News

POST TYPE

RELAX

ငြိမ်းချမ်းကျော်နဲ့ တွေ့ဆုံခြင်း
20-Nov-2016

အမျိုးသား နှစ်ယောက်ရဲ့ကြားက သံယောဇဉ်နဲ့ ချစ်ခြင်း မေတ္တာ အကြောင်းကို ပုံဖော် ရိုက်ကူးထားတဲ့ မေထုန်ရာသီဖွား ရုပ်ရှင်ဇာတ်ကား အကြောင်းနဲ့ ပတ်သက်ပြီး ဇာတ်ကားရဲ့ ထုတ်လုပ်သူနဲ့ သရုပ်ဆောင်ဖြစ်တဲ့ ငြိမ်းချမ်းကျော်နဲ့ တွေ့ဆုံပြီး၊ အမေရိကမှာ ရုံတင်ပြသခွင့် ရခဲ့တဲ့အပေါ် ခံစားမှု၊ ဇာတ်ကားကို ရိုက်ကူးခဲ့တဲ့အတွက် ရင်ဆိုင်ခဲ့ရတဲ့ ဝေဖန်မှုများ အကြောင်းနဲ့ ရိုက်ကူးရေး အတွေ့အကြုံများ အကြောင်းကို The Voice က မေးမြန်းဖော်ပြ ထားပါတယ်။

Voice : မေထုန်ရာသီဖွား ရုပ်ရှင်က မူလက စက်တင်ဘာလထဲ ရုံတင်မယ်လို့ ကြားထားတာပါ။ ဘယ်လို အခက်အခဲတွေရှိလို့ ရုံတင်ရက် နောက်ကျသွားတာလဲ။
NCK : အဲ့ဒါကတော့ ဒီကားမှာ မူလ ဖန်တီးထားတဲ့ နောက်ခံ တေးဂီတကို မကြိုက်တဲ့အတွက် အသစ် ပြန်တီးတယ်။ အဲ့ဒါကြောင့် ဆင်ဆာ တင်တာလည်း နည်းနည်း နောက်ကျသွားတယ်။ ရုံတင်ရက်လည်း နည်းနည်း နောက်ကျသွားပါတယ်။ ဒီဇင်ဘာလထဲမှာတော့ ပရိသတ်တွေ ကြည့်ခွင့်ရတော့မှာပါ။

Voice : အမေရိကမှာ ရရှိတဲ့ ရုပ်ရှင်ရုံ နှစ်ရုံမှာ သွားရောက် ပြသခဲ့တုန်းကရော ပရိသတ်အားပေးမှုအတိုင်း အတာက ဘယ်လိုရှိလဲ။
NCK : ဒီကားကို ကြည့်ပြီးတဲ့သူတွေ အားလုံးကတော့ ဇာတ်ကားမှာ ပါဝင်တဲ့ ဇာတ်လမ်း၊ ဇာတ်ကွက်တွေ၊ တင်ပြပုံ Presentation တွေကို ချီးကျူးတဲ့ အသံတွေပဲ ကြားရတယ်။ ဒီကားကို လာကြည့်တဲ့ အနောက်နိုင်ငံသားတွေကလည်း ချီးကျူးကြတယ်ဗျ။ အဲ့ဒီအပေါ်မှာတော့ အတိုင်းမသိ ဝမ်းသာတယ်လို့ ပြောရမှာပေါ့။ ဇာတ်ကား တစ်ခုလုံးရဲ့ ကောင်းခြင်းကတော့ ဒါရိုက်တာ ကိုညိုမင်းလွင်ရဲ့ စွမ်းဆောင်မှုကြောင့်ပါ။

Voice : ဒီကားနဲ့ ပတ်သက်ပြီး ကြည့်ပြီးတဲ့ ပရိသတ်တွေ ထောက်ပြထားတဲ့ လိုအပ်ချက်တွေကရော ဘာတွေဖြစ်မလဲ။
NCK : အဲ့ဒါကတော့ ဒီကားကို အမေရိကမှာ ရုံတင်ဖို့ လုပ်နေတဲ့အချိန်က နောက်ခံ တေးဂီတပိုင်းမှာ လိုအပ်တာလေးတွေ ရှိသွားတဲ့အတွက် ပြန်လုပ်နေတဲ့ အချိန်ပေါ့။ အဲ့ဒီအပိုင်းမှာ နည်းနည်းလေး ကသီသွားတဲ့အခါကျတော့ အင်္ဂလိပ်လို စာတန်းထိုးတဲ့ အချိန်မှာ နည်းနည်း ပြန်စစ်ချိန်လေး မရလိုက်တော့ တချို့ နေရာလေးတွေမှာ စကား ပြောနေပေမယ့် အင်္ဂလိပ် စာတန်းထိုးက မပေါ်လာသေးဘဲ၊ နည်းနည်း နောက်ကျသွားတယ်။ လာကြည့်တဲ့ အနောက် နိုင်ငံသားတွေ အတွက်ကျတော့ ဘာသာပြန် စာတန်းကို ဖတ်ရတာ အဆင်မပြေဘူး ဖြစ်သွားတာပေါ့။ သရုပ်ဆောင်တွေက စကား ပြောနေပေမယ့် အောက်က စာတန်းထိုးထားတာက မပေါ်ဘူးပေါ့။ အဲ့ဒီ လိုအပ်ချက်တွေ အားလုံးကိုတော့ ကျွန်တော်တို့ ပြန်ပြင်ထားပြီးပါပြီ။

Voice : ဒီကားနဲ့ ပတ်သက်ပြီး ဟောလိဝုဒ်မှာ ပထမဆုံး ရုံတင်တဲ့ မြန်မာရုပ်ရှင်ကား၊ အော်စကာ စာကြည့်တိုက်မှာ အသိမ်းခံရတဲ့ မြန်မာ ဇာတ်ညွှန်းဆိုတဲ့ ဂုဏ်ပုဒ်တွေ ရလာတဲ့အပေါ်ကိုရော ဘယ်လို ခံစားရလဲ။
NCK : အခုနောက်ပိုင်းမှာ ပရိသတ်တွေ တောင်းဆိုလာတာက ကျွန်တော်တို့ ရိုက်ပြတဲ့ ဇာတ်လမ်းတွေက ကိုယ်ပိုင် ဖန်တီးမှု ဖြစ်ဖို့ လိုတယ်ဆိုတဲ့ အချက်ကိုပေါ့။ အခုနောက်ပိုင်း ပရိသတ်တွေက ရုပ်ရှင်ကို သာမန် ကြည့်တာထက် လေ့လာ ခံစားတယ်လို့ ပြောရမှာပေါ့။ အဲ့ဒီအတွက် ပရိသတ်တွေက မြန်မာ ဇာတ်ကားတွေကို ကောင်းစေချင်တယ်။ မေထုန်ရာသီဖွား ဇာတ်ကားက ကိုယ်ပိုင် ဖန်တီးထားတဲ့ ဇာတ်လမ်း ဖြစ်တဲ့အတွက် ဟောလိဝုဒ်တင် မဟုတ်ဘဲ၊ တခြား ပြည်ပ နိုင်ငံတွေမှာပါ သူတို့ရဲ့ ဘာသာစကားနဲ့ နောက်ခံ အသံသွင်းပြီး ပြလို့ရတဲ့ အဆင့်အထိ ရောက်သွားတယ်။ ကျွန်တော်တို့ ဇာတ်ကားတွေမှာ တင်ပြပုံတွေ၊ ရိုက်ချက်တွေ ကောင်းလာပြီဆိုရင် နိုင်ငံတကာကိုပါ ထိုးဖောက်နိုင်တဲ့ အဆင့်အထိ ရောက်လာမယ်။ နိုင်ငံခြား ဝင်ငွေပါ ရှာလာနိုင်ပြီဆိုရင် ရုပ်ရှင်ဇာတ်ကားတွေအတွက် ငွေလည်း ပိုသုံးလာနိုင်မယ်။ အဲ့ဒီအတွက် မြန်မာရုပ်ရှင် ဇာတ်ကား တစ်ကား အနေနဲ့ အမေရိကအထိ ထိုးဖောက်ပြီး ပြသနိုင်တာကို ဂုဏ်ယူတယ်။ ကျွန်တော်တို့တောင် လုပ်လို့ ရတယ်လို့ မြင်ရင်၊ နောက်ပိုင်းလူတွေလည်း လိုက်လုပ်ဖို့ စိတ်ကူးတွေ ရလာမယ် ဆိုရင်ပဲ ကျွန်တော်တို့ရဲ့ ရည်ရွယ်ချက် အောင်မြင်ပါတယ်။

Voice : ဒီကားမှာ ပါဝင်ခဲ့တဲ့အတွက် လူမှုကွန်ရက် Facebook မှာ မြန်မာနိုင်ငံရဲ့ ပထမဆုံး Gay မင်းသားဆိုပြီး ကိုယ့်ကို နာမည်ပေး ပြောဆိုကြတဲ့ အပေါ်ကိုရော ဘယ်လို ခံစားရလဲ။
NCK : ဒီကားမှာ ကျွန်တော်က Gay အဖြစ် သရုပ်ဆောင်တဲ့ မင်းသားလို့ ပြောရမှာပေါ့နော်။ ဒီကားကို ရိုက်ဖြစ်သွားတဲ့ အကြောင်းရင်းက နှစ်ချက် ရှိပါတယ်။ ပထမတော့ ကျွန်တော် ဗီဒီယိုတွေ စရိုက်တယ်။ မင်းသား တစ်ယောက် အနေနဲ့ ရုပ်ရှင် ကားကြီးလည်း ရိုက်သင့်တယ်ဆိုတဲ့ အချိန်မှာ ကျွန်တော် ရွေးလိုက်တဲ့ ဇာတ်လမ်း သုံးခု ရှိပါတယ်။ အဲ့ဒီအထဲကမှ မေထုန်ရာသီဖွား ရုပ်ရှင်သည် သရုပ်ဆောင်အသစ် တစ်ယောက်ကို ပရိသတ်တွေ သတိပြုမိသွားစေမယ့် ဇာတ်လမ်းမျိုး ဖြစ်တဲ့အတွက် ရွေးလိုက်တာပါ။ ကျွန်တော့် ရွေးချယ်မှုအတွက် ဖြစ်လာတဲ့ တန်ပြန် သက်ရောက်မှုတွေကို ခံရမယ်ဆိုတာတော့ ကျွန်တော် သိထားပါတယ်။ ဒီကားကို ရိုက်မယ်လို့ ကြေညာလိုက်တဲ့ အချိန်ကတည်းက ဝေဖန်မှုတွေ ရှိလာတယ်။ ကျွန်တော့် မိသားစု၊ ဆွေမျိုး၊ ပတ်ဝန်းကျင် အသိုင်းအဝိုင်းကလည်း ပြောခံရတယ်။ ဒါပေမဲ့ ရုံတင်တဲ့အခါမှာ ကျွန်တော့်ရဲ့ သရုပ်ဆောင်မှုနဲ့ ပတ်သက်ပြီး ပရိသတ်တွေက သတိပြုမိသွားလိမ့်မယ်လို့ ယုံကြည်ပါတယ်။ အနုပညာပိုင်းဆိုင်ရာ ဖန်တီးမှု တစ်ခုအတွက် ကျန်တဲ့အရာတွေကို စတေးရတယ် ဆိုရင်တောင် ကျွန်တော့်အနေနဲ့ ဝမ်းမနည်းပါဘူး။

Voice : အမျိုးသားချင်း ချစ်ကြိုက်ကြတဲ့ ဇာတ်လမ်းမျိုးကို အတည်အခန့် ပုံစံမျိုး ရိုက်ပြတာက ဒီကားက ပထမဆုံး ဖြစ်မယ် ထင်တယ်နော်။ အဲ့ဒီအတွက် သရုပ်ဆောင်မှု အပိုင်းမှာရော ဘယ်လို အခက်အခဲတွေ ရှိခဲ့လဲ။
NCK : ဒီကားကို မရိုက်ခင်တုန်းကတော့ ကြောက်တယ်။ ယောက်ျားလေး တစ်ယောက်က နောက်ထပ် ယောက်ျားလေး တစ်ယောက်ကို ချစ်ပြဖို့၊ မျက်လုံးတွေကအစ ပျော်ဝင်ပြဖို့၊ ကိုယ်သရုပ်ဆောင် မပြနိုင်မှာကို စိုးရိမ်တယ်။ ဒီလို ကာရိုက်တာမျိုးက ကိုယ်နဲ့လည်း နည်းနည်းလေး ဝေးနေတယ်။ ဒီကားကို မရိုက်ခင်ကတော့ တော်တော် စိုးရိမ်တယ်။ ရိုက်ရမယ်လို့ သေချာပြီးတော့ ရှုတင်စတည်တဲ့ အချိန်မှာ စိတ်ကို ဒုံးဒုံး ချလိုက်တယ်။ ဖြစ်ချင်တာ ဖြစ်တော့။ လုပ်ရတော့မယ်ပေါ့နော်။ ကိုညို သင်ပြသရွေ့ကို လုပ်မယ်လို့ စိတ်ထဲမှာ ခံယူလိုက်တယ်။ ကိုညိုက ကျွန်တော်တို့ရဲ့ အက်တင်ပိုင်းနဲ့ ပတ်သက်ပြီး အနည်းနဲ့၊ အများကို ချိန်ပေးပါတယ်။ ကိုညိုရဲ့ သင်ပြမှုနဲ့ ဇာတ်လမ်း အပေါ်မှာ ကျွန်တော်တို့ ကိုယ်တိုင် သေချာ စီးမျော ခံစားပြီး သရုပ်ဆောင်ခဲ့တဲ့အတွက် အရမ်းကြီး ခက်ခဲတာမျိုးတော့ မရှိခဲ့ပါဘူး။

သန့်ဇင်ဦး

  • VIA