News

POST TYPE

SUMMER SPECIAL

ဒစ်ဂျစ်တယ်ခေတ် ပညာရေး
26-Feb-2018

လူသားတို့သည် သူတို့တီထွင်ထားသည့် စက်များကို ဉာဏ်ရည်ချင်း မယှဉ်နိုင်သည့် ခေတ်ကိုရောက်လာပြီဟု ဆိုရမည်။ ဂဏန်းပေါင်းစက်ကို လူတွေက တီထွင်ကြသည်။ ကွန်ပျူတာခေတ် ရောက်လာသည်။ ဉာဏ်ရည်တု (AI) ဖြင့် လူသားအတိုင်း တုပတွေးတောနိုင်သည့်စက်တွေ ပေါ်လာသည်။ လူသားတို့ စက်တွေကို မယှဉ်နိုင်တော့။ ထို့ကြောင့် စက်ကိုမပြိုင်ဘဲ စက်ကိုကိုင်တွယ်နိုင်သူများဖြစ်စေရန် ခေတ်သစ်ပညာရေးက တောင်းဆိုလာသည်။

စတုတ္ထစက်မှုခေတ် ပြောင်းတော်လှန်ရေးကာလကို ရောက်လာပြီဖြစ်သည်။ လူသားတို့နေရာတွင် ခေတ်ပြောင်းတော်လှန်ရေးက စက်များကို အစားထိုးခဲ့သည်။ ယခု ကွန်ပျူတာနှင့် လူတုစက်များကို အစားထိုးရန် ပြင်ဆင်နေကြပြန်သည်။ ခေတ်သစ်က လူသားနေရာတွင် ကွန်ပျူတာစနစ်တွေက အစားထိုးလာသည်။ ဝန်ဆောင်မှုများတွင် လူသားအစား ကွန်ပျူတာနှင့် စက်ရုပ်တွေက ဝင်လာသည်။ 

Uber ဆိုသည့် သယ်ယူပို့ဆောင်ရေးဝန်ဆောင်မှုလုပ်ငန်းက လူမောင်းသော တက္ကစီများနေရာတွင် မောင်းသူမဲ့တက္ကစီများကို အစားထိုးရန်ပြင်ဆင်နေသည်။ လူမောင်းသောကားများကို လူမမောင်းဘဲ ကွန်ပျူတာဖြင့် ထိန်းကျောင်းနိုင်အောင် ကြိုးစားနေခြင်းက လူပေါင်းများစွာကို အလုပ်လက်မဲ့ဘဝ ရောက်သွားစေလိမ့်ဦးမည်။ 

စတော့ဈေးကွက်တွင် ၇၉ ရာခိုင်နှုန်းသော ဈေးကွက်လည်ပတ်စီးဆင်းမှုကို ဆော့ဖ်ဝဲများဖြင့် ထိန်းချုပ်လုပ်ကိုင်နေကြောင်း ယေးလ်စီမံခန့်ခွဲမှုကျောင်းမှ ဖရန့်ဇန်းက ဆိုသည်။ လူသားထက် စက်များက ပိုပြီးတိကျစွာ လုပ်ဆောင်ပေးနိုင်သဖြင့် စတော့ဈေးကွက်တွင်လည်း စက်တွေကို ပိုပြီးအားကိုးအားထားပြုလာကြသည်။ 

Google က လုပ်ဆောင်နေသည့် ဘာသာပြန်စနစ်တွေကလည်း ပိုပြီးကောင်းလာသည်။ ထို့ကြောင့် ဘာသာစကားသင်ကြားမှုများနှင့် ယင်းအပေါ် မှီခိုအားထားနေကြရသည့် လုပ်ငန်းများအရေးကလည်း ရင်လေးစရာဖြစ်သည်။ ကွန်ပျူတာစနစ်တွေကို ကောင်းသည်ထက်ကောင်းအောင်လုပ်လေ၊ လူသားတို့အဆင့်က လျော့ကျလေဖြစ်မှန်း သိသိနှင့်ပင် လူသားများ အလုပ်ပျောက်အောင် ဆက်ပြီးတီထွင်နေကြသည်။

AI ခေါ် ဉာဏ်ရည်တုကို စမ်းသပ်သုံးစွဲနေခြင်းက အောင်မြင်မှုရော၊ ဆုံးရှုံးမှုများကိုပါ နှစ်မျိုးစလုံး ဖစ်လာစေခဲ့သည်။ လူသားမဲ့ယာဉ်များကို တီထွင်လာနိုင်သည်။ အောင်မြင်မှုမှာ စီးပွားဈေးကွက်အသစ်ဖြစ်ပြီး ဆုံးရှုံးမှုမှာ လူသားတို့လုပ်အားဖြင့် ဝင်ငွေဖန်တီးခြင်းဖြစ်သည်။ လုပ်အားနေရာတွင် စက်အားနှင့် ကွန်ပျူတာတွေကို အစားထိုးလာသောကြောင့်ဖြစ်သည်။ 

ထို့ကြောင့် ပညာရေးနယ်ပယ်တွင်လည်း မည်သည့်ပညာရပ်များကို သင်ကြားမွေးထုတ်ပေးရမည်နည်းဆိုသည့် စဉ်းစားတွေးတောစရာများ ဖြစ်လာသည်။ အသက်မွေးဝမ်းကျောင်းပညာရပ်များကို သင်ကြားနေသည့် ပညာရေးတွင်ပါ အလှည့်အပြောင်းများကိုလုပ်ရန် ပြင်ဆင်ရပေတော့မည်။ လူဦးရေက တိုးပွားလာရန်သာရှိပြီး၊ အလုပ်အကိုင်အခွင့်အလမ်းများ ပိုပြီး နည်းပါးသွားချိန်တွင် ခေတ်စနစ်၏ တောင်းဆိုချက်ကို မလိုက်နိုင်သည့် ပညာရေးနှင့် နိုင်ငံသည် ခေတ်နောက်ကျနေပေလိမ့်မည်။

ဂျပန်နိုင်ငံတွင် ၂၀၁၉ ခုနှစ်ကတည်းက မူကြိုပညာရေးကိုစတင်ပြီး ပြုပြင်ပြောင်းလဲမှုများလုပ်ရန် ဝန်ကြီးချုပ် ရှင်ဇိုအာဘေးက ကြေညာထားသည်။ သူက ဒစ်ဂျစ်တယ်စီးပွားနှင့် လိုက်လျောညီထွေရှိမည့် ပညာရေးကို အောက်ခြေကစပြီး ပြောင်းလဲရန် စီစဉ်နေသည်။ ဂျပန်တို့လည်း အရည်အသွေးပြည့်ပညာရေး (Quality of Education) ကို ပြောင်းလဲရန်အတွက် အရင်းအနှီးများ စိုက်ထုတ်ပြင်ဆင်နေကြသည်။ သူတို့ Critical Thinking, Communication, Leadership ဆိုသည့် လမ်းကြောင်းအတိုင်း ပညာရေးကို ပြုပြင်ပြောင်းလဲရန် စီစဉ်နေကြသည်။ သူတို့ လူမျိုးတွေကို ဝေဖန်ဆန်းစစ်တတ်သည့် အရည်အချင်းများ ပြည့်ဝလာစေရန်၊ ကမ္ဘာ့ဆက်သွယ်ရေးစနစ်ကို ထိုးဖောက်ပြီး ကူးလူးဆက်ဆံနိုင်သူများ ဖြစ်လာစေရန်နှင့် အရာရာကို ဦးဆောင်နိုင်စွမ်းရှိသူ ခေါင်းဆောင်နိုင်သည့် အရည်အသွေးများ ရှိလာစေရန် တစ်ဖက်က ပြင်ဆင်နေသည်။

စတုတ္ထ စက်မှုခေတ်ပြောင်းတော်လှန်ရေးသည် ဂျပန်တို့ကို ခြောက်လှန့်နေသည့် အပြောင်းအလဲကြီးတစ်ခု ဖြစ်လာသည်။ ပညာရေးကို ခေတ်နှင့်ညီအောင် လိုက်ပြောင်းရမည်ကိုလည်း သူတို့သိထားသည်။ အလွတ်ကျက် အာဂုံဆောင်စနစ်သည် အလုပ်မဖြစ်တော့သည်ကို ကောင်းကောင်း သိမြင်လာသောကြောင့် စက်တွေကို တီထွင်၊ စက်တွေကို ထိန်းချုပ်၊ စက်တွေကို လုပ်ဆောင်ခိုင်းနိုင်သည့်ပညာများကို သင်ကြားမှ ဖြစ်မည်ကို နားလည်လာသည်။ 

ရေရှည်တွင် လူသားသည် စက်နှင့်ကွန်ပျူတာတို့ကို ယှဉ်နိုင်ရန် မလွယ်ပါ။ သို့သော် လူသားတို့သည် စက်များကို အကောင်းဆုံး တီထွင်ဖန်တီးနိုင်သည်။ စက်များကို ထုတ်လုပ်နိုင်သည်။ စက်များကို ထိန်းချုပ်ခိုင်းစေနိုင်မည့်ပညာများ ရှိသည်။ လူငယ်များကို ကွန်ပျူတာ၊ AI နှင့် ထိန်းချုပ်ရသည့်ပညာ၊ လိုအပ်ချက်များကို တီထွင်ဖန်တီးပေးနိုင်သည့်ပညာများကသာ အနာဂတ်တွင် ကမ္ဘာကို စိုးမိုးနိုင်မည်ဆိုခြင်းကို တရုတ်တို့လို ဂျပန်တွေလည်း နားလည်ထားသည်။ AI နောက်ကို တရုတ်တွေ တကောက်ကောက်လိုက်သည်။ ဂျပန်တို့ကလည်း ငါတို့ အဘယ်ကြောင့် နောက်ချန်နေခဲ့ရမည်နည်းဟု ပြေးလိုက်သည်။ ပြောင်းလဲမှု၏ အခြေခံမှာ ပညာဖြစ်သည်။ ထို့ကြောင့် ပညာရေးတွင် AI အခြေခံသည့် ဒစ်ဂျစ်တယ်ပညာရေးကို ဦးတည်နေကြသည်။ 

E-01
(Ref: Education in the Digital Age, Koichi Hamada)