News

POST TYPE

RELAX

ကွန်ဖြူးရှပ်၏ စီးပွားရေးနှင့် လူဦးရေအမြင်
08-Sep-2018 tagged as



လူသားများကို အရည်အချင်းရှိအောင် ပျိုးထောင်ပေးခြင်းသည် လက်နက်ကောင်းများကို တပ်ဆင်ဖြည့်ဆည်းနေခြင်းထက် ပိုကောင်းသည်။ ကောင်းမွန်သော အုပ်ချုပ်ရေးစနစ်သည် စီးပွားရေးတိုးတက်ကောင်းမွန်အောင် လုပ်ဆောင်နိုင်ခြင်းအပေါ်တွင် မူတည်သည်ဟု ကွန်ဖြူးရှပ်ကဆိုသည်။ သူဆိုလိုသည်က နိုင်ငံတစ်နိုင်ငံသည် အင်အားကြီးနိုင်ငံတစ်နိုင်ငံ ဖြစ်လာစေရန် လက်နက်ကောင်းများ တပ်ဆင်နေရုံဖြင့် မလုံလောက်၊ ပြည်သူတွေကို ပညာတတ်များအဖြစ် မွေးထုတ်ပေးရန်လည်း လိုသည်။ ပညာတပ်ဆင်ပေးခြင်းသည် လက်နက်များတပ်ဆင်နေခြင်းထက် ပိုကောင်းသည်ဟု ဆိုလိုပါသည်။
 
ထို့ကြောင့် ကွန်ဖြူးရှပ်က ပြည်သူတွေကို ချမ်းသာအောင်လုပ်ပေးပါ။ ပညာတတ်အောင်လုပ်ပေးပါဟု တွဲပြောသည်။ ထိုသဘောတရားကို တရုတ်တို့ အစဉ်အဆက် အကောင်အထည်ဖော်ကြသည်။ ပြည်သူများ စားဝတ်နေရေးပြည့်စုံစေရေးနှင့် ပညာတတ်များဖြစ်ရေးကို ပိုပြီး အလေးထားကာ နိုင်ငံခေါင်းဆောင်များ လုပ်ဆောင်နိုင်ခြင်းကြောင့် လူဦးရေပေါက်ကွဲနေသော တရုတ်နိုင်ငံသည် ပြဿနာအနည်းဆုံးအနေအထားတွင် ရှိနေကြောင်းလည်း တွေ့ရသည်။

ပြည်သူတွေကို အစားအစာအလုံအလောက်ပေးရေး၊ တိုင်းပြည်တွင် စစ်လက်နက်အပြည့်အစုံရှိရေးနှင့် အစိုးရအပေါ် ပြည်သူတို့က အပြည့်အဝယုံကြည်မှုရှိရေးသည် ယနေ့တရုတ်တို့အလေးပေး လုပ်ဆောင်နေသည့် သဘောတရားများဖြစ်ပြီး ထိုသဘောတရားများက ကွန်ဖြူးရှပ်၏ ခေတ်အဆက်ဆက် သွန်သင်ဆုံးမမှုများတွင် အခြေခံနေကြောင်း တွေ့ရမည်ဖြစ်သည်။

တိုင်းပြည်တစ်ပြည်တွင် လူဦးရေတိုးပွားခြင်းသည်ပြဿနာမဟုတ်ပါ။ ထိုတိုးပွားလာသည့်လူဦးရေကို အကျိုးရှိစွာဖြင့် စီမံခန့်ခွဲနိုင်ရေးကသာ အရေးကြီးသည်။ လူတွေကို ပညာတတ်အောင် လုပ်ပေးလိုက်လျှင် နေရာတိုင်း အစိုးရအနေနှင့် လိုက်ပူနေစရာမလိုပါ။ သူတို့ဘာသာ ထိန်းကျောင်းနိုင်စွမ်း ရှိသွားပါလိမ့်မည်။ အစိုးရအပေါ်တွင်လည်းကောင်း၊ အုပ်ချုပ်မှုအပေါ်တွင်လည်းကောင်း သူတို့ နားလည်မှုများလေ၊ ယုံကြည်မှုများလေ တိုင်းပြည်ပိုပြီး အေးချမ်းလေဖြစ်သည်။ တိုင်းပြည်အေးချမ်းလျှင် အကျိုးစီးပွားတို့ တိုးတက်လာမည်မှာ အသေအချာဖြစ်သည်။

ကွန်ဖြူးရှပ်အတွေးအခေါ်များကို ကြည့်လိုက်လျှင် အဆင့်ဆင့် စနစ်တကျပြင်ဆင်ထားမှုများကို ဦးစားပေးထားကြောင်း တွေ့ရသည်။ အားလုံးသည် ကွင်းဆက်များနှင့်ဖြစ်နေသည်။ တစ်ခုကောင်းမှ အခြားတစ်ခုလည်း ကောင်းမည်။ အရာရာတွင် တစ်ခုတည်းကောင်းနေရုံဖြင့် တိုင်းပြည်အားလုံးကောင်းမည်ကို လက်မခံပေ။ သူက လူဦးရေတိုးပွားနေခြင်းမှာ အပြစ်မဟုတ်။ လူသားရင်းမြစ်များကို စနစ်တကျစီမံခန့်ခွဲခြင်းမပြုနိုင်သည်ကသာ အပြစ်ဖြစ်သည်။ လူဦးရေတိုးပွားနေခြင်းဖြင့် ဈေးကွက်ကောင်းတစ်ခုကို တည်ဆောက်ပြီးသား ဖြစ်နေမည်။ လူဦးရေများပြားမှုထဲတွင် ကျွမ်းကျင်ရာလိမ္မာမှုတွေလည်း များနိုင်သည်။ လူတွေက ကိုယ်သန်ရာ လုပ်ငန်းများဖြင့် ကုန်ထုတ်လုပ်မှုများကို ပြုလုပ်ကြလိမ့်မည်။ ထိုအခါတွင် ဈေးကွက်အတွင်း ကုန်စည်စီးဆင်းမှုနှင့် ဝန်ဆောင်မှုများသည် အလိုအလောက် ဖြစ်ပေါ်လာမည်သာဖြစ်သည်။ 

လူဦးရေ တိုးတက်များပြားလာခြင်းသည် စစ်ရေးအတွက်လည်း စိုးရိမ်ရသည့် အနေအထားတွင် မရှိတော့ပေ။ တိုင်းပြည်လုံခြုံရေးနှင့် ကာကွယ်ရေးတို့အတွက် လူအင်အားတောင့်တင်းသည်ဆိုခြင်းကပင် အားသာချက်တစ်ခုဖြစ်သည်။ ရှေးခေတ်ကတည်းက တရုတ်နိုင်ငံတွင် လှည့်လည်သွားလာနေသည့် လူစုကို ထိန်းသိမ်းပြီး စုစည်းကျွေးထားနိုင်သည့်ဒေသများက ဘုရင်များသည် အင်အားကြီးသူများအဖြစ် ရပ်တည်နိုင်ခဲ့ကြသည်သာဖြစ်သည်။ 

တိုင်းပြည်တွင် လူသားအင်အားကောင်းနေခြင်းသည် စစ်အင်အားကောင်းနေခြင်းတစ်ခုတည်းကို တွက်၍မရပါ။ ထိုအင်အားက တိုင်းပြည်အတွက် ကုန်ထုတ်လုပ်မှု လုပ်ငန်းများတွင်ပါ အထောက်အကူဖြစ်နေလျှင် ပိုကောင်းသည်ဟု ကွန်ဖြူးရှပ်ကဆိုသည်။ ထိုသဘောတရားကို တိုင်းပြည်ငတ်ပြတ်နေသည့်ကာလများတွင် တရုတ်ကွန်မြူနစ်တွေလည်း ကောင်းစွာအသုံးချခဲ့ကြောင်း တွေ့ရသည်။ စစ်မတိုက်ရသည့်အခါတွင် သူတို့စစ်သားတွေကို လယ်ယာနှင့် ကုန်ထုတ်လုပ်ငန်းများတွင် အပြည့်အဝပါဝင်နေရသူများအဖြစ် ပြောင်းလဲပေးကာ တိုင်းပြည်ကောင်းကျိုးကို ဆောင်ရွက်နိုင်ခဲ့ကြသည်။ 

တရုတ်တို့က လူဦးရေသည် သူတို့အတွက် ပြဿနာမဟုတ်ဆိုသည့် သဘောတရားကို လက်ခံသည်။ လူဦးရေပေါက်ကွဲမှုကို သူတို့နည်းသူတို့ဟန်ဖြင့် တစ်ဖက်က ထိန်းသလို၊ ရှိသည့်လူဦးရေကိုလည်း မငတ်အောင်ကြံဆောင်သည်။ အားလုံးဆောင်ရွက်အများအတွက်ဆိုသည့် သဘောတရားသည် ကွန်မြူနစ်သဘောတရားသက်သက် မဟုတ်ပါ။ တရုတ်တွင် ရှေးခေတ်ကတည်းက သူတို့ လူ့ဘောင်တည်ဆောက်ရေးအတွက် သုံးစွဲခဲ့ကြသော သဘောတရားတစ်ခုဖြစ်သည်။

ကွန်ဖြူးရှပ်က ပြည်သူတွေကို ကြွယ်ဝချမ်းသာအောင် လုပ်ပေးပါဟု ပြောနေခြင်းမှာ စည်းစိမ်ဥစ္စာသက်သက်မဟုတ်ပါ။ ပညာသင်ပေးခြင်း၊ လက်မှုပညာများ ကျွမ်းကျင်စေရန် သင်ပေးခြင်းတို့အား သာမန်ပြည်သူများကို ပြုလုပ်ပေးခိုင်းပါသည်။ သာမန်ပြည်သူတို့ ပညာတတ်လေ၊ လုပ်စားကိုင်စားနိုင်သည့် အတတ်ပညာများရှိလေ တိုင်းပြည်လည်း တစ်ဖက်က အေးချမ်းလေဆိုသည့် သဘောတရားကို သူကကောင်းစွာမြင်ခဲ့သောကြောင့် ဖြစ်ပါသည်။ လူသားတို့၏ လူနေမှုနှင့် ယဉ်ကျေးမှုအဆင့်အတန်းကို မြှင့်တင်ပေးခြင်းကသာလျှင် နိုင်ငံ၏ ကုန်ထုတ်စွမ်းအားကို မြှင့်တင်ပေးရာရောက်သည်ဆိုသော သဘောတရားကို ကွန်ဖြူးရှပ် လက်ထက်ကတည်းက အခြေတည်ခဲ့ပါသည်။ 

ပြည်သူတွေကို ဝလင်အောင်ကျွေးပါ၊ ပြည်သူတွေ ထမင်းဝလျှင် တိုင်းပြည်ကို စစ်လက်နက်တွေတပ်ဆင်ပါ။ ထိုနှစ်ချက်က ပြည်သူတွေ အုပ်ချုပ်သူအပေါ် ကောင်းကောင်းယုံကြည်မှုရှိလာစေလိမ့်မည်ဟု ကွန်ဖြူးရှပ်ပြောခဲ့သည့်စကားသည် ဖြန့်ထွက်တွေးစရာတွေ အများကြီးဖြစ်သည်။ ထမင်းငတ်နေသော တိုင်းပြည်တွင် အုပ်ချုပ်သူက စစ်အင်အား၊ လက်နက်အင်အားကို အခိုင်အမာတိုးချဲ့တည်ဆောင်နေလျှင် ပြည်သူတွေက ယုံကြည်မှုကင်းမဲ့နိုင်သည်။ လူတွေနှင့် တိုက်ပွဲတွေ ရင်ဆိုင်တိုက်ခိုက်နေကြရသည့် ကာလများဖြစ်သဖြင့် ပြည်သူတွေ ဝမ်းမဝလျှင် စစ်ရေးလည်း အောင်မြင်နိုင်မည်မဟုတ်ပါ။ ထမင်းဖြစ်မည့် ဆန်စပါးကို ထုတ်လုပ်ရမည့်အစား၊ ဓားတွေကိုချည်း ထုတ်လုပ်နေရလျှင်လည်း တိုင်းပြည်မငြိမ်းချမ်းနိုင်ပါ။ အားလုံးသည် ဆက်နွှယ်လျက်ရှိနေပါသည်။

  • TAGS