News

POST TYPE

RELAX

ကွန်ဖြူးရှပ်၏ စီးပွားရေးနှင့် နိုင်ငံရေးဒဿန
25-Aug-2018



စီးပွားရေးလုပ်ငန်းရှင်ကြီးများ၊ စီးပွားရေးလောကကို ဦးဆောင်နေသူများသည် နိုင်ငံရေး၊ လူမှုရေး၊ ပညာရေး စသည်တို့ကိုလည်း လေ့လာသိမှတ်နေကြရပါသည်။ ခေတ်ကို မျက်ခြည်မပြတ်ရန် အရေးကြီးသဖြင့် ခေတ်ကို လေ့လာရင်း စီးပွားရေးဖွံ့ဖြိုးတိုးတက်အောင် ကြံဆောင်ရကြရသည်။ ခေတ်နှင့်လျော်ညီစွာ နေထိုင်ကျင့်ကြံနိုင်အောင် ကြိုးစားအားထုတ်ကြရသည်။

နိုင်ငံတစ်နိုင်ငံက ထုတ်ပြန်သည့် အမိန့်များ၊ ဥပဒေများသည် စီးပွားရေးအတက်အကျကို ဖြစ်နေနိုင်သည့် အဓိကအကြောင်းတရားများ ဖြစ်ကောင်းဖြစ်နိုင်သည်။ အနောက်နိုင်ငံကြီးများ၏ အောင်မြင်သော စီးပွားရေးလုပ်ငန်းရှင်ကြီးများသည် နိုင်ငံရေးကို ခေါင်းရှောင်လေ့ရှိကြသည်။ လွတ်လပ်သောဈေးကွက်စီးပွားရေးစနစ်တစ်ခုကို အစိုးရပိုင်းက အကောင်အထည်ဖော်ပေးပြီးသားဖြစ်လျှင် သူတို့အတွက် စိုးရိမ်စရာမလိုဟု သတ်မှတ်ထားကြသည်။ 

တရုတ်နိုင်ငံမှ စီးပွားရေးအောင်မြင်သည့် လုပ်ငန်းရှင်ကြီးများကတော့ နိုင်ငံရေးကို စိတ်ဝင်စားကြသည်။ အဘယ်ကြောင့်ဆိုသော် သူတို့လုပ်ငန်းများသည် အစိုးရမူဝါဒများနှင့် ဆက်စပ်နေသောကြောင့်ဖြစ်သည်။ သူတို့ဘဝများကလည်း ငယ်စဉ်ကတည်းက ကွန်ဖြူးရှပ်အတွေးအခေါ်များ လွှမ်းမိုးပြီးသားဖြစ်နေသောကြောင့် လုပ်ငန်းနှင့် တိုင်းပြည်အုပ်ချုပ်သူတို့၏ မူဝါဒများကို ဆက်စပ်တွေးလေ့ရှိသည်မှာ အစဉ်အလာလို ဖြစ်နေသည်။ 

အနောက်တိုင်းဓလေ့တွင် အောင်မြင်မှုဆိုသည်မှာ ကိုယ်တိုင်အားထုတ်၊ ကိုယ်တိုင်လုပ်ပြီး ကိုယ့်အားကိုယ်ကိုး တိုးတက်မှုများကို အခြေခံကြသည်က များသည်။ သူတို့က ဗုဒ္ဓဘာသာဝင်များ လက်ခံသည့် “အတ္တာဟိ အတ္တနော နာထော” ဆိုသော သဘောတရားကို ကျင့်သုံးကြသည်ကများသည်။ (အတ္တာဟိ = မိမိကိုယ်သာ၊ အတ္တနော = မိမိ၏၊ နာထော = ကိုးကွယ်ရာဖြစ်၏) ဆိုသည့် သဘောတရားအတိုင်း အောင်မြင်မှုတစ်ခုအတွက် ကိုယ့်ကိုယ်ကိုယ်သာ ကိုးကွယ်အားထားပြီး လုပ်ဆောင်ကြသည်က များသည်။ 

ကွန်ဖြူးရှပ်သဘောတရားကို လက်ခံကြသူများ၏ အတွေးအမြင်ကတော့ အနောက်တိုင်း အယူအဆတွေနှင့် ကွဲပြားခြားနားသည်။ ကွန်ဖြူးရှပ်အတွေးအခေါ်တွင် လူသားသည် အောင်မြင်မှုတစ်ခုအတွက် အဆင့်လေးဆင့်ကို ကျော်ဖြတ်ရမည်ဟု ခံယူထားသည်။ ယင်းကိုပင် ဘဝပန်းတိုင်ဟု သူကဆိုထားသည်။ 

လူသားတစ်ဦးသည် ဘဝတွင် (၁) မွေးဖွားခြင်းကို ခံရမည် (၂) ပြုစုပျိုးထောင်ခြင်းကို ခံရမည် (၃) သတ်မှတ်ပြဋ္ဌာန်းခြင်းကို ခံရမည် (၄) အလုပ်အကျွေးပြုရမည်ဆိုသည့် သဘောတရားလေးခုသည် လူသား၏ဘဝတွင် လူသားအဖြစ် ခံယူလိုက်ကတည်းက ကျင့်သုံးသွားရမည့်လမ်းစဉ်ဖြစ်သည်။ 

လူသားသည် လူ့ဘောင်အဖွဲ့အစည်းကို ကျေးဇူးပြုရန်နှင့် ကမ္ဘာလောကကြီးကို ငြိမ်းချမ်းသာယာစေရန် လုပ်ဆောင်ပေးရမည့် တာဝန်ရှိသည်။ အောင်မြင်သူတစ်ယောက်ဖြစ်လာရေးမှာ ပုဂ္ဂိုလ်တစ်ဦးတစ်ယောက်၏ အတွင်းစိတ်ဓာတ်နှင့်လည်း သက်ဆိုင်သည်။ ပြင်ပဖိအားဆိုသည်မှာ အုပ်ချုပ်သူမင်း (အစိုးရ) ၏ သတ်မှတ်ချက်ဥပဒေများကို လိုက်နာဆောင်ရွက်ရန်ဖြစ်သည်။ အတ္တစီးပွားမှ ပရစီးပွားကို ကူးပြောင်းကျင့်သုံးနိုင်အောင် ကြိုးစားရမည်။ ဘဝဆိုသည်မှာ ပြီးပြည့်စုံသည်ဟူ၍ မရှိ။ အလိုဆန္ဒဆိုသည်မှာလည်း ကုန်ဆုံးနိုင်သည်မရှိ။ မည်သို့ဆိုစေ ကိုယ့်ကိုယ်ကိုယ်ပျိုးထောင်ပြီး လောကကောင်းကျိုးကို ဆောင်ရွက်နိုင်စေရန် ကြိုးစားခြင်းသည်သာ ဘဝတန်ဖိုး၊ ဘဝအဓိပ္ပာယ်ဖြစ်သည်။

အောင်မြင်သော တရုတ်စီးပွားရေးလုပ်ငန်းရှင်ကြီးများကို ကြည့်လိုက်လျှင် သူတို့ကိုယ်သူတို့ အလွန်အလေးထားသလို သူတို့ လုပ်ငန်းကုမ္ပဏီတွေကိုလည်း အလေးထားကြောင်းတွေ့ရသည်။ သူတို့က ပြိုင်ဘက်တွေကို အနိုင်ရရေးအတွက် ကိုယ့်အုပ်စုအဖွဲ့အစည်းနှင့် တိုက်ရမည်ဆိုသည့် သဘောကို ကောင်းစွာခံယူကြသည်။ တစ်နည်းပြောရလျှင် ကိုယ့်အတ္တကို ရှေ့တန်းတင်ပြီးမှ ကိုယ့်အဖွဲ့အစည်းနှင့် ပြိုင်ဆိုင်မှုဆိုသည့် သဘောတရားကို ရောက်အောင်သွားသည်။ ကိုယ်တိုင်တည်ဆောက်သည်။ အဖွဲ့အစည်းကို တည်ဆောက်သည်။ နိုင်ငံနှင့်လူမျိုးကို ထောက်ထားသည်။ သူတို့ဤလမ်းကြောင်း ပုံစံအတိုင်းသွားသည်။ သူတို့ လုပ်ငန်းတိုးတက်အောင်မြင်ရန် အစိုးရအမိန့်၊ အစိုးရဥပဒေများကို လိုက်နာသည်။ ပူးပေါင်းလုပ်ဆောင်သည်။ 

တရုတ်တို့ လက်ခံထားသည့် စီးပွားအောင်မြင်ရေး နည်းလမ်းများတွင် လွတ်လပ်စွာလုပ်ပိုင်ခွင့် ရရှိရေးက အရေးကြီးသည်။ ထိုသဘောတရားသည် ကွန်ဖြူးရှပ်အတွေးအမြင်များတွင် တွေ့ရသည်။ ကွန်ဖြူးရှပ်က လုပ်ငန်းတစ်ခု လုပ်ဆောင်ရာတွင် “ဘုရင် စိတ်ဓာတ်” က အရေးကြီးကြောင်း ဆိုခဲ့သည်။ သူပြောသည့် ဘုရင်စိတ်ဆိုသည်မှာ လူတစ်ယောက်အောင်မြင်ရေးတွင် အရေးကြီးသည့် စိတ်ဓာတ်ဖြစ်သည်။ ထိုစိတ်ဓာတ်သည် သဘောတရားသက်သက် ပြောခြင်းမဟုတ်။ လက်တွေ့ကျကျ ကျင့်သုံးရန် ပြောခြင်းဖြစ်သည်။ တရုတ်တို့သည် ရှေးအစဉ်အဆက်ကတည်းက အုပ်ချုပ်သူမင်းနှင့် မဆန့်ကျင်၊ အောင်မြင်အောင် လုပ်ဆောင်ခြင်းမျိုးဖြစ်သည်။ တိုင်းပြည်၊ လူမျိုး၊ မင်း စသည်တို့ကို မဆန့်ကျင်မဖောက်ပြန်ဘဲ အောင်မြင်စေရန် ကြိုးစားခြင်းကသာလျှင် စစ်မှန်သော အောင်မြင်မှုဖြစ်သည်။ ထိုစိတ်ဓာတ်ကိုပင် ဘုရင်စိတ်ဓာတ်အဖြစ် သတ်မှတ်ထားသည်။ 

ထို့ပြင် အောင်မြင်သူများသည် ကိုယ့်အောင်မြင်မှုကို လုပ်ဆောင်ပြီးလျှင် နိုင်ငံနှင့် လူမျိုးတိုးတက်ရေးကို ပါဝင်လုပ်ဆောင်ရန် လိုသည်။ နိုင်ငံရေးထဲတွင် ပါဝင်သင့်လျှင် ပါဝင်ဆောင်ရွက်ရမည်ဆိုခြင်းမှာ တရုတ်တို့၏ အတ္တပြီးလျှင် ပရအဆင့်ကို တက်ခြင်းဖြစ်သည်ဟု ခံယူထားသောကြောင့် အနောက်တိုင်း စီးပွားရေးအတွေးအမြင်များနှင့် ခြားနားသည်ဟု ဆိုလိုခြင်းဖြစ်သည်။ အနောက်တိုင်းစိတ်ဓာတ်က စီးပွားရေးနှင့် နိုင်ငံရေးကို ခွဲခြားသည်။ တရုတ်က ပေါင်းစည်းနိုင်ရန် ကြိုးစားသည်။ 

ကွန်ဖြူးရှပ်၏ လမ်းစဉ်အတိုင်း စီးပွားအောင်မြင်ရန် လုပ်ဆောင်နေသူများကို လေ့လာကြည့်လျှင် ကိုယ်ပိုင်ချမ်းသာခြင်းအတွက် ဦးစွာထူထောင်သည်။ ထို့နောက် အဖွဲ့အစည်းများတွင် ခေါင်းဆောင်ဖြစ်စေရန် ကြံဆောင်သည်။ အသင်းအဖွဲ့အစည်းတစ်ခုခု၏ ဥက္ကဋ္ဌ စသောရာထူးကြီးများကို ရယူပြီးလျှင် နိုင်ငံရေးအဖွဲ့အစည်းတစ်ခုခုတွင် ပါဝင်ဆောင်ရွက်နိုင်ရန် ကြိုးစားသည်။ တရုတ်သူဌေးတို့သည်ငွေနှင့် အာဏာကို တွဲလျက် အိပ်မက်များ မက်တတ်သော စိတ်ဓာတ်ပိုင်ရှင်များ ဖြစ်နေတတ်သည်။