News

POST TYPE

RELAX

မိုက္ကယ္ပီတာ
27-Nov-2016
“ဘာလုပ်လုပ် အကောင်းဆုံးဖြစ်အောင်လုပ်”

“မာဂရက်သက်ချာနဲ့အတူ အလုပ်လုပ်ခဲ့ရတာ ကျွန်တော့်ကို ခေါင်းဆောင်မှုပညာ အများကြီး သင်ပေးသွားပါတယ်။ သူက လူတွေ တစ်ဦးချင်းစီကနေ အကြံတွေတောင်းတယ်။ သူတို့ တစ်ဦးချင်း ပြောတာတွေကို ပြန်ပြီးတော့ အကျဉ်းချုပ်တယ်။ ပြီးတော့မှ သူ့ရဲ့ အကြံပြုချက်တွေကို သူများက ကြိုက်သည်ဖြစ်စေ၊ မကြိုက်သည်ဖြစ်စေ ထုတ်ဖော်ပြောတတ်တယ်။ သူ့ကို ကျွန်တော်လေးစားတာ အဲဒီအချက်တွေ ပါတယ်”

Michael Peters & Partners ဆိုသည့် ဒီဇိုင်းအကြံပေး ကုမ္ပဏီကြီးကို ဥက္ကဋ္ဌအဖြစ် တာဝန်ယူထားရသူ မိုက်ကယ်ပီတာ (Michael Peters) က ယခင် ဗြိတိန်နိုင်ငံ အမျိုးသမီး ဝန်ကြီးချုပ်ဟောင်း မာဂရက်သက်ချာနှင့် ပတ်သက်ပြီး သူ၏ ထင်မြင်လေးစားစိတ်ကို ထုတ်ဖော်ပြောကြားလိုက်ခြင်း ဖြစ်ပါသည်။ 

ပီတာတစ်ယောက် ဂရပ်ဖစ် ဒီဇိုင်းပညာနှင့် ပုံနှိပ်ပညာကို လန်ဒန် ပုံနှိပ်အတတ်ပညာ ကောလိပ်တွင် သင်ယူခဲ့သည်။ သူသည် ကောလိပ်တွင် ပညာသင်ဆုဖြင့် တက်ရောက်သင်ကြားခြင်း မပြုမီ အမေရိကန်ပြည်ထောင်စု ယေးလ်ရှိ အနုပညာနှင့် ဗိသုကာပညာကျောင်းတွင် တက်ရောက်ပညာသင်ကြားခဲ့သည်။ ထိုကျောင်းတွင် သူသည် Masters in Fine Arts ဆုကို ရရှိခဲ့သည်။ နောက်ပိုင်း နယူးယောက်ရှိ CBS ရုပ်သံဌာနတွင် အလုပ်ဝင်လုပ်သည်။

“အမေရိကကို သွားပြီးတော့ ဒီဇိုင်းပညာသင်ရတာ ကျွန်တော့်ကုမ္ပဏီ အတွက်တော့ အများကြီး အရေးပါတဲ့ အတွေ့အကြုံ တစ်ခုပါပဲ။ လုပ်ငန်းမှာ အောင်မြင်ဖို့ လိုအပ်တဲ့ တီထွင်ဖန်တီးအားတွေ အများကြီး ဖြစ်စေခဲ့ပါတယ်” ဟု သူက ဆိုသည်။

သူအမေရိကမှ ဗြိတိန်သို့ ပြန်ရောက်လာသည့် အခါတွင် ဒီဇိုင်းလောကတွင် ဆက်သွယ်လုပ်ကိုင်သည့် စနစ်၊ လုပ်ငန်းကို Package  ဖြင့် ထုတ်လုပ်သည့် စနစ်များ မရှိသေးကြောင်း လေ့လာတွေ့ရှိခဲ့သည်။ ထို့ကြောင့် သူက ဗြိတိန်တွင် ဒီဇိုင်းကို Package ဖြင့် ထုတ်လုပ်ရန် ဆုံးဖြတ်လိုက်သည်။

သူက Michael Peters & Partners ဆိုသည့် ကုမ္ပဏီကို ၁၉၇၀ ပြည့်နှစ်တွင် စတင်ထူထောင်ခဲ့သည်။ စတင်လုပ်ကိုင် ကတည်းက အကောင်းဆုံး ဒီဇိုင်းများကို ဖော်ထုတ်ပေးပြီး၊ မိမိကုမ္ပဏီကိုလည်း အကောင်းဆုံး မန်နေဂျာများကို ဦးဆောင်ဦးရွက်ပြုကာ မောင်းနှင်ခိုင်းရန် ကြံရွယ်ထားသည်။ 

ပထမဆုံး လုပ်ငန်းအဖွဲ့ငယ်လေးများနှင့် ပေါင်းစုကာ ဆက်သွယ်ပူးပေါင်းမှုများ ပြုလုပ်ခဲ့သည်။ ယင်းတို့အထဲတွင် BBC နှင့် Unilever တို့လည်း ပါဝင်သည်။ 

“ကျွန်တော်တို့ Rolling Stone အဖွဲ့ရဲ့ Beggar's Banquet ဆိုတဲ့ အယ်လ်ဘန်မျက်နှာဖုံးကို စပြီးတော့ ဆွဲရတယ်။ ဒါဟာ Packaging ဆိုတဲ့ သဘောတရားကို ပထမဆုံး စပြီးတော့ အကောင်အထည် ဖော်လိုက်တာပဲ”

နောက်ပိုင်းတွင် ပီတာသည် ကမ္ဘာ့နာမည်ကျော် အမှတ်တံဆိပ် ကုမ္ပဏီကြီးများနှင့် ပူးပေါင်းလုပ်ဆောင်ခွင့် ရသွားသည်။ ယင်းတို့အထဲတွင် Aeroflot, Carling, Giorgio Armani, Powered, Johnnie Walker နှင့် ရုရှားနိုင်ငံမှ Russian Standard Vodka ကုမ္ပဏီများအထိ သူက အလုပ်များ လုပ်ကိုင်ပေးခဲ့ရသည်။ 

ပီတာသည် ၁၉၉၀ ပြည့်နှစ်တွင် ဒီဇိုင်းနှင့်ဈေးကွက် ပညာထူးချွန်သောကြောင့် ဗြိတိန်နိုင်ငံက ချီးမြှင့်ပေးအပ်သည့် OBE ဂုဏ်ထူးဆောင်ဘွဲ့ကို ရရှိခဲ့သည်။

သူက မိမိဖောက်သည်များထံ မည်သို့ ချဉ်းကပ်ရသည်ကို အဘိုးဖြစ်သူထံက လေ့လာသင်ယူခဲ့သည်။ 

“အဘိုးက ကျွန်တော့်ကို အမြဲပြောတယ် လူတိုင်းကို ကိုယ့်မိတ်ဆွေ သူငယ်ချင်းလို ဆက်ဆံပါတဲ့။ ကိုယ့်ဖောက်သည်တွေ ဆိုတာ အလေးပေး ဂရုစိုက်ခံချင်တာပဲ။ သူတို့က သူတို့အတွေးအခေါ်တွေ ပြောပြချင်ကြတယ်။ သူတို့စိတ်ကူးတွေ၊ သူတို့ဆန္ဒတွေ ပြောကြတာပဲ။ သူတို့ ယုံကြည်တဲ့သူတွေရဲ့ ဖြစ်ချင်တာတွေကို ပြောတတ်ကြတာပဲ”

သူက ထိုသဘောတရားနှင့် ဆက်နွှယ်ပြီး သူ့ဝန်ထမ်းများကို မည်သို့ဆက်ဆံကြောင်း ပြောရာတွင်-

“ကျွန်တော်နဲ့အတူ အလုပ်လုပ်တဲ့ လူအများစုဟာ နှစ်ပေါင်းများစွာ လက်တွဲလာခဲ့ကြသူတွေ ဖြစ်နေတော့ ကိုယ့်ရဲ့ တကယ့်မိတ်ဆွေရင်းချာတွေလို ဖြစ်နေပြီ။ ဒါကြောင့် လုပ်ငန်းထဲမှာ ဘယ်သူက လက်ဖက်ရည်ဖျော်ရသလဲ ဆိုတာ ပြဿနာ မဟုတ်တော့ဘူး။ ကျွန်တော်နဲ့ အလုပ်တွဲလုပ်သူ ၆၀၀ လောက်အထိ ရှိဖူးတယ်။ သူတို့အားလုံး ကျွန်တော့် လက်ရေးနဲ့ ရေးပို့တဲ့ မွေးနေ့လက်ဆောင်ကတ်တွေ ရဖူးကြသူတွေချည်းပဲ”

ပီတာက အမေရိကရှိ ကုမ္ပဏီများသည် အမေရိကန်နည်း အမေရိကန်ဟန်များဖြင့် သွားနေကြသည်ဟု ဆိုသည်။ သူတို့က ကုမ္ပဏီဘုတ်အဖွဲ့တွင် ဖန်တီးမှု ဒါရိုက်တာများကို ထည့်သွင်းထားလေ့ ရှိသည်။ ထိုသူများက ကုမ္ပဏီ၏ အသစ်အဆန်းများကို ဖန်တီးထုတ်လုပ် တင်ပြကြရသည်ဟု ဆိုသည်။ 

“Apple နဲ့ Nokia ကိုပဲကြည့်လေ။ သူတို့ ဘာလုပ်လုပ် ဒီဇိုင်းကို ဗဟိုပြုထားကြတယ်။ ဒါကြောင့်လည်း သူတို့ အောင်မြင်နေကြတာပေါ့။ ထုတ်လုပ်တဲ့ ကုန်ပစ္စည်းက ကောင်းတယ်ဆိုတာ ဒီဇိုင်းက ကြည့်လိုက်ရင် လူအထင်ကြီးစရာ ဖြစ်နေဖို့လည်း လိုတယ်”
 
ပီတာသည် ဒီဇိုင်းလောကတွင် ကျင်လည်ပြီး ဆရာကြီးတစ်ဆူအဖြစ် ရပ်တည်နိုင်ခဲ့သည်မှာ နှစ်ပေါင်း ၃၅ နှစ် ကျော်ခဲ့ပြီ ဖြစ်သည်။ သူထူထောင်ခဲ့သည့် ဒီဇိုင်းကုမ္ပဏီများတွင် Michael Peters and Partners, Michael Peters Group PLC, Identica ဆိုသည့် ကုမ္ပဏီအားလုံး အောင်မြင်ခဲ့သော ကုမ္ပဏီများ ဖြစ်ခဲ့သည်။ 

သူ ၁၉၉၂ ခုနှစ်တွင် ထူထောင်သည့် Identica ကုမ္ပဏီသည် ကုန်အမှတ်တံဆိပ်များနှင့် ဒီဇိုင်းများကို တီထွင်ပေးသည့် အေဂျင်စီကြီးတစ်ခု ဖြစ်ခဲ့သည်။ Universal Studios နှင့် Diageo ကုမ္ပဏီကြီးများအတွက် အလုပ်လုပ်ပေးနေရသည်။ နိုင်ငံတကာမှ နာမည်ကျော် ကုမ္ပဏီကြီးများကလည်း သူ့ထံတွင် ဒီဇိုင်းများ လာအပ်ကြသည်။ 

သူအဘယ်ကြောင့် အောင်မြင်သနည်း။ စိတ်ရှည်ဇွဲသန်သည်။ မိမိဝန်ထမ်းများကို ဂရုစိုက်လေးစားသည်။ ဖောက်သည်များကို အကောင်းဆုံး စည်းရုံးနိုင်သည်။ မိမိကုမ္ပဏီကို အယုံကြည် စိတ်အချရဆုံး ဒီဇိုင်းကုမ္ပဏီကြီးတစ်ခု ဖြစ်အောင် ထူထောင်ပြီး အားလုံးကိုလည်း လေးစားစွာ ဆက်ဆံသည်။ အများအကြိုက်ကို မိမိပညာနှင့် ပေါင်းပြီး ကမ္ဘာကျော် အမှတ်တံဆိပ်များဖြစ်အောင် ထိုးဖောက်ပေးနိုင်ခြင်းက ပီတာကို အကောင်းဆုံး ဒီဇိုင်းဆရာဘဝ ရောက်စေခဲ့သည်။