News

POST TAGGED AS

စကားဝိုင်း

ဒေါ်အောင်ဆန်းစုကြည်အပေါ် ပုဂ္ဂိုလ်ရေးကိုးကွယ်မှုများ


“ဒေါ်အောင်ဆန်းစုကြည်အပေါ် ပုဂ္ဂိုလ်ရေးကိုးကွယ်မှုသည် နိုင်ငံတကာတွင် မှေးမှိန်သွားပြီဖြစ်သော်လည်း မြန်မာနိုင်ငံအတွင်း၌ ထွန်းတောက်နေဆဲဖြစ်သည်”

ဒေါ်အောင်ဆန်းစုကြည်၏ နိုင်ငံတကာ ကျော်ကြားမှုနှင့် ချီးကျူးထောမနာပြုမှုများမှတစ်ဆင့် ရရှိထားသော ပုဂ္ဂိုလ်ရေးကိုးကွယ်မှု သို့မဟုတ် နိုင်ငံတကာ ကျော်ကြားမှုပုံရိပ်ကျဆင်းသွားပြီဖြစ်သည်ဟူသော အချက်ကို အနောက်ကမ္ဘာအနေနှင့် တွေ့မြင်ခဲ့ကြရပြီဖြစ်သည်။ သိမ်မွေ့နူးညံ့ပုံရသော်လည်း သံမဏိစိတ်ဓာတ်ရှိသူ သူမသည် လက်နက်အားကိုး တပ်မတော်အာဏာရှင်ကို ရင်ဆိုင်အန်တုကာ ဒီမိုကရေစီ ထွန်းကားရေးကို စည်းရုံးလှုံ့ဆော်ခဲ့မှုကြောင့် နှစ်ပေါင်းများစွာ နေအိမ်အကျယ်ချုပ်ကျခံခဲ့ရပြီး ကမ္ဘာ့စံနမူနာ ဒီမိုကရေစီ နိမိတ်ပုံတစ်ခုအဖြစ် ကျော်ကြားလာခဲ့သည်။ 

သူမသည် မြန်မာနိုင်ငံ၏ ဒီမိုကရေစီအရေးအတွက် မိသားစုဘဝကို စွန့်လွှတ်ခဲ့သူဖြစ်သည်။ သို့ရာတွင် ယခုအခါ နိုင်ငံတကာအဖွဲ့အစည်း အမျိုးမျိုးသည် သူမအား ယခင်က ချီးမြှင့်ခဲ့ဖူးသောဆုများကို ပြန်လည်ရုပ်သိမ်းနေကြပြီး အချို့မီဒီယာများကမူ ငြိမ်းချမ်းရေး နိုဘယ်လ်ဆုကိုပင် ရုပ်သိမ်းရန် မစာမနာ တောင်းဆိုရေးသားနေကြပြီဖြစ်သည်။ ယခင်က သူမကို ထူးထူးကဲကဲ ထောက်ခံခဲ့ကြသူများလည်း ယခုအခါ သိသိသာသာပင် နှုတ်ဆိတ်လျက်ရှိသည်။

ဒေါ်အောင်ဆန်းစုကြည်သည် ဒီမိုကရေစီ စံနမူနာခေါင်းဆောင်ပုံရိပ်ကို ထိထိရောက်ရောက် အသုံးပြုခဲ့သော်လည်း သူမအနေနှင့် ဒီမိုကရေစီ စံပြခေါင်းဆောင်မဖြစ်လိုကြောင်း၊ ယင်းပုံရိပ်ကို မဖန်တီးခဲ့ကြောင်း မကြာခဏ အသိပေးခဲ့ပြီး မြန်မာနိုင်ငံအတွက် နိုင်ငံရေးသမားတစ်ဦးသာ ဖြစ်ချင်သည်ဟု ထုတ်ဖော်ပြောဆိုခဲ့သည်။ သူမသည် ထိုပုံရိပ်နှစ်မျိုးစလုံးကို ရရှိခဲ့သော်လည်း ပြည်တွင်း၌ သူမအပေါ် ဖိအားပေးနေသည့် ရှုပ်ထွေးသော နိုင်ငံရေးအခြေအနေများက သူမ၏ နိုင်ငံတကာပုံရိပ်ကို ထိထိရောက်ရောက် ဖျက်ဆီးလိုက်ပြီဖြစ်သည်။ 

မြန်မာနိုင်ငံအတွင်း တရားဝင် အာဏာသုံးကိုင်တွယ်ရသည့် ဥပဒေစိုးမိုးရေးလက်တံများနှင့် ဌာနတွင်း အုပ်ချုပ်ရေးယန္တရား အဆင့်ဆင့်ကို ဆက်လက်ထိန်းချုပ်ထားသည့် တပ်မတော်က သူမ၏ နိုင်ငံရေးခေါင်းဆောင်မှုနှင့် လုပ်ဆောင်မှုများကို ပြင်းပြင်းထန်ထန် ဝိုင်းပတ်ကန့်သတ်ထားသည်။ သူမနှင့် NLD ပါတီ အစိုးရသည် ဥပဒေပြုခွင့်အာဏာကို အကန့်အသတ်နှင့်ရရှိထားသော်လည်း တပ်မတော်ဟုခေါ်သော စစ်တပ်အပေါ် ထိရောက်စွာ လွှမ်းမိုးနိုင်သောအာဏာ မရရှိပေ။ သူမနှင့် တပ်မတော်အကြား အထူးသဖြင့် ထိပ်ဆုံးပိုင်း အရာရှိအချို့အကြား အပြန်အလှန်ယုံကြည်မှုမရှိသည့် အခြေအနေမျိုးတွင် သူမသည် ထိရောက်သော နိုင်ငံရေးသမားတစ်ဦး ဖြစ်နိုင်မည်မဟုတ်ပေ။

သူမအပေါ် နိုင်ငံတကာ၏ ပြစ်တင်ဝေဖန်မှု ကြီးထွားလာရခြင်း၏ အဓိကအကြောင်းရင်းမှာ ရခိုင်ပြည်နယ်မြောက်ပိုင်းမှ ရိုဟင်ဂျာ (ဘင်္ဂါလီဟုခေါ်ဝေါ်) များအပေါ် ပြုမူဆက်ဆံပုံကြောင့်ဖြစ်သည်။ မြန်မာနိုင်ငံက အဆိုပါမွတ်ဆလင်များကို တိုင်းရင်းသားအဖြစ်၊ နိုင်ငံသားခံယူခွင့်ရှိသူအဖြစ် အသိအမှတ်မပြုဘဲ တစ်ဖက်ဘင်္ဂလားဒေ့ရ်ှနိုင်ငံဘက်သို့ ပြန်သင့်သည့် ဘင်္ဂါလီလူမျိုးများဖြစ်သည်ဟု ယူဆသတ်မှတ်ထားသည်။ မြန်မာနိုင်ငံတွင် ရိုဟင်ဂျာပြဿနာအပြင် နိုင်ငံမြောက်ပိုင်း၌ တိုက်ပွဲများ ဆက်လက်ဖြစ်ပွားနေပြီး မီဒီယာများအပေါ် ဥပဒေကြောင်းအရ တင်းကျပ်မှုနှင့် အာဏာပိုင်များ၏ တင်းတင်းမာမာ ကိုင်တွယ်ဆောင်ရွက်မှုများလည်း ကြီးထွားလျက်သည်။

ဒုက္ခအတိပြီးသော ယင်းကဲ့သို့ အခြေအနေမျိုးတွင် အလွန်ရှုပ်ထွေးသော ရိုဟင်ဂျာပြဿနာအပေါ် ပါးစပ်ပြောသမိုင်း၊ အတွေးအမြင်လွဲမှားမှုနှင့် အဖြစ်မှန်များ ရောနှောတည်ရှိနေမှုကြောင့် တင်းမာမှုများကို ပိုဆိုးစေပြီး အကဲခတ်လေ့လာသူများကို ဝေခွဲမရ ရှုပ်ထွေးသွားစေသည်။ အဖြစ်မှန်မှာ အဆိုပါ နိုင်ငံမဲ့ မွတ်ဆလင်များသည် မြန်မာနိုင်ငံက ပစ်ပယ်ထားသော၊ ဘင်္ဂလားဒေ့ရ်ှနိုင်ငံက မလိုလားသော အာရှတိုက်တွင် အနွမ်းပါးဆုံးနှင့် အခြိမ်းခြောက်ခံရဆုံး လူမျိုးစုတစ်စုဖြစ်သည်။ ပါးစပ်ပြောသမိုင်းအရ ဘင်္ဂါလီများက ၎င်းတို့သည် ယခုခေတ်မှ ရွှေ့ပြောင်းလာသူများ မဟုတ်ဘဲ ထိုဒေသတွင် နှစ်ရာချီ၍ ရှိခဲ့သူများဟု ဆိုကြသည်။ 

မြန်မာအစိုးရဘက်ကမူ ဘင်္ဂါလီအများစုမှာ မကြာသေးသောကာလက တရားမဝင်ရွှေ့ပြောင်းနေထိုင်ခဲ့သူများဖြစ်သောကြောင့် နိုင်ငံသားအဖြစ် တရားဝင် အဆင့်အတန်းကို မရရှိနိုင်ဟု ယူဆထားသည်။ နှစ်ဖက်စလုံးတွင် စိတ်မှန်းဖြင့်ပြောဆိုသောအချက်များ ရှိနေသည်။ အချို့ကလည်း ရိုဟင်ဂျာတို့သည် မြန်မာနှင့် ရခိုင်တို့၏ ဖိနှိပ်မှုကို ခံနေရသောကြောင့် နိုင်ငံတကာ အထောက်အပံ့နှင့် စာနာမှုကိုရရှိရန် လိုအပ်နေသော ဘေးသင့်နေသည့် လူမျိုးစု Victimized အမျိုးအစားအဖြစ် သတ်မှတ်ထားကြသည်။

ရိုဟင်ဂျာ ၆၆၀,၀၀၀ ကျော်သည် မြန်မာနိုင်ငံဘက်မှ ဘင်္ဂလားဒေ့ရ်ှဘက်သို့ ထွက်ပြေးသွားခဲ့ကြပြီသည်။ လူပေါင်း ၆၀၀၀ ခန့် သေဆုံး သို့မဟုတ် သတ်ဖြတ်ခံရကာ ရွာပေါင်းများစွာ မီးရှို့ဖျက်ဆီးခြင်းခံရမှုကြောင့် ဘေးဒုက္ခပတ်လည်ဝိုင်းသည့် ကပ်ဘေးဆိုက်မှုနှင့် ရင်ဆိုင်ကြုံတွေ့ခဲ့ရသည်ဟု ဆိုသည်။ အဆိုပါ ကြောက်မက်ဖွယ်ဖြစ်စဉ်ကို နိုင်ငံတကာအစိုးရများနှင့် အဖွဲ့အစည်းများက သိရှိကြောင်း အတည်ပြုခဲ့ကြသည်။ အမေရိကန်နိုင်ငံခြားရေးဌာနက တစ်လခန့် စောင့်ကြည့်နေခဲ့ပြီးနောက် အစုအပြုံလိုက် မောင်းထုတ်သော လူမျိုးတုံးသန့်စင်မှုဟု ပြစ်တင်ဝေဖန်ခဲ့ပြီး အချို့အကဲခတ်များက အစုအပြုံလိုက်သတ်ဖြတ်မှုဟု စွပ်စွဲရန် စတင်ကြိုးစားလာခဲ့သည်။ 

တပ်မတော်ဟုခေါ်သော မြန်မာစစ်တပ်တာဝန်ရှိသူများကမူ အဆိုပါစွပ်စွဲချက်များကို တွင်တွင်ငြင်းဆိုခဲ့သည်။ ခါးသီးသည့် ဖိနှိပ်မှုဒဏ်ကို ခံနေရသော ရိုဟင်ဂျာများ၏ အင်အားချို့တဲ့သော လက်နက်ကိုင်စွဲမှုနှင့် တော်လှန်မှုသည် မြန်မာနိုင်ငံအတွက် အသေးအမွှား ဆူးငြောင့်တစ်ခုသာ ဖြစ်သည်ဟုဆိုနိုင်သည်။ သို့သော် ၂၀၁၇ ခုနှစ်တွင် ARSA ဟူသော လက်နက်ကိုင်အုပ်စုအဖြစ် ကြီးထွားလာမှုအပေါ် မြန်မာစစ်တပ်က အမျိုးသားလုံခြုံရေးပြဿနာဟု သတ်မှတ်ဖွင့်ဆိုလိုက်ချိန်တွင် အင်အားအလွန်အကျွံသုံးပြီး လက်တုံ့ပြန်သည်အထိ ဖြစ်စေခဲ့သည်။ အမှန်တကယ်တွင် နိုင်ငံအနှံ့ စစ်အင်အားဖြန့်ကြက်မှုများ ရှိနေသော မြန်မာနိုင်ငံအတွက် ARSA ပေါ်ပေါက်မှုသည် မပြန့်ပွားနိုင်သော အသေးအမွှားကင်ဆာအကျိတ်မျှသာဖြစ်သည်။

ဒေါ်အောင်ဆန်းစုကြည်သည် တပ်မတော်အပေါ် ကိုင်တွယ်ရခက်မှုနှင့် အရပ်ဘက်အဖွဲ့အစည်း၏ တောင်းဆိုမှုများအကြား ဟန်ချက်မျှတရန် ခက်ခက်ခဲခဲ ကြိုးစားနေရသည်။ အခြားတစ်ဖက်တွင်လည်း အခြေခံဥပဒေ ခွင့်ပြုထားမှုအရ မငြိမ်သက်သော အခြေအနေမျိုးတွင် အမြတ်ထုတ်သည့်ပုံစံမျိုးဖြင့် ဖြစ်ပေါ်လာနိုင်သော စစ်အာဏာသိမ်းမှုမျိုးကိုလည်း စိုးရိမ်နေပုံရသည်။ ရိုဟင်ဂျာပြဿနာမှာ အရှုပ်ထွေးဆုံးဖြစ်သော်လည်း မြန်မာနိုင်ငံအပေါ် ဖိစီးနေသည့် ဆယ်စုနှစ်ချီ လက်နက်ကိုင်တော်လှန်မှုများထဲမှ တစ်ခုသာလျှင်ဖြစ်သည်။

ဒေါ်အောင်ဆန်းစုကြည်သည် သူမ၏ဖခင် ဗိုလ်ချုပ်အောင်ဆန်းအားထုတ်ခဲ့သော ပင်လုံညီလာခံစိတ်ဓာတ်ကို အမွေဆက်ခံကာ နိုင်ငံတော်အတွက် အန္တရာယ်ဟု တပ်မတော်က သတ်မှတ်ထားသော တိုင်းရင်းသားလက်နက်ကိုင် တော်လှန်မှုပြဿနာကို အဖြေရှာနိုင်ရေးအတွက် ငြိမ်းချမ်းရေးလုပ်ငန်းစဉ်ကို အဓိက ဦးစားပေးအာရုံစိုက်ခဲ့သည်။ သို့တိုင်အောင် ယင်းကိစ္စကို ယနေ့အထိ ထိရောက်စွာ လုပ်ဆောင်နိုင်ခြင်း မရှိသေးပေ။

ဒေါ်အောင်ဆန်းစုကြည်သည် နိုင်ငံခြား သံတမန်အသိုင်းအဝိုင်းများအပေါ်တွင်လည်း ပွင့်လင်းမှုလျော့နည်းလာပြီး ၎င်းတို့သည် ဘင်္ဂါလီ ရိုဟင်ဂျာပြဿနာနှင့် ပတ်သက်၍ သိရှိနားလည်ခြင်းမရှိဟု ယူဆကာ တရားဝင် ရှင်းလင်းဟောပြောမှုများ ပြုလုပ်ခြင်းဖြင့် အခြေအနေအရပ်ရပ်ကို လျှော့ပေါ့ပုံဖော်ခဲ့သည်။ အများ၏အမြင်တွင် သူမသည် ကြောက်မက်ဖွယ် အမှန်တရားကို လက်တွေ့သိရှိပုံ မရသည့်ပုံစံ ဖြစ်နေသည်။ အချို့ကလည်း သူမသည် ဝါးလုံးခေါင်းထဲတွင် မျက်စိပိတ်နားပိတ်ဖြစ်နေသည်ဟု ဝေဖန်ပြောဆိုကြသည်။ သူမသည် ပြည်တွင်း၌ ပြစ်တင်ဝေဖန်ခြင်း မခံရသည့်အပြင် သူမရရှိထားသော အခွင့်အာဏာကိုလည်း လက်အောက်ဝန်ကြီးများကို ခွဲဝေပေးခြင်းမရှိဟု အချို့က ဆိုကြသည်။ နိုင်ငံပိုင်မီဒီယာများတွင် သူမအကြောင်း ဖော်ပြမှုများသည်လည်း အခြားအာဏာရှင်နိုင်ငံများတွင် ဖော်ပြသကဲ့သို့ပင် ဖြစ်နေသည်။ ပြည်သူအများစု၏ နေအိမ်ဧည့်ခန်းများတွင်လည်း သူမ၏ဓာတ်ပုံများကို ချိတ်ဆွဲထားကြသည်။ ဤအချက်သည် သူမအပေါ် နိုင်ငံတကာ၏ ကိုးကွယ်မှုများ ကျဆင်းသွားသော်လည်း ပြည်တွင်း၌ ဆက်လက်ထွန်းတောက်နေဆဲ ဖြစ်သည်ကို ထင်ဟပ်နေသည်။ သို့ရာတွင် သူမ၏ ခေါင်းဆောင်မှုအပေါ် မကျေနပ်သော လူနည်းစုအချို့လည်းရှိနေသည်။ လူနည်းစု အသိုင်းအဝိုင်းများ၏ ငြိမ်းချမ်းမှုသည် လုံးဝမရှိခြင်း မဟုတ်သော်လည်း ယာယီခဏသာဖြစ်သည်။

မြန်မာနိုင်ငံတွင် ရိုဟင်ဂျာတို့၏ ဘဝနှင့် လုံခြုံမှုသည် အများဆုံး အန္တရာယ်ကျရောက်နေပြီး ၎င်းတို့၏ အိမ်နီးချင်း ရခိုင်လူမျိုးများသည်လည်း ကွဲပြားသော မလုံခြုံမှုကို ခံစားနေကြရသည်။ ၁၇၈၅ တွင် ဗမာဘုရင်၏ သိမ်းပိုက်ခြင်းခံခဲ့ရပြီးနောက် ဒုတိယတန်းစားဖြစ်သွားခဲ့သည်ဟု ခံစားယူဆခဲ့သော ရခိုင်များသည် ယခုအခါ နိုင်ငံတကာအထောက်အပံ့များသည် မွတ်ဆလင်များထံသို့သာ ရောက်ရှိနေပြီး နွမ်းပါးသော ရခိုင်များထံ ရောက်မလာကြောင်း စောဒကတက်နေကြသည်။ ဗုဒ္ဓဘာသာကြီးစိုးသောနိုင်ငံသို့ မွတ်ဆလင်များ ကျူးကျော်လာမည့်အရေးကို စိုးရိမ်သော ဗမာ ဗုဒ္ဓဘာသာ အသိုင်းအဝိုင်းကလည်း မွတ်ဆလင်ဩဇာနှင့် ကြီးထွားမှုကို ကန့်သတ်ရန် ဥပဒေများ ပြဋ္ဌာန်းထားသည်။ အစွန်းရောက်သော သံဃာအချို့၏ လှုံ့ဆော်မှုသည် နိုင်ငံအတွင်း မွတ်ဆလင်မုန်းတီးသည့် စိတ်ဓာတ်နှင့် အဓိကရုဏ်းများကို ဖြစ်ပေါ်စေခဲ့သည်။ ခရစ်ယာန်၊ မွတ်ဆလင်နှင့် အခြားဘာသာကိုးကွယ်သူများသည် တပ်မတော်နှင့် ဌာနဆိုင်ရာ အထက်ဆင့်များ အပါအဝင် အာဏာ၊ လုပ်ပိုင်ခွင့်နှင့် ရင်းမြစ်များမှ ဝေးရာသို့ ဖယ်ကြဉ်ထားခြင်းခံနေရသည်။ ဒေါ်အောင်ဆန်းစုကြည်ကိုယ်တိုင်သည်ပင် သူမအား မယုံကြည်သော စစ်ဘက်အသိုင်းအဝိုင်းများအကြားတွင် ဘေးရှိနိုင်သည်။ အာဏာချုပ်ကိုင်ထားဆဲ တပ်မတော်က ယိမ်းယိုင်နေသော နိုင်ငံဖွံ့ဖြိုးရေးအတွက် အနောက်အုပ်စု အထောက်အပံ့ကို မျှော်နေသည့်တိုင်အောင် နိုင်ငံ၏ဂုဏ်သတင်းမှာ အနုတ်လက္ခဏာပြသော စီးပွားရေးရလဒ်များနှင့်အတူ ကျဆင်းလျက်ရှိသည်။ ရိုဟင်ဂျာ (ဘင်္ဂါလီ) တို့အပေါ် အနောက်အုပ်စုက စိတ်ဓာတ်ရေးရာ အားပေးမှုများ ပြုလုပ်နေမှုသည် မြန်မာနိုင်ငံတွင် အနောက်အုပ်စု ဆန့်ကျင်မှုများ ပြန်ပေါ်လာအောင် နှိုးဆွသကဲ့သို့ဖြစ်နေပြီး တရုတ်ကြီးစိုးမှုကို နောက်တစ်ကြိမ် တံခါးဖွင့်ပေးအောင် ပြုလုပ်လျက်ရှိသည်။

မြန်မာနိုင်ငံတွင် စီးပွားရေးမညီမျှမှု ကြီးထွားလာခြင်း၊ အဂတိလိုက်စားမှု၊ အရည်အချင်းမပြည့်သော စီမံအုပ်ချုပ်မှု၊ လူမျိုးရေးဘက်လိုက်မှု၊ လူ့အခွင့်အရေးနှင့် မီဒီယာအပေါ် တင်းကျပ်လာမှု၊ အရပ်ဘက်အသိုင်းအဝိုင်းအား ပစ်ပယ်ထားမှု၊ နိုင်ငံခြားဆန့်ကျင်ရေး အစွန်းရောက် အမျိုးသားစိတ်ကြီးထွားလာမှု စသော ပြဿနာအမျိုးမျိုးက ဖိစီးနှိပ်စက်နေသည်။ ဒေါ်အောင်ဆန်းစုကြည်ကိုယ်တိုင်သည်ပင် အာဏာရှင် တပ်မတော်အကြီးအကဲ၏ နှစ်ပေါင်းနှစ်ဆယ်ခန့် အကျယ်ချုပ်ဖမ်းဆီးခြင်းကို ခံခဲ့ရသောကြောင့် ရိုဟင်ဂျာပြဿနာသည် ယနေ့ မြန်မာနိုင်ငံရင်ဆိုင်နေရသော အရေးပေါ်ကိစ္စတစ်ရပ်သာဖြစ်သည်။ လက်ရှိတွင် ခံစားမှုများမှာ အစွန်းရောက်လွန်ကဲနေသောကြောင့် ပြဿနာ၏ အကျိုးဆက်များကို ပြည်တွင်း၌ ဆွေးနွေးညှိနှိုင်းရန် အဟန့်အတားဖြစ်နေသည်။ အကယ်၍ လူမျိုးတုံးသန့်စင်မှုသည် မြင်တွေ့ရသည့်အတိုင်း အမှန်တကယ်ဖြစ်ခဲ့ပါက ဘင်္ဂါလီတို့ ပြန်လာနိုင်ရေးအတွက် စေ့စပ်ညှိနှိုင်းမှုများသည် နိုင်ငံတကာ အစီအစဉ်တစ်ခု ဖြစ်ပေလိမ့်မည်။ ဒေါ်အောင်ဆန်းစုကြည်၏ သဘောထားမည်သို့ပင် ရှိစေကာမူ ပြည်တွင်း၌ မျက်စိမှိတ်ဘက်လိုက်သည့် သဘောထားများ အခိုင်အမာဖြစ်ပေါ်လျက်ပင်ရှိသည်။ ထို့ပြင် သူမ၏ သဘောထားများသည် ဗမာ ပညာတတ်အလွှာအများစု၏ သဘောထားနှင့် အခြေခံကျကျ ခြားနားသည်ကိုလည်းမတွေ့ရပေ။ ရခိုင်မြောက်ပိုင်းဒေသတွင် သတ်ဖြတ်တိုက်ခိုက်မှုများ ရပ်တန့်သွားသည့်တိုင်အောင် မုတ်သုံရာသီ ဝင်ရောက်လာပြီး အခက်အခဲပေါင်းစုံ ကြုံတွေ့နေရသည့် ရိုဟင်ဂျာများ ပြန်လာနိုင်ရေးကိစ္စတွင် ယာယီပြေလည်မည့် အဖြေလည်းရှိပုံမရပေ။

လတ်တလောအချိန်တွင် ဒေါ်အောင်ဆန်းစုကြည်သည် မြန်မာ့ဒီမိုကရေစီလုပ်ငန်းစဉ်အတွက် တစ်ခုတည်းသော မျှော်လင့်ချက်ဖြစ်သည်ဟု မြန်မာပြည်သူများက အခိုင်အမာ ယုံကြည်ထားကြသည်။ ဤအတိုင်း မှန်ကန်ပါက အစိုးရ၏ စီမံချုပ်မှုနှင့် ပြည်နယ်ခေါင်းဆောင်များ၏ လုပ်ပိုင်ခွင့်အာဏာဆိုင်ရာ သဘောတရား အယူအဆများတွင် ဒီမိုကရေစီစံနှုန်းများ ပျိုးထောင်ပြီး သိသာထင်ရှားသည့် အပြောင်းအလဲများ လိုက်ပါလုပ်ဆောင်လာရန် လိုအပ်မည်ဖြစ်သည်။ သို့မှသာ ယင်းဒီမိုကရေစီစံချိန်စံနှုန်းများကို အခိုင်အမာဖြစ်အောင် ထိန်းသိမ်းထားနိုင်မည်ဖြစ်သည်။ သို့သော် ဒီမိုကရေစီ စံချိန်စံနှုန်းများသည် အရေးပေါ်ရေတိုကိစ္စများ၊ အမျိုးသားရေး ဘက်လိုက်ဆုံးဖြတ်မှုများကြောင့် ဖျက်ဆီးခံရခြင်းမရှိစေရန် အထူးသတိထားရမည်ဖြစ်သည်။ မည်သို့ပင်ဆိုစေကာမူ အဆိုပါ လုပ်ငန်းစဉ်ကြီးသည် မလွဲမသွေ ရှည်လျားမည့်လုပ်ငန်းစဉ်တစ်ရပ်သာဖြစ်ပေသည်။

David I Steinberg ရေးသားပြီး NLM ဘာသာပြန်ဆိုသည်။



FOLLOW US