News

POST TYPE

RELAX

ကွန်ဖြူးရှပ်နှင့် ရှီကျင့်ဖျင်
01-Sep-2018



တရုတ်နိုင်ငံတွင် ကွန်မြူနစ်ပါတီက ဆက်လက်အောင်ပွဲခံနေသည်။ သမ္မတအဖြစ် ရှီကျင့်ဖျင် ဆက်လုပ်သည်။ တရုတ်ကွန်မြူနစ်ပါတီတွင်လည်းကောင်း၊ သမ္မတအဖြစ်လည်းကောင်း သက်တမ်းကြာမြင့်စွာ သူ့ကို နိုင်ငံတော်က အာဏာအပ်နှင်းထားခြင်းခံရသည်မှာ အဘယ်ကြောင့်နည်း။

သူအဘယ်ကြောင့် အောင်မြင်ရသနည်း။ အင်အားကြီး တရုတ်နိုင်ငံကြီးကို အဘယ်ကြောင့် အုပ်ချုပ်ပိုင်ခွင့်ရသနည်း။ သူ့အတွေးအမြင်များကို လေ့လာကြည့်လိုက်လျှင် ကွန်ဖြူးရှပ်အတွေးအခေါ်များ လွှမ်းမိုးနေကြောင်း သိသူနည်းလှသည်။ ရှီကျင့်ဖျင်သည် ကွန်ဖြူးရှပ်အတွေးအခေါ်များအတိုင်း လုပ်ကိုင်ဆောင်ရွက်တတ်သူဖြစ်ပါသည်။

ရှီကျင့်ဖျင်သည် ပွင့်လင်းမှုရှိပြီး တဲ့တိုးပြောဆိုဆက်ဆံတတ်သူတစ်ဦးဖြစ်သည်။ သူ့အပြောအဆိုများကို လေ့လာကြည့်လိုက်လျှင် တရုတ်အစဉ်အလာ အတွေးအမြင်များကို လေးစားတန်ဖိုးထားတတ်သူဖြစ်ကြောင်း တွေ့ရသည်။ ထို့အတူ သူ၏ ကွန်မြူနစ်ပါတီအပေါ်နှင့် ဆိုရှယ်လစ်ဝါဒအပေါ် ယုံကြည်မှုကလည်း အပြောင်းအလဲမရှိ တစ်သမတ်တည်းဖြစ်သည်။ 

ရှီကျင့်ဖျင်သည် ထိပ်ပိုင်းခေါင်းဆောင်ဘဝ ရောက်ရှိလာရန်အတွက် သူကြိုးစားဆောင်ရွက်ခဲ့သည့် လမ်းစဉ်မှာ အကျင့်ပျက်ခြစားမှုတိုက်ဖျက်ရေးဖြစ်သည်။ သမ္မတရာထူး မရမီကတည်းက တိုင်းပြည်တွင်း အကျင့်ပျက်ခြစားနေမှုများကို တိုက်ဖျက်ရာတွင် ပြောင်မြောက်ခဲ့သူဖြစ်သောကြောင့်လည်း ခေါင်းဆောင်ပိုင်းက သူ့ကို သဘောကျခဲ့ခြင်းဖြစ်သည်။ သူက ကွန်ဖြူးရှပ်၏ စကားတစ်ခွန်းကို ကိုးကားပြောလေ့ရှိသည်။ ထိုစကားမှာ သူတော်ကောင်းတရားဟူသည် ဓူဝံကြယ်နှင့် နှိုင်းယှဉ်သင့်သည်။ ဓူဝံကြယ်သည် နေရာအပြောင်းအလဲမရှိ။ တစ်နေရာတည်းတွင်ဖြစ်သည့် မြောက်အရပ်တည့်တည့်တွင် ရှိနေသည်။ ထို့ကြောင့်လည်း သူ့ကို အမြဲတိုင်တည်သက်သေပြုကြရသည် ဟူသည့်စကားကို မစ္စတာရှီက အမြဲညွှန်းသည်။ သူလည်း အမြဲသူ့ကိုယ်သူ ဓူဝံကြယ်လို ကျင့်ကြံနေထိုင်ပြီး တည့်မတ်အောင်နေသည်။

ကွန်ဖြူးရှပ်က နိုင်ငံကို ဦးဆောင်အုပ်ချုပ်နေသူများသည် သာမန်ပြည်သူများ၏ ယုံကြည်လောက်သည့်၊ ကိုးကွယ်အားထားသူများဖြစ်လောက်သော ပုံရိပ်ဖြင့် နေထိုင်ကြရမည်ဟု သွန်သင်ခဲ့သည်။ ယုံကြည်မှုတည်ဆောက်နိုင်မှ လူ့ဘောင်အဖွဲ့အစည်းက လေးစားတန်ဖိုးထားသည်။ အများအကျိုးကို လုပ်ဆောင်လိုသူသည် ကိုယ်တိုင် သီလသမာဓိရှိအောင် နေရမည်ဆိုသည့်စကားအတိုင်း ရှီကျင့်ဖျင်က ကျင့်ကြံနေထိုင်နိုင်အောင် ကြိုးစားသည်။

ကွန်ဖြူးရှပ်က သာမန်ပြည်သူတို့သည် အစိုးရ၏ မူဝါဒဆိုင်ရာ သဘောတရားတွေကို နားလည်းမလည်၊ နားလည်သော်လည်း အကောင်အထည်ဖော်ရန် မတတ်နိုင်သူတွေသာဖြစ်သည်။ ထို့ကြောင့် အုပ်ချုပ်သူတို့က အစိုးရတာဝန်ကိုယူထားလျှင် သာမန်ပြည်သူတွေ အကျိုးရှိအောင် ကြံဆောင်လုပ်ကိုင်ပေးနိုင်ရမည်ဟုဆိုသည်။ ကွန်ဖြူးရှပ်က -

“ပြည်သူသည် လူတစ်ဦးတစ်ယောက်ကို မကြိုက်ဟုဆိုလျှင်၊ ထိုသူကို အဘယ်ကြောင့် မကြိုက်ရကြောင်း လေ့လာဆန်းစစ်ရမည်။ ပြည်သူက လူတစ်ယောက်ကို ကြိုက်နှစ်သက်သည်ဆိုလျှင်လည်း သူတို့အဘယ်ကြောင့် ကြိုက်နှစ်သက်ကြောင်း ဆန်းစစ်ရမည်” မိန့်ဆိုချက်သည် ရှီကျင့်ဖျင်အတွက် အလေးထားစရာဖြစ်ခဲ့သည်။

မစ္စတာရှီကျင့်ဖျင်သည် “အနောက်တန်ဖိုး” ဆိုသည့် အနောက်တိုင်းက တန်ဖိုးထားသော ဓလေ့နှင့်ယဉ်ကျေးမှုများကို ဆန့်ကျင်တတ်သည်။ အနောက်တိုင်း၏ လစ်ဘရယ် ဒီမိုကရေစီသဘောတရားကို သူမကြိုက်၊ လက်မခံပေ။ အမေရိကန်ပြည်ထောင်စုက တိုက်ရိုက်ဒီမိုကရေစီဆိုသည့် သဘောတရားကသာ အစိုးရတစ်ရပ်အတွက် အကောင်းဆုံးဖြစ်သည်ဟုဆိုခဲ့သည်။ ပြည်သူက အစိုးရအနေနှင့် အုပ်ချုပ်မှုအပိုင်းတွင် ဝင်ရောက်ပါဝင်ခွင့်ရသောကြောင့် အမေရိကန်ဒီမိုကရေစီသည် တိုက်ရိုက်ဒီမိုကရေစီသဘောမျိုးဆောင်သည်။ 

ကွန်ဖြူးရှပ်၏ အုပ်ချုပ်သူအစိုးရအပေါ် တိုင်းတာချက်ကတော့ တစ်မျိုးဖြစ်သည်။ ပြည်သူတွေကို ပျော်ရွှင်အောင်လုပ်ပေးနိုင်ပြီး၊ စိတ်ကျေနပ်အောင် ကြံဆောင်ပေးနိုင်သည့်အစိုးရကိုသာ အကောင်းဆုံးအစိုးရဟု သတ်မှတ်သည်။ ရှီကျင့်ဖျင်ကလည်း ထိုသဘောတရားကို ကောင်းစွာလက်ခံသည်။ တရုတ်ကို အနောက်စံနှင့်လာပြီး တိုင်းတာသည်ကို သူလက်မခံ။ တရုတ်နည်းတရုတ်ဟန်တွေ အများကြီးရှိသည်။ ရှီကျင့်ဖျင်က တရုတ်ကို “တရုတ်စိတ်ကူး” “တရုတ်အိပ်မက်” များဖြင့်သာ အုပ်ချုပ်လိုသည်။

ကွန်ဖြူးရှပ်က လူ့ဘောင်အဖွဲ့အစည်းကို တိုးတက်အောင်ဆောင်ရွက်ရာတွင် မလျှော့မတင်း အုပ်ချုပ်ခြင်းဖြင့်သာ အောင်မြင်နိုင်သည်ဟု လက်ခံသည်။ ထိုသဘောတရားကို ရှီကျင့်ဖျင်ကလည်း သဘောတူသည်။ ထို့ကြောင့်လည်း စီးပွားရေးမူဝါဒများ ချမှတ်လုပ်ဆောင်ရာတွင် ကွန်ဖြူးရှပ်နည်းလမ်းများကို ကျင့်သုံးလေ့ရှိသည်။

“ချစ်ဖွယ်ကောင်းသူသည် ပညာဗဟုသုတရှိမှ ပြည့်စုံသည်။ မြင့်မြတ်သူသည် အမှန်တရားဖြင့်သာ ပြည့်စုံစေနိုင်သည်” ဟု ကွန်ဖြူးရှပ်က ဆိုသည်။ ရှီကျင့်ဖျင်ကလည်း ပြည်သူချစ်အောင် နည်းမျိုးစုံဖြင့် ကြံဆောင်သည်။ ပညာလည်းရှာသည်။ ဖြောင့်မှန်အောင်လည်း နေသည်။ မှန်အောင်လည်း ကျင့်သည်။ 

ကွန်ဖြူးရှပ်က “အကျိုးရှိလိုလျှင်၊ မကျေနပ်မှုတွေကို တတ်နိုင်သမျှ နည်းအောင်လျှော့ချရမည်” ဟု ဆိုသည်။ တရုတ်အုပ်ချုပ်ရေးသဘောတရားတွင် ပြည်သူတွေ ကျင့်စဉ်တစ်ခုအနေနှင့် သတ်မှတ်ပေးထားသည့် လိုက်နာရမည့် သဘောတရားတစ်ခုလည်းဖြစ်သည်။

ရှီကျင့်ဖျင်သည် အကျင့်ပျက်ခြစားမှုများ၊ လာဘ်ပေးလာဘ်ယူမှုများကို အလွန်မုန်းတီးသူတစ်ဦးဖြစ်သည်။ တရုတ်ဘီလီယံကြွယ်သူဌေးများကလည်း ရှီကျင့်ဖျင်၏ အကျင့်ပျက်၊ လာဘ်ပေးမှုတိုက်ဖျက်ရေးကို သဘောကျကြသည်။ သူတို့သဘောကျခြင်းမှာ ကွန်ဖြူးရှပ်လမ်းညွှန်ချက်နှင့် ကိုက်ညီနေသည့်အပြင် မကျေနပ်စရာမရှိသော လမ်းစဉ်ဖြစ်သောကြောင့်ပင်။ ထို့ကြောင့်သူဌေးတွေက ရှီကျင့်ဖျင်ကို လေးစားထောက်ခံကြသည်။