News

POST TYPE

SPORTS

နည်းပြဂျာဒင်းမ်ကို မိုနာကို ရာထူးထုတ်ပယ်၊ နည်းပြသစ်ဖြစ်လာရန် အွန်နရီ ရေပန်းစား
11-Oct-2018


ပဲရစ်၊ အောက်တိုဘာ ၁၁

ပြင်သစ်လီဂူးကလပ် မိုနာကိုအသင်းသည် အသင်းနည်းပြ ဂျာဒင်းမ်ကို ရာထူးထုတ်ပယ်လိုက်ပြီဖြစ်ပြီး လက်ရှိတွင် ဂျာဒင်းမ်နေရာကို အစားဝင်ရန်အတွက် မိုနာကိုအသင်းထံတွင် ကစားသမားဘ၀အစပြုခဲ့သော ပြင်သစ်လက်ရွေးတိုက်စစ်မှူးဟောင်း အွန်နရီက ထိပ်ဆုံးနေရာမှနေ၍ ရေပန်းစားနေကြောင်း BBC က ဖော်ပြထားသည်။

မိုနာကိုအသင်းသည် အွန်နရီကို နည်းပြတာဝန်ပေးအပ်နိုင်ရန် သဘောတူညီမှုများရခဲ့ပြီးဖြစ်၍ ဂျာဒင်းမ်ကို ရာထူးထုတ်ပယ်လိုက်ခြင်းဖြစ်ဖွယ်ရှိကြောင်း ဆက်စပ်သတင်းများလည်း ထွက်ပေါ်နေပြီး မိုနာကိုမှာ လက်ရှိတွင် ပြင်သစ်လီဂူးအမှတ်ပေးဇယား၌ တန်းဆင်းဇုန်အတွင်းသို့ရောက်ရှိနေသည့်အတွက် ယခုကဲ့သို့ နည်းပြအပြောင်းအလဲလုပ်ရန် ဆုံးဖြတ်လိုက်ခြင်းဖြစ်သည်။

မိုနာကိုသည် ဂျာဒင်းမ်ကို ၂၀၁၄ ခုနှစ်၌ အသင်းနည်းပြအဖြစ် စတင်တာဝန်ပေးအပ်ခဲ့ခြင်းဖြစ်ပြီး ၎င်း၏လက်ထက်တွင် ၂၀၁၇ ခုနှစ်၌ မိုနာကိုမှာ ပြင်သစ်လီဂူးအမှတ်ပေးချန်ပီယံဖြစ်ခွင့်ရရှိသည်အထိ အောင်မြင်ခဲ့ဖူးသည်။

ပြင်သစ်သတင်းမီဒီယာများသည် မိုနာကိုအသင်း ကျရှုံးရခြင်းတွင် အဓိကတာဝန်ရှိသည်မှာ နည်းပြ ဂျာဒင်းမ်မဟုတ်ဘဲ အသင်းတာဝန်ရှိသူများသာဖြစ်ကြောင်း ထောက်ပြထားပြီး အသင်း၏အဓိကကစားသမားများကို အဆက်မပြတ် ရောင်းထုတ်ခဲ့ခြင်း၊ ရောင်းထုတ်လိုက်သည့်ကစားသမားများ၏ကွက်လပ်ကို အစားပြန်ဖြည့်ရန်အတွက် အဆင့်မီကစားသမားများ ပြန်မခေါ်ယူခဲ့ခြင်းစသည့်ဒဏ်ကို မိုနာကိုအနေနှင့် ခံစားနေရခြင်းဖြစ်သည်ဟုလည်း ပြင်သစ်သတင်းမီဒီယာများက သုံးသပ်ထားသေးသည်။