News

POST TYPE

TIP

အိပ်စက်နားနေမှုကို ထိခိုက်စေတဲ့ အပြစ်ကင်းတဲ့အကျင့် ၁၂ မျိုး
01-Mar-2017 tagged as


နောက်ဆုံး ကော်ဖီတစ်ခွက်ဟာ ဘယ်အချိန်အထိ အစွမ်းပြနိုင်တယ်ဆိုတာ သိရင် သင်အံ့သြသွားပါလိမ့်မယ်။

၁။ ညဘက် အလုပ်လုပ်ရတာ ကြိုက်တာ

“စိတ်ဖိစီးမှုများတဲ့ လှုပ်ရှားမှုတွေကို ဖြစ်နိုင်သမျှ စောစောပြီးအောင် လုပ်ပါ၊ အိပ်ချိန်အထိ သယ်သွားတယ်ဆိုရင် တစ်ကယ်လည်း အိပ်ဖို့လုပ်ရော အိပ်မပျော်တော့ပါဘူး။ ညနက်သန်းခေါင်အထိ အလုပ်လုပ်ရတာမျိုး ရှိတတ်ပေမဲ့ အိပ်ရာထဲမ၀င်မီ ဒါတွေကို ချန်ထားနိုင်အောင် လုပ်ဖို့လိုတယ်လို့ American Sleep Association ရဲ့ ကိုယ်စားလှယ်၊ Sleep Disorder ဆေးပညာရှင် နီးလ်ကလိုင်းက ဆိုပါတယ်။ အိပ်ရာမ၀င်မီ စာရင်းတွေ လုပ်မဲ့အစား၊ တစ်နေ့တာ ဖြစ်ရပ်တွေ စားမြုံ့ပြန်နေမဲ့အစား တည်ငြိမ်သွားစေမဲ့စာမျိုး လုပ်ပါ”လို့ ကလိုင်းက ဆိုပါတယ်။ ရေနွေးနဲ့ရေချိုးတာ၊ တရားထိုင်တာ၊ ငြိမ့်ညောင်းတဲ့ တေးဂီတ နားဆင်တာမျိုးပေါ့။

၂။ ပိတ်ရက်တွေမှာ အ၀အိပ်တာ

လုံလုံလောက်လောက် အိပ်မထားရင် “အအိပ်ကြွေး” ဆိုတာ တင်တယ်လို့ The Sleep Solution : Why Your Sleep is Broken and How to Fix it စာအုပ်ရေးသားသူ ရှားလော့စ်ဗီးလ် အာရုံကြောဆိုင်ရာ ဆေးပညာနဲ့ အိပ်စက်မှုဆိုင်ရာ ဆေးခန်း ဥက္ကဋ္ဌ ဒဗလျူ ခရစ္စတိုဖာဝင်းတား (ဆရာဝန်) က ဆိုပါတယ်။ ပိတ်ရက် စနေ၊ တနင်္ဂနွေမှာ အိပ်တာက ရုံးဖွင့်ရက်တွေမှာ မလုံလောက်ခဲ့တဲ့ အိပ်က်မှုကို ပြန်ဖြည့်ပေးတယ်ဆိုပေမဲ့ ခန္ဓာကိုယ်ရဲ့ အိပ်စက်မှု သံသရာကို ရှုပ်ထွေးသွားစေပါတယ်။ တနင်္ဂနွေနေ့မှာ နေမွန်းမတည့်မီအထိ အိပ်ရာထဲမှာ နေတယ်ဆိုရင် အဲဒီညမှာ အိပ်ရာထဲ ဟိုလှိမ့်ဒီလှိမ့်နဲ့ တော်တော်နဲ့ အိပ်ပျော်မှာ မဟုတ်တော့ပါဘူး။ “တစ်ထိုင်တည်း အများကြီး ပြန်ဖြည့်လို့ မရပါဘူး။ အဲဒီနောက်တစ်ညမှာ ခင်ဗျား ဘယ်လိုအိပ်မလဲ ဆိုတာပါ ကြည့်ထားဖို့လိုတယ်။ ပိတ်ရက်တွေမှာ ပိုအိပ်တာ၊ အိပ်ရာထဲ နှပ်နေတာက ပြဿနာ မဟုတ်ပေမဲ့ အလွန်အကျွံ မအိပ်မိအောင် နှိုးစက်လေး ဘာလေး ပေးထားဖို့ လိုတယ်”လို့ ၀င်းတားက ဆိုပါတယ်။

၃။ အိပ်ရာမ၀င်ခင် Facebook ကြည့်တာ

ဘယ်အချိန် အိပ်မယ်၊ ဘယ်အချိန် ထမယ်ဆိုတာနဲ့ ပတ်သက်ပြီး သင့်ခန္ဓာကိုယ်မှာ ဇီဝစက်ဝန်း နရီစည်းချက်တစ်ခု ရှိပါတယ်။ အဲဒီစက်ဝန်းက သဘာဝအတိုင်းဆိုရင် တစ်ပတ်လည်ဖို့ ၂၄ နာရီ ကြာပါတယ်၊ ဦးနှောက်က အလင်းရောင်ကို ကြည့်ပြီး ဘယ်အချိန် ထသင့်တယ်ဆိုတာ ဆုံးဖြတ်တာပါ။ “တောက်ပတဲ့ အလင်းရောင်ဟာ နေ့ခင်းအချိန် ဖြစ်တယ်ဆိုပြီး ဦးနှောက်က ယုံကြည်လာအောင် လွှမ်းမိုးပေးတဲ့ အားကောင်းတဲ့အချိန် သဲလွန်စဖြစ်ပါတယ်”လို့ ဒေါက်တာ ကလိုင်းက ဆိုပါတယ်။ နေ၀င်သွားပြီး မှောင်လာပြီဆိုရင် ခန္ဓာကိုယ်က အိပ်စက်ဖို့ စေ့ဆော်ပေးတဲ့ မယ်လာတိုနင် ဟော်မုန်းတွေ ထုတ်ပေးပါတယ်။ ဒါပေမဲ့ ဦးနှောက်က နေ့အလင်းရောင်နဲ့ ဖုန်း၊ TV၊ မီးအိမ်က အလင်းရောင်အကြား ကွာဟချက်ကို မသိပါဘူး။ ဒါကြောင့် အိပ်ရာဝင်ချိန် နည်းပညာနဲ့ အရမ်း ထိတွေ့တဲ့အခါ ရှုပ်ထွေးကုန်ပါတယ်။ အိပ်ရာမ၀င်မီ နှစ်နာရီလောက်ကတည်း အီလက်ထရောနစ် ပစ္စည်းတွေ မသုံးတော့ဖို့ အကြံပြုကြပေမဲ့ ဒါက လက်တွေ့ မကျတဲ့အတွက် တတ်နိုင်သလောက် လျှော့တာပဲ အဆင်ပြေမယ်လို့ ဒေါက်တာ ၀င်းတားက ဆိုပါတယ်။ ဥပမာပြောရရင် အိပ်ရာထဲမှာ Laptop နဲ့ ကြည့်တာထက် မီးပိတ်ထားတဲ့ အခန်းထဲမှာ တီဗွီကြည့်တာက ပိုသက်သာရာ ရစေနိုင်ပါတယ်။ အပြာရောင်အလင်း ကာပေးတဲ့ နေကာမျက်မှန်မျိုးတွေလည်း တတ်လို့ရတယ်လို့ ဆိုပါတယ်။ (ညကြီးမင်းကြီး နေကာမျက်မှန်တတ်တာ နည်းနည်းတော့ ကြောင်တာပေါ့)

၎။ အိပ်ပျော်အောင် အိပ်ရာထဲမှာ စာဖတ်တာ

စာအုပ်ဖတ်ပြီး အိပ်ပျော်အောင် လုပ်တာလည်း မရလို့မအံ့သြပါနဲ့။ အိပ်ရာထဲ စာဖတ်တာ၊ တီဗွီကြည့်တာဟာ ဒါအိပ်ချိန် မဟုတ်ဘူးလို့ ခန္ဓာကိုယ်ကို အသိပေးရာ ရောက်ပါတယ်။ နိုးနေတဲ့အချိန်နဲ့ ပတ်သက်တဲ့ လှုပ်ရှားမှုတွေကို အိပ်ရာထဲမှာ မလုပ်သင့်ဘူးလို့ ဒေါက်တာ ကလိုင်းက ဆိုပါတယ်။ အိပ်ရာထဲ စာဖတ်ရင်း အိပ်ပျော်ချင်တယ်ဆိုရင် စမတ်ဖုန်း၊ Tablet နဲ့ မဖတ်သင့်သလို မျက်စိ ပိုသက်သာတယ်ဆိုတဲ့ e-reader တွေနဲ့လည်း မဖတ်ပါနဲ့။ တစ်ကယ့် စာအုပ်ကိုပဲ ဖတ်ပါ။ စာကြည့်မီးတိုင်ကို သင့်နောက်ကျောက နံရံ ဒါမှမဟုတ် အိပ်ရာမှာ ချိတ်ပြီး အလင်းက စာမျက်နှာပေါ် တိုက်ရိုက် မကျအောင်၊ သင့်မျက်နှာကို အလင်းဟပ်မနေအောင် ဖတ်သင့်ပါတယ်လို့ ဒေါက်တာ ၀င်းတားက ဆိုပါတယ်။

၅။ အိပ်ရာမ၀င်မီ သွားတိုက်တာ

ထိုင်ခုံမှာ တီဗွီကြည့်ရင်း အလုပ်လုပ်ရင်း ငိုက်လာလို့ အိပ်တော့မယ်ဆိုပြီး သွားတိုက်လိုက်တယ်၊ အဲဒီမှာ တစ်ကျော့ပြန်လန်းလာတော့တာပါပဲ။ တောက်ပတဲ့ ရေချိုးခန်း မီးရောင်နဲ့ သွားတိုက်ဆေးက ပရုပ်အရသာဟာ သင့်ကို နိုးကြားသွားစေပါတယ်။ ညဘက် သွားမတိုက်သင့်ဘူးလို့ ပြောတာ မဟုတ်ပါဘူး၊ ဒီလိုပြဿနာနဲ့ ကြုံရရင် သွားစောစောတိုက်ပါလို့ ဒေါက်တာဝင်းတာက ဆိုပါတယ်။ တီဗွီကြည့်တယ်ဆိုရင် ကြော်ငြာဝင်တဲ့အချိန် ရေချိုးခန်းဝင်ပြီး သွားတိုက်ထားလိုက်ပေါ့။ ထပ်စားစရာမရှိတော့ရင် မအိပ်သေးပေမဲ့ သွားတိုက်ထားလိုက်ပေါ့။ ပရုပ်ပျော့တဲ့ သွားတိုက်ဆေးမျိုး ညဖက်သုံးတာလည်း ရပါတယ်။ ဒါပေမဲ့ ဒီပရုပ်ရဲ့ ပူရှိန်းမှုက မနက်ခင်း သင်နိုးထလာဖို့ကျတော့လည်း ကူညီပေးပြန်ပါတယ်။

၆။ ညဘက် ပူလောင်အိုက်စပ်တဲ့ အခြေအနေမှာနေတာ

အလင်းက သင့်ခန္ဓာကိုယ် အနားမယူအောင် လုပ်တဲ့ တစ်ခုတည်းသော အကြောင်းခံ မဟုတ်ပါဘူး။ ကျွန်တော်တို့မှာ ခန္ဓာကိုယ်နဲ့ ဦးနှောက် အပူချိန် နရီစည်းချက်လည်း ရှိတယ်လို့ ဒေါက်တာ ကလိုင်းက ဆိုပါတယ်။ ညဘက်ခန္ဓာကိုယ်က အပူချိန်ကျလာပေမဲ့ အိပ်ခန်းက ပူလောလောကြီးဖြစ်နေရင် စောသေးတယ်လို့ ဦးနှောက်ကထင်သွားပါလိမ့်မယ်။ အိပ်ခန်း အပူချိန်ကို ၁၈ ဒီဂရီ စင်တီဂရိတ်လောက် ထားသင့်တယ်လို့ အမျိုးသား အိပ်စက်မှု ဖောင်ဒေးရှင်းက အကြံပြုထားပါတယ်။ ဒါက လူတိုင်းအတွက်တော့ အလုပ်မဖြစ်ပါဘူး (ဒါက အမေရိကလို မြန်မာပြည်ထက် ပိုအေးတဲ့ဒေသအတွက် အကြုံပြုချက်ဖြစ်သလို အဲကွန်းမရှိရင် ပူတဲ့ဒေသမှာ ၁၈ ဒီဂရီဖြစ်အောင်လုပ်ဖို့ဆိုတာ မဖြစ်နိုင်ပါဘူး)။ ယေဘုယျအားဖြင့် အိပ်ဖို့ကြိုးစားချိန်မှာ ပတ်ဝန်းကျင်ကို အေးအောင်လုပ်ထားဖို့ပဲ ဒေါက်တာကလိုင်းက အကြံပြုပါတယ်။ (ယပ်တောင်လေးခပ်၊ ပြတင်းပေါက်တံခါးလေး ဘာလေးဖွင့်၊ သနပ်ခါးလေး ဘာလေးလူးပေါ့)

၇။ နွေးထွေးတဲ့ ညအိပ်ဝတ်စုံတွေနဲ့ အိပ်တာ

ဖလန်နယ် ညအိပ်ဝတ်စုံတွေဟာ နွေးတယ်ဆိုပေမဲ့ ညအချိန် ခန္ဓာကိုယ် အပူချိန်ကို ထိန်းပေးဖို့ ခက်ပါတယ်လို့ ဒေါက်တာ ၀င်းတားက ဆိုပါတယ်။ သက်သောင့်သက်သာ ဖြစ်အောင် အ၀တ်အထူကြီး မ၀တ်ဘဲ စောင်ခြုံတာက ပိုကောင်းတယ်လို့ ဆိုပါတယ်။ စောင်ခြုံအိပ်တာက အိုက်လာရင် ကန်ချလိုက်လို့ရသလို ချမ်းလာရင် ကောက်ခြုံလို့ရတယ်လို့ ဒေါက်တာ ၀င်းတားက ဆိုပါတယ်။

၈။ အကိုက်အခဲ ပျောက်ဆေးတွေ သောက်တာ

ကိုယ်လက်ခေါင်းခါး ကိုက်ခဲတဲ့အခါ အိပ်မရတာ မထူးဆန်းပေမဲ့ အကိုက်အခဲ ပျောက်အောင် ဆေးသောက်တာက အိပ်ဖို့ ပိုခက်စေပါတယ်။ လူတွေက ဒါကို သိပ်မသိကြဘူးလို့ ဒေါက်တာ ၀င်းတားက ဆိုပါတယ်။ အကိုက်အခဲ ပျောက်ဆေးတွေဟာ စိတ်ကိုငြိမ်စေတဲ့ စွမ်းရည်ရှိပေမဲ့ တစ်ချို့ဆေးတွေက အိပ်စက်မှုကို ထိခိုက်စေတယ်လို့ ဆိုပါတယ်။ ဖျာ၊ မွေ့ရာ ကောင်းကောင်းသုံးတာ၊ ခန္ဓာကိုယ် သက်သောင့်သက်သာရှိအောင် ခေါင်းအုံး၊ ဖက်အုံး၊ ရေမြှုပ်အုံးနဲ့ ဆွဲဆန့်လို့ရတဲ့ အိပ်ရာခင်းမျိုးသုံးတာ မျိုးနဲ့ ကိုက်ခဲမှုကို သက်သာရာ ရစေဖို့လုပ်တာ ပိုကောင်းတယ်လို့ ဆိုပါတယ်။

၉။ ညဘက် လေ့ကျင့်ခန်း လုပ်တာ

ကိုယ်ကာယ လှုပ်ရှားတာဟာ ညဘက်ကို ပိုအိပ်ကောင်းစေပါတယ်။ သင့်တော်တဲ့အချိန်မှာ လုပ်မယ်ဆိုရင်ပေါ့။ လေ့ကျင့်ခန်း လုပ်တာဟာ ကောင်းကောင်း အိပ်ပျော်စေအောင် ကူညီတယ်ဆိုပေမယ့် မအိပ်ခင် လေ့ကျင့်ခန်း လုပ်တာကတော့ နိုးနေအောင် လှုံ့ဆော်သလိုပါပဲ။ အန်ဒိုဖင်းဟော်မုန်းတွေက ဇီဝစနစ်ထဲမှာ ရှိနေတဲ့အတွက် ပြင်းပြင်းထန်ထန် လေ့ကျင့်ခန်း လုပ်တာဟာ ပြောင်းပြန် အကျိုးသက်ရောက်လာစေနိုင်တာမျိုး ဖြစ်လာနိုင်တယ်လို့ ဒေါက်တာ ကလိုင်းက ဆိုပါတယ်။ ဖြစ်နိုင်ရင် မနက်ပိုင်း ဒါမှမဟုတ် ညနေပိုင်းပဲ လုပ်သင့်တယ်လို့ ဆိုပါတယ်။ အချိန် အခက်အခဲ ရှိမယ်ဆိုရင်တောင် အိပ်ချိန်နဲ့ သိသိသာသာခြားသင့်ပါတယ်။

၁၀။ ညနေပိုင်း ကော်ဖီ၊ လက်ဖက်ရည် သောက်တယ်

အိပ်ရာဝင်ခါနီး ကော်ဖီ မသောက်ဘူး (လက်ဖက်ရည်၊ ဆိုဒါတွေလည်း ပါပါတယ်) ဆိုရင်တောင် ကဖင်းဓာတ်ဟာ သင်ထင်ထားတာထက် ကြာကြာ ပိုခံပါတယ်။ အိပ်ရာမ၀င်မီ လေးနာရီအတွင်း သောက်လိုက်တာကတောင် သင့်ကို ညဘက်မှာ နိုးနေစေနိုင်တယ်လို့ ဒေါက်တာ ၀င်းတာက ဆိုပါတယ်။ အချိုမုန့်လေးတစ်ခုနဲ့ ကော်ဖီတစ်ခွက်ဟာ ဘာမှမဟုတ်ပေမယ့် တစ်ချို့လူတွေရဲ့ခန္ဓာကိုယ်ကကျတော့ ကဖင်းဓာတ်ကို အစာချေဖျက်တာ ပုံမှန်ထက် ပိုနှေးတယ်လို့ ဆိုပါတယ်။ အိပ်ရာမ၀င်မီ လေးနာရီ ရှေ့ပိုင်းမှာပဲ သောက်တာက အကောင်းဆုံးပါ။ ဖြစ်နိုင်ရင် နေ့ခင်း လက်ဖက်ရည်၊ ကော်ဖီက နောက်ဆုံး တစ်ခွက်ဖြစ်သင့်ပါတယ်။

၁၁။ ညစာ စားပြီး တစ်ခွက်တစ်ဖလား မော့တာ

ဝိုင်နီတစ်ခွက်က သင့်ကို မြန်မြန်ဆန်ဆန် အိပ်ပျော်သွားစေတယ်ဆိုတာ သေချာပါတယ်။ (မူးပြီး အိပ်ပျော်သွားတာလည်း ပါပါတယ်) ဒါပေမဲ့ အဲဒီ အိပ်စက်မှုက အရည်အသွေး ကောင်းချင်မှ ကောင်းမှာပါ။ သင့်ခန္ဓာကိုယ် ပြန်လည် အားပြည့်လာစေတဲ့ အိပ်မက်မက်တဲ့ ကာလ Deep REM အိပ်စက်မှုကို အရက်က အနှောင့်အယှက် ပေးပါတယ်။ အယ်လ်ကိုဟော ဓာတ်ပြယ်သွားမှ အိပ်မက်တွေက ရေကြီးသုတ်ပြာရောက်လာတော့ အိပ်စက်မှု အပင်အပတ် ပြန့်ကျဲသွားပါတယ်။ အရက်ကြောင့် အိပ်စက်မှု အရည်အသွေး ထိခိုက်တယ်လို့ ခံစားမိရင် အိပ်ခါနီး ငါးနာရီလောက်အတွင်း ရှောင်သင့်ပါတယ်လို့ ဒေါက်တာ ကလိုင်းက အကြံပြုပါတယ်။

၁၂။ မအိပ်မီ စားတာ

ဗိုက်ဟောင်းလောင်းနဲ့ အိပ်ရင် အိပ်ပျော်ဖို့ ခက်ပါတယ်။ ဒါပေမဲ့ မအိပ်ခင် တစ်ဝတစ်ပြဲနင်းကန်စားဖို့တော့ မကြိုးစားပါနဲ့။ အူထဲမှာ အစာတွေရှိနေရင် ကောင်းကောင်း အိပ်ဖို့ထက် အစာချေဖို့ကို စွမ်းအင်ပိုသုံးရတယ်လို့ ဒေါက်တာ ၀င်းတားက ဆိုပါတယ်။ ဒါ့အပြင် ညဘက်စားတာက ကိုယ်အလေးချိန်ကိုလည်း တိုးစေပါတယ်။ ဗိုက်ကလေး တစ်ရွှဲရွှဲနဲ့ နေချင်လည်းနေပေါ့။ တစ်ကယ်စာတာ မဟုတ်ဘူးဆိုရင် အိပ်ရာဝင်ခါနီး ပေါ့ပေါ့ပါးပါးထက် ပိုမစားသင့်ပါဘူး။ 

Ref : Reader’s Digest

  • TAGS