News

POST TYPE

SATIRE

သို့ / သိပ္ပံပညာရှင်
14-Aug-2016

၁။

ဤအရာ ဤကိစ္စများသည် ဖြစ်နိုင်ကောင်းသည် မဟုတ်ပါ၊၊
သို့သော် မဖြစ်နိုင်မှန်းသိလျက်နှင့် ဤသို့ဆန္ဒ ဖြစ်မှုခြင်းကား ကျွန်ုပ် လွန်လေသလား မလွန်ဘူးလား ဖတ်ကြည့်ပါလေ၊၊

၂။

ယာဉ်များအနေနှင့် ယာဉ်မရပ်ရအမှတ်အသား ဖြစ်သည့် အနီနှင့် အဖြူရောင်မျဉ်းကျားအနီးသို့ ထိုးဆိုက် ရပ်တန့်လာသည့်အခါ ဆေးရောင်သည် အလိုအလျောက် အနက်နှင့်အဝါသို့ ပြောင်းလဲပေးတတ်သည့် သုတ်ဆေးမျိုးကို သိပ္ပံပညာရှင်များက တီထွင်နိုင်လျှင် ကောင်းပါအံ့ဟူ၍ အတွေးဝင်မိပါသည်။
သို့ဆိုလျှင် ချမ်းသာ၊ ဆင်းရဲ မည်သည့်လူတန်းစား၏ မည်သည့်ယာဉ်မဆို ဖြူနီကြားတွင် စည်းကမ်းမဲ့စွာ ရပ်တန့်ထားခြင်းကို ကျွန်ုပ်တို့ မြင်တွေ့ရတော့ မဟုတ်ပေ၊၊ ထို့အတွက် မြင်ရသူအဖို့ စိတ်တိုခြင်း စိတ် အနှောင့်အယှက် ဖြစ်ရခြင်းတို့မှ လျော့ကျလိမ့်မည် ဖြစ်သည်၊၊

ဖမ်းဆီးအရေးယူမှု မပြုမည့်အတူတူ အစိုးရကို ဆဲရေးပြစ်တင်ရန်လည်း မလိုတော့၊၊
အစိုးရသည်လည်း အလုပ်မရှုပ်တော့၊၊
ကောင်လင့်တေး၊၊

လမ်းဘေးဈေးသည်များအရေး ကာလကြာရှည် ကတည်းက မျက်စိစုံမှိတ်ထားရရှာသည့် မြို့တော်ဝန်ကြီးများ အဆက်ဆက်ကို သနားလှပါပြီ။ လမ်းဘေး ဈေးသည်များကိုလည်း သနားပါသည်။ သူ့ဒုက္ခနှင့်သူ။ 

ယာဉ်ကြောကျပ်ခြင်းပြဿနာ၊ လမ်းပိတ်ဆို့ခြင်း ပြဿနာတို့အတွက် အစိုးရမင်းများ၊ ပညာရှင်များ အနေနှင့် အကြံအိုက်၊ ပြည်သူအများကလည်း နေ့စဉ်နှင့်အမျှ စိတ်ဆင်းရဲခြင်းများစွာ။
ယာဉ်တွေပိတ်လို့ ခုံးကျော်တံတားဆောက်၊ ဆောက်ပြီးသော်လည်း ကျပ်ပိတ်ဆဲ ဖြစ်နေသည့်အခါ သူတို့ခမျာ လက်မှိုင်ချရုံမှတစ်ပါး ဘာမှမလုပ်တတ်တော့သည်မှာ မြင်နေရ၏။ လုပ်ချင်းလုပ် ဆောက်ပြီးသား တံတားကို ပြန်ပြိုဖျက်ရုံပင်။

မနေ့တစ်နေ့ကတော့ လမ်းပေါ်တွင် ပိတ်ဆို့နေသည့် ယာဉ်များကိစ္စကို ဖြေရှင်းရန် ကြိုးပမ်းခြင်းအနေနှင့် လမ်းတစ်ခုလုံးကို ခွလျက် အခြားယာဉ်များကိုပါ အုပ်မိုးကာ မောင်းနှင်နိုင်သည့် ဧရာမဘတ်စ်ကားကြီးများ ထုတ်လုပ်နိုင်ရန် တရုတ်တို့က စမ်းသပ်နေပြီဖြစ်ကြောင်း သတင်းဖတ်လိုက်ရသည်။
ယင်းကိစ္စအတွက် ဖတ်ရှုရန် ကျွန်ုပ်ချင်ခြင်းတပ်မိသည့် သတင်းမျိုးကား ဤသို့ ဖြစ်ပါ၏။ 

ကမ္ဘာ့ပညာရှင်များသည် လမ်းများကို နေရောင်ခြည်စွမ်းအင်ဖြင့် အလိုအလျောက် ပြေးလွှားနေစေရန် တီထွင်လိုက်နိုင်ပြီဖြစ်ကြောင်း ဟူ၍။ 

လူတစ်ဦးအနေနှင့် အိမ်မှထွက်ကာ ရွေ့လျားနေသည့်လမ်းပေါ်တက်၍ ရပ်လိုက်ခြင်းဖြင့် မိမိသွား လိုရာကို အဆင်သင့်စွာ ရောက်နိုင်မည့်ကိစ္စဖြစ်သည်။ လူများသာမက ယာဉ်များအနေဖြင့်လည်း တကူးတက မောင်းနှင်နေရန်မလို၊ လမ်းပေါ် မောင်းတင်လိုက်ရုံဖြင့် ရွေ့လျားနေပေတော့မည်။ လမ်းဘေးဈေးသည်တို့ အနေနှင့်လည်း ပလက်ဖောင်းပေါ်တွင် အေးအေးလူလူ ဘေးရန်ကင်းစွာ ရောင်းချနေပေရော့။

အို...အို။ ညစ်ညမ်းကြမ်းတမ်းလှသည့် ဘတ်စ် ကားစပယ်ယာတို့၏ ဆဲဆိုငေါက်ငမ်းခံရခြင်း မှလည်း လွတ်မြောက်ရဦးမည်။ ထိုသတင်းမျိုးသည် အဘယ်မျှ မင်္ဂလာရှိပါ အံ့နည်း။

မြန်မာတို့သည် အသံမျိုးစုံဖြင့် ဆူညံနေတတ်သည့် နိုင်ငံတွင် နေထိုင်ရသူများဖြစ်သည်။ အလုပ်ထဲ၊ နေအိမ်ထဲ၊ လမ်းမများပေါ် ဆင်ခြင်တုံမဲ့စွာ ဖွင့်တတ်ကြ၊ အော်ကြီးဟစ်ကျယ် ပြောဆိုတတ်ကြသည့် မြန်မာနိုင်ငံသားများ ဖြစ်သည်။ ကြိုက်ကြိုက်၊ မကြိုက်ကြိုက် နားတို့ကိုပိတ်ဆို့ထားရန် မဖြစ်နိုင်ပါ။ မမြင်လိုလျှင်တော့ အကြည့်လွှဲလိုက်၍ ဖြစ်နိုင်ပါသည်။
ယင်းအတိုင်းပင် မကြားလိုသည့်အသံကိုကွက်၍ ကွင်း၍ ရှောင်ရှားနိုင်သည့် ပစ္စည်းတစ်မျိုးကို လုပ်ပေးရန် မဖြစ်နိုင်ဘူးလား။ ကျွန်ုပ်၏ စိတ်ကူးထဲမှာဖြင့် ဖြစ်နိုင်ပါသည်။ ထိုအသံလာရာဘက်မှ နားကို တခြားဘက်သို့ လှည့်လိုက်သည့်အခါ မကြားရတော့သည့် ပစ္စည်းမျိုးဖြစ်သည်။ အော်ချင်သလောက်အော်နေ စေတော့၊ နားနှစ်ဖက်ကို သူတို့နှင့် မတည့်အောင် နေလိုက်လျှင် ပြီးပြီ။

ပြီးလျှင် နီနေသောမီးပွိုင့်ကို ဖြတ်မောင်းလိုက်စဉ် ရုတ်တရက် ချက်ချင်း အစိမ်းရောင် ပြောင်းပေးတတ်သည့် မီးလုံးမျိုးကိုလည်း ဖန်တီးပေးပါလေ။  မီးနီဖြတ်ခြင်း ဆိုသည်ကို မြင်တွေ့ရန်အခြေအနေသည် လောကတွင် ရှိတော့မည် မဟုတ်တော့ပေ။ 

ကျွန်ုပ်တို့အနေနှင့် ယင်းအမှုမျိုးတွင် ယာဉ်ထိန်းရဲတို့၏ ဖမ်းဆီးခြင်းမပြုဘဲ မျက်ကွယ်ပြုနေမှုကြောင့် စိတ်မကောင်းဖြစ်ခြင်းမှ ကင်းဝေးသွားမည်ဖြစ်သည်။

မော်တော်ယာဉ်များနှင့်ပတ်သက်၍ ဆက်ပါဦးမည်။

သိပ္ပံရှင်တို့သည် မည်သည့်မော်တော်ယာဉ်က ဖြစ်စေ အရှိန်နှုန်း မြင့်ချင်သလောက် မြင့်ပါစေ ဖြတ်မောင်းလိုက်သည့်အခါ လမ်းပေါ်ရှိရေအိုင်များမှ နံဘေးသို့ ရေများလွင့်စင်မထွက်စေသည့် ဘီးတာယာများကို တီထွင်လိုက်နိုင်ပြီဆိုသည့် သတင်းမျိုးကိုလည်း မျှော်လင့်မိပါ၏၊၊
အထူးသဖြင့် ပရမ်းပတာ ယာဉ်မောင်းများနှင့် အခြေအနေမဲ့ စည်ပင်များရှိသော မြန်မာရွှေပြည် အတွက် ပို၍ပင် သင့်လျော်ပါသည့် သတင်းဖြစ်သည်၊၊

အဟမ်း၊ ကျွန်ုပ်ကား လမ်းလျှောက်သူသာ ဖြစ်၏၊၊
မဆင်မခြင်မောင်းနှင်တတ်သော လူလွန်မသား တို့အပေါ် အချည်းနှီး ဒေါသထွက်ရခြင်းကို ကျွန်ုပ် မောပန်းနေပါပြီ၊၊

အာကာသထဲ၊ စကြဝဠာထဲကကိစ္စတွေအတွက် ငွေကုန်ကြေးကျ အများကြီးခံနေမည့်အစား ဒါမျိုး ကလေးတွေအတွက် ကြံဆပေးစမ်းပါ ဆရာတို့ခင်ဗျား ဟူ၍  တိုက်တွန်းလိုမှုကား တဖွားဖွားဖြစ်မိပါသည်။

အမှိုက်ပုံးမှတစ်ပါး အခြားမည်သည့်နေရာသို့ ပစ်ပစ် ပစ်သူထံသို့ ပြန်ရောက်လာစေတတ်သော လေမျိုးသည် အမှန်လိုအပ်၏၊၊ အထူးသဖြင့် ကျွန်ုပ်တို့ မြန်မာရွှေပြည်အတွက် ပို၍ပင် သင့်တင့်လှ၏၊၊ သို့ဆိုလျှင် စည်းကမ်းမဲ့အမှိုက်ပစ်မှုအတွက် အများသူငါ စိတ်ဒုက္ခရောက်ရခြင်းမှ ကင်းပပါလိမ့်မည်၊၊ ကမ္ဘာ့လေထုအတွင်း ဓာတ်တစ်ခုခုလွှင့်ထုတ်ကာ ယင်းလေမျိုးကို ဖန်တီးကြပါတော့။ ဒဏ်မရိုက် အရေးမယူနိုင်မည့်အတူတူ ထိုနည်းဖြင့်ပင် ရွှေမြန်မာတို့အား ကယ်တင်ပါလော့၊၊

အို ဆရာတို့၊၊

တစ်ဆက်တည်းဆိုရလျှင် ပါးစပ်မှထွေးလိုက် သည့်အခါ တံတွေးသည် လေတွင်ပျောက်ကွယ်သွား သောကွမ်းယာမျိုးကို ဖန်တီးတတ်သည့်အတတ်ပညာအား ရှာဖွေပေးပါဦးလော့၊၊
ဟိုးတစ်လောဆီကဖြင့် မီးခိုးမထွက်စေသည့် စီးကရက်မျိုးကို ဂျပန်တို့က တီထွင်လိုက်ပြီဟု ကြားရ ဖူးသည်၊၊
ယခုလည်း ထပ်ပြီး ငံ့လင့်ပါသည်၊၊

လူတွေက စည်းမရှိကမ်းမမြင် ဥပဒေနှင့် အရော တဝင်မရှိလေသလား၊၊
အစိုးရက အလုပ်မလုပ်လေသလား၊၊
ကြက်မနှင့် ကြက်ဥပြဿနာအကြား ကျွန်ုပ်တို့များစွာ ဆားလိုညပ်နေခဲ့ရသည်မှာ နှစ်များစွာ ကြာပါပြီကော၊၊

လမ်းပေါ်က ရေအိုင်ကလေးများကိစ္စ ကျန်ပါသေးသည်၊၊
သိပ္ပံညာရှင်တို့အနေနှင့် ကြိုးမဲ့လျှပ်စစ်ဓာတ်အား ဖြန့်ဖြူးရေးအကြောင်း ဆွေးနွေးကြပြီ ဆိုတာလောက်ကလေးကိုမှ ရွှေပြည်ကြီးသားများ ထံသို့ သတင်းစကားလေးများ မပါးနိုင်ဘူးလား၊၊
လမ်းလျှောက်ရင်း၊ ဈေးဝယ်ရင်း ရေအိုင်ကလေးများကို နင်းဖြတ်မိရင်း ဓာတ်လိုက်၍ သေပြီးသူတွေ ပြန်မရှင်သော်မှ ထိုသတင်းမျိုးအတွက် ရွှေပြည်သားတို့ လက်ခုပ်တီးရန် အသင့်ပါ ခင်ဗျာ။

မြန်မာရွှေပြည်သားတို့သည် အားမကိုးရသော အစိုးရနှင့် နှစ်ပေါင်းကြာရှည် ယဉ်ပါးခဲ့သည်မို့ ကြုံလေရာ ပြဿနာများအတွက် ကိုယ့်နည်းကိုယ့်ဟန်ဖြင့် ဖြေရှင်းရခြင်းကို နေသားလည်းကျ သဘောလည်းကျ ဖြစ်နေပါပြီ၊၊

အမှန်တော့ ကိုယ့်နည်းကိုယ့်ဟန်ဖြင့် ဖြေရှင်းခြင်း ဆိုသည်မှာ ကိုယ့်နည်းကိုယ့်ဟန်ဖြင့် ကြိတ်ခံခြင်း ဖြစ်သည်၊၊ ယခုလည်း အစိုးရကို အပူမကပ်ချင်ပါလေ။
ထို့အတွက် ပညာရှင်များဖြစ်သည့် ဆရာတို့အား ရတောင့်ရငြား အကူအညီ တောင်းခံကြည့်ခြင်းဖြစ်ပါသည်။

မူးယစ်ဆေးများ အထိန်းအကွပ်မဲ့နေသည့်နှယ် ကျယ်ပြန်ပျံ့နှံ့နေမှု၏ နောက်ဆက်တွဲအဖြစ် လူကြီး၊ လူငယ်၊ ကျားကျား မမများစွာ အကြမ်းဖက်ခံရခြင်း၊ လုယက်ခံရခြင်းများ ကြုံတွေ့နေရသည့် သတင်းများ မကြာခဏ ဖတ်နေရသည်။ အချို့ဆိုလျှင် အကြောင်း မည်မည်ရရမရှိပါဘဲ အစိမ်းသက်သက် ဓားဖြင့်ထိုးခြင်း၊  ရိုက်နှက်ခြင်းပင် ခံရသည်။

မူးယစ်ဆေးသုံးစွဲမှု ထုတ်လုပ်မှုများ လျော့ကျရေး၊ ပပျောက်ရေးတွေ မအောင်မမြင်ဖြစ်နေဆဲ ယခု အချိန်တွင် အခြေအနေနှင့် အချိန်အခါကိုက်ဖြစ်သည့် တီထွင်မှုမျိုး အင်မတန် လိုအပ်လှတော့သည်။ 
ထိုကဲ့သို့ မူးယစ်ဆေးသုံးစွဲထားပြီး စိတ်ကယောက်ကယက် ဖြစ်နေသူ၊ သတိလက်လွတ်ဖြစ်နေသူ တစ်ဦးသည် မိမိနှင့် ကိုက်ငါးဆယ် သို့မဟုတ် တစ်ရာအကွာအဝေးတွင် ရှိနေကြောင်း အချက်ပေးသည့် ကိရိယာမျိုးကို ပညာရှင်တို့က ထုတ်လုပ်ပေးနိုင်လျှင် ကောင်းပါလိမ့်မည်။

တစ်ခါက မုသားဖော်စက်သည် ရေပန်းစားခဲ့၏၊၊
ရေပန်းသာမက မြေပန်း လေပန်း မီးပန်း ပန်းပေါင်းစုံကို စားနိုင်ပါလိမ့်မည်၊၊
အချိန်မလွန်ခင် မြန်မြန်ကလေး ထုတ်လုပ်ကြပါတော့၊၊

ကာကွယ်ခြင်းသည် ကုသခြင်းထက် ပို၍ကောင်း၏ ဟူသည့်စကားအတိုင်း ယင်းကိရိယာမျိုးရှိနေပါက အန္တရာယ်ကို ကြိုတင်မြင်နိုင်စွမ်း ရှိမည်ဖြစ်၏။

၃။

ကြို၍ပြောခဲ့သလို မဖြစ်နိုင်စရာများကို ရှာကြံ စိတ်ကူးယဉ်ထားခြင်း ဖြစ်ပါသည်။ သည်လိုယဉ်ခြင်းကလည်း ကျွန်ုပ်အနေနှင့် အကြောင်းရှိပါ၏။ အစော ကတည်းက မဖြစ်နိုင်မှန်း သိထားပြီးဖြစ်၍ မျှော်လင့်ခြင်းအတွက် တကယ်ဖြစ်မလာလျှင်လည်း စိတ်တွင် ညစ်နွမ်း မောပန်းဖြစ်စရာ မလိုသောကြောင့် ဖြစ်ပါသည်။ ဖြစ်သမျှအကြောင်း အကောင်းချည်းမတွေး နိုင်သော်မှ စိတ်လက်ပေါ့ပါး ရှိနေရခြင်းသည် ကောင်း၏မဟုတ်လား။

ကျေးဇူးတင်ပါသည်။

ငထက်