News

POST TAGGED AS

စည်းကမ်းမဲ့

အမှားနဲ့ အမှန်ကြား ယာဉ်တိုက်မှုတွေ ပိုများလာမလား
ကျွန်တော် မကြာခဏ ရေးခဲ့ဖူးသလိုပင် ရန်ကုန်-မန္တလေး အပါအဝင် မြန်မာနိုင်ငံရှိ (တစ်မြို့နှင့်တစ်မြို့ ဆက်သွယ်သော) မြို့ပြင်လမ်းများတွင် မော်တော်ကားဖြင့် မောင်းနှင်သွားလာခဲ့ဖူးပါသည်။ ထိုကဲ့သို့ မောင်းနှင်သွားလာရာ၌ မိမိရှေ့မှ သွားနေသောကားက ၎င်း၏ညာဘက် အချက်ပြမီးကိုပြလျှင် “ရှေ့မှာကားလာနေသည် မကျော်ပါနှင့်ဦး”ဟူသည့် အဓိပ္ပာယ်ရသဖြင့် မိမိကလည်း သူ့ကားကို မကျော်သေးဘဲ ညာဘက်သို့ အနည်းငယ် ကပ်၍ မောင်းပါသည်။ ရှေ့တွင် ကားဆက်မပြတ်ပါက သူ၏အချက်ပြမီးကို ဆက်လက်ပြနေသဖြင့် ကိုယ်ကလည်း သူ့နောက်မှမှေး၍ လိုက်ရပါသည်။ ရှေ့တွင်ယာဉ်များ ရှင်းသွားပါက သူ၏အချက်ပြမီးကို ညာဘက်သို့ပြနေရာမှ ဘယ်ဘက်သို့ပြောင်း၍ ပြပါသည်။ အဓိပ္ပာယ်မှာ “ရှေ့တွင် ကားရှင်းသွားပါပြီ၊ ကျော်လိုက ကျော်နိုင်ပါပြီ”ဟူသော အချက်ပြမှု ဖြစ်ပါသည်။ ထိုအခါ မိမိလည်း ရှေ့တွင်တံတားကျဉ်း ရှိ-မရှိ၊ ချိုင့်ခွက်များ ရှိ-မရှိကိုကြည့်၍ ကားကို ကျော်တက်ပါသည်။ ကျော်တက်ရုံမျှမကသေးပါ ထိုကဲ့သို့ လမ်းကြောင်းပေးသည့်အတွက် သူ့ကို ကျေးဇူးတင်ကြောင်း ပြောသည့်အနေနှင့် ဟွန်းသံအတို နှစ်ချက်မျှ တီးပေးလိုက်ပါသည်။ သူကလည်း ကိုယ်၏ ကျေးဇူးတင်စကားကို တုံ့ပြန်သည့်အနေနှင့် ဟွန်းတို တစ်ချက်၊ နှစ်ချက်မျှ ပြန်၍တီးပါသည်။ ဤသည်ကား မြန်မာနိုင်ငံ၏ အဝေးပြေး လမ်းမ/ မြို့ပြင်လမ်းများတွင် မောင်းနှင်သော မော်တော်ယာဉ်များ အသုံးပြုနေသည့် အချက်ပြစနစ် ဖြစ်ပြီး တစ်နည်းအားဖြင့် အဝေးပြေးကားများ၏ ဘာသာစကား (ဝါ) ယဉ်ကျေးမှု တစ်ရပ်ပင် ဖြစ်၍နေပါသည်။ အဆိုပါစနစ်ကို မည်သူက မည်သည့်အချိန်တွင် စတင် အသုံးပြုခဲ့ပြီး အချိန်ကာလအားဖြင့် မည်မျှ ကြာညောင်းခဲ့ပြီကိုမူကား မည်သူမျှ မသိကြပါ။

အမှန်တကယ်တော့ ဤစနစ်မှာ စနစ်မှန် မဟုတ်ဘဲ မှားယွင်းသော စနစ်ဖြစ်ကြောင်း ကားလောကမှ ပုဂ္ဂိုလ်များ အားလုံး သိကြပါသည်။ သို့သော် အစဉ်အလာ လိုက်နာကျင့်သုံးခဲ့ကြသဖြင့် မည်သို့မျှဖျောက်၍ မရတော့ဘဲ အမှားကြာတော့ အမှန်ဖြစ်ဆိုသည့် စကားအတိုင်း စနစ်အမှန် တစ်ခုသဖွယ် ကျင့်သုံးနေကြခြင်း ဖြစ်ပါသည်။ ဤစနစ်မှာ အန္တရာယ် အမှန်တကယ် ရှိသောစနစ် ဖြစ်ပါသည်။ အထူးသဖြင့် မြို့တွင်းနှင့် မြို့ပြင်လမ်း မကွဲပြားသော အခြေအနေမျိုးတွင် ဖြစ်လေ့ဖြစ်ထ ရှိတတ်ပါသည်။ ရှေ့မှ ကားက ဘယ်ဘက်သို့ အချက်ပြသည်ကို ကျော်တက်ခိုင်းသည်အထင်နှင့် ကျော်တက်ရာမှ ရှေ့ကားက ကွေ့လိုက်သောအခါ ယာဉ်တိုက်မှု ဖြစ်ပွားရခြင်းဖြစ်ပါသည်။

ထင်ရှားသော သာဓကတစ်ခုမှာ လွန်ခဲ့သော အနှစ်နှစ်ဆယ်ခန့်က နိုင်ငံတော်အဆင့် အကြီးအကဲတစ်ဦး၏ သမီးနှင့်သမက်တို့ မောင်းနှင်လာသောကားမှာ မှော်ဘီမြို့အနီးရှိ စက်ရုံတစ်ရုံဘက်သို့ ချိုးကွေ့ရန် (လက်ဝဲ ဘက်) ဘယ်ဘက်မီးကို အချက်ပြ၍ ချိုးကွေ့လိုက်ပါသည်။ ထိုအခါ နောက်မှလိုက်လာသော ယာဉ်ကြီးတစ်စီးက ၎င်းကို ကျော်တက်ရန် အချက်ပြသည်ဟုထင်ပြီး ဘယ်ဘက်မှ ကျော်တက်လိုက်သည့်အခါ ရှေ့မှကားကိုဝင် တိုက်မိပြီး အကြီးအကဲဖြစ်သူ၏ သမီးနှင့်သမက်မှာ ပွဲချင်းပြီး သေဆုံးခဲ့ရပါသည်။

ထိုကဲ့သို့ မှားယွင်းအချက်ပြ၍ ယာဉ်တိုက်မှုများ ဖြစ်ပွားရသည့်အတွက် ထိုစနစ်မှားအစား စနစ်မှန်ကို ပြန်လည် ပြောင်းလဲအသုံးပြုရန် ပြောဆိုရေးသားမှုများ ရှိခဲ့သော်လည်း မဖြစ်မြောက်ခဲ့ပါ။ မကြာသေးမီကလည်း ထိုသို့မှားယွင်းသောစနစ်ကို အသုံးမပြုကြရန်နှင့် ပညာပေးကာလ ကျော်လွန်ပြီးနောက် အသုံးပြုပါက အရေးယူ ဆောင်ရွက်မည်ဖြစ်ကြောင်း မြန်မာ့ရုပ်သံနှင့် သတင်းစာများမှ ပညာပေး ရေးသားမှုများကို ဖတ်ရှုရပါသည်။ သို့သော် မည်သူကမျှ အရေးတယူ လိုက်နာဆောင်ရွက်ခြင်း မပြုကြပါ။ သွားမြဲ လာမြဲ အချက်ပြမြဲသာ ဖြစ်ကြပါသည်။

ကျွန်တော်သည် ယခုအခါ ကရင်ပြည်နယ်သို့ ရောက်ရှိနေပါသည်။ ဘားအံမှနေ၍ မော်လမြိုင်မြို့ အပါအဝင် အနီးအနား မြို့နယ်များသို့ မော်တော်ယာဉ်မောင်းနှင်၍ သွားလာပါသည်။ ထိုအခါ လမ်းတွင်တွေ့ရသော ကားများက အချက်ပြမီးများ ပြကြပါသည်။ သို့သော် သူတို့၏ အချက်ပြမီးများကို ကျွန်တော် မယုံရဲပါ။ ကျွန်တော့်အနေနှင့် သူတို့အချက်ပြသည်ကို နားလည်မှုလွဲပြီး ကျော်တက်မိပါက မတွေးရဲ ... မရေးရဲတော့ပါ။ ကျွန်တော်ကလည်း ရှေ့မှာကားလာနေလျှင် မည်သည့်နည်းနှင့်မျှ အချက်မပြတော့ပါ။ တော်ကြာ သူတို့က နားလည်မှုလွဲသွားလျှင် ဒုက္ခရောက်ကြမည် မဟုတ်ပါလား။

အစိုးရက ကြေညာထားသော ကြေညာချက်မှာ တကယ်တော့ မရှင်းပါ။ ပညာပေးကာလတွင် မည်သည့်စနစ်ဖြင့် အချက်ပြရပါမည်နည်း။ အချို့ကိစ္စများတွင် ပညာပေးကာလ၌ မလိုက်နာပါက နှုတ်ဖြင့် ပြောဆိုသတိပေးပါသည်။ ထိုအခါ ပညာပေးခံရသူက လိုက်နာဆောင်ရွက်ရပါသည်။ မလိုက်နာသူများလည်း ရှိပါသည်။ ယခုကိစ္စမှာ ထိုသို့လုပ်၍မရပါ။ ကြားကာလတွင် လိုက်နာသူကတစ်မျိုး၊ မလိုက်နာသူကတစ်မျိုး လုပ်၍မရပါ။ ထိုအခါ ကားတွေတိုက်ပြီး သေကုန်ကြပါလိမ့်မည်။ ယခုကိစ္စသည် တစ်နိုင်ငံလုံး၌ တစ်ရက်တည်း တစ်ချိန်တည်း တစ်ပြိုင်တည်း ပြောင်းလဲ ကျင့်သုံးရမည့်ကိစ္စဖြစ်သည်။ ယခုအခါ စက်တင်ဘာလ ၁ ရက်နေ့ နောက်ပိုင်း စတင် အရေးယူမည်ဟူ၍ ထပ်မံ ကြေညာထားပါသည်။ အမှန်တကယ်တော့ စက်တင်ဘာလ ၁ ရက်နေ့တွင် မော်တော်ယာဉ် အားလုံး တစ်ပြိုင်နက် ပြောင်းလဲကျင့်သုံးရမည်ဖြစ်၍ ထိုနေ့တွင် မှားယွင်းအချက်ပြသောကား ဟူသည် ရှိတော့မည် မဟုတ်ပါ။ ရှိစရာအကြောင်းလည်းမရှိပါ။ ထိုသို့မရှိ ရအောင်လည်း အစစအရာရာ ကြိုတင်စီမံပြီး ဖြစ်နေရပါမည်။

ကျွန်တော် မှတ်မိသရွေ့ ပြောပြပါမည်။ လွန်ခဲ့သော အနှစ် ၅၀ နီးပါး၊ ၁၉၆၉/၇၀ ပြည့်နှစ်လောက်က ဖြစ်ပါသည်။ မြန်မာနိုင်ငံတွင် မော်တော်ယာဉ် မောင်းနှင်သောစနစ်ကို လက်ဝဲကပ်မောင်းစနစ်မှ လက်ယာကပ်မောင်း စနစ်သို့ စတင်၍ ပြောင်းလဲပါသည်။ ကျွန်တော် မှတ်မိသည်မှာ ဒီဇင်ဘာလ ၁ ရက်နေ့ ဖြစ်ပါသည်။ ထိုနေ့မတိုင်မီ မြန်မာ့အသံ ရေဒီယိုနှင့် သတင်းစာများက စည်းရုံးလှုံ့ဆော်သော အစီအစဉ်များ၊ ပညာပေး အစီအစဉ်များကို ထုတ်လွှင့်ပါသည်။ တစ်ဖက်ကလည်း သက်ဆိုင်ရာ တာဝန်ရှိအဖွဲ့အစည်းများ အုပ်ချုပ်ရေးအဖွဲ့များက ကြိုတင်ပြင်ဆင်မှုများ ပြုလုပ်သည်။

လက်ယာကပ်မောင်းစနစ်ကို မည်သည့်နေ့ရက်တွင် တစ်ပြိုင်နက် စတင်မည်ဖြစ်ကြောင်း ကြိုတင် အသိပေး ဆိုင်းဘုတ်ကြီးများကို မြို့ဝင် မြို့ထွက်များတွင် စိုက်ထူပါသည်။ လမ်းညွှန်ဆိုင်းဘုတ်များကို တစ်ပြိုင်နက် စိုက်ထူနိုင်ရန် ကြိုတင် ရေးဆွဲပြင်ဆင်ထားပါသည်။ မြို့များတွင် လက်ယာကပ်မောင်းစနစ် အကောင်အထည်ဖော်ရေး ကော်မတီများကို ဖွဲ့စည်းပါသည်။ ယင်းကော်မတီများက နေရာကွက်လပ်ရှိသော နေရာများတွင် ယာယီ ယာဉ်မောင်းကွင်းများ ပြုလုပ်ပါသည်။ အဆိုပါ ယာဉ်မောင်းကွင်းများတွင် လက်ယာကပ်မောင်းစနစ်နှင့် သက်ဆိုင်သည့် လမ်းညွှန်ဆိုင်းဘုတ်များ၊ ယာဉ်ကြောများ ရေးဆွဲထားပြီး မီးပွိုင့်များကိုလည်း တပ်ဆင်ထားပါသည်။ အဆိုပါ ယာဉ်မောင်း လေ့ကျင့်ရေးကွင်းတွင် တစ်လခန့် ကြိုတင်၍ မြို့နယ်အတွင်းရှိ ယာဉ်ပိုင်ရှင်၊ ယာဉ်မောင်းများ အားလုံး လာရောက် လေ့ကျင့်ကြရပါသည်။ လေ့ကျင့်မှုပြီးဆုံးပါက ပြီးဆုံးကြောင်း အသိအမှတ်ပြု လက်မှတ်ကို ထုတ်ပေးပါသည်။ ယင်းလက်မှတ်မပါရှိပါက မြို့နယ်အတွင်း လုံးဝ ယာဉ်မောင်းနှင်ခွင့်မရှိပါ။ နိုဝင်ဘာလ ၃၀ ရက်နေ့ ညတွင် ယာဉ်ကြော အမှတ်အသားများ ပြောင်းလဲရေးဆွဲခြင်း၊ လမ်းညွှန် အမှတ်အသားများ စိုက်ထူခြင်း၊ မီးပွိုင့်များ ပြောင်းလဲ တပ်ဆင်ခြင်းကို အပြီး ဆောင်ရွက်ပါသည်။ (ထိုအချိန်က မြန်မာနိုင်ငံတွင် ကားအစီးရေ နည်းသေးသဖြင့် အခက်အခဲ ကြီးကြီးမားမား မရှိခဲ့ပါ)။

နောက်တစ်နေ့ ဒီဇင်ဘာလ ၁ ရက် (တနင်္ဂနွေ)နေ့ နံနက်တွင် လမ်းဆုံလမ်းခွများ၊ မြို့ဝင်မြို့ထွက်များ၌ ရဲတပ်ဖွဲ့ဝင်များ၊ ယာဉ်ထိန်းရဲများ၊ ဌာနဆိုင်ရာ ဝန်ထမ်းများ၊ လူမှုရေး အဖွဲ့အစည်းများ၊ ကျောင်းသား ကျောင်းသူများသည် လမ်းကြောင်း မှားလာသော ယာဉ်များအား လမ်းကြောင်းမှန်သို့ ပြောင်းလဲမောင်းနှင်စေခြင်းများ ပြုလုပ်၍ နေရာအနှံ့တွင် အသံချဲ့စက်များဖြင့်လည်း အော်ဟစ် သတိပေးကြပါသည်။ ဆိုလိုသည်မှာ မြန်မာနိုင်ငံ၏ အရေးကြီးသော အထင်ကရ အပြောင်းအလဲကြီးတစ်ခုကို ပေါ့ပေါ့တန်တန် သဘောထား၍ မပြုလုပ်ဘဲ လူထုလှုပ်ရှားမှုကြီး (Campaign) တစ်ခုအဖြစ် ဆောင်ရွက်ခဲ့ကြခြင်း ဖြစ်ပါသည်။

ယခုဆောင်ရွက်မည့် မော်တော်ယာဉ် အချက်ပြ မှားယွင်းမှုကို ပြင်ဆင် ပြောင်းလဲမည့် အစီအစဉ်သည်လည်း သာမန် ပေါ့ပေါ့တန်တန် သဘောထား၍ ဆောင်ရွက်သင့်သည့်လုပ်ငန်း မဟုတ်ပါ။ လူတွေ၏အသက်နှင့် သက်ဆိုင်သည့်ကိစ္စဖြစ်ပါသည်။ အချက်ပြတစ်ချက် မှားယွင်းလျှင် သို့မဟုတ် အမှန်အတိုင်း အချက်ပြသော်လည်း မှားယွင်းနားလည်မိလျှင် ကားပေါ်ပါသူ အားလုံး အသက်ဆုံးရှုံးရမည့်ကိစ္စ ဖြစ်ပါသည်။ မှားသွားလို့ပါ၊ မေ့သွားလို့ပါ၊ သတိလက်လွတ်သွားလို့ပါ ဟူ၍ ဘွာခတ်၍ရသော ကိစ္စမဟုတ်ပါ။ ထို့အပြင် ယခုကိစ္စသည် စက်တင်ဘာလ ၁ ရက်နေ့ နောက်ပိုင်း မလိုက်နာသူများ/ မှားယွင်း အချက်ပြသူများကို အရေးယူရမည့်ကိစ္စ မဟုတ်ပါ။ စက်တင်ဘာလ ၁ ရက်နေ့ နောက်ပိုင်းတွင် မှားယွင်း အချက်ပြမှု လုံးဝ မရှိသင့်သည့်/ လုံးဝ မရှိရတော့မည့် ကိစ္စသာ ဖြစ်ပါသည်။ ထို့ကြောင့် စက်တင်ဘာလ ၁ ရက်နေ့တွင် မြန်မာတစ်နိုင်ငံလုံး တစ်ချိန်တည်း၊ တစ်ပြိုင်တည်း ပြောင်းလဲနိုင်ရေးအတွက် တာဝန်ရှိအဖွဲ့စည်းများအနေနှင့် ယခုမှပင် စတင်၍ အစီအမံများ ချမှတ်ဆောင်ရွက်သင့်ပြီ ဖြစ်ပါသည်။

ခရီးဝေးသွား ယာဉ်မောင်း အတော်များများသည် နေ့ရော ညပါ လမ်းပေါ်တွင် အချိန် ကုန်နေကြပြီး သူတို့မှာ စက္ကန့်ပိုင်းမျှသာ ကြော်ငြာသော ရုပ်သံ အစီအစဉ်ကို ကြည့်ရန်သော်လည်းကောင်း၊ သတင်းစာဖတ်ရန်သော်လည်းကောင်း အချိန် မပေးနိုင်ကြပါ။ ထို့ကြောင့် ပိုက်ဆံ အကုန်ခံ၍ မြို့နယ်အလိုက် မြို့ဝင် မြို့ထွက်ဂိတ်များတွင် Bill Board ကြီးများ စိုက်ထူသင့်ပါကြောင်း အကြံပြု တင်ပြအပ်ပါသည်။

ထို့ကြောင့် မကြာတော့မည့်ကာလ စက်တင်ဘာလ ၁ ရက်နေ့တွင် စတင် အကောင်အထည်ဖော် ဆောင်ရွက်တော့မည့် “အဝေးပြေး လမ်းမကြီးများတွင် မှားယွင်း အချက်ပြနေသည့် မော်တော်ယာဉ် အချက်ပြမီး စနစ် အမှန် ပြန်လည် ပြောင်းလဲခြင်းလုပ်ငန်း”ကိုဆောင်ရွက်ရာတွင် ထိုနေ့၌ အဝေးပြေးလမ်းမကြီးများတစ်လျှောက်ရှိ မြို့များမှ ပြည်သူများ၏ အင်အားကိုရယူ၍ အသံချဲ့စက်များဖြင့် ဟစ်အော်ခြင်းများ ပြုလုပ်၍ ဟိုးလေးတကျော်၊ တိုင်းကျော်ပြည်ကျော် ဆောင်ရွက်သင့်ပါကြောင်း အကြံပြု တင်ပြလိုက်ရပါသည် ... ။

သိန်းထက်အောင်



FOLLOW US