News

POST TYPE

RELAX

ကျားပေါက်နဲ့တွေ့ဆုံခြင်း
02-Sep-2016
နာမည်ကျော် တေးသံရှင် ကျားပေါက်နဲ့ တွေ့ဆုံပြီး ကမ္ဘာကို ဖြန့်မယ့် အင်္ဂလိပ်သီချင်း အယ်လ်ဘမ်မှာ ပါဝင်မယ့် သီချင်းတွေအကြောင်း၊ S.I.R အဖွဲ့  ပြိုကွဲ သွားတဲ့အပေါ် သူ့ရဲ့ ခံစားမှုနဲ့ Big Bag အဖွဲ့ရဲ့ အကောင်းဆုံးတေးများ အယ်လ်ဘမ် အကြောင်းတို့ကို The Voice က မေးမြန်းဖော်ပြ ထားပါတယ်။ 

Voice : ကျားပေါက်ရဲ့ လတ်တလော ဂီတလှုပ်ရှားမှု အကြောင်းကနေ စပြီး ပြောပြပေးပါဦး။
KP : အခုကျွန်တော်တို့ WDGAF Live Show ဒီဗီဒီ ထွက်ဖို့ လုပ်နေတယ်။ နောက်ပြီးတော့ ကျွန်တော် ဆွီဒင်မှာ သွင်းခဲ့တဲ့ အင်္ဂလိပ်သီချင်း အယ်လ်ဘမ် ထွက်မယ်။ အဲ့ဒါကတော့ ကျွန်တော် ထင်တယ်။ ဒီဇင်ဘာလလောက်မှ Mixing ပြီးမယ် ထင်တယ်။ အချိန်တော့ အတိအကျ မပြောတတ်သေးဘူး။ နောက်ပြီးတော့ Weapon of Choice ဆိုတဲ့ ခွေအသစ် ထွက်လာပါလိမ့်မယ်။

Voice : WDGAF ဒီဗီဒီခွေကိုကျတော့ ပွဲမှာဆိုခဲ့၊ တီးခဲ့တဲ့အတိုင်းပဲ ပြန်ထွက်မှာလား။
KP : အဲ့ဒါကတော့ စင်ပေါ်မှာ မိုက်ကြောင့် ဖြစ်သွားတဲ့ အမှားလေးတွေရယ်၊ ကင်မရာတွေ ဘာတွေက ဟိုဘက် ဒီဘက် ပြေးနေတော့ ကိုယ်လိုချင်တဲ့ ဂီတာသံ စင်ပေါ်မှာ မထွက်လိုက်ဘူး ဆိုတော့ အဲ့ဒီလောက် ကလေးပဲ ပြန်ပြင်တယ်။ ကျန်တာအကုန် ဒီအတိုင်းပဲ ပြန်ထည့်ထားတယ်။ ကျွန်တော် ပြန်လည်း မဆိုဘူး။ စက်မှုပိုင်းဆိုင်ရာ အမှားလေးတွေက လွဲလို့ ဘာမှ ကျွန်တော်တို့ ပြန်မပြင်ထားဘူး။

Voice : ဆွီဒင်မှာ သွင်းခဲ့တဲ့ အင်္ဂလိပ်သီချင်း အယ်လ်ဘမ် အတွက်ကိုရော ဘယ်လောက်အထိ ကျေနပ်အားရမှု ရှိခဲ့လဲ။
KP : ကျွန်တော့်ခွေမှာတော့ သီချင်းက ဆယ့်တစ်ပုဒ်ကနေ ဆယ့်နှစ်ပုဒ်အထိ ဖြစ်နိုင်ပါတယ်။ အင်္ဂလိပ်လိုပဲ ဆိုထားတဲ့ သီချင်းက ဆယ့်တစ်ပုဒ်ပါမယ်။ မြန်မာလိုနဲ့ အင်္ဂလိပ်လို ရောပြီး ဆိုထားတာက တစ်ပုဒ်ပါမယ်။ သီချင်း ခြောက်ပုဒ်က Mixinng ရော Mastering ရောပြီးပြီ။ ကျွန်တော်တို့က ဆွီဒင်မှာ စတူဒီယို နှစ်ခု ခွဲပြီး လုပ်ခဲ့ရတာဗျ။ ဒုတိယ တစ်ခေါက် သွားသွင်းထားတဲ့ သီချင်းတွေကတော့ စောင့်နေရတုန်းပဲ။

Voice : ဒီခွေက ကမ္ဘာကို ဖြန့်မှာဆိုတော့ သီချင်းပိုင်းဆိုင်ရာမှာရော ဘယ်လောက်အထိ ကြိုးစားပြထားလဲ။
KP : ကိုယ့်ရဲ့အကောင်းဆုံး သီချင်းတွေကိုတော့ ထုတ်ရတာပေါ့။ ဘာဖြစ်လို့လဲဆိုတော့ ကျွန်တော်တို့က တစ်ကမ္ဘာလုံးကို ဖြန့်ဖို့ စဉ်းစား ထားတာကိုး။ အဲ့ဒီတော့ ကိုယ့်မှာရှိတဲ့ တော်ရုံတန်ရုံ ကြိုးစားမှုလောက်နဲ့ လုပ်လို့ မရဘူး။ ကျွန်တော့်အခွေကို ဘယ်မှာပဲ ဖြန့်ဖြန့်ပါ။ ကျွန်တော့် ကိုယ်စွမ်း၊ ဉာဏ်စွမ်းရှိသမျှ အကောင်းဆုံး လုပ်ပါတယ်။ အဲဒီ့ထက်ကို ပိုပြီး ပိုကောင်းအောင် လုပ်နိုင်တဲ့ Music Producer တွေနဲ့ ဆွီဒင်မှာ ကျွန်တော်တို့ တွေ့ခဲ့ရတယ်။ အဲ့ဒီတော့ ကျွန်တော်တို့ ကံကောင်းပါတယ်။

Voice : ဒီခွေက ကိုယ့်အတွက် ကမ္ဘာကို ထိုးဖောက်မယ့် ပထမ ခြေလှမ်း ဆိုတော့ ဘယ်လောက်အထိ အောင်မြင်မှု ရဖို့ မျှော်လင့်ထားလဲ။
KP : ဒီခွေ အရင်ထွက်သွားဖို့က ကျွန်တော်တို့ရဲ့ ပထမဆုံး မျှော်လင့်ချက်ပါ။ ဘာဖြစ်လို့လဲ ဆိုတော့ ကြားထဲမှာ အဆင့်တွေက အများကြီး ရှိသေးတယ်။ ဒီနိုင်ငံကနေ တစ်ကမ္ဘာလုံးကို တိုက်ရိုက် စဖြန့်ဖို့က ကြားထဲမှာ အဆင့်တွေ အများကြီး ရှိသေးတယ်။ အဲ့ဒီအတွက်တော့ ကျွန်တော်တို့ရဲ့ Record Label ဖြစ်တဲ့ FG Entertainment က စီစဉ်နေပါတယ်။ ဒါမျိုးက ဘယ်သူမှလည်း မလုပ်ဖူးသေးတော့ ကျွန်တော့်ဘက်က အများကြီး ကြိုပြောလို့ မရသေးဘူး။ ဒါပေမဲ့ အကောင်းဆုံး ဖြစ်အောင်တော့ ကျွန်တော်တို့ ကြိုးစား နေပါတယ်။

Voice : S.I.R အဖွဲ့ကနေ နုတ်ထွက်ခဲ့ရတဲ့ အကြောင်းနဲ့ ပတ်သက်ပြီးတော့ရော ကျားပေါက်ဘက်က ပရိသတ်တွေကို ဘာများ ပြောချင်သေးလဲ။
KP : ဒီအကြောင်းနဲ့ ပတ်သက်ပြီးတော့ ကျွန်တော် တစ်ယောက်တည်း အမြင်နဲ့တော့ မပြောချင်ပါဘူး။ တကယ်ကို သတ်သတ်မှတ်မှတ် ပွဲတစ်ခု လုပ်ပြီး ကျွန်တော်တို့ ပြောပြမှာပါ။ ဒါပေမဲ့ ပွဲလုပ်မယ် ဆိုပြီး ပြောပြီးကတည်းက ကျွန်တော်ရော၊ ရေမွန်ရော၊ အောင်လရောက အပြင်မှာ ငါးမိနစ်လောက် တွေ့ပြီး စကားပြောဖို့တောင် မလွယ်ဘူး ဖြစ်နေတယ်။ သူတို့လည်း တအား အလုပ်ရှုပ် နေကြတယ်။ ရှိုးတွေ ထွက်လိုက်၊ သီချင်းတွေ အသံ သွင်းလိုက်နဲ့ပေါ့နော်။ ကျွန်တော်တို့ သုံးယောက်လုံး အားတဲ့အချိန် ကျရင်တော့ ပွဲလုပ်မယ်။ ဘာဖြစ်လို့လဲဆိုတော့ တစ်ယောက်ချင်း ထလုပ်လို့လည်း မဖြစ်ဘူး။

Voice : S.I.R အဖွဲ့ ဖြစ်လာဖို့ ကိုယ်တိုင် အားစိုက် ကြိုးစားခဲ့တဲ့ သူတစ်ယောက် အနေနဲ့ရော အဖွဲ့ ပြိုကွဲသွားတဲ့အပေါ် ဘယ်လို ခံစားရလဲ။
KP : ဒီလို ဖြစ်သွားလိမ့်မယ်လို့ ဘယ်လိုမှတော့ မမျှော်လင့်ထားဘူးလေ။ ဒါပေမဲ့ ကိုယ်တစ်ယောက်တည်း ရုန်းလို့ကလည်း မရပြန်ဘူး။ ကျွန်တော်တို့ ကိုယ်စွမ်း၊ ဉာဏ်စွမ်းရှိသလောက် အကုန် ကြိုးစားခဲ့တယ်။ S.I.R အဖွဲ့ အနေနဲ့ အကြာကြီး ရပ်တည် နိုင်ဖို့အတွက်ပေါ့။ အဲ့ဒါကြောင့်လည်း ဒီလောက် ကြာခဲ့တာပါ။ နှင့်မိုဆို အစောကြီးကတည်းက လစ်သွားတာ ကြာပြီ။ အခုလို ဖြစ်သွားတဲ့အပေါ် ကျွန်တော်တို့လည်း စိတ်မကောင်း ဖြစ်တာကတော့ သေချာတာပေါ့။ ဒါပေမဲ့ ကိုယ်လုပ်ခဲ့တဲ့ အရာ တစ်ခုကို စွန့်ပစ်ခဲ့ရရင်၊ ထားခဲ့ရရင် အဲ့ဒီလူ ကိုယ်တိုင်က အခံစားရဆုံး ဖြစ်မှာပဲ။ ဒါကိုတော့ ပရိသတ်တွေလည်း နားလည်မှာပါ။

Voice : Big Bag ရဲ့ အကောင်းဆုံးတေးများ အယ်လ်ဘမ် ထွက်မယ်လို့ ပြောခဲ့ဖူးတယ်နော်။ အဲ့ဒီခွေရော စလုပ်နေပြီလား။
KP : အဲ့ဒါကတော့ Weapon of Choice ခွေ ထွက်ပြီးရင် စလုပ်ပါမယ်။ သီချင်းတွေကတော့ အကြမ်းဖျင်း လျာထားပြီးပါပြီ။ ကျွန်တော်တို့ လုံးဝ မပေါက်ခဲ့တဲ့၊ ပရိသတ်တွေ သိပ်မသိတဲ့ သီချင်းတွေ တော်တော်များများ ပြန်ပါမယ်။ ကျွန်တော်တို့ စိတ်ကြိုက် ဖြစ်တဲ့ သီချင်းတွေလည်း ပါမှာပေါ့။

Voice : မြို့ ငါးမြို့ကို စက်တင်ဘာလကစပြီး Music Tour သွားမယ့် အကြောင်းလေးလည်း ပြောပြပေးပါဦး။
KP : အဲ့ဒါကတော့ ကျွန်တော်၊ ဝေလ၊ ဖြူဖြူကျော်သိန်းနဲ့ နီနီခင်ဇော်တို့ သွားကြမှာပေါ့။ သွားမယ့် မြို့ ငါးမြို့ကတော့ တောင်ငူ၊ မော်လမြိုင်၊ မကွေး၊ ပုသိမ်နဲ့ မြိတ်မြို့တွေကို အစဉ်လိုက် သွားမယ်။ ဒီလိုမျိုး Music Tour အနေနဲ့ သွားဖို့ ကျွန်တော်တို့ စဉ်းစားခဲ့တာ အရမ်း ကြာနေပြီ။ S.I.R တုန်းကတည်းက ဒါမျိုး Tour အနေနဲ့ သွားချင်ခဲ့တာပါ။ ဒါပေမဲ့ တစ်မြို့ပြီး တစ်မြို့ သွားဖို့က လမ်းပန်း ဆက်သွယ်ရေးရော၊ လူသိပ်များတာရောကြောင့် အဆင် မပြေခဲ့ဘူး။ တစ်ကမ္ဘာလုံးမှာက Music Tour တွေ သွားနေကြတာ ကြာပါပြီ။ ကိုယ့်အခွေတွေ ရောက်ပြီး လူကိုယ်တိုင် မရောက်နိုင်တဲ့ မြို့တွေ ရှိတယ်လေ။ အမှန်တော့ ဂီတသမား ဆိုတာက သီချင်းတွေ သွင်းရင် သွင်းနေ၊ ဒါမှမဟုတ်ရင် Music Tour တွေ ထွက်နေရမှာပါ။ ဒါက အဖြစ်သင့်ဆုံး ပုံစံပါပဲ။

သန့်ဇင်ဦး


  • VIA