News

POST TYPE

SPORTS

ကွန်ဖက်ဒရေးရှင်းဖလားပွဲစဉ်များကို ဝက်ဝံမလေး နီကာနှင့်ကြောင်ကြီး အာခီလိစ်တို့က ခန့်မှန်းပေး
19-Jun-2017 tagged as


မော်စကို၊ ဇွန် ၁၉

ရုရှားနိုင်ငံတွင် ကျင်းပနေသည့် ကွန်ဖက်ဒရေးရှင်းဖလားပွဲစဉ်များကို ဝက်ဝံမလေး နီကာနှင့် ကြောင်ကြီး အာခီလိစ်တို့က ခန့်မှန်းပေးနေပြီး နီကာနှင့် အာခီလိစ်တို့ကို ၂၀၁၈ ကမ္ဘာ့ဖလားပွဲစဉ်များကို ခန့်မှန်းပေးရန်အတွက်လည်း ရုရှားကမ္ဘာ့ဖလားပြိုင်ပွဲကျင်းပရေး ကော်မတီက ရွေးချယ်ထားပြီဖြစ်ကြောင်း RT News က ဖော်ပြထားသည်။

ဝက်ဝံမလေး နီကာနှင့် ကြောင်ကြီး အာခီလိစ်တို့ကို ဆဋ္ဌမအာရုံရ သတ္တဝါများဟု တင်စားမှုများရှိနေပြီး ဝက်ဝံမလေး နီကာမှာ ကမ္ဘာ့ဘောလုံးအဖွဲ့ချုပ်(ဖီဖာ)၏ တရားဝင်ဟောကိန်းထုတ် သတ္တဝါအဖြစ် သတ်မှတ်ပေးခြင်း ခံထားရပြီလည်းဖြစ်သည်။

အသက် ၂ နှစ်အရွယ်ရှိ ပိုလာဝက်ဝံမလေး နီကာသည် လွန်ခဲ့သည့် တစ်နှစ်ခန့်က ချူကော့ကာဒေသမှနေ၍ မော်စကိုသို့ ရောက်လာခဲ့ခြင်းဖြစ်ပြီး နီကာမှာ သူမ၏စိတ်စွမ်းအင်ကြောင့် ယခုအချိန်တိုင်သည်အထိ အသက်ရှင်သန်နေခြင်း ဖြစ်သည်ဟု ၎င်း၏လေ့ကျင့်ရေးမှူး အလက်ဇန္ဒား အိုင်ဂိုရော့ဗ်က ပြောကြားထားသည်။

နီကာသည် ၎င်း၏ဝက်ဝံအုပ်စုနှင့် လှည့်လည် သွားလာနေစဉ်တွင် ဒဏ်ရာရရှိကာ တစ်ကောင်တည်း သင်းကွဲ ကျန်နေရစ်ခဲ့ခြင်းဖြစ်ပြီး လူများ နေထိုင်ရာ နေရာတစ်ခုသို့ တွားသွားရောက်ရှိလာခဲ့ခြင်းက သူမကို အသက်ဆက်ရှင်ခွင့် ရစေခဲ့ခြင်းဖြစ်သည်။

လေ့ကျင့်ရေးမှူး အိုင်ဂိုရော့ဗ်သည် လူအများနေထိုင်ရာ နေရာကို နီကာ မှန်ကန်စွာ မှန်းဆနိုင်ခဲ့ခြင်းမှာ သူမ၏ စိတ်စွမ်းအင်ကြောင့်ဖြစ်သည်ဟု ယုံကြည်ထားပြီး မော်စကိုတိရစ္ဆာန်ရုံတွင် နေထိုင်ခဲ့စဉ်ကာလအတွင်း၌လည်း နီကာ၏ စိတ်စွမ်းအင်ဆိုင်ရာ အံ့သြလောက်ဖွယ် စွမ်းဆောင်ရည်များကို ၎င်းတို့အနေနှင့် အကြိမ်ကြိမ် အဖန်ဖန် မြင်ခဲ့ရပြီးဖြစ်သည်ဟုလည်း အိုင်ဂိုရော့ဗ်က အသိပေးထားသေးသည်။

နီကာသည် ဘောလုံးများနှင့် ဆော့ကစားရခြင်းကို လွန်စွာခုံမင်ပြီး ဘောလုံးများကို ခေါင်းအုံး၍ အိပ်စက်တတ်လေ့ ရှိသည်မှာလည်း နီကာ၏ထူးခြားသည့် အလေ့အထတစ်ခုဖြစ်ကြောင်း အိုင်ဂိုရော့ဗ်က ပြောကြားထားသေးသည်။

မော်စကိုတိရစ္ဆာန်ရုံ အုပ်ချုပ်ရေးအဖွဲ့သည် နီကာကို ၂၀၁၇ ကွန်ဖက်ဒရေးရှင်းဖလားနှင့် ၂၀၁၈ ကမ္ဘာ့ဖလားပြိုင်ပွဲတို့အတွက် တရားဝင် ခန့်မှန်းသတ္တဝါအဖြစ် သတ်မှတ်ပေးပါရန် ဖီဖာနှင့်ဆက်သွယ်၍ ခွင့်ပြုချက် တောင်းခံခဲ့ခြင်းဖြစ်ပြီး မက္ကဆီကိုနှင့် ပေါ်တူဂီတို့ ယှဉ်ပြိုင်ကစားခဲ့သည့် ကွန်ဖက်ဒရေးရှင်းပွဲစဉ်တွင် နီကာက ပွဲစတင်ခန့်မှန်းခဲ့ခြင်းဖြစ်သည်။

ကြောင်ကြီး အာခီလိစ်သည် ရုရှားနှင့် နယူးဇီလန်တို့ ယှဉ်ပြိုင် ကစားခဲ့သည့်ပွဲစဉ်တွင် ရုရှားအလံစိုက်ထားသည့် အစာခွက်အတွင်းမှ အစာကိုစား၍ ရုရှားနိုင်မည်ဟု ခန့်မှန်းပေးခဲ့ပြီး ကြောင်ကြီး အာခီလိစ်မှာ စိန့်ပီတာစဘတ်ဂ်ျမြို့တွင် ၎င်း၏ပိုင်ရှင်နှင့်အတူ နေထိုင်လျက်ရှိသည်။

  • TAGS