News

POST TYPE

TIP

နှစ်သက်ကြည်သာ အိပ်စက်နိုင်ကြစေဖို့
09-Jun-2019


အိပ်စက်ခြင်းဟာ ဆင်းရဲချမ်းသာလူတိုင်း အနားယူပိုင်ခွင့် ဖြစ်ပါတယ်။ ကောင်းမွန်စွာ အိပ်စက်အနားယူခြင်းဟာ စိတ်ပိုင်းဆိုင်ရာနဲ့ ရုပ်ပိုင်းဆိုင်ရာ ကျန်းမာရေးကို များစွာ အထောက်အကူဖြစ်စေပါတယ်။ အိပ်မရတဲ့အခါ လူရော၊ စိတ်ရော နွမ်းနယ်တော့တာပါပဲ။ ဒါကြောင့် စားဝင်အိပ်ပျော်ဖို့ လိုတယ်လို့ ပြောကြတာပေါ့။ ယခုတစ်ပတ် နှစ်သက် ကြည်သာ အိပ်စက်နိုင်စေကြောင်း အကြံပြုချက်များကို ရေးသားဖော်ပြလိုက်ပါတယ်။ 

ကောင်းမွန်စွာ အိပ်စက်ရခြင်းရဲ့ အကျိုးကျေးဇူးများ

ကောင်းမွန်ပြည့်ဝတဲ့ အိပ်စက်မှုဟာ သင့်ကျန်းမာရေးအတွက် အကျိုးရှိပါတယ်။ စိတ်ဖိအားတွေကို ကျဆင်းစေပြီး၊ သက်သောင့်သက်သာမှုကို ပေးပါတယ်။ စိတ်ကြည်လင်လန်းဆန်းမှုကို ဖြစ်စေပြီး စွမ်းအင် ပြည့်ဝစေပါတယ်။ အိပ်စက်ခြင်းနဲ့ ကိုယ်အလေးချိန်ဟာ ဆက်စပ်ပါတယ်။ ကျန်းမာတဲ့ ကိုယ်အလေးချိန်ကို နှစ်ခြိုက်စွာ အချိန်မှန်အိပ်ခြင်းက သက် ရောက်မှုရှိပါတယ်။ အိပ်ရေးဝနေမှ သွားလာလှုပ်ရှားမှုက တက်ကြွတာပါ။ အားကစားသမားတွေဆို မဖြစ်မနေ အိပ်ရေးဝနေဖို့ လိုပါတယ်။ ကောင်းမွန်စွာ အိပ်စက်ထားပါမှ ကြွက်သားတွေဟာ သင့်တင့်လျောက်ပတ်စွာ ချိတ်ဆက်အလုပ်လုပ်ကြပါမယ်။ အိပ်စက်ခြင်းဟာ အာရုံစူးစိုက်နိုင်ဖို့ လိုအပ်ပါတယ်။ အိပ်ရေးဝတော့ အလုပ်တာဝန်၊ ကျောင်းစာနဲ့ ဖန်တီးမှုတွေမှာ စူးစိုက်မှုပိုကောင်းလာတော့တာပေါ့။ အိပ်စက်ချိန် မှန်ကန်ပြည့်ဝမှုဟာ သွေးဖိအားကိုလည်း လျော့ကျစေပါတယ်။ 

အိပ်စက်ခြင်းကို အထောက်အကူဖြစ်စေတဲ့ အနေအထိုင်

နေ့ခင်းအချိန် နေရောင်ခြည်ရရှိမှုဟာ အိပ်စက်ခြင်းအပေါ် အကျိုးပြုတယ်ရယ်လို့ သက်သေပြထားတဲ့ သုတေသနတွေက ဆိုထားပါတယ်။ ဦးနှောက်၊ ခန္ဓာကိုယ်နဲ့ ဟိုမုန်းတွေကို ပုံမှန်ဖြစ်စေတဲ့ ဇီဝနာရီကို နေရောင်ခြည် အလင်းရောင်ရရှိမှုက သက်ရောက်မှုရှိစေပါတယ်။ အိပ်မပျော်တဲ့ ဝေဒနာ Insomnia ရှိ သူတွေကို နေ့ခင်းအချိန်အခါမှာ တောက်ပတဲ့နေ့ အလင်းရောင်၊ ဒါမှမဟုတ် အလင်းကောင်းကောင်း ရရှိခံစားစေတဲ့ ကုသမှုတွေ ရှိပါတယ်။

နေ့ခင်းရတဲ့ အလင်းရောင်ဟာ အိပ်စက်ခြင်းကို ကောင်းမွန်စေပေမယ့် ညဘက်ရတဲ့ အလင်းရောင်ကတော့ ဆန့်ကျင်ဘက် အကျိုးပေးပါတယ်။ Blue Light Exposure လို့ခေါ်တဲ့ ညဘက်ရတဲ့ အလင်းတွေဟာ ဦးနှောက်ကို နေ့အလင်းရောင်အဖြစ် လှည့်စားတာမို့ အနားယူဖို့ပေးတဲ့ ဟိုမုန်းတွေ လျော့ကျစေ ပါတော့တယ်။ ညဘက် ကွန်ပျူတာ၊ စမတ်ဖုန်းသုံးတာများတဲ့သူတွေမှာ အဆိုပါ အလင်းရောင်တွေ များများရတတ်ပါတယ်။ ဒါတွေကို လျှော့ရမှာပါ။ 

ညနေခင်း နောက်ပိုင်းသောက်တဲ့ ကဖိန်းဓာတ်ဟာ မလိုလားအပ်တဲ့အရာ ဖြစ်ပါတယ်။ ကော်ဖီ၊ လက်ဖက်ရည်၊ အားဖြည့် အချိုရည်တွေမှာ ကဖိန်းဓာတ် ပါဝင်ပါတယ်။ ကဖိန်းက အိပ်စက်ချင်စိတ်ကို တားဆီးတာမို့ ညဘက် ကော်ဖီ၊ လက်ဖက်ရည်သောက်တာကို Insomnia ကုသတဲ့ ဆရာဝန်တွေက တားမြစ်တတ်ကြပါတယ်။

နေ့ခင်းအချိန်အခါ အိပ်စက်မှုအကြောင်းလည်း ပြောရပါမယ်။ နေ့ခင်း အချိန်တစ်ခဏတာ အိပ်စက်မှုက ကျန်းမာရေးကို အထောက်အကူ ဖြစ်စေပါတယ်။ စိတ်ကိုလည်း လန်းဆန်းစေပါတယ်။ ဒါပေမဲ့ နေ့ခင်းပိုင်း အချိန်အကြာကြီး အိပ်စက်မယ်ဆိုရင်တော့ ညဘက် အိပ်စက်ခြင်းကို ထိခိုက်စေပါပြီ။ နေ့ခင်းအိပ်ချိန် မကြာအောင်သတိပြုပါ။

အချိန်မှန်အိပ်၊ အချိန်မှန်ထပါ။ ဒါဟာ အိပ်စက်မှုမူမမှန်ခြင်း Insomnia ကို လျော့ကျစေပါတယ်။ ရုံးပိတ်ရက် ကျောင်းပိတ်ရက်တွေမှာတောင်မှ နောက်မှ အိပ်တာ၊ အိပ်ရာထ နောက်ကျအောင် ပိုအိပ်တာတွေ မလုပ်ဘဲ အိပ်စက်ချိန် မှန်ပါစေ။ နိုးထချိန်မှန်ပါစေ။ ဖြစ်နိုင်ရင် နေ့စဉ်အိပ်ရာဝင်ချိန် တစ်သမတ်တည်း ရှိပါစေလေ။ 

အိပ်စက်ခြင်းကို အားပေးတဲ့ ဓာတ်စာတွေရှိပါတယ်။ Melatonin ဟိုမုန်းဟာ အိပ်စက်ခြင်းအရသာကောင်းကို ပေးပြီး ခပ်မြန်မြန်အိပ်ပျော်စေပါတယ်။ ကျွမ်းကျင်သူတွေညွှန်တဲ့ အဆိုပါ ဟိုမုန်းပါဝင် ဓာတ်စာကို သုံးစွဲရင်လည်း အိပ်စက်မပျော်တဲ့ ရောဂါဝေဒနာကို သက်သာစေပါတယ်။ ကမ္ဘာဦးပင်ရွက် Ginkgo က ထုတ်တဲ့ တိုင်းရင်းဆေးဝါးတွေဟာ အိပ်စက်အနားယူမှုကို အထောက်အကူ ဖြစ်စေပါသတဲ့။ အရက် အလွန်အကျွံသောက်ခြင်းဟာ ညဘက် အချိန်အခါ Melatonin ဟိုမုန်းထွက်ခြင်းကို လျော့ကျစေပြီး၊ အိပ်စက်ခြင်း အနေအထားတွေကို မူမမှန်စေပါဘူး။ သတိထားပါ။ 

အိပ်တဲ့နေရာ (အိပ်ရာ) ရဲ့ အပူချိန်၊ အလင်းရောင် စူးရှမှု၊ အသံအတိုးအကျယ် စတာတွေကို ဂရုစိုက်ပေးပါ။ ၂၀ ဒီဂရီစင်တီဂရိတ်အပူချိန်ဟာ အိပ်စက် ဖို့အတွက် သင့်လျော်တဲ့ အပူချိန်လို့ အကြံပြုချက်တွေ ရှိပါတယ်။ အလင်းစူးစူးရှရှတွေ ပိတ်ပြီးအိပ်ပါ။ အသံဆူဆူညံညံတွေ မဝင်နိုင်တဲ့ အိပ်ခန်းဖြစ်ပါစေ။ ဒီအချက် တွေက သင့်ရဲ့ နှစ်ခြိုက်စွာ အိပ်စက်ခြင်းအပေါ် သက်ရောက်စေပါတယ်။

နေ့ခင်းအချိန်မှာ လေ့ကျင့်ခန်းလုပ်ပေးပါ။ အကောင်းဆုံးအိပ်ဆေးလို့ ဆိုပါတယ်။ အိပ်ခါနီး အစားအသောက် ကြီးကြီးမားမားတွေ မစားကြပါနဲ့။ ဒါပေမဲ့ ပေါ့ပေါ့ပါးပါးလေး စားလိုက်တာကျတော့ အိပ်စက်ခြင်းကို အကျိုးဖြစ်စေတယ်လို့ ဆိုပြန်ပါရော။ ရေနွေးနွေးလေး ချိုးပြီး အိပ်တာ၊ အိပ်ခါနီး တရားထိုင်တာတွေက ပြည့်ဝတဲ့ အနားယူမှုကို အထောက်အကူဖြစ်စေပါတယ်။ အိပ်ရာမဝင်ခင် အပေါ့အပါးသွားပါ။ 

စာဖတ်သူများ နှစ်သက်ကြည်သာ အိပ်စက်နိုင်ကြပါစေ။ 

ဆရာဆေး