News

POST TYPE

SATIRE

ဝက်နဲ့လူ ပူးပေါင်းချိန် တန်ပြီ
21-Jul-2018 tagged as

ကယားဝန်ကြီးချုပ်က တပ်ကို တာဝန်ပေးမလို့တဲ့။ စစ်တပ်ကို တာဝန်ပေးမှတော့ စစ်တပ်လက်ထဲကို အာဏာပြန်ရောက်သွားမှာပေါ့။

၁၉၅၈ တုန်းက ဦးနုဟာ စစ်တပ်ကို အာဏာ ၆ လ လွှဲပေးခဲ့ဖူးတယ်။ နောက်လေးနှစ်အကြာ ၁၉၆၂ ခုနှစ်မှာတော့ စစ်တပ်က အာဏာသိမ်းရော။ တစ်ဆင့်ဆင့်နဲ့ အာဏာသိမ်းလိုက်တာ ၂၀၁၁ ခုနှစ်အထိပဲ။ အခုတောင် စစ်တပ်က အာဏာကို အကုန်လက်လွှတ်သေးတာမဟုတ်။ 

အခုလည်း ဒီအစိုးရဟာ အာဏာရတာမှ မကြာသေးဘူး။ ၂ နှစ်ကျော်ပဲရှိသေးတယ်။ ကယားမှာ စစ်တပ်ကို အာဏာပြန်ပေးတော့မယ်တဲ့။ ဘယ်လောက်ချစ်ဖို့ ကောင်းလိုက်သလဲ။

ကယားက တော်တော်များ ဆိုးနေသလားဆိုတော့လည်း မဟုတ်သေးပါဘူး။ ဗိုလ်ချုပ်ရုပ်တု ထားဖို့ကို ကန့်ကွက်တာပဲ ရှိသေးတယ်။ ဒီမိုကရေစီခေတ်ပဲ။ လူတိုင်း ကန့်ကွက်ခွင့်ရှိတယ်။ ထောက်ခံခွင့်ရှိတယ်။ အခုတော့ ဘာလုပ်လုပ် ထောက်ခံရမယ်။ ကန့်ကွက်ရင် စိတ်ဆိုးတယ်။ အကြမ်းဖက် ဖြိုခွင်းတယ်။ တရားစွဲမယ်။ ထောင်ချမယ်။

အခုဆို စစ်တပ်နဲ့ပါ ခြိမ်းခြောက်လာပြီ။ ပြည်သူက စစ်တပ်အုပ်ချုပ်တာ မကြိုက်လို့။ စစ်တပ်နဲ့ ပတ်သက်သူတွေ အုပ်ချုပ်တာကို မကြိုက်လို့ ...။ ဒီအစိုးရကို မဲတွေပုံပေးခဲ့တာကိုမှ မထောက်။ အဲ့လို စစ်တပ်ကပဲ အုပ်ချုပ်မယ်ဆို ဘာလို့စစ်တပ်ကို ကန့်ကွက်နေတော့မတုံး။ ဒီအစိုးရကိုလည်း ဘာလို့ မဲပေးနေတော့မလဲ။ အရင်အတိုင်း ပုံမှန်လေးပဲ စစ်အစိုးရအောက်မှာ နေတော့မှာပေါ့။

ဘယ်လိုဖြစ်နေလဲဆိုတော့ အဖေ့ကိုလည်းကြောက်ရတယ်။ ကြည့်လည်းမရ။ အဖေကလည်း ဆော်ပလော်တီးလွန်းတာကိုး။ အဲ့ဒါကို ညီအစ်ကိုချင်း ရန်ဖြစ်တော့ အဖေ့ကို သွားတိုင်သလိုမျိုး။ ဒါမှမဟုတ် အလွန်အရိုက်သန်တဲ့ ဆရာမကို ကျောင်းသားချင်း စကားများတာ သွားတိုင်သလိုမျိုး ဖြစ်မနေဘူးလား။ ဟိုက အစကတည်းက ရိုက်ချင်နေတာ။ ရိုက်ရတော့မယ်ဆိုပြီး ပျော်နေလောက်ပြီ။ ရုပ်တုတစ်ခုကို ကန့်ကွက်ရုံလောက်နဲ့တော့ အဲ့လောက်အထိ မလုပ်သင့်ပါဘူးလေ။

အဲ့လိုမျိုးဆို ရန်ကုန်က ဝန်ကြီးချုပ်ပဲ အားရတယ်။ အခြားဝန်ကြီးချုပ်တွေထက် အလုပ်ပိုလုပ်တယ်။ ပိုလည်း အပြောခံရတယ်။ ဘယ်လောက်ပြောပြော စိတ်ထဲသိပ်ထားတာမဟုတ်ဘူး။ စစ်တပ်ကို အားကိုးဖို့မပြောနဲ့ ...။ စစ်တပ်ရဲ့ အကြီးအကဲကိုတောင် လူမိုက်ကြည့် ကြည့် ပစ်လိုက်တာ။ ရန်ကုန်က ပြည်သူတွေမှာ သူတို့ဝန်ကြီးချုပ်အတွက် အားတွေရလို့။ ဘယ်လောက်ပဲ တလွဲလုပ်လုပ် ပြည်သူတွေက မမုန်းဘူးရယ်။ စစ်တပ်ကို အာခံရဲတာ ဒီတစ်ယောက်ပဲရှိတယ်ဆိုပြီး သဘောတွေကျနေကြတာ။

ဖြစ်နိုင်ရင် ကယားဝန်ကြီးချုပ်ကိုလည်း ရန်ကုန်ဝန်ကြီးချုပ်လို သတ္တိတွေ ရှိစေချင်တယ်။ ကိုယ့်အားကိုယ်ကိုးစေချင်တာပေါ့လေ။ ရန်ကုန်ဝန်ကြီးချုပ်ဆို လွှတ်တော်ကိုတောင် အားကိုးတာမဟုတ်ဘူး။ သူ့ဟာသူ တစ်ယောက်တည်းလုပ်တာ။ လွှတ်တော်ကိုတောင် ဂရုသိပ်မစိုက်မှတော့ စစ်တပ်ဆို ဝေလာဝေးပဲ။

အခုဆို အစိုးရလည်း အာဏာရတာ ၂ နှစ်ကျော်ပြီ။ ဒါပေမဲ့ ဖြစ်ဖြစ်မြောက်မြောက် လုပ်နိုင်တာဆိုလို့ ဗိုလ်ချုပ်ရုပ်တုတွေပဲရှိတယ်။ ဒါတောင် အခုဆို ဗိုလ်ချုပ်ရုပ်တုတွေလုပ်ရင်း ပြဿနာတွေ တက်လို့တက်။

ဦးနုလို ကိုယ်မထိန်းနိုင်ရင် စစ်တပ်ကို တာဝန်ပေးလိုက်မယ်ဆိုတာကတော့ မဟုတ်သေးဘူးရယ်။ အဲ့အစဉ်အလာကြီး ဖြစ်သွားရင်သွားပြီ။ အခြားတိုင်းနဲ့ပြည်နယ်တွေကလည်း ကယားပြည်နယ်ကို အားကျကုန်ရင် ဘယ်လိုလုပ်မတုံး။

“ငါတို့တော့ မရှင်းနိုင်တော့ဘူးဟေ့။ စစ်တပ်ရေ လာပါဦး။ ရှင်းပေးပါဦး”ဆို ဘယ်လိုလုပ်မလဲ။

အခြားပြည်နယ်တွေဆို ကယားပြည်ထက်တောင် ရှုပ်ထွေးနေသေးတာ။ တဖြည်းဖြည်း စစ်တပ်ကို တာဝန်ပေးရင်းနဲ့ နေပြည်တော်ပါ စစ်တပ်အောက် ပြန်ရောက်သွားရင်တော့ လှပြီ။ အာဏာကို တင်ဒါဆွဲသလိုပေါ့။

ပါတီတွေက မဲဆွယ်ပြီး အာဏာရအောင်လုပ်။ ပြီးရင် သိပ်မအုပ်ချုပ်နိုင်။ ဒီတော့ အုပ်ချုပ်နိုင်သူကို ကန်ထရိုက်ပြန်ပေး။ ပါတီတွေက တင်ဒါဆွဲ။ စစ်တပ်ကို ကန်ထရိုက်ပြန်ပေး။ အုပ်ချုပ်ရေး စနစ်သစ်တစ်ခုတောင် ဖြစ်ချင်ဖြစ်ဦးမှာ။

အခြားလက်နက်ကိုင်တွေရှိတဲ့ ဒေသတွေမှာဆိုရင်လည်း အဲ့လက်နက်ကိုင်အဖွဲ့တွေကို အုပ်ချုပ်ရေး ကန်ထရိုက်ပြန်ပေးပေါ့။ သိပ်တော့ မဆိုးဘူးရယ်။ ဒါဆို နှစ်ဦးနှစ်ဖက် အလုပ်ရတယ်။ တင်ဒါဆွဲတဲ့ ပါတီကလည်း ရာထူးတွေရပြီး လခတွေရမယ်။ စစ်တပ်ကလည်း အုပ်ချုပ်တော့ သူတို့လည်း ဝင်ငွေကောင်းဦးမယ်။

ဘာပဲဖြစ်ဖြစ် ကယားဝန်ကြီးချုပ် စကားကိုကြားပြီး ခြေလေးချောင်းတော်လှန်ရေးကိုတောင် သတိရမိတယ်။ ဂျော့အော်ဝဲဆိုတဲ့ စာရေးဆရာတစ်ယောက်ရှိတယ်။ သူက မြန်မာပြည်မှာလည်း နေခဲ့ဖူးတယ်။ မြန်မာပြည်မှနေ့ရက်များတို့ ဘာတို့ကိုလည်း ရေးခဲ့ဖူးသူပေါ့။ ဒါပေမဲ့ အဲ့စာအုပ်ထက်စာရင် ခြေလေးချောင်းတော်လှန်ရေးဆိုတဲ့ Animal Farm စာအုပ်က ပိုနာမည်ကြီးတာပေါ့။ ရုရှားတော်လှန်ရေးအကြောင်းကို သရော်ထားတာလို့ ဆိုကြတာပဲ။

အဲ့ဝတ္ထုမှာဆိုရင် စိုက်ပျိုးမွေးမြူရေး ခြံတစ်ခုရှိတယ်။ တိရစ္ဆာန်တွေကို ခြံပိုင်ရှင်က ဖိနှိပ်တာပေါ့လေ။ အဲ့တော့ ဝက်တွေဟာ ဦးဆောင်ပြီးတော့ ခြံပိုင်ရှင်ကို တော်လှန်ခဲ့တယ်။ အောင်မြင်သွားတယ်။

ဒါပေမဲ့ တော်လှန်ရေးကြီး အောင်မြင်သွားချိန်မှာတော့ ဝက်တွေဟာ အခြားတိရစ္ဆာန်တွေကို ဖိနှိပ်တယ်။ ပြီးတော့ ဝက်တွေဟာ လူတွေနဲ့ပူးပေါင်း၊ လူတွေရဲ့အကျင့်တွေ ကူးစက်ပြီး ကျန်တဲ့တိရစ္ဆာန်တွေကို လူတွေအတိုင်း နှိပ်စက်။ တော်လှန်ရေးကို အတူတူ လုပ်ခဲ့ပေမယ့် အခြားတိရစ္ဆာန်တွေဟာ ဝက်တွေရဲ့ ဖိနှိပ်မှုအောက်မှာ ...။ အစာတွေလည်း ဝအောင် မစားရ။ အလုပ်တွေလည်း ပိုလုပ်ရ။ ဝက်တွေက ကောင်းကောင်းစား ကောင်းကောင်းနေကြတာပေါ့။ ပြီးတော့ လူတွေနဲ့ပူးပေါင်းပြီး ပါတီတွေလုပ်လို့လုပ်။ စားပွဲသောက်ပွဲတွေလုပ်။

နောက်ဆုံး အဆုံးသတ်မှာတော့ လူနဲ့ ဝက်၊ ဝက်နဲ့ လူ။ ဘယ်ဟာက ဝက်မှန်း၊ ဘယ်ဟာက လူမှန်း ခွဲမရတော့ဘူးတဲ့။

အခုလည်း မြန်မာ့နိုင်ငံရေး အဲ့စာအုပ်ထဲအတိုင်း ထပ်တူပါပဲ။ ဘယ်ဟာကဝက်၊ ဘယ်ဟာက လူမှန်း ခွဲမရတော့ဘူးရယ်။

စိုပြေ

  • TAGS