POST TYPE

SATIRE

မဖဲဝါနှင့် အသပြာ တစ်သန်းတန် ဘော်လီပြဿနာ
13-Nov-2016 tagged as

ပရလောက တစ်ခုလုံးကို လှုပ်ခတ်သွားစေတဲ့ ဒီသတင်းကို စဖြန့်ခဲ့တဲ့လူက ဆယ့်တစ်ပင်တန်းက တာတေကြီးတို့ အုပ်စုပဲ။

ဘာတဲ့။

သုသာန် အပေါင်းတို့ရဲ့ သခင်မ သင်္ချိုင်းစောင့် အမျိုးသမီး ဝတ်တဲ့ ဘော်လီဟာ အသပြာ တစ်သန်း တန်တဲ့ စိန်စီဘော်လီဆိုပဲ။ အဲ့ဒီဘော်လီကို မဖဲဝါဆီကို ပေးတာကလည်း အရက်မူးသမား ဖြစ်ဖူးတဲ့ သဘက်ကြီး တစ်ယောက်ပါတဲ့။ သူကလည်း မဖဲဝါရဲ့ သင်္ချိုင်းထဲက စားမြိန်ထုပ် လာဘ်လာဘတွေ များများရှိတဲ့ ဇရပ်တစ်ခုကို ကန်ထရိုက် လိုချင်လို့ လာဘ်ထိုးတာတဲ့။

တာတေကြီးတို့ကလည်း ပိုင်တယ်။ ဆယ့်တစ်ပင်တန်းဟာ မဖဲဝါဘော်လီ ဝတ်ချိန်မှ ဘယ်လို ဘယ်လို စောင့်ပြီး သုတေသန ပြုလိုက်မှန်းကို မသိအောင် တော်တာ။

ဘယ်သူက ဘယ်သူ့ကို ပေးတယ်လို့သာ နာမည် အတိအကျ ထည့်မရေးပေမယ့် အဲ့ဒီဘော်လီဟာ လှည်းတန်းဈေးက တင်တင် အမှတ်တံဆိပ် ဇာဘော်လီ ဖြစ်ပြီး ရွှေဘယ်နှကျပ်သား ကွပ်ထားကြောင်း၊ ဘော်လီဆိုဒ်က ဘယ်လောက်ဖြစ်ကြောင်း ဆိုတာကစ တကယ့် အတိအကျပဲ။

ခက်တော့လည်း ခက်တယ်။ ပရလောကမှာကလည်း သုသာန်တို့ရဲ့ သခင်မဆိုရင် မဖဲဝါပဲ ရှိတာကိုး။ နောက်ပြီး အရက်မူးသမား ဖြစ်ဖူးတဲ့ သဘက်ကြီး ဇရပ် ကန်ထရိုက် ရထားတဲ့ သဘက်ကြီး ဆိုတာကလည်း တစ်ယောက်ပဲ ရှိတာကိုး။

ဒီတော့ တာတေကြီးတို့ သတင်းဟာ ဘယ်သူ့ကို ဘယ်သူဟာ ဆိုတာ ထည့်မပြောကြရုံတစ်မည်ပဲပေါ့။ ဆယ့်တစ်ပင်တန်းက တာတေကြီးတို့ ဆိုတာကလည်း နှယ်နှယ်ရရ မဟုတ်ဘူး။ ပရလောကရဲ့ အတွင်းရေး အစုံအစေ့ ပလုံပလိတွေအထိ သူတို့ ဖော်ခဲ့တာတွေ ရှိတာကိုး။

များသောအားဖြင့် သူက ပရလောကရဲ့ အာဏာရှိသူတွေကို ပစ်မှတ်ထားလေ့ ရှိတယ်။ အလှုပ်အခတ် အမွှေစိန်ကြီးတွေလေ။ တော်လှန်သော ဆယ့်တစ်ပင်တန်းမှ တာတေကြီးပေါ့။

ဒီသတင်းကြားတော့ မဖဲဝါလည်း ယောင်ယမ်းပြီး သူ့ဘော်လီလေးကို စမ်းကြည့်မိတယ်။

ဘယ့်နှယ် ... မီးသင်္ဂြိုဟ်စက်မှာ ဓာတ်ဆီရှိနေပြီပဲ ... ထင်းတွေ မလိုတောပါဘူး ဆိုတာနဲ့တင် ထင်းသမားတွေ အကုန် ပျောက်ကုန်တဲ့အထိ တန်ခိုးထက်ခဲ့တဲ့ မဖဲဝါပေပဲ။

မဖဲဝါ တစ်ချက်လွှတ် အမိန့်ဆို ဆောက်လက်စ အုတ်ဂူတွေ၊ ရိုက်လက်စ အခေါင်းတွေတောင် ရပ်ထားရမင့်ဟာ။

ဒီလိုမျိုး အစွမ်းတန်ခိုးတွေ ရှိတဲ့ မဖဲဝါရဲ့ ဘော်လီကိုတောင် ရာရာစစ ထောက်လှမ်းရေး လာလုပ်ပြီး ဖော်ကောင်လုပ်တဲ့ သကောင့်သားတွေ အုပ်စုလောက်တော့ မဖဲဝါက ဖြုန်ရမတဲ့လား။

ပြီးတော့ ဒီနောက်ပိုင်းမှာ ပန်းဆိုးတန်းက စာအုပ်တန်းတွေ သွားကြည့်။ ထွက်သမျှ စာအုပ်တွေက မဖဲဝါအကြောင်း မပါရင် မပြီးဘူး။

ဒီလို သရဲထုကြားတင်မက လူတွေကြားမှာပါ ရေပန်းစားနေတဲ့ မဖဲဝါကိုမှ သင်းတို့ကတဲ့လေ။

မဖဲဝါကို လာစမ်းသပေါ့။ ဘယ်ရမလဲ။

သုသာန်တစပြင်ဆိုင်ရာ အတွင်းဝန်ရုံးကနေ တာတေကြီးတို့ဆီ ချက်ချင်း ဆင့်ခေါ်စာ ထုတ်တယ်။

သို့...

တာတေကြီး

ဆယ့်တစ်ပင်တန်း 

အသင်တို့ ထုတ်ပြန်သည့် သတင်းထဲမှ အသပြာ တစ်သန်းတန် ရွှေဘော်လီသည် မည်သူက မည်သူ့ကို ပေးသည်ကို လာရောက် အဖြေပေးပါရန်။

အဲ့ဒီလို ဘာညာပေါ့။

တချို့ကလည်း မဖဲဝါဆိုတာ ရာဇဝင်နဲ့ချီ ချမ်းသာခဲ့တာ။ အခုလို သင်္ချိုင်းစောင့်ဖြစ်မှ ချမ်းသာတာ မဟုတ်ဘူး။ သူ့အစ်ကို ကိုစံမှဲ့ ဆိုရင် နာမည်ကျော် အင်းသူကြီး။ ရွှေဘော်လီလောက်တော့ ဝယ်ဝတ်နိုင်တယ်ပေါ့။

တချို့ကလည်း ဒီကိစ္စဟာ တာတေကြီးတို့ဆီမှာ အချက်အလက် ခိုင်တာမို့ မဖဲဝါကို အပြုတ်တိုက်တယ်ပေါ့။

မဖဲဝါတို့ရုံးက စာကိုရတော့ တာတေကြီးတို့ဆီက ဘယ်လို တုံ့ပြန်တယ် မှတ်တုံး။

...ယုဇနပင်ပန်းတွေကြားမှာ ချစ်စရာ့အဖြေ ရှိတယ် ... မဖဲဝါလေးရယ် ဆိုပြီး လာမယ်တော့ မမှတ်နဲ့။

ဘာတဲ့ ... ပရလောက သတင်းကျင့်ဝတ်အရ အကြောင်း မပြန်နိုင်ဘူးတဲ့။

ပြဿနာက ဒီလောက်ရှုပ်ရတဲ့ အထဲမှာမှ သရဲ တချို့က ဒီသတင်းနဲ့ ပတ်သက်လို့ ခြောက်ထပ်ကွမ်း ကွင်းပိုင်ကြီးရဲ့ သဘောထားကို သွားမေးပြန်တယ်။ ခြောက်ထပ်ကွမ်း ကွင်းပိုင်ကြီးက ဒီလို ပြောတယ်။

မဖဲဝါဟာ သူ့ဇာတ် သူနိုင်ပါတယ်တဲ့။

မဖဲဝါဟာ အော်ရယ်ဂျင်နယ် သူဌေး။ မျိုးရိုး စဉ်ဆက် သူဌေးပါတဲ့။ ပြီးတော့ အဲ့ဒီ ဇာဘော်လီဟာလည်း တာတေကြီးတို့ အုပ်စုပြောသလို လှည်းတန်းဈေးက တင်တင် ဇာဘော်လီ မဟုတ်ဘူးတဲ့။ ဗိုလ်ချုပ်ဈေးက အန်တီ ရိုစီဆိုင်က ဝယ်ထားတဲ့ ဘော်လီပါတဲ့။ ဘော်လီမှာ စိန်စီပြီးတော့ မဖဲဝါရဲ့ အဆက်ဟောင်း မှော်ဆရာ ကိုကိုလေးက လက်ဆောင်ပေးတာပါတဲ့။ တာတေကြီးတို့အုပ်စုက မဖဲဝါရဲ့ ထင်ပေါ် ကျော်ကြားမှုကို မလိုလားလို့ အခုလို အပုပ်ချတယ်လို့လည်း ပြောလိုက်သေးတယ်။

ပရလောကရဲ့ နာမည်ကြီး ခြောက်ထပ်ကွမ်း ကွင်းပိုင်ကြီးက ဒီလိုပြောတယ်ဆိုတော့ ပရလောကထဲ ထပ်လှုပ်သွားပြန်ရော။

တိုက်ပွဲထဲကို နာမည်ကျော် ကွင်းပိုင်ကြီး ပါလာပြီပေါ့။ ကွင်းပိုင်ကြီးရဲ့ စကားတွေကို မခံနိုင်တဲ့ တာတေကြီးတို့ အုပ်စုကလည်း ဆယ့်တစ်ပင်တန်းကို ဧည့်သည်တွေ ဖိတ်ပြီး ရှင်းလင်းပွဲ ထပ်လုပ်လိုက်တယ်။

တာတေကြီးတို့တင်လား။

ဘော်လီ လာဘ်ထိုးပါတယ်လို့ ပြောခံရတဲ့ သဘက်ကြီးကလည်း အားကျမခံ သတင်းစာ ရှင်းလင်းပွဲလုပ်ပြီး သူသည် ဘယ်သူ့ကိုမှ ဘော်လီ မပေးပါကြောင်း၊ ပေးချင်လျှင်တောင် မဖဲဝါ၏ဆိုဒ်ကို သူမသိကြောင်း ပြန်ရှင်းပါတော့တယ်။

အဲ့ဒီ ရက်ပိုင်းလေးတွေတင် ပရလောကထဲ သတင်းစာ ရှင်းလင်းပွဲတွေ တော်တော် များသွားတာပေါ့။

ထုံးစံအတိုင်း ပရလောကသားတွေထဲမှာလည်း မဖဲဝါဘက်တော်သား၊ ဆယ့်တစ်ပင်တန်း ဘက်တော်သားတွေ ကွဲကြ ချဲကြနဲ့။

အောင်မယ် ... ဒီကြားထဲ အမေရိကန်ဆိုတဲ့ နိုင်ငံကလည်း မဖဲဝါ ဘက်တော်သား ထင်ပါရဲ့။

မဖဲဝါရဲ့ ဘော်လီ ပြဿနာကို ပရလောကသားတွေ စိတ်ဝင်စားနေမှန်း သိလို့ အာရုံလွှဲတဲ့ အနေနဲ့ သမ္မတ ရွေးကောက်ပွဲ လုပ်လိုက်တယ်လေ။

ပရလောကနဲ့ အမေရိကန်က ရွေးကောက်ပွဲနဲ့ ဘာဆိုင်လဲတော့ မမေးနဲ့ဗျ။ ဒီပရလောကသားတွေက ကိုယ်တိုင်သာ သရဲတစ္ဆေဘဝက မကျွတ်သေးတာ တစ်ကမ္ဘာလုံး အရေးတော့ ကိုယ့်အရေးလို့ကို မှတ်တာဗျ။

ဟို ချိုတကူးနဲ့ ဂုဏ်ရည်မတူ ဇာတ်ကားထဲက မောင်ချိုတကူးလိုပေါ့ဗျာ။

အဲ့ဒီလိုနဲ့ ဟိုးအမေရိကားမှာ အဒေါ်ကို နယ်ပြန် ပို့ပြီး ထရမ်းတဲ့ လူကြီးနဲ့ ဟီလာတိုက်ပြီး ရယ်တတ်တဲ့ အဒေါ်ကြီး သမ္မတဖြစ်ဖို့ မဲပြိုင်ကြတဲ့ဆီ အာရုံ ရောက်သွားကြတယ်။

ပရလောက ထုံးစံအတိုင်း အမေရိကန် ပြည်ထောင်စုကြီးနဲ့ ကမ္ဘာကြီးအတွက် စိုးရိမ်ကြ၊ စိတ်ပူကြ။

ယောက်ျားဝါဒီ၊ မိန်းမဝါဒီတွေဆိုပြီး အပြန်အလှန် စွပ်စွဲကြ ရန်ဖြစ်ကြနဲ့ဆိုတော့ ခုန မဖဲဝါဘော်လီကိစ္စလည်း ဘယ်ရောက်သွားမှန်းကို မသိလိုက်ဘူး။

ဆယ့်တစ်ပင်တန်းက တာတေနဲ့ မဖဲဝါတို့ရဲ့ ဘော်လီ ဇာတ်လမ်းလည်း ဟိုအရင် ဇာတ်လမ်းတွေလို ဟိုလိုလို ဒီလိုလို အီလည်လည်ပြီးသွားမှာလားပေါ့။

မကြာခင်ပဲ ဟိုးအနောက်အရပ် အမေရိကန်ဆီက ရွေးကောက်ပွဲကြီးလည်း ပြီးသွားပါပြီ။

အဒေါ်ကို နယ်ပြန်ပို့ပြီး ထရမ်းတဲ့ လူကြီးလည်း နိုင်သွားပါပြီ။

ပရလောကသားတွေလည်း မဖဲဝါ ဘော်လီဘက်ကို အာရုံပြန်ရောက် မရောက်က မသေချာသေးပါဘူး။ ဒါပေမဲ့ ဆယ့်တစ်ပင်တန်းရဲ့ ကောင်းမှုကြောင့် မဖဲဝါတို့လို ပရလောက အာဏာပိုင်ကြီးတွေ အသိုင်းအဝိုင်းမှာက ပြောင်းလဲမှုကြီး တစ်ခု မကြာခင် ဖြစ်လာပါတော့တယ်။

အဲ့ဒါကတော့ ပရလောက အာဏာပိုင်တွေထဲက အမျိုးသားတွေဆိုလည်း အောက်ခံ စွပ်ကျယ်တောင် အကောင်းစား မဝတ်ကြတော့သလို အမျိုးသမီးတွေ ဆိုလည်း ဘော်လီ မဝတ်ကြတော့ပါဘူး။

နို့ ... ဒါဖြင့် ... အမျိုးသမီးတွေ ဘာဝတ်တုံးဆို။

ဘရာစီယာ ပြောင်းဝတ်ကုန်ကြပါပြီ။

ဒါပါပဲ။

ပြောင်းလဲဖို့ အချိန်တန်ပြီဆိုတာ။

ဗြိတိသျှကိုကိုမောင်

  • TAGS