News

POST TAGGED AS

စည်ပင်သာယာရေး

NLD အစိုးရ ဖြတ်ကျော်ရဦးမယ့် ၂၀၁၈ ခရီးကြမ်း
မကြာမီရက်ပိုင်းဆိုလျှင်၂၀၁၇ ကုန်ဆုံးတော့မည် ဖြစ်သည်။ အစဉ်မပြတ် ပြောင်းလဲရွှေ့လျားနေသည့် အချိန်စက်ဝန်း၏ သဘာဝတရားအရ အချိန်တန်လျှင် နောင်နှစ်သစ်တစ်ခုကိုလည်း ကူးပြောင်းရမည်သာ ဖြစ်သည်။ ထိုနည်းတူစွာပင် သက်တမ်း သတ်သတ်မှတ်မှတ်ရှိသည့် သတ္တဝါများ၊ အစိုးရအဖွဲ့များ၊ အသင်းအဖွဲ့များအနေနှင့်လည်း ထိုအချိန်အပေါ်တည်မှီပြီး ဖြစ်တည်နေကြလျက်ရှိရာ ထိုအချိန်တည်းဟူသော အရာသည် အလွန်ပင်အရေးကြီးလျက် ရှိနေလေသည်။ ထိုသို့ အရေးကြီးသည့်အလျောက် အချိန်ကို အကျိုးရှိရှိစီမံခန့်ခွဲပြီး စနစ်တကျ ကာလအပိုင်းအခြားအလိုက် ဆောင်ရွက်ကြရမည့်အထဲတွင် သက်တမ်းငါးနှစ်ဟု သတ်မှတ်ပေးထားသည့် အစိုးရတစ်ရပ်သည်လည်း ရှေ့ဆုံးက ပါဝင်လေသည်။သို့အတွက် ကျွန်ုပ်တို့အနေနှင့်လည်း ယခုလက်ရှိ အစိုးရ၏ သက်တမ်းကာလအတွင်း သူကျော်ဖြတ်ခဲ့ရသည့် အရာများနှင့် ယခုလာမည့် ၂၀၁၈ နှစ်သစ်အတွက် သူဆက်လက်လျှောက်လှမ်းရမည့် ခရီးများကို လေ့လာကြည့်ရတော့မည် ဖြစ်သည်။

လက်ရှိအစိုးရအနေနှင့် သူစတင်တာဝန်ယူခဲ့သည့် ၂၀၁၆ ခုနှစ် မတ်လ ၃၁ ရက်နေ့မှ စတင်ပြီး ယခုလာမည့် ဒီဇင်ဘာ ၃၁ ရက်နေ့အထိကို ရေတွက်ကြည့်ပါက ယခုဆိုလျှင် သူ၏သက်တမ်းသည် တစ်နှစ်နှင့်ကိုးလတာ ကာလကို ချင်းနင်းဝင်ရောက်ခဲ့ပြီ ဖြစ်လေသည်။ သို့သော် အစိုးရအနေဖြင့် သူကျော်ဖြတ်ခဲ့ရသည့် ၂ နှစ်နီးပါး ကာလအတွင်းတွင် စိန်ခေါ်မှု အများအပြားကို ကျော်ဖြတ်ခဲ့ရသည်။ သူ၏သက်တမ်းသည်လည်း နောင် ၂ နှစ်ကျော်သာ အလုပ်လုပ်ချိန်ရှိတော့သည်။ သူ၏သက်တမ်း လေးနှစ်ကျော်လာလျှင် သူတို့၏ နောင်ကာလသက်တမ်းအတွက် စည်းရုံးရေးလုပ်ငန်းများကို ဇောင်းပေးလုပ်ဆောင်ရင်းဖြင့်သာ ကျန်သည့်အချိန်ကို ဖြတ်သန်းသွားရနိုင်သည်။

သူ့အကြောင်းကိုပြောလျှင် သူစတင်တာဝန်မယူမီ၂၀၁၅ ခုနှစ် နှောင်းပိုင်းကာလက အချီးမျှ ပြန်လည်စပြောမှ ရမည်။ သူ့အနေနှင့် အစိုးရ မဖြစ်မီခင်ကတည်းကပင် နှစ်ပေါင်းအတော်ကြာ ပါတီတစ်ခုအဖြစ် ရပ်တည်စဉ်ကတည်းကပင် စိန်ခေါ်မှုအများအပြားဖြင့် ကြုံတွေ့ခဲ့ရပြီး ယှဉ်ပြိုင်မှုများ အားကောင်းခဲ့သည်။ သို့သော်လည်း ကမ္ဘာ့ပြောင်းလဲမှု ဖြစ်စဉ်များနှင့်အတူ ပြောင်းလဲမှုကို လိုချင်နေကြသည့် ပြည်သူများက သူ့ကို မျက်စိကျခဲ့ကြသည်။ သူ၏အိပ်မက်ဖြစ်သည့် အစိုးရတစ်ရပ်အဖြစ် ဖွဲ့စည်းပြီး နိုင်ငံတော်တာဝန်ယူနိုင်ရေးနှင့် ငြိမ်းချမ်းရေးရရှိရေးအတွက် ကြိုးပမ်းရေး စသည့် အိပ်မက်များအတွက် ပြည်သူများက သူ့အပေါ် ၂၀၁၅ ခုနှစ် နှောင်းပိုင်းကာလတွင် မဲပေးခဲ့ကြသည်။

ကျွန်ုပ်တို့နိုင်ငံအနေနှင့် NLD ရွေးကောက်ပွဲ အနိုင်ရခဲ့ခြင်းနှင့်အတူ ပြောင်းလဲမှုများစွာဖြင့်လည်း ကြုံတွေ့ခဲ့ရသည်။ တစ်ချိန်က တိုက်ပုံအဖြူများ လွှမ်းမိုးသည့် လွှတ်တော်များအတွင်း ပင်နီရောင်များ လွှမ်းမိုးခဲ့သည်။ အမျိုးသမီး အမတ်ဦးရေ ရာခိုင်နှုန်း ယခင်ထက်ပိုမို မြင့်မားခဲ့သည်။ နှစ်ပေါင်းအတော်ကြာ စစ်အုပ်ချုပ်ရေးစနစ် ကျရောက်ခဲ့ရပြီး ပါတီစုံဒီမိုကရေစီစနစ် ပြန်လည်ကျင့်သုံးစ ကာလအထိ အမြစ်တွယ်နေသည့် စစ်ခေါင်းဆောင်များ အုပ်ချုပ်ရေးဘက်တွင် ဝင်ရောက်နေရာယူထားရာမှ အရပ်သားစစ်စစ် အစိုးရတစ်ရပ်ကို၂၀၁၆ မတ်လ ကုန်ပိုင်းတွင် အစားထိုး လဲလှယ်နိုင်ခဲ့ကြသည်။ ထိုကိစ္စသည်ပင်၂၀၁၆ အတွက် ကြီးမားသောပြောင်းလဲမှုဟု ဆိုနိုင်သည်။ ပြည်သူအများ နှစ်ထောင်းအားရဖြစ်ခဲ့ကြသည်။ အစိုးရသစ်ကို အားကိုးတကြီး မျှော်ကိုးခဲ့ကြသည်။

အစိုးရသစ်အနေနှင့်လည်း ၎င်းတာဝန်ယူပြီး တက်တက်လာခြင်း ကနဦး လှုပ်ရှားပုံဖော်မှုအနေနှင့် ဆောင်ရွက်လာသည်မှာ နိုင်ငံ့စီးပွားရေး တိုးတက်ရေးအတွက် ဌာနပေါင်းစုံအလိုက် ရက် ၁၀၀ စီမံချက်များပင် ဖြစ်သည်။ ထိုရက် ၁၀၀ စီမံချက်များ ဖော်ဆောင်မှုတွင် တရားဥပဒေစိုးမိုးရေး၊ ငြိမ်းချမ်းရေးနှင့် သံတမန်ရေးကိစ္စများ အထိုက်အလျောက်အောင်မြင်မှု ရှိခဲ့သော်လည်း အခြားသော နိုင်ငံ့စီးပွားရေး တိုးတက်မှုအလားအလာမှာမူ နှေးကွေးခဲ့ရသည်။ ထိုသို့ဖြစ်ကြရခြင်းမှာ ၎င်းတို့၏ ကနဦးအစ လှုပ်ရှားဆောင်ရွက်မှုများမှာ လူသာပြောင်းပြီး စနစ်မပြောင်းသဖြင့် မအောင်မြင်ခဲ့ကြဟု အချို့က ဆိုခဲ့ကြသည်။ အချို့ကမူ စနစ်က အသစ်ဖြစ်သော်လည်း အကောင်အထည်ဖော်သည့် အောက်ခြေမှလူများက အဟောင်းဖြစ်၍ မပြောင်းလဲဟု ဆိုကြပြန်သည်။ နိုင်ငံ၏ စီးပွားရေးအလားအလာမှာ၂၀၁၆ ခုနှစ်က တန့်နေခဲ့ပြီး၂၀၁၇ ခုနှစ်တွင်မူ တိုးတက်မှုမရှိဘဲ ကျရိပ်သန်းကာ အဆိုးဆုံးဖြစ်ခဲ့သည်။ စီးပွားရေးတိုးတက်မှု ညွန်းကိန်း လုံးလုံးတက်လာမှု မရှိဘဲ ထိုကိစ္စအပေါ် အစိုးရတာဝန်ရှိသူများကပင် ဝန်ခံခဲ့ကြရသည်အထိ ဖြစ်ခဲ့သည်။ သို့အတွက် ထိုစီးပွားရေး တိုးတက်အောင်ပြုလုပ်ရန်ကိစ္စမှာ အစိုးရအနေနှင့် လာမည့် ၂၀၁၈ ခုနှစ်အတွက် အလွန်အရေးကြီးနေပြီး ဆက်လက်လျှောက်လှမ်းရမည့် ခရီးကမ်းများအထဲမှာ စိန်ခေါ်မှုကြီးတစ်ခုလည်း ဖြစ်နေပြန်သည်။

ငြိမ်းချမ်းရေး ဖော်ဆောင်မှုဘက်တွင်မူ ၂၀၁၆ ခုနှစ်အတွင်း၂၁ ရာစု ပင်လုံဟုခေါ်သည့် ပြည်ထောင်စုငြိမ်းချမ်းရေး ညီလာခံတစ်ရပ်ကို ကျင်းပနိုင်ခဲ့ကြပြီး အပစ်အခတ်ရပ်စဲရေး လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များ အပါအဝင် လက်မှတ်မထိုးထားသေးသည့် အဖွဲ့များပါ စုံစုံညီညီတက်ရောက်ခဲ့ကြပြီး ၎င်းတို့၏ ငြိမ်းချမ်းရေးအတွက် သဘောထားအမြင်များကို ပြောကြားခွင့်၊ မြင်တွေ့ ခွင့်ရခဲ့ကြသည်။ သို့သော် ၂၀၁၇ ခုနှစ်အတွင်းတွင်မူ ငြိမ်းချမ်းရေးဖော်ဆောင်မှု လုပ်ငန်းများမှာ အရှိန်အဟုန် သိပ်မကောင်းခဲ့ချေ။ သို့အတွက် ထိုငြိမ်းချမ်းရေး ဖော်ဆောင်မှု လုပ်ငန်းအနေနှင့် လာမည့် ၂၀၁၈ ခုနှစ်အတွက်မူ အစိုးရအနေနှင့် စိန်ခေါ်မှု တစ်ခုဖြစ်နေသေးသည်။ ထိုသို့ဖြစ်ခဲ့ရခြင်းမှာလည်း အစိုးရအနေနှင့် သူ့အပေါ် နိုင်ငံရေးအရ ထိုးနှက်ချက် ကြီးကြီးမားမားတစ်ရပ်က ရှိနေခဲ့၍ဖြစ်သည်။ ၎င်းမှာ အနောက်ဘက်မှ မောင်တောအရေးဖြစ်ပြီး ထိုကိစ္စ ဖြစ်ပေါ်လာခဲ့ရခြင်းအတွက် ငြိမ်းချမ်းရေးလုပ်ငန်းစဉ်နှင့် စီးပွားရေးဘက် ခြေဦးလှည့်ရန် ဟန်ချက်ပျက်ခဲ့ရသလို ဖြစ်ခဲ့သည်။

ထို ရခိုင်မြောက်ပိုင်းအရေးမှာ သူ၏သက်တမ်း ၂ နှစ်တာနီးနီး ကာလအတွင်း အကြီးမားဆုံးစိန်ခေါ်မှု တစ်ရပ်အဖြစ် ကြုံခဲ့ရပြီး နိုင်ငံတကာဖိအားကိုပင် သမိုင်းတစ်လျှောက် မကြုံဖူးသည်အထိ ခံခဲ့ရသည်။ ထိုအရေးမှာ ယခုလာမည့် ၂၀၁၈ ခုနှစ်အတွက်လည်း ၎င်းတို့ ဆက်လက်လျှောက်လှမ်းရမည့် ခရီးလမ်းများတွင် ခရီးကြမ်းကြီးတစ်ခု ဖြစ်နေသေးသည်။  လာမည့်ဇန်နဝါရီ လလယ်ပိုင်းအတွင်း စတင်လက်ခံကြမည့် နေရပ်စွန့်ခွာသူများ အရေအတွက်လည်း ယနေ့အချိန်အထိ နိုင်ငံတကာဖိအားက ဆက်လက်ရှိနေသေးရာ အစိုးရအတွက် ၂၀၁၈ တစ်နှစ်လုံးလိုလို ဇွဲနပဲကြီးစွာ သတိထားပြီး ဖြတ်သန်းရဦးမည်မှာ မလွဲပေ။

၂၀၁၇ ခုနှစ်အတွင်း အခြားကိစ္စများအပေါ် တစ်နိုင်ငံလုံး အတိုင်းအတာအနေနှင့် ခြုံငုံသုံးသပ်ရလျှင် မူးယစ်ဆေးဝါးများ ပေါများခဲ့ပြီး စံချိန်တင် ဖမ်းဆီးရမိမှုများရှိခဲ့သည်။ ထိုအရေးကိုမူ အမျိုးသားရေး ရန်သူအဖြစ်ရှုမြင်ပြီး၂၀၁၈ တွင် ဆက်လက်ဖြေရှင်းရန် ရှိနေဦးမည်ဖြစ်သည်။ ၂၀၁၇ တွင် ဥပဒေမဲ့ လက်လွတ်စပယ်အနုကြမ်းစီး လုယက်သောင်းကျန်းမှုများ၊ လေးလောင်းပြိုင်၊ သုံးလောင်းပြိုင် လူသတ်မှုများ၊ သက်ငယ်မုဒိမ်းမှုများ ဖြစ်ပွားမှုရာခိုင်နှုန်း မြင့်တက်ခဲ့သည်။ ထို ဖြစ်ပွားမှုအနေအထားများသည် ယခုထက်တိုင် ရပ်စဲတုံ့နှေးခြင်း မရှိသေးသဖြင့်လည်း၂၀၁၈ စိန်ခေါ်မှုများစာရင်း ဆက်လက်ဝင်နေဦးမည်သာ ဖြစ်သည်။ ယခုလောလောဆယ် ဖြစ်ပေါ်နေသေးသည့် ဒေါ်လာဈေးများ မြင့်မားနေမှုနှင့် ငွေကြေးလဲလှယ်မှုနှုန်းများ မြင့်တက်လာပြီး ကုန်ဈေးနှုန်းများ ကြီးမြှင့်ခဲ့သည့်ဒဏ်မှ လွှတ်မြောက်နိုင်ရန်အတွက်လည်း အစိုးရတာဝန်ရှိသူများ ဆက်လက်ညှိနှိုင်း အဖြေရှာကြရဦးမည်သာ ဖြစ်သည်။

၂၀၁၇ ခုနှစ်နှောင်းပိုင်းတွင် နိုင်ငံ၏ အနောက်ဘက်အခြမ်း၊ ချင်းပြည်နယ်အတွင်းနှင့် မြောက်ဘက်ခြမ်းတွင် တိုင်းရင်းသား လက်နက်ကိုင်များနှင့်စစ်ပွဲများ ပိုမိုပြင်းထန်လာခဲ့ပြီး တိုက်ပွဲများ ဖြစ်ပွားမှုနှုန်း မြင့်မားလာခဲ့သည်။ သည့်အတွက် ဒေသခံပြည်သူအများအပြား စစ်ဘေးစစ်ဒဏ်သင့်ခဲ့ရပြီး ဒုက္ခသည်များအဖြစ် စစ်ဘေးလွတ်ရာသို့ ပုန်းရှောင်ကြရသည်။ ကလေးသူငယ် ကျောင်းနေအရွယ်များ ပညာရေး နှောင့်နှေးခဲ့ကြရသည်။ လမ်းပန်းဆက်သွယ်ရေး ပြတ်တောက်ပြီး အဆိုပါ နယ်မြေများအတွင်း ကုန်ပစ္စည်းစီးဆင်းမှု လျော့ကျကာ ကုန်ဈေးနှုန်းများ အဆမတန် မြင့်တက်ခဲ့ရသည်။ ပြည်တွင်း၌ ဆန်တစ်အိတ် နှစ်သောင်းခန့် ဈေးပေါက်နေချိန်တွင် ထိုနေရာဒေသများတွင် ဆန်တစ်အိတ်ကို နှစ်ဆ (ငါးသောင်း)ပေးဝယ်စားနေကြရသည်။

၂၀၁၇ ခုနှစ်တွင် ပြည်ပဆန်ဝယ်လိုအား မြင့်တက်မှုကြောင့် တောင်သူလယ်သမားများအတွက် စပါးဈေးနှုန်းမှာ အသင့်အတင့် ပြန်လည်တက်လာခဲ့မှုနှင့် ကြုံတွေ့ခဲ့ရသော်လည်း ပဲစိုက်တောင်သူ အများစုမှာမူ အိန္ဒိယက အဝယ်ရပ်ဆိုင်းခဲ့မှုကြောင့် အတော်အခက်တွေ့ခဲ့ရသည်။ အစိုးရ၏ သက်တမ်း ၂ နှစ်နီးပါးကာလအတွင်း တရားဥပဒေ စိုးမိုးရေးကိစ္စကို လေ့လာကြည့်လျှင် ထူးထူးခြားခြား တိုးတက်လာခြင်းမရှိဟု ဆို၍ရသည်။ တရားဥပဒေမဲ့ ထူးခြားသတင်းများမှာ ပေါများလှသည်။ ထူးဆန်းသည့် မှုခင်းသတင်းများ နေ့စဉ်လိုလို ကြားခဲ့ကြသည်။ သက်ငယ်မုဒိမ်းမှုများ ကြောက်ခမန်းလိလိ အဖြစ်များခဲ့သည်။ သက်ငယ်မုဒိမ်းမှု ဖြစ်ပွားမှုမှာ ၂၀၁၆ ခုနှစ်ထက်၂၀၁၇ ခုနှစ်တွင် ပိုမိုမြင့်တက်ခဲ့သည်။ လူသတ်မှုများ ပိုမိုဖြစ်ထွန်းခဲ့သည်။ကုန်ဈေးနှုန်းဘက်တွင်မူ စက်သုံးဆီဈေးနှုန်းများ တရိပ်ရိပ်ထိုးတက်ခဲ့သည်။ လူငယ်ဘွဲ့ရများ အလုပ်အကိုင် ရှားပါးနေဆဲဖြစ်သည်။ မူးယစ်ဆေးဝါးများ ပေါများသထက် ပေါများခဲ့သည်။ နိုင်ငံ့ ဝန်ထမ်းနှင့် အလုပ်သမားများ လုပ်ခလစာ နိမ့်ကျနေဆဲဖြစ်သည်။ ပြည်သူများ၏ ကျန်းမာရေး ဝန်ဆောင်မှုလုပ်ငန်းများ ထိုက်သင့်သလောက် တိုးတက်မှုမရှိဘဲ ရပ်တန့်နေခဲ့သည်။ ပညာရေးဆိုင်ရာ ပြုပြင်ပြောင်းလဲမှု တစ်စုံတစ်ရာမျှ မြင်ခဲ့ကြသေးချေ။ အဂတိလိုက်စားမများ ကျန်ရစ်နေဆဲ ဖြစ်သည်။

သို့အတွက် အချုပ်အားဖြင့် နိဂုံးချုပ်တင်ပြရလျှင် အချိန်ပြောင်းလဲခြင်းနှင့်အတူ အခြားသော နိုင်ငံ့ရေးရာ ကိစ္စများသည်လည်း လိုက်ပါပြောင်းလဲလျက်ရှိသည်မှာ သဘာဝပင်ဖြစ်သည်။ ၂၀၁၇ ခုနှစ်အတွင်း ဖြစ်ပေါ်ခဲ့သည့် ပြောင်းလဲမှု အရာအားလုံးသည်လည်း၂၀၁၈ ခုနှစ် နှစ်သစ်တွင်လည်း ဆက်လက်လိုက်ပါ ပြောင်းလဲနေဦးမည်မှာ အမှန်ပင်ဖြစ်ပါသည်။

သို့သော် ပြောင်းလဲသည့် အရာများသည် ကောင်းမွန်သော ပြောင်းလဲခြင်းများသာ ဖြစ်သင့်ကြသည်။ အတိတ်နိမိတ်ကောင်းပြီး အောင်ခြင်းမင်္ဂလာ အဖြာဖြာနှင့်ပြည့်စုံသော ကောင်းသတင်းများသာ ဖြစ်သင့်သည်။ မြန်မာလူမျိုး ဗုဒ္ဓဘာသာဝင်များ၏ အယူဝါဒအရ နှစ်ဟောင်းမှ မကောင်းသည့် အမူအကျင့်များ၊ မကောင်းသည့် စရိုက်ဆိုးများ၊ မကောင်းသည့်ဖြစ် ရပ်များ၊ မကောင်းသည့် ဖြစ်စဉ်များ၊ မကောင်းသည့် နိုင်ငံ့ရေးရာကိစ္စရပ်များကို နှစ်သစ်သို့ မယူကောင်းချေ။ နှစ်သစ်တစ်ခုအစတွင် ကောင်းသည့်အတိတ် ကောင်းသည့်နိမိတ်ဖြင့်သာ စသင့်သည်။ ကောင်းသည့်အတိတ် ကောင်းသည့်နိမိတ်များ ဖြစ်ပေါ်စေရေးအတွက်ဆိုလျှင် ကောင်းသည့် အရာများကိုသာ စဉ်းစားတွေးတောပြီး အာရုံစိုက်ကာ ကြိုးပမ်းလုပ်ကိုင်မှပင် ရမည်ဖြစ်သည်။ ထို့အတွက် ကောင်းသတင်းများ ဖြစ်ပေါ်စေရေးနှင့် ကောင်းသည့် ဖြစ်စဉ်ဖြစ်ရပ်များ ဖြစ်ထွန်းပေါ်ပေါက်စေရေးတို့အတွက် အတိတ်ဟောင်းဆီက ကောင်းခဲ့သည့် ဖြစ်စဉ်ဖြစ်ရပ်များကို နမူနာယူပြီး အစိုးရရော ပြည်သူများကပါ ဝိုင်းဝန်းကြိုးပမ်း ကာကွယ်တားဆီး လုပ်ဆောင်ကြရင်းဖြင့် ကျွန်ုပ်တို့နိုင်ငံသည် ကမ္ဘာ့အလယ်တွင် အခြားနိုင်ငံများနှင့် ရင်ပေါင်တန်းပြီး ခေတ်မီဖွံ့ဖြိုးတိုးတက်သည့် နိုင်ငံတော်ကြီးဖြစ်ပေါ်လာမည်မှာ မလွဲဧကန် အမှန်ပင်ဖြစ်ပါကြောင်း စိတ်ကောင်းစေတနာဖြင့် ရည်ရွယ်တိုက်တွန်း ရေးသား တင်ပြလိုက်ရပါသည်။

အောင်ဇေယျ



FOLLOW US