News

POST TAGGED AS

ခရီးသွားလုပ်ငန်း

ခရီးသွားလုပ်ငန်းကြောင့် ကာဗွန်ရိုက်ခတ်မှုသည် ခန့်မှန်းသည်ထက် သုံးဆပိုများ


ဆစ်ဒနီ၊ မေ ၈

ခရီးသွားလုပ်ငန်းကြောင့် ကာဗွန်ထုတ်လွှတ်မှုသည် ကမ္ဘာလုံးဆိုင်ရာ ထုတ်လွှတ်မှု၏ ၈ ရာခိုင်နှုန်းရှိပြီး ယခင်မှန်းဆထားသည်ထက် သုံးဆပိုများသည်ဟု အစီရင်ခံစာအသစ် ထွက်ပေါ်လာကြောင်း BBC သတင်းတွင် ဖော်ပြထားသည်။

ခရီးသွားခြင်းမှ ကာဗွန်ထုတ်လွှတ်မှုများအပြင် ခရီးသွားများ၏ အစားအသောက်၊ ဟိုတယ်နှင့် ဈေးဝယ်ခြင်းကိစ္စများတွင် ကာဗွန်သံသရာလည်မှု အပြည့်အဝပါဝင်နေမှုကြောင့် ယခုတွေ့ရှိမှုသည် ကြီးမားသည်ဟုဆိုသည်။

ကာဗွန်ထုတ်လွှတ်မှု မြင့်တက်စေသော ခရီးသွားများမှာ သုံးဖြုန်းနိုင်သော တိုင်းပြည်များမှ ပြည်တွင်းရှိ အခြားလည်ပတ်စရာ နေရာများသို့ သွားရောက်လည်ပတ်ကြသူများဖြစ်သည်။ အမေရိကန်က ထိပ်ဆုံးဖြစ်ပြီး ၎င်း၏နောက်တွင် တရုတ်၊ ဂျာမနီ၊ အိန္ဒိယတို့ရှိသည်။

ခရီးသွားလုပ်ငန်းသည် ဒေါ်လာ ၇ ထရီလီယံ တန်ဖိုးရှိသော ကမ္ဘာ့စီးပွားရေးတစ်ခုဖြစ်ပြီး အလုပ်သမားဆယ်ဦးလျှင် တစ်ဦးကို အလုပ်ပေးထားကာ နှစ်စဉ် ၄ ရာခိုင်နှုန်း ကြီးထွားလျက်ရှိသည်။

ယခင်ကမူ ခရီးသွားလုပ်ငန်းသည် တစ်ကမ္ဘာလုံး ကာဗွန်ထုတ်လွှတ်မှု၏ ၂ ဒသမ ၅ မှ ၃ ရာခိုင်နှုန်းသာ ရှိသည်ဟု ခန့်မှန်းခဲ့ကြသည်။

ယခုလေ့လာမှုတွင် ခရီးသွားလုပ်ငန်း၏ အစားအစာ၊ အဖျော်ယမကာ၊ ဆောက်လုပ်ရေးလုပ်ငန်း၊ ပြင်ဆင်ထိန်းသိမ်းမှု၊ လက်လီဈေးဝယ်မှု စသောကဏ္ဍများတွင် အသုံးပြုရသော စွမ်းအင်များကို ထည့်သွင်းတွက်ချက်ခဲ့သည်။

“ဒီအချက်က တကယ်ကို မျက်စိပွင့်သွားစေပါတယ်” ဟု သုတေသနတွင် ပါဝင်သူ ဆစ်ဒနီတက္ကသိုလ်မှ ဒေါက်တာ အရူနီမာ မာလစ်က ပြောကြားသည်။

ကနေဒါ၊ ဆွစ်ဇာလန်၊ နယ်သာလန်နှင့် ဒိန်းမတ်နိုင်ငံများမှ ခရီးသွားများမှာမူ ၎င်းတို့ ပြည်တွင်းထက် ပြည်ပခရီးတွင် ကာဗွန်ထုတ်လွှတ်မှု မြင့်တက်စေသူများ ဖြစ်သည်ဟု သိရှိရသည်။

ချမ်းသာသူများ ခရီးသွားလျှင် ကာဗွန်ထုတ်လွှတ်မှုများသောကိစ္စများတွင် ငွေကြေးကို သုံးဖြုန်းကြသည်ဟု ဒေါက်တာမာလစ်က မှတ်ချက်ပေးသည်။

“ချမ်းသာတဲ့နိုင်ငံတွေက ခရီးသွားတွေက လေကြောင်းခရီးတွေ၊ ဟိုတယ်တွေ၊ ဈေးဝယ်တဲ့နေရာတွေမှာ ပိုက်ဆံဖြုန်းကြတယ်။ ဝင်ငွေနိမ့်နိုင်ငံတွေက ခရီးသွားတွေကတော့ အများသုံး ပို့ဆောင်ရေးစနစ်နဲ့ စရိတ်နည်း အစားအသောက်တွေမှာ ပိုက်ဆံသုံးကြတယ်။ လာတဲ့နိုင်ငံရဲ့ စီးပွားရေး အခြေအနေအပေါ် မူတည်ပြီး ကွဲပြားသွားတယ်” ဟု ၎င်းက ဆိုသည်။ 

တစ်နိုင်ငံခြင်း ထုတ်လွှတ်မှုတွင်မူ မော်ဒိုက်ဗ်၊ ဆိုက်ပရပ်စ်နှင့် ဆေရှဲလ်ကဲ့သို့ နာမည်ကျော်ခရီးသွားကျွန်းစုများက ထိပ်ဆုံးမှရှိနေပြီး ခရီးသွားလုပ်ငန်း ကာဗွန်ထုတ်လွှတ်မှုသည် တစ်နှစ်လုံးထုတ်လွှတ်မှု၏ ၈၀ ရာခိုင်နှုန်းရှိသည်။

သုတေသနတွင် တစ်နှစ်ဝင်ငွေ ဒေါ်လာ ၄၀,၀၀၀ ကျော်သူများသည် ဝင်ငွေ ၁၀ ရာခိုင်နှုန်းတိုးတိုင်း၊ ခရီးသွားလုပ်ငန်း၏ ကာဗွန်ထုတ်လွှတ်မှုကို ၁၃ ရာခိုင်နှုန်း မြင့်တက်စေသည်ဟူသော အချက်ကို တွေ့ရှိခဲ့သည်။

ကမ္ဘာ့ခရီးသွားလုပ်ငန်းကောင်စီ WTTC ကမူ ၎င်းအစီရင်ခံစာကို ကြိုဆိုလိုက်သော်လည်း ကာဗွန်လျှော့ချရေး အားထုတ်မှုများ အောင်မြင်ခြင်းမရှိဟူ သောအချက်ကိုလက်မခံပေ။ ကာဗွန်ကိစ္စမှာ ဘာမှမလုပ်ဘူးလို့ ပြောတာကတော့ မျှတမှုမရှိပါဘူး” ဟု WTTC သုတသေန ဒါရိုက်တာ ရိုရှဲလ်တာနာက ပြောကြားသည်။ ကာဗွန်လျှော့ချသော ဟိုတယ်များ၊ လေဆိပ်များ၊ လုပ်ငန်းများအရေအတွက် တိုးလာခြင်းသည် အရှိန်ရလာခြင်းကို ပြသနေသည်ဟု ရိုရှဲလ်တာနာက ဆိုသည်။

အသိပညာရှိမှုသည် အရေးကြီးသောအချက်ဖြစ်ပြီး လတ်တလော ကိပ်တောင်းမှ ရေပြဿနာသည် ရာသီဥတုပြောင်းလဲမှုကြောင့် ရေကဲ့သို့ အရင်းအမြစ်များ ထိခိုက်လာခြင်းကို လူအများသိရှိနားလည်သွားစေရန် အထောက်အကူ ပြုသည်ဟု WTTC က မှတ်ချက်ပေးသည်။

“ဒီလိုကိစ္စတွေကို သိရှိနားလည်လာမှုဟာ ခရီးသွားတွေရဲ့ ဆုံးဖြတ်ချက်တွေကို ပိုမိုကောင်းမွန်လာစေမှာ ဖြစ်ပါတယ်” ဟု WTTC က ပြောကြားသည်။

F-04



FOLLOW US