News

POST TYPE

SUMMER SPECIAL

အြန္ထရယ္ပရယ္နား
17-Mar-2018

အင်္ဂလိပ်စာဖြင့် Entrepreneur ကို စီးပွားရေးလုပ်ငန်းရှင်၊ စီးပွားရေးစွမ်းဆောင်ရှင်ဟု မြန်မာလို ပြန်ဆိုကြပါသည်။ အင်္ဂလိပ်အဘိဓာန်တွင် (a person who sets up a business or businesses, taking on financial risks in the hope of profit) ဟူ၍ ဖွင့်ဆိုပါသည်။ စွန့်ဦးဆိုခြင်းထက် အခက်အခဲများကို စွန့်စားပြီး ကျော်လွှားကာ အောင်မြင်ချမ်းသာအောင် လုပ်ဆောင်နိုင်သူများ ဖြစ်သည်။ 

များသောအားဖြင့် အွန်ထရယ်ပရယ်နားဟု ပြောလိုက်လျှင် လုပ်ငန်းရှင်ကြီးများကိုသာ ပြေးမြင်တတ်ကြသည်။ Entrepreneur ၏ မူရင်းစာလုံးသည် ပြင်သစ်ကလာပြီး “တာဝန်ယူ လက်ခံဆောင်ရွက်သူ” ဆိုသည့်အဓိပ္ပာယ်နှင့်လည်း သုံးစွဲခဲ့ကြသည်။ အခက်အခဲမည်မျှရှိသည်ဆိုစေ ဖောက်ထွက်ပြီး ပန်းတိုင်ရောက်အောင် ပို့ဆောင်နိုင်သူ၊ လုပ်ငန်းဆိုလျှင် အကျိုးအမြတ်ရှိအောင် လုပ်ဆောင်နိုင်စွမ်းရှိသူကိုလည်း Entrepreneur ဟု ခေါ်သည်။ 

လုပ်ငန်းတစ်ခုကို အောင်မြင်စေရန်နှင့် အကျိုးအမြတ်ရှိစေရန် လုပ်ဆောင်ဖို့ဆိုသည်မှာ အလွန်ခက်ခဲပါသည်။ လုပ်ငန်းစတင်လိုက်ပြီဆိုသည်နှင့် ငွေအား၊ လူအားရင်းနှီးမြှုပ်နှံမှုများကို စတင်ထားရသည်။ လုပ်ငန်းက မည်သည့်အနေအထား ရောက်မည်မသိသေးသော်လည်း စွန့်စားထားရသည်။ အွန်ထရယ်ပရယ်နား ဆိုသည်မှာ လုပ်ငန်းစတင်ချိန်တွင် သူ့အခန်းကဏ္ဍ ရောက်ချင်မှရောက်မည်။ လုပ်ငန်းကို လည်ပတ်နေချိန်တွင် လုံးဝ အခြေအနေမကောင်းချိန်မှ သူဝင်ချင်လည်း ဝင်လာမည်။ မည်သို့ဆိုစေ သူဝင်လာလိုက်လျှင် အောင်မြင်စေရန် စီမံခန့်ခွဲပေးနိုင်စွမ်းရှိသူလည်း ဖြစ်ကောင်းဖြစ်နိုင်သည်။ 

ယနေ့ခေတ်သည် ဒစ်ဂျစ်တယ်ခေတ်ဖြစ်သောကြောင့် သန်းပေါင်းများစွာသော လူတို့သည် အွန်လိုင်းတွင် ရှိနေကြသည်။ ထိုသူတို့အထဲတွင် အခမဲ့ အကြံကောင်း ဉာဏ်ကောင်း ပေးစွမ်းနိုင်သူတွေလည်း များစွာပါဝင်ကောင်း ပါဝင်နိုင်သည်။ သူတို့သည် ကိုယ့်ထမင်းကိုယ်စားပြီး အကြံကောင်း ဉာဏ်ကောင်း ပေးနိုင်သူများလည်း ဖြစ်နေနိုင်သဖြင့် အကြောင်းတည့်ပေးကာ သူပေးသည့်အကြံနှင့် ကြီးပွားချမ်းသာသွားသူများလည်း ရှိသည်။ အွန်လိုင်းပေါ်မှ အခမဲ့အွန်ထရယ်ပရယ်နာများကို Freelancers Entrepreneurs များဟု သတ်မှတ်ကြသည်။ Freelancers များသည် ရုံးခန်းမရှိ။ လွတ်လပ်စွာ ရေးချင်ရာရေးနေသူများလည်း ဖြစ်နိုင်သည်။ သို့သော် Freelancers တိုင်းတော့ အွန်ထရယ်ပရယ်နားများ မဖြစ်နိုင်ပေ။

အွန်ထရယ်ပရယ်နားဖြစ်ချင်လျှင် အဆင့်လေးဆင့်ကို ကျော်ဖြတ်နိုင်ရမည်ဖြစ်သည်

၁။ အခွင့်အလမ်းကောင်း ရှာတတ်ရမည်
၂။ ဈေးကွက်ကို သုတေသနလုပ်တတ်ရမည်
၃။ ပညာရှာရမည်
၄။ တစ်ဆင့်ချင်း တက်သွားနိုင်ရမည်

အခွင့်အလမ်းကောင်းများ ရှာခြင်းဆိုသည်မှာ ဘာလုပ်မည်နည်းဆိုသည်ကို ပထမဆုံးရွေးချယ်ခြင်းဖြစ်သည်။ လူတိုင်း လုပ်ငန်းရှင်ကြီးတွေ ဖြစ်ချင်သည်။ သို့သော် ဘာလုပ်မည်နည်းဆိုလိုက်လျှင် ဝေဝါးကုန်သည်။ လျှောက်လုပ်တိုင်း အလုပ်ဖြစ်ချင်မှဖြစ်မည်။ ဘာလုပ်လျှင် ချမ်းသာနိုင်မည်နည်းဆိုသည်ကို ပထမဆုံး အခွင့်အလမ်းအဖြစ် သိမြင်နိုင်စွမ်းရှိရမည်။ 

ပရိဘောဂလုပ်သူက ခိုင်းသမျှထိုင်လုပ်လျှင် မကြီးပွားနိုင်။ မည်သို့ပုံစံ ဒီဇိုင်းထွင်ပြီး ထိုးဖောက်ရမည်ကို ကြံဆနိုင်ရမည်။ စားသောက်ဆိုင်တွင်လုပ်သူကလည်း မှာသမျှ ထိုင်ချက်ပြုတ်ပေးနေသမျှ သူဌေးဖြစ်ချင်မှဖြစ်မည်။ မည်သို့သော အစားအသောက်မျိုးကို တီထွင်ပြီး ဖောက်ထွက်ရမည်ကို ကိုယ်တိုင် ဝေဖန်ဆန်းစစ်နိုင်မှဖြစ်မည်။

ကြီးပွားချမ်းသာချင်သူသည် တီထွင်မှုကို မြတ်နိုးရသည်။ စွန့်စားဖောက်ထွက်ခြင်းကို သဘောကျသည်။ ခိုင်းတာလုပ်ရခြင်းထက် မခိုင်းဘဲ တီထွင်ပြီး စမ်းသပ်နေရခြင်းကို မြတ်နိုးတတ်သည်။ သူသည် အမြဲထိုင်နေသူမဟုတ်။ အိပ်နေလျှင်ပင် တီထွင်ဖောက်ထွက်နေတတ်သူဖြစ်သည်။ 

ကိုယ်လုပ်မည့်လုပ်ငန်းသည် ထုတ်ကုန်သက်သက် ထိုင်ထုတ်နေရန်မဟုတ်။ ကိုယ့်ထုတ်ကုန်ကို ဈေးကွက်ရစေရန် ရှာဖွေနိုင်စွမ်းလည်းရှိရမည်။ ဈေးကွက်က ဘာတွေလိုသနည်း၊ ဘယ်လောက်လို သနည်း။ ငါ ဘယ်လောက် ထုတ်ရမည်နည်းဆိုသည့်အချက်များကို လေ့လာဆန်းစစ်နိုင်စွမ်းရှိရမည်။

ဥပမာ ထမင်းဆိုင်တစ်ဆိုင်ကို ရပ်ကွက်အတွင်း ဖွင့်တော့မည်ဆိုလျှင် ဤရပ်ကွက်အတွင်း၌ အလားတူ ဆိုင်ပေါင်း မည်မျှရှိနေသနည်း။ စားသုံးသူများသည် ဈေးပေါပေါကြိုက်သလား၊ ဈေးကြီးသော်လည်း ကောင်းကောင်းကြိုက်သလား၊ မည်သို့သော အစားအသောက်များကို ကြိုက်သနည်း စသည်တို့ကို သေသေချာချာ လေ့လာစိစစ်ပြီးမှဖွင့်လျှင် ပိုပြီးအောင်မြင်နိုင်သည်။ 

အွန်ထရယ်ပရယ်နား ဖြစ်ချင်သူတစ်ဦးသည် အမြဲတမ်း လေ့လာသင်ယူနေသူတစ်ဦး ဖြစ်ရမည်။ အောင်မြင်သူတိုင်း ပညာတတ်ကြသည်၊ စာဖတ်ကြသည်။ ပညာတတ်ဆိုသည်မှာ တက္ကသိုလ်မှ ဘွဲ့ဒဂရီကြီးများကို ဆိုလိုခြင်းမဟုတ်။ အတတ်ပညာနှင့် အသိပညာကို ပေါင်းစပ်ပြီး တီထွင်နိုင်စွမ်းရှိခြင်းမျိုးကို ဆိုလိုသည်။ အမှားအမှန် ဆင်ခြင်ခွဲခြားနိုင်စွမ်းနှင့် လုပ်ငန်းအပေါ် ပိုင်းဖြတ်နိုင်စွမ်းများကိုလည်း ပညာဟုခေါ်ပါသည်။ ကိုယ်လုပ်ရမည့် လုပ်ငန်းအတွက် အမြဲတမ်း တိုးတက်စေရန် သက်ဆိုင်သော အတွေ့အကြုံ၊ ဗဟုသုတများကို ရှာဖွေလေ့လာနေခြင်းကလည်း ပညာဖြစ်သည်။ ယနေ့ အောင်မြင်နေသည့် လုပ်ငန်းရှင် အွန်ထရယ်ပရယ်နား ၉၅ ရာခိုင်နှုန်းခန့်သည် တက္ကသိုလ်၊ ကောလိပ်များမှ ဘွဲ့ဒီဂရီတစ်ခုခု ရရှိထားကြသူများဖြစ်သည်။ 

လုပ်ငန်းအောင်မြင်စေရန် ခုန်ပျံကျော်လွှား တက်သွား၍မရပါ။ တစ်ဆင့်ချင်း တက်လှမ်းသွားနိုင်စေရန် ကြိုးစားရမည်။ အောင်မြင်သူ အွန်ထရယ်ပရယ်နားတို့၏ ဖြတ်သန်းမှုခရီးလမ်းများကို လေ့လာကြည့်ပါ။ သူတို့ တစ်ဆင့်ချင်း တက်ခဲ့ကြသူများဖြစ်နေသည်ကို တွေ့ကြရပါလိမ့်မည်။ နှစ်ပေါင်းများစွာ သူတို့ဘဝတွေကို ရင်းနှီးမြှုပ်နှံခဲ့ပြီးမှ ထိပ်ဆုံးတွင် နေရာလေးတစ်နေရာ ရလာကြခြင်းဖြစ်ပါသည်။ အချို့သော အွန်ထရယ်ပရယ်နားများသည် ချက်ချင်းအောင်မြင်သည်ဟု ထင်ကောင်းထင်ကြလိမ့်မည်။ သို့သော် သူတို့သည် အခြားသောလုပ်ငန်းတစ်ခုတွင် ဘဝကိုနှစ်ထားသော်လည်း၊ အားလပ်ချိန်များတွင် သူတို့ဖြစ်ချင်သည့်အလုပ်ကို စူးစိုက်လုပ်ဆောင်နေတတ်မှန်း သိချင်မှသိမည်။ 

အွန်ထရယ်ပရယ်နားတစ်ယောက် ဖြစ်လာရန် မလွယ်ပါ။ အချိန်တွေအများကြီးပေးကာ ရုန်းကန်ခဲ့ရပါသည်။ အချို့လည်း စိတ်မရှည်နိုင်သဖြင့် စွန့်လွှတ်သွားခဲ့သည်များလည်း ရှိနိုင်ပါသည်။ အခက်အခဲများနှင့် စွန့်စားအားထုတ်ရမှုသည် လုပ်ငန်းတိုင်းတွင် ရှိနိုင်ပါသည်။ အောင်မြင်သူတိုင်း လွယ်လွယ်လေးနှင့် အနေအထားတစ်ခုကို ရောက်လာသည်မဟုတ်။ သူတို့တွင် ရင်းနှီးခဲ့ရသော စွန့်လွှတ်နစ်နာခဲ့မှုပေါင်းများစွာနှင့် ဘဝကို တည်ဆောက်ခဲ့ကြခြင်းဖြစ်ကြောင်း နားလည်ထားသင့်သည်။

E-01

(Ref : Becoming an Entrepreneur)