News

POST TYPE

SUMMER SPECIAL

တောင်ကိုရီးယား စွန့်ဦးလူငယ်များ
25-Feb-2018


တောင်ကိုရီးယားနိုင်ငံ၊ ဆိုးလ်မြို့၏ အနုတ် ၅ ဒီဂရီ အေးမြသောရာသီထဲတွင် လူတွေက အနွေးထည် ထူထူကြီးတွေဝတ်ပြီး တစ်နေရာမှ တစ်နေရ ပြေးလွှားနေကြသည်။ Coex ဆိုသည့် အဆောက်အအုံကြီးတစ်ခုထဲတွင် အပူလွှတ်ထားသောကြောင့် လူများ သက်သောင့်သက်သာဖြင့် သွားလာနိုင်ကြသည်။ အချို့ဆိုလျှင် တီရှပ်များနှင့်ပင် လျှောက်သွားနေကြသည်။ တီရှပ်ဆိုသော်လည်း ကုမ္ပဏီတံဆိပ်ပါ ယူနီဖောင်းများဖြစ်သည်။

Coex အဆောက်အအုံထဲတွင် ၂၀၁၇ ခုနှစ် စွန့်ဦးလုပ်ငန်း စတင်ကုမ္ပဏီများပွဲတော်ကို ကျင်းပနေသည်။ သုံးရက်တာ နည်းပညာညီလာခံပွဲကို တောင်ကိုရီးယားနိုင်ငံ ဝန်ကြီးဌာနက ကြီးမှူးကျင်းပပေးခြင်းဖြစ်ပြီး လုပ်ငန်း အကြီး၊ အသေး၊ အလယ်အလတ် ကုမ္ပဏီအားလုံး ဤပြပွဲကို လာရောက်ပြီး ပူးပေါင်းဆင်နွှဲကြသည်။ ၂၀၁၇ နိုဝင်ဘာ ၃၀ မှ ဒီဇင်ဘာ ၂ ရက်နေ့အထိ ကျင်းပသည့် ထိုပွဲကို လူပေါင်း ၃,၀၀၀ ကျော် တက်ရောက်ခဲ့ကြသည်။

တောင်ကိုရီးယားအစိုးရသည် လူငယ်စွန့်ဦးလုပ်ငန်းရှင်လေးများကို အလေးထားပြီး အားပေးလျက်ရှိသည်။ ကိုယ်ပိုင်လုပ်ငန်းများ ထူထောင်ပြီး စီးပွားရေး တိုးတက်မြင့်မားအောင် လုပ်ဆောင်ချင်သည့် လူငယ်တိုင်းကို တစ်ဖက်တစ်လမ်းမှ အားပေးကူညီသည်။ လူငယ်များ၏ဘဝနှင့် လုပ်ငန်းကို မြှင့်တင်ပေးခြင်းသည် နိုင်ငံတော်ကို ထူထောင်နေခြင်းဟု အစိုးရက ခံယူထားပြီးဖြစ်သည်။

၂၀၁၆ ခုနှစ်ကတည်းက တောင်ကိုရီးယားနိုင်ငံတွင် သမ္မတပတ်ဂွမ်ဟီး၏ အာဏာနှင့် လုပ်ပိုင်ခွင့် အလွဲသုံးစားမှုများအပြင် အကျင့်ပျက်ခြစားမှုများကို ဖယ်ရှားနိုင်ခဲ့ကြသည်။ ထိုအကျင့်ပျက်ခြစားမှုတွင် Samsung ဆိုသည့် ကုမ္ပဏီကြီးကလည်း ပါဝင်ပတ်သက်နေသည်။ လူငယ်ကျောင်းသားများက သမ္မတနှင့် အပေါင်းအပါများကို လနှင့်ချီပြီး တိုက်ပွဲဝင်ကာ သမ္မတရာထူးက ပြုတ်ကျစေရန် လုပ်ဆောင်နိုင်ခဲ့ကြသည်။

လူ့အခွင့်အရေးကို လေးစားသည့် ရှေ့နေတစ်ဦးဖြစ်သူ မွန်ဂျေအင်းသည် သမ္မတသစ်ဖြစ်လာပြီး ပြုပြင်ပြောင်းလဲမှုများကို ဆက်တိုက်လုပ်ဆောင်လာကြောင်း တွေ့ရသည်။ ပြည်သူ့သမ္မတအဖြစ် တက်လာသော မွန်ဂျေအင်းသည် အကျင့်ပျက်လာဘ်စားမှုများကို တိုက်ဖျက်မည်ဆိုသည့် ကတိအတိုင်း ဆောင်ရွက်ရုံမက ချမ်းသာသည့်သူများအပေါ် အခွန်များတိုးကောက်ခြင်းဖြင့် သက်သေပြခဲ့သည်။

သမ္မတသစ်၏ အခွန်တိုးကောက်ခြင်းနှင့် လုပ်ငန်းရှင်များကို နှိပ်ကွပ်နေခြင်းကြောင့် စွန့်ဦးလုပ်ငန်းရှင်လေးများ ပေါ်ထွန်းလာပါ့မလားဟု ဝေဖန်မှုများ မြင့်တက်လာသည်။ သို့သော် အစိုးရက စွန့်ဦးလုပ်ငန်းရှင်လေးများအတွက် ၂၀၁၈ ခုနှစ်တွင် ထောက်ပံ့ပေးရန် လျာထားသည့် ဘတ်ဂျက်မှာ ဒေါ်လာ ၇ ဒသမ ၅ ဘီလီယံဖြစ်ပြီး ယင်းအနက် ဒေါ်လာ ၄၁၂ သန်း ထုတ်ပေးပြီးဖြစ်ကြောင်း တွေ့ရသည်။ စီးပွားတိုးမှ နိုင်ငံဖွံ့ဖြိုးမည်ကို သမ္မတက ကောင်းစွာလက်ခံထားကြောင်း လက်တွေ့ပြလိုက်ခြင်းဖြစ်သည်။

Coex တွင် ကျင်းပသည့် စွန့်ဦးလုပ်ငန်းရှင်များ ညီလာခံကို လူငယ်လုပ်ငန်းရှင်လေးများ လာရောက်ပြီး ပူးပေါင်းဆင်နွှဲကြသည်။ ထိုပွဲတွင် သူတို့ ရင်းနှီးမြှုပ်နှံသူများနှင့် တွေ့ခွင့်ရသည်။ မီဒီယာတွေနှင့်တွေ့ဆုံပြီး သူတို့လုပ်ငန်းများကို ထုတ်ဖော်ပြောဆိုခွင့်ရကြသည်။

ထိုပွဲကို တက်ရောက်လာသည့် Ordinary Seoul Life ကုမ္ပဏီလေးကို ထူထောင်ထားသော ပတ်မန်ဆူးသည် သူနှင့် ကျောင်းနေဖက် လူငယ် ၄ ဦးကို စုစည်းပြီး လုပ်ငန်းများကို အစပျိုးနေသည်။ ၂၀၁၇ ခု နှစ်လယ်ကတည်းက လုပ်ငန်းကို လုပ်ဆောင်နေကြပြီး တရုတ်နှင့် ကိုရီးယားတွင် ဆိုရှယ်မီဒီယာလုပ်ငန်းတစ်ခုကို ထိုးဖောက်နိုင်ရန် ကြိုးစားနေကြသည်။ 

သူတို့နှင့် ပူးပေါင်းနေသူမှာ တရုတ်က လုပ်ငန်းရှင်ဖြစ်သည်။ ဆိုရှယ်မီဒီယာကို အခြေခံထားသည့် Parklu ဆိုသော လိုင်းတစ်ခုကို ထူထောင်ပြီး လုပ်ငန်းရှင်များနှင့် ချိတ်ဆက်ပြီး လုပ်ဆောင်နေရာ ယခုဆိုလျှင် သူတို့ ဆိုရှယ်မီဒီယာတွင် လုပ်ငန်းရှင်ပေါင်း ၂၀၀၀၀ ကျော်ကို စုစည်းထားနိုင်ပြီဖြစ်သည်။ သူတို့ရည်ရွယ်ချက်မှာ ထုတ်လုပ်ထားသည့် ကုန်ပစ္စည်းများကို ရောင်းအားတိုးမြှင့်ပေးရာတွင် အထောက်အကူပြုရန် ဖြစ်သည်။ 

တရုတ်တွင် ဂျက်မာဆိုသည့် ပုဂ္ဂိုလ်ကလည်း အွန်လိုင်းအရောင်းအဝယ်ကို သုံးနှစ်လောက်ဖောက်ပြီး Alibaba ကို ထူထောင်နိုင်ခဲ့ခြင်းအပေါ် သူတို့က အားကျနေသည်။ ထို့ကြောင့်လည်း သူတို့သည် အွန်လိုင်းကတစ်ဆင့် လုပ်ငန်းများကို တိုးချဲ့နေရာ အစိုးရက အသိအမှတ်ပြုသည်အထိ အောင်မြင်ခဲ့သည်။ 

တောင်ကိုရီးယားနိုင်ငံသည် လူနေမှုအဆင့် အလွန်မြင့်သလို စားသောက်နေထိုင်စရိတ်တွေလည်း အလွန်မြင့်မားသည်။ နိုင်ငံအတွင်း ဝင်ငွေမညီမျှမှုများကြောင့် ဆင်းရဲချမ်းသာ ကွာဟချက်များလည်း ရှိနေပြီး လူငယ်အများစုမှာ ဆင်းရဲကြသည်ကများသည်။ အထူးသဖြင့် ဆိုးလ်မြို့တွင် နေထိုင်ကြသည့် လူငယ်တွေ၏ဘဝမှာ အလွန်ကွာခြားချက်ကြီးမားနေကြောင်း တွေ့ရသည်။ 
 
စီးပွားရေးက မငြိမ်ဘဲ ခန့်မှန်းရခက်သောကြောင့် လုပ်ငန်းတစ်ခုကို စွန့်စားလုပ်ဆောင်ရန် မဝံ့ရဲဘဲ ပုံမှန်ဝင်ငွေလေးနှင့် ကျေနပ်နေကြသည့် လူငယ်ပေါင်းများစွာလည်း ရှိနေသည်။ ထိုလူငယ်များကြားတွင် Ordinary Seoul Life ကိုထူထောင်သည့် လူငယ်လေးဦးသည် သေလုအောင် ရုန်းကန်လှုပ်ရှားနေကြရသည်။ “ကျွန်တော်တို့ စက်ရုပ်တွေလို လှုပ်ရှားခဲ့ရပါတယ်”ဟုလည်း ပတ်မန်ဆူးက ပြောကြားသည်။

ပတ်မန်ဆူးသည် သူ့ဖခင် ကွယ်လွန်သွားပြီးနောက်တွင် စာကို အပြင်းအထန်ကြိုးစားရသည်။ ကျောင်းစာအပြင် အပြင်စာတွေလည်း အငန်းမရဖတ်သည်။ သူက ကြီးပွားချမ်းသာချင်သည်။ သူဖတ်ခဲ့သည့် စာအုပ် ပေါင်း ၅၀၀ ခန့်ရှိမည်ဟုလည်း ဆိုသည်။ အများစုမှာ စိတ်ကူးနှင့် စိတ်ဓာတ်ကို ရင့်သန်စေမည့် စာများဖြစ်သည်။ 

သူ့ကိုကြည့်လိုက်လျှင် ဆံပင်စုတ်ဖွားနှင့် အထင်ကြီးစရာ မရှိသော်လည်း သူက Ordinary Seoul Life ကို ထူထောင်ထားပြီး CEO အဖြစ် တာဝန်ယူထားသည်။ ဆိုးလ်တွင် လုပ်ငန်းတစ်ခုစတင်ရန် ရုံးခန်းကို ငှားကတည်းက ပြဿနာစသည်။ သို့သော် တိုက်ခန်းလေးတစ်ခန်းကို တူတူတန်တန်ငှားပြီး လုပ်ငန်းစခဲ့သည်။ သူက -

“စတိဗ်ဂျော့တောင် ကားဂိုဒေါင်ကနေ လုပ်ငန်းကို စတင်ခဲ့ရသေးတာပဲ။ ကိုရီးယားမှာ အခန်းခက အရမ်းဈေးကြီးတယ်ဗျာ”ဟုလည်း ညည်းရှာသည်။ အခန်းကျဉ်းလေးထဲတွင် လုပ်ငန်းကို စရင်းက တောင်ကိုရီးယား ရေတပ်က ပစ္စည်းအမှာကို ပထမဆုံး လက်ခံရရှိလိုက်သည်။ သူတို့အတွက် ပထမဆုံး စိန်ခေါ်သည့်အလုပ်ကို စတင်လုပ်ဆောင်ခဲ့ရခြင်းဖြစ်သည်။ ရေတပ်ကို ပစ္စည်းသွင်းရန် စီစဉ်နေစဉ်တွင် တရုတ်စကားကျွမ်းကျင်စွာ ပြောဆိုနိုင်သည့် ကင်ဝူဂျေးနှင့် တွေ့ဆုံခွင့်ရခဲ့သည်။ ကင်သည် ကိုရီးယား၊ အင်္ဂလိပ်၊ တရုတ် သုံးဘာသာကို ကျွမ်းကျင်စွာ ပြောဆိုနိုင်သည်။ သူက ပတ်မန်ဆူးကို တရုတ်ဈေးကွက်နှင့် စတင်မိတ်ဆက်ပေးပြီး မျက်စိဖွင့်ပေးလိုက်သည်။ 

ကင်က ပတ်နှင့် အဘယ်ကြောင့်တွဲဖြစ်သနည်း ဆိုခြင်းကို ဤသို့ရှင်းပြသည်။

“ပတ်က တာဝန်ယူတတ်တယ်။ သူပြောတဲ့အတိုင်း လုပ်ပေးတယ်။ ကတိတည်တယ်။ အသေးအဖွဲ့လေးကအစ ဂရုစိုက်ပြီး ဖြေရှင်းပေးတတ်တယ်။ သူ့စိတ်ဓာတ်ကိုကြိုက်လို့ လက်တွဲဖြစ်တာ”ဟု ပြောသည့်စကားလေးမှာ စွန့်ဦးလုပ်ငန်း စတင်လုပ်ဆောင်လိုသူများ အလေးထားစရာဖြစ်သည်။

ပတ်သည် လူငယ်လေးတစ်ယောက်ဖြစ်သော်လည်း စာဖတ်သည်။ စာမဖတ်လျှင် လေ့ကျင့်ခန်းလုပ်သည်။ သူ့ကို ကြည့်လိုက်လျှင် အိပ်နေ၊ နားနေသည်မရှိ အမြဲ အလုပ်လုပ်နေသည်ကိုသာ မြင်နေရသောကြောင့် ကင်က စိတ်ဝင်စားမိခြင်းဖြစ်သည်။ ပတ်ကတော့ ကတိတည်ခြင်းမှာ အဖေ့ထံကရသည့် အမွေဟု ဆိုသည်။

၂၀၁၇ ခုနှစ် စွန့်ဦးလုပ်ငန်းရှင်များပွဲတွင် ပတ်၏ Ordinary Seoul Life လုပ်ငန်းကို လူအများ စိတ်ဝင်စားကြသည်။ သူက ဘာသာစကားတွင် အားနည်းနေသေးသော်လည်း တရုတ်နှင့် အခြားကုမ္ပဏီကြီးများ သူတို့ကို ပူးပေါင်းဆောင်ရွက်လာစေရန် ပွဲတော်ကာလအတွင်း စွမ်းဆောင်နိုင်ခဲ့သည်။ သူတို့ကုမ္ပဏီ ထူထောင်ပြီး ၇ လအကြာတွင် အကျိုးအမြတ်လေးများကို စတင်ခံစားရန် အခွင့်အရေးဖြစ်လာသည်။ 

သူတို့က အစိုးရထံမှ အထောက်အပံ့များကို မျှော်လင့်ထားသည်။ အကယ်၍ အထောက်အပံ့များရလာလျှင် သုတေသနနှင့် ဖွံ့ဖြိုးရေးလုပ်ငန်းများကို ပိုပြီး လုပ်ဆောင်နိုင်မည်။ သူတို့တွင် အချက်အလက်များကို စုဆောင်းထားရန် လိုနေသေးသည်။ အချက်အလက်များစွာက သူတို့ဝန်ဆောင်ပေးမည့် လုပ်ငန်းကို များစွာ အထောက်အကူပြုပေးနိုင်သောကြောင့် ဖြစ်သည်။ 

ကိုရီးယားအစိုးရသည် လုပ်ငန်းငယ်များ စတင်လုပ်ဆောင်နေသည့် လူငယ်များကို အထောက်အပံ့များ ထုတ်ပေးနေပါသည်။ Kakao ဆိုသည့် လုပ်ငန်းငယ်လေးကို အလုပ်သမား ၁၀ ဦးနှင့် စတင်သည့်ဘဝတွင် အစိုးရ အထောက်အပံ့ရလိုက်သောကြောင့် ယခုအခါ ဝန်ထမ်းပေါင်း ထောင်ချီနှင့် လည်ပတ်နေသည့် လုပ်ငန်းကြီးတစ်ခုဖြစ်နေသည်။

၂၀၁၇ ခုနှစ်တွင် တောင်ကိုရီးယားနိုင်ငံအတွင်း စွန့်ဦးလုပ်ငန်းငယ်လေးပေါင်းများစွာ စီးပွားရေးလုပ်ငန်းများထဲကို ရောက်လာကြသည်။ ယခင်အစိုးရလက်ထက်က စွန့်ဦးလူငယ်တို့ မလှုပ်နိုင်သည့် အနေအထားဖြစ်သည်။ အဘယ်ကြောင့်ဆိုသော် လက်ဝါးကြီးအုပ်ထားသူများကို မကျော်လွှားနိုင်ကြပေ။ သို့သော် သမ္မတသစ်လက်ထက်တွင် စီးပွားရေးဆိုင်ရာမူဝါဒနှင့် သဘောထားတွေ ပြောင်းလာသည်။ 

ယခင်က လူငယ်တို့လုပ်ငန်းများတွင် ဝင်မတိုးရဲဆိုသည်မှာ အစိုးရ၏ ပံ့ပိုးမှုနည်းရုံမက လျစ်လျူရှုထားသောကြောင့်လည်း ဖြစ်သည်။ လုပ်ငန်းလုပ်ရန် ငွေမရှိ၊ ငွေကလည်း ချေးမရသဖြင့် ကိုယ်ပိုင်ငွေများနှင့် ထူထောင်ရင်းက မြုပ်သွားရသည့်လုပ်ငန်းတွေ မနည်းဖြစ်ခဲ့ရသည်။ 

သို့သော် ၂၀၁၈ ခုနှစ်ကတော့ အကောင်းမြင်စိတ်တွေ ရောင်နီသန်းလာသည်။ သမ္မတသစ်ကိုယ်တိုင်က စွန့်ဦးလုပ်ငန်းရှင်လေးများကို ထောက်ခံအားပေးနေသဖြင့် အားတက်စရာဖြစ်လာသည်။ ထို့ကြောင့်လည်း အပြိုင်အဆိုင် မိမိတို့လုပ်ငန်းများကို အစိုးရထံ ပွဲထုတ်ချပြလာကြသည်။

နိုင်ငံစီးပွားဖွံ့ဖြိုးတိုးတက်ရေးတွင် အစိုးရ၏ အထောက်အပံ့အားက အရေးကြီးပါသည်။ လူငယ်တွေက ယခုလို လုပ်ငန်းရှင်လေးများ စုပေါင်းဆွေးနွေးခွင့်ရမည့် ညီလာခံကို နိုင်ငံအနှံ့ကျင်းပပေးရန် အဆိုပြုကြသည်။ နေရာတိုင်းတွင် ရွက်ပုန်းသီးများရှိနိုင်သည်။ ဖော်ထုတ်ရန် အရေးကြီးသည်။

ယနေ့ခေတ်သည် တစ်ဦးကောင်း တစ်ယောက်ကောင်း စွမ်းဆောင်နိုင်သည့် ခေတ်မဟုတ်။ ပူးပေါင်းဆောင်ရွက်ခြင်းဖြင့် အဖြေကောင်းတစ်ခုကို ရှာနိုင်သည်ဆိုသော သဘောတရားကို လူငယ်တွေ နားလည်သဘောပေါက်လာကြသည်။ ထို့ကြောင့်လည်း အစိုးရက အခွင့်အလမ်းများ ဖော်ဆောင်ပေးထားရန် အရေးကြီးသည်။ လမ်းဖောက်ပေးထားမှ လျှောက်လာနိုင်မည့် အနေအထားတွင် လမ်းဖွင့်ပေးရန်သာမက လျှောက်နိုင်မည့် အခွင့်အရေးများကို ပေးရန်လည်းလိုအပ်ကြောင်း သူတို့က ထောက်ပြကြသည်။

၂၀၁၈ ခုနှစ်တွင်လည်း စွန့်ဦးလုပ်ငန်းရှင်လေးများ၏ လုပ်ငန်းပြပွဲများ၊ ဆွေးနွေးပွဲများကို လုပ်ဆောင်ဦးမည် ဖြစ်ပါသည်။ အွန်လိုင်းလုပ်ငန်းများ တိုးတက်ဖွံ့ဖြိုးနေချိန်တွင် ဈေးကွက်စီးပွားရေးစနစ်က ပုံစံပြောင်းနေသည်။ ပြောင်းလဲနေသည့် ဈေးကွက်အပေါ်မူတည်ပြီး မည်သို့ထိုးဖောက်နိုင်သနည်းဆိုသည့် ဗျူဟာတွေက ပိုပြီးအရေးကြီးလာသည်။ လမ်းအိုလမ်းဟောင်းအတိုင်း သွားနေမည့် သက်ကြီးစီးပွားရေးသမားကြီးများနှင့် သက်ငယ်လုပ်ငန်းရှင်၊ ပညာရှင်များ ပြိုင်ဆိုင်ကြရမည့် အချိန်ကာလတစ်ခုကို ရောက်လာခဲ့ပြီဖြစ်သည်။ 

ကင်တို့လို အဆက်အသွယ်ကောင်းသည့်သူများကလည်း လူငယ်များနှင့် သူဌေးကြီးများကြားတွင် ပေါင်းကူးအဖြစ် လုပ်ဆောင်ပေးရန် စိတ်ဝင်စားလာသည်။ အစိုးရက ကျောထောက်နောက်ခံပြုပေးလိုက်လျှင် လူငယ်များအနေဖြင့် ကမ္ဘာ့လုပ်ငန်းရှင်များနှင့် ဆက်သွယ်လုပ်ဆောင်ရန် ပိုပြီး လွယ်ကူသွားလိမ့်မည်ဟု ကင်က လက်ခံထားသည်။

ကိုရီးယားတွင် လူငယ်တွေ ငြိမ်မနေပါ။ သူတို့နည်း သူတို့ဟန်နှင့် လှုပ်ရှားနေပါသည်။ အစိုးရကလည်း အလကားမနေပါ။ စောင့်ကြည့်နေပါသည်။ စီးပွားကောင်းမှ နိုင်ငံကောင်းမည်ကို လက်ခံပြီး၊ စီးပွားပုံစံသစ်ကို လူငယ်မျိုးဆက်သစ်တို့လက်ထဲတွင် ထည့်ပေးကြည့်ရန် စိတ်ကူးကောင်းသူများသည်လည်း နိုင်ငံစီးပွားအခြေအနေ ပြောင်းလဲခြင်း၏ အသီးအပွင့်များကို ခံစားရမည်သာဖြစ်သည်။

E-01
(Ref: Tech in Asia)