News

POST TYPE

RELAX

ပန်းတိုင်နှင့်ပေါင်းစည်းအား (Daily,Vol-4/No-280)
04-Mar-2017 tagged as နိုင်ငံရေး

အင်္ဂလိပ်ဘာသာဖြင့်Synergy ဟုခေါ်သောစကားလုံး၏ မြန်မာလိုအဓိပ္ပာယ်မှာ -
ယင်းစကားလုံးက ဆိုလိုချင်သောအနက် ပေါ်လွင်စေရန် ‘စုပေါင်းညှိနှိုင်းဆောင်ရွက်မှု၏ အကျိုးရလဒ်’ ဟုဘာသာပြန်နိုင်ပြီး ‘ပေါင်းစည်းအား’ ဟူ၍လည်း အတိုချုံး အနက်ကောက်နိုင်သည်။

‘တစ်ယောက်အားဖြင့် ယူသော်မရ၊ တစ်သောင်းအားဖြင့် ယူသော်ရ၏။’ ဆိုသော မြန်မာစကားပုံမှာ စည်းလုံးညီညွတ်မှုကို ကိုယ်စားပြုသည့်အပြင် ပေါင်းစည်းအား၏ အဓိပ္ပာယ်ကိုလည်း ဖော်ပြသည်။

ပြဿနာ၊ အခက်အခဲတစ်ရပ်ကို တစ်ဦးချင်း ဖြေရှင်းသည်ထက် လူအများ စုပေါင်းအကြံဉာဏ်ထုတ်၊ ဆွေးနွေး၊ ညှိနှိုင်းခြင်းဖြင့် ပို၍လွယ်ကူ၊ မြန်ဆန်၊ ထိရောက်စွာ အဖြေရှာနိုင်ခြင်းသည်လည်း ပေါင်းစည်းအား၏ အားသာချက်တစ်ရပ် ဖြစ်သည်။

ပြိုင်ဆိုင်မှု ကြီးမားသော ဈေးကွက်တွင် အင်အားကြီးမားသော ပြိုင်ဘက်များကို ရင်ဆိုင်နိုင်ရာတွင် မိမိကုမ္ပဏီ အဖွဲ့အစည်းအတွင်းရှိ အဆင့်ဆင့်အလိုက် ရှိနေသော ဌာနခွဲများ၊ ဝန်ထမ်းများကို စိတ်ပိုင်း၊ ရုပ်ပိုင်း၊ အတတ်ပညာပိုင်းဆိုင်ရာများ ဖြည့်ဆည်းခြင်း၊ အချင်းချင်း စုစည်းညီညွတ်မှု၊ ချိတ်ဆက် ပူးပေါင်းဆောင်ရွက်မှုတို့ကို မြှင့်တင်ထားခြင်း တစ်နည်းအားဖြင့် ပေါင်းစည်းအားတည်ဆောက်ထားခြင်းသည် အနိုင်မရလျှင်ပင် မရှုံးနိမ့်ရန်နှင့် ပခုံးချင်းယှဉ် နိုင်စေရန် ကြီးစွာအထောက်အကူ ဖြစ်စေသည်။

တစ်ဆင့်တက်၍ အနိုင်ရလိုသော် မိမိကုမ္ပဏီကဲ့သို့ အင်အားမျိုး သို့မဟုတ် မတိမ်းမယိမ်း အင်အားရှိသော အခြားကုမ္ပဏီများနှင့် မဟာမိတ်ဖွဲ့ကာ အားလုံးထံမှ စိတ်ကူးအကြံဉာဏ်အား၊ အရည်အချင်းရှိ လူ့စွမ်းအား၊ ငွေကြေးအရင်းအနှီးအား၊ ကိုယ်စီရှိနှင့်ပြီးသား ဈေးကွက်အားတို့ဖြင့် ပေါင်းစည်းအားတည်ဆောက်ခြင်းဖြင့် ရင်ဆိုင်ယှဉ်ပြိုင်လေ့ ရှိကြသည်။

ယနေ့ မြန်မာနိုင်ငံတွင် ဖြစ်ပေါ်ပြောင်းလဲနေသော အခြေအနေအရပ်ရပ်ကို လေ့လာကြည့်ပါက ပေါင်းစည်းအား ရရှိရေးထက် ရှိနေသော အင်အားစု၊ အဖွဲ့အစည်း၊ အသင်းအပင်းများ အကြား နားလည်မှု၊ ယုံကြည်မှုပင် တည်ဆောက်မရနိုင်သေးသည့် အပြင် အင်အားစု တစ်ခုတည်းတွင်ပင် အုပ်စုကွဲများဖြင့် မသင့်မတင့် သဘောဆောင်နေပေသည်။

အကျိုးဆက်အားဖြင့် ယနေ့အချိန်အထိ နိုင်ငံတော်နှင့် နိုင်ငံသား ပြည်သူလူထုတစ်ရပ်လုံး အတွက် နယ်ပယ်အသီးသီးအလိုက် အားရကျေနပ်လောက်စရာ သိသာထင်ရှားသော ရလဒ်ကောင်း၊ အဖြေကောင်း မတွေ့မြင်ရသေးဘဲ အချင်းချင်း အပြန်အလှန် အငြင်းပွား၊ ရန်စောင်၊ စွပ်စွဲ၊ တိုက်ခိုက်၊ အပုပ်ချခြင်းဖြင့် အချိန်ကုန်နေသည်ကိုသာ အတွေ့ရ များပေသည်။

မြန်မာ့သမိုင်းကို လေ့လာကြည့်သည့် အခါတွင်လည်း ပေါင်းစည်းအား ရရှိချိန် များစွာနည်းပါးခဲ့ပြီး ဘုံရန်သူခေါ် တစ်မျိုးသားလုံးနှင့် ဆန့်ကျင်ဘက်တွင် ရှိနေသော အင်အားစုတစ်ခုကို ရင်ဆိုင်ရာတွင်သာ ယာယီသဘော စုစည်းညီညွတ်မှု ရှိခဲ့ပြီး ဘုံရန်သူ မရှိတော့သည့်အခါ အချင်းချင်းအကြား စိတ်ဝမ်းကွဲကာ အုပ်စုကွဲများ ဖြစ်သွားခဲ့သည့် သာဓက များစွာရှိခဲ့သည်။

ထိုအခြေအနေများကို ကြည့်ပါကတစ်ယောက်ရှိလျှင် သုံးဖွဲ့ကွဲဟု ဆိုရလောက်အောင်ပင် မြန်မာတို့၏ စရိုက်လက္ခဏာဆိုးက အနှောင့်အယှက် ပေးနေသောကြောင့် ကြီးကျယ်ထွန်းကားသော နိုင်ငံတစ်ခုအဖြစ် မရောက်ရှိနိုင်ခြင်း ပေလောဟု စောကြောသုံးသပ်ဖွယ် ဖြစ်လာစေသည်။

ယနေ့ မြန်မာနိုင်ငံတွင် ရင်ဆိုင်နေရသော ပြည်တွင်းစစ် ပြဿနာနှင့် နိုင်ငံရေး အင်အားစုများ အကြား ရန် ငါစည်း ခြားနေခြင်းတို့သည် နိုင်ငံဖွံ့ဖြိုးတိုးတက်စေရန် အကြီးမားဆုံး အဟန့်အတား ဖြစ်နေပေရာ ပေါင်းစည်းအား (ဝါ) Synergy ရရှိမှသာ အားလုံးလိုလား တောင့်တသော ပန်းတိုင်သို့ ရောက်ရှိရန် နီးစပ်မည် ဖြစ်သောကြောင့် အာဏာသုံးရပ် ရှိသူများက အထူးအားစိုက် ကြိုးစားကြစေလိုကြောင်း တိုက်တွန်းအကြံပြုအပ်ပေသည်။

အယ်ဒီတာ (၁-၃-၂၀၁၇)