News

POST TYPE

SPORTS

အခွန်ပြဿနာကြောင့် လာလီဂါသို့ ကမ္ဘာကျော်များ ပြောင်းရွှေ့မှု ကျဆင်းသွားမည်ကို ပြိုင်ပွဲကျင်းပရေး ကော်မတီဥက္ကဋ္ဌ စိုးရိမ်
19-Jun-2017 tagged as

မက်ဒရစ်၊ ဇွန် ၁၉

စပိန်လာလီဂါပြိုင်ပွဲ ကျင်းပရေးကော်မတီဥက္ကဋ္ဌ ဂျာဗီးယား တီဘတ်စ်သည် စပိန်အစိုးရရှေ့နေများနှင့် စပိန်အခွန်ဦးစီးဌာနတို့၏ အချို့သော လုပ်ရပ်များက လာလီဂါပြိုင်ပွဲသို့ ကမ္ဘာကျော် ကစားသမားများ ပြောင်းရွှေ့ရောက်ရှိနိုင်ရေးကို အတားအဆီး ဖြစ်သွားနိုင်ကြောင်း ဝေဖန်ပြောကြားလိုက်သည်ဟု Marca က ဖော်ပြထားသည်။

တီဘတ်စ်သည် စပိန်အစိုးရရှေ့နေများနှင့် စပိန်အခွန်ဦးစီးဌာနတို့က ရီးရဲလ်မက်ဒရစ် တိုက်စစ်မှူး စီရော်နယ်ဒိုကို အခွန်တိမ်းရှောင်သည်ဟု စွပ်စွဲကာ အမှုစွဲဆိုရန် ပြင်ဆင်လိုက်ခြင်းကိစ္စတွင် စီရော်နယ်ဒိုဘက်က အပြည့်အဝ ထောက်ခံရပ်တည်လိုက်ပြီဖြစ်ပြီး ရီးရဲလ်မက်ဒရစ်ကို စီရော်နယ်ဒို စွန့်ခွာသွားပါက ပြိုင်ပွဲ၏ပုံရိပ်ပါ ကျဆင်းသွားလိမ့်မည်ဟု တီဘတ်စ်က အသိပေးထားပြီဖြစ်သည်။

စပိန်အစိုးရရှေ့နေများနှင့် စပိန်အခွန်ဦးစီးဌာနတို့သည် စီရော်နယ်ဒို မတိုင်မီတွင် ဘာစီလိုနာ ကစားသမားများဖြစ်သည့် နေမာ၊ မက်ဆီ၊ မာရှေယာနိုနှင့် ဆန်းချက်ဇ်တို့ကို အခွန်တိမ်းရှောင်မှုဖြင့် အမှုစွဲဆိုခဲ့ပြီး ဆန်းချက်ဇ်နှင့် မာရှေယာနိုတို့က အခွန်တိမ်းရှောင်မိခဲ့ကြောင်း အပြစ်ဝန်ခံခဲ့သော်လည်း နေမာနှင့် မက်ဆီတို့ကမူ ၎င်းတို့အနေနှင့် မတရားစွပ်စွဲခံရခြင်း ဖြစ်သည်ဟု ငြင်းဆန်ကာ အမှုရင်ဆိုင်နေဆဲဖြစ်သည်။

တီဘတ်စ်သည် စီရော်နယ်ဒို၊ မက်ဆီနှင့် နေမာတို့ကို အခွန်တိမ်းရှောင်သည်ဟု စပိန်အစိုးရရှေ့နေများနှင့် စပိန်အခွန်ဦးစီးဌာနတို့က စွပ်စွဲထားခြင်းသည် အနာဂတ်ကာလတွင် ကမ္ဘာကျော် ကစားသမားများ လာလီဂါသို့ ပြောင်းရွှေ့ ရောက်ရှိနိုင်ရေးကို အတားအဆီး ဖြစ်လာလိမ့်မည်ဟု အခိုင်အမာ ယူဆထားပြီး စပိန်အစိုးရရှေ့နေများနှင့် စပိန်အခွန် ဦးစီးဌာနတို့က နာမည်ကျော် ကစားသမားများကို အခွန်ကိစ္စဖြင့် အမြဲတစေ ပြဿနာရှာလေ့ ရှိသည်ဟု ထင်မြင်ယူဆသွားပါက ကမ္ဘာကျော် ကစားသမားများမှာ လာလီဂါသို့ ပြောင်းရွှေ့ကစားရန် လွန်စွာတွေဝေသွားလိမ့်မည်ဟု တီဘတ်စ်က အသိေးထားသည်။

သတင်းမီဒီယာများနှင့် တွေ့ဆုံခဲ့ရာတွင် တီဘတ်စ်က “စပိန်အစိုးရရှေ့နေတွေနဲ့ စပိန်အခွန်ဦးစီးဌာနတို့အနေနဲ့ တစ်ချို့ကိစ္စတွေကို သတိထား ကိုင်တွယ်သင့်နေပါပြီ။ စီရော်နယ်ဒိုလို ကစားသမားမျိုးသာ ရီးရဲလ်မက်ဒရစ်ကို စွန့်ခွာသွားခဲ့ရင် လာလီဂါပြိုင်ပွဲရဲ့ ပုံရိပ်လည်း ကျဆင်းသွားပါလိမ့်မယ်။ ဒီအတိုင်းဆိုရင် အနာဂတ်ကာလမှာ လာလီဂါပြိုင်ပွဲက ကမ္ဘာကျော် ကစားသမားတွေကို ဆွဲဆောင်နိုင်စွမ်း လျော့ကျသွားတော့မှာပါ။ ဒါဟာ ကျွန်တော်တို့အတွက် စိုးရိမ်ရမယ့် အခြေအနေပါပဲ”ဟု ပြောကြားသွားခဲ့သည်။

  • TAGS