News

POST TYPE

RELAX

တအာင်းဒေသ၏ ပညာရေးနှင့် ဒေသခံတို့အကြောင်းကို အရပ်ဘက်အဖွဲ့အစည်း ခေါင်းဆောင်တစ်ဦးနှင့် တွေ့ဆုံခြင်း
11-Sep-2018 tagged as


တအာင်းဒေသ၏ ပညာရေးနှင့် ဒေသခံတို့အကြောင်းကို အရပ်ဘက်အဖွဲ့အစည်း ခေါင်းဆောင်တစ်ဦးက ပြောပြထားသည်။

ရှမ်းပြည်နယ်မြောက်ပိုင်းရှိ တအာင်းခေါ် ပလောင်တိုင်းရင်းသားတို့ နေထိုင်သည့်ဒေသတွင် အခြေစိုက်သည့်  တအာင်းပညာရေးအင်စတီကျု TEI သည် ဒေသတွင်း ပရဟိတကျောင်း ၁၆၀ ကျော် ဖွင့်လှစ်ထားရာ ထိုကျောင်းများတွင် လူမျိုးဘာသာမရွေး တက်ရောက်ပြီး မူလတန်းပညာသင်ယူနိုင်သည်ဟု သိရသည်။
မကြာသေးခင်က တွေ့ဆုံမေးမြန်းရာတွင် ထိုအဖွဲ့၏ အတွင်းရေးမှူး လွေးချယ်ရီက ပညာရေးအပါအဝင် ဒေသတွင်းအခြေအနေများကို ပြောပြထားသည်။

မေး။ ။ ဒီဘက်မှာ ပညာရေးအရေးတကြီးလိုအပ်နေတာ ဘာကြောင့်လဲ။ 
ဖြေ။ ။ မိုင်းယော် (မြို့နယ်) ဘက်မှာဆိုရင် တော်တော်များများက ဘိန်းစိုက်ကြတယ်။ ဒါပေမဲ့ လုံးဝကို ဆင်းရဲတယ်။ ပုံမှန်အားဖြင့် ဘိန်းစိုက်တယ်ဆိုရင် သူဌေးဖြစ်ရမှာပဲလေ၊ ဘာလို့ဆင်းရဲနေကြလဲဆိုတော့ ပညာမတတ်လို့ပေါ့။ သူတို့က ဘိန်းစိုက်တယ်၊ ဟုတ်တယ်။ သူတို့ကို အခွန်လာကောက်တဲ့ အဖွဲ့အစည်းတွေကလည်း အရမ်းများတယ်၊ သူတို့ ပြန်မပြောရဲဘူး၊ ဘယ်အဖွဲ့က ဆိုတာကိုလည်း မသိဘူး။ ဘိန်းကလည်း တရားမဝင်ဆိုတော့ ကြောက်စိတ်ပဲရှိတာ၊ ပြီးတော့ ရောင်းတဲ့အချိန်မှာလည်း စာမတတ်တော့ မတွက်တတ်ဘူး၊ ဒီတော့ အလိမ်ခံရတယ်။ ဘိန်းစိုက်ပေမယ့် ဆင်းရဲသည်ထက် ဆင်းရဲလာတယ်။ ဒါဟာ ပညာရေးဘယ်လောက်လိုအပ်နေပြီလဲဆိုတာရဲ့ ပြယုဂ်ပဲ။

မေး။ ။ ရှမ်းနဲ့ တအာင်း လက်နက်ကိုင်နှစ်ဖွဲ့ တိုက်ခိုက်ကြတာကြောင့် ဒေသခံတွေ ဆက်ဆံရေးပျက်ခဲ့တယ်လို့ သိရတယ်။ ဒီအခြေအနေမှာ ရှမ်းရွာတွေထဲ ကျောင်းသွားဆောက်တော့ အခက်အခဲဖြစ်တာတွေရှိလား။ 
ဖြေ။ ။ ရှမ်းနဲ့ တအာင်းဆိုတာက ဟိုးဘိုးဘွားဘီဘင်ကတည်းက အတူတကွ နေထိုင်လာခဲ့တယ်။ ဒီတော့ ကျွန်မတို့လုပ်တဲ့ ပညာရေးလှုပ်ရှားမှုတွေမှာ ရှမ်းမို့လို့၊ တအာင်းမို့လို့ဆိုတဲ့ အခက်အခဲတွေမရှိပါဘူး။ ကျွန်မတို့က အရမ်းနည်းနည်းလေးကိုပဲ လုပ်ပေးနိုင်သေးတာပါ။ ဒီနှစ်စတဲ့ ဘကကျောင်း (ဘုန်းတော်ကြီးသင် ပညာရေးကျောင်း) ဆိုရင် (လူဦးရေ) ၅၀၀-၆၀၀ လောက်ပဲ ကျွန်မတို့ကူညီနိုင်သေးတယ်။ တကယ်က တစ်နှစ် တစ်နှစ်ကို ကျွန်မတို့တောင်ပေါ်က ကလေးတွေ ထောင်ချီပြီးတော့မှ အောက်ပိုင်းကို ဆင်းနေကြတာ။ 

မေး။ ။ ဘာလို့ အဲဒီလို ဆင်းရဲနေကြတာလဲ။
ဖြေ။ ။ အထူးသဖြင့် ဘုန်းကြီးတွေ။ ဘုန်းကြီးတွေက ဒီကိုရောက်လာတဲ့အခါမှာ ဒီကဘုန်းကြီးအသိတွေနဲ့ ဆက်သွယ်ပြီးတော့ဟိုမှာ ဘကတွေရှိတယ်၊ ပရဟိတ တွေရှိတယ်စသဖြင့် မျိုးစုံပေါ့၊ အဲဒီနေရာတွေကို ခေါ်သွားပြီးတော့ ထားပေးတယ်။ ကျွန်မတို့ပလောင်တွေ ဆိုလို့ရှိရင် ကလေးအများကြီးမွေးတယ်။ မွေးပြီးမှ ကိုယ့်ကလေးကို လုံးဝလှည့်မကြည့်တဲ့မိဘတွေ အများကြီးရှိတယ်။ ဒီလိုမျိုးထည့်ပေးလိုက်ပြီဆိုတာနဲ့ သူတို့တွေ အဆင်ပြေရဲ့လား၊ မိန်းကလေးတွေဆိုရင်ရော လုံခြုံတဲ့နေရာဖြစ်ရဲ့လား ဆိုတာကို စိတ်ဝင်စားမှုအရမ်းကို နည်းတယ်။ ကျောင်းသားတွေက သွားလိုက်ပြီဆိုရင် ကောင်းတဲ့နေရာတွေရှိသလို တချို့ မကောင်းတာတွေရှိတယ်၊ အစားဆင်းရဲတာမျိုးတွေဖြစ်တယ်။

မေး။ ။ ပရဟိတအဖွဲ့တွေလည်း ရှိနေတာကို ဘုန်းကြီးတွေနောက်ကို ဘာလို့လိုက်ကြတာလဲ။
ဖြေ။ ။ ကျွန်မတို့ တအာင်းတွေရဲ့ ၉၉ ရာခိုင်နှုန်းက ဗုဒ္ဓဘာသာတွေဖြစ်ကြတယ်ဆိုတော့ ဘုန်းကြီးတွေက ကျွန်မတို့ရဲ့ လူ့အဖွဲ့အစည်းမှာ အရမ်းပဲ အာဏာ၊ ပါဝါကြီးတယ်။ ပြီးတော့ ဘာသာတရားကို ယုံကြည်တယ်၊ နောက် ဒီလိုမျိုးတွေ ဖြစ်မှာမဟုတ်ဘူးဆိုပြီးတော့ ထည့်ပေးလိုက်တာတွေ ရှိတယ်ပေါ့။ 

မေး။ ။ TNLA တအာင်းလက်နက်ကိုင်အဖွဲ့ကရော ကူညီပေးတာတွေ ရှိလား။ 
ဖြေ။ ။ ကျွန်မတို့ TEI နဲ့ TNLA နဲ့ ဆက်စပ်မှုမရှိဘူး။ သူတို့က ကျွန်မတို့လုပ်ငန်းတွေကို ကူညီတာ၊ ပံ့ပိုးပေးတာမျိုး မရှိဘူး။ 

မေး။ ။ တိုက်ပွဲဖြစ်လေ့ရှိတဲ့ဒေသတွေမှာ TEI က ခန့်ထားတဲ့ ဆရာ၊ ဆရာမတွေရဲ့ လုံခြုံရေးကို ဘယ်လိုဆောင်ရွက်ပေးပါသလဲ။
ဖြေ။ ။ ကျွန်မတို့ ကျောင်းဖွင့်ထားတဲ့နေရာမှာတော့ တိုက်ပွဲတွေ အများကြီးဖြစ်နေတယ်ဆိုတော့ ဆရာ၊ ဆရာမတွေရဲ့ လုံခြုံရေး၊ ဝန်ထမ်းတွေရဲ့ လုံခြုံရေးတွေကို အရမ်းကို စိုးရိမ်ရတဲ့အနေအထားတွေရှိတယ်။ ဒါပေမဲ့ လုံခြုံရေးကိုတော့ သေသေချာချာ၊ ထွေထွေထူးထူး မလုပ်ပေးနိုင်ပါဘူး။ သုံးလတစ်ခါလောက် သူတို့ဆီသွားပြီးတော့ အားပေးတာမျိုးပဲ ရှိပါတယ်။

မေး။ ။ စာသင်ဖို့အတွက် ဆရာ၊ ဆရာမတွေကို ဘယ်လိုခေါ်ယူပါသလဲ။ 
ဖြေ။ ။ အစိုးရကပေးတဲ့ ဆရာ၊ ဆရာမတွေက အောက်ပြည်ကဖြစ်တယ်ဆိုတော့ ဒီကလေးတွေနဲ့ သူ့စကားကိုယ်နားမလည်၊ ကိုယ်သင်တာကို သူတို့နားမလည်ဖြစ်ပြီးတော့ ဘယ်လိုမှ ကီးမကိုက်ဘူး။ ကီးမကိုက်တော့ ဆရာတွေမှာလည်း ကြာကြာရေရှည် မခံနိုင်ဘူး၊ ပြန်သွားကြတယ်။ ဒါ့အပြင် ကျွန်မတို့ဆီမှာက တိုက်ပွဲတွေဖြစ်နေတော့ ဒါကိုလည်း ကြောက်ကြတာတွေရှိတယ်။ ကျွန်မတို့ကတော့ ကလေးတွေ နားလည်အောင် ပြောနိုင်သင်ပြနိုင်တဲ့ ဆရာ၊ ဆရာမတွေကို ခေါ်တယ်။ သင်တန်းပေးတယ်။ သင်တဲ့အခါမှာလည်း စကားပြောရတာ နားလည်ကြတော့ ကလေးတွေကလည်း ပျော်တယ် ဆရာတွေလည်း ပျော်တယ်။ အဆင်ပြေတယ်။

မေး။ ။ တခြား ဘာအခက်အခဲတွေ့ရသလဲ။
ဖြေ။ ။ ကျွန်မတို့က ဘတ်ဂျက်အခက်အခဲရှိတယ်။ အလှူရှင်တွေ အများကြီးကို ချဉ်းကပ်ကြည့်ပေမယ့် “ပညာရေးသည် အစိုးရအလုပ်” ဆိုပြီးတော့ ပြောတဲ့သူတွေ အများကြီးရှိတယ်။ ဒီတော့ ဒါကကျွန်မတို့ အတွက် ကြီးမားတဲ့စိန်ခေါ်မှုတစ်ခုပဲ။ နိုင်ငံခြားမှာ ရောက်နေတဲ့ ကျွန်မတို့ တအာင်းလူမျိုးတွေဆီကနေ အလှူခံတယ်။ လုပ်ငန်းရှင်တွေဆီမှာလည်း အလှူခံတယ်။ 

မေး။ ။ ဒီကိစ္စတွေပြေလည်ဖို့ဆိုရင် ဘာတွေလိုအပ်လဲ။ 
ဖြေ။ ။ ကျွန်မတို့ဒေသမှာ မငြိမ်းချမ်းလို့ ပညာရေးပိုင်းမှာ လွတ်လွတ်လပ်လပ် လုပ်လို့မရသလို၊ ဘယ်သူမှ အဲဒီလိုမျိုးနေရာမှာ မသွားချင်ကြဘူး။ တကယ်လို့သာ ငြိမ်းငြိမ်းချမ်းချမ်းရှိမယ်ဆိုရင်တော့ ပညာရေးပိုင်းမှာ အစိုးရသာမက ကျွန်မတို့လိုမျိုး အဖွဲ့တွေက ဝိုင်းလုပ်မယ်ဆိုရင် ဒီထက်အများကြီး ပိုပြီးတော့ ဖွံ့ဖြိုးတိုးတက်မယ်လို့ ထင်တာပေါ့လေ။ 

စန္ဒာမော် (Myanmar Now)

  • TAGS