News

POST TYPE

TIP

စတိဂျော့၏ ဖန်တီးမှုစွမ်းရည်
22-Dec-2018


Apple ကုမ္ပဏီကို စတင်ထူထောင်ခဲ့သူ စတိဂျော့ (Steve Jobs) တစ်ယောက်လုပ်တိုင်း အောင်မြင်မှု မရနိုင်ဆိုသည့် သဘောကို ကောင်းကောင်းသိသည်။ သူ့ရှေ့မှာ ထူထောင်ထားသည့် ကုမ္ပဏီတွေ တစ်ခုပြီးတစ်ခု လဲပြိုနေကြသည်။ သို့သော် သူအဘယ်ကြောင့် အောင်မြင်ခဲ့ရသနည်း။ အဖြေကရှင်းပါသည်။ စတိဂျော့သည် အရိုးဆုံး အရှင်းဆုံးကို အကောင်းဆုံးဖြစ်အောင် တီထွင်တတ်သူ ဖြစ်နေသောကြောင့်ပင်။

သူ့ဦးတည်ချက်က အများကြီးထုတ်ရန် မဟုတ်။ သုံးစွဲသူအတွက် အများကြီး အသုံးဝင်ရမည်ဆိုသည့် စားသုံးသူ ဗဟိုပြုမှုကို အမြဲဦးစားပေးသည်။ သူထုတ်လိုက်သည့် ပစ္စည်းကို သုံးစွဲသူတိုင်းက သုံးရတာကောင်းလိုက်တာဟု ပြောလိုက်လျှင် သူအောင်မြင်ပြီဆိုသည့် သဘောတရားကို လက်ကိုင်ထားကာ တီထွင်နေသူဖြစ်သည်။ သူ၏ တီထွင်မှုမှန်သမျှသည် ဖွင့်သုံးလိုက်လျှင် အလွယ်ဖြစ်ရမည်။ လေ့လာလိုက်လျှင် နားလည်ရမည်။ သုံးကြည့်လိုက်လျှင် ကြိုက်သွားရမည်။

စတိဂျော့သည် အချိန်ဖြုန်းတီးလေ့ရှိသူမဟုတ်ပါ။ သူကအချိန်ဖြုန်းပြီး ဝေ့ဝဲနေရခြင်းမျိုးကိုလည်း မကြိုက်ပါ။ မလိုအပ်ဘဲ လိုက်လုပ်နေရသည့် အဆင့်တွေကိုလည်း သူက မုန်းတီးသူဖြစ်သည်။ လူတွေကို အများကြီးတွေး၊ အများကြီး စဉ်းစားရမည်ကိုလည်း သူမကြိုက်။ ထို့ကြောင့် သူ့တီထွင်မှုမှန်သမျှသည် ရိုးစင်းသောပစ္စည်းများ ဖြစ်ရမည်ဆိုသည့် အခြေခံကို လက်ကိုင်ထား တီထွင်လေ့ရှိသည်။ အမှန်တော့ အရိုးဆုံး၊ အရှင်းဆုံးဖြစ်အောင် တီထွင်ရခြင်းမှာ အခက်ဆုံးဖြစ်နေတတ်ပါသည်။

သူက ပိုရှေးလက်ပတ်နာရီ အကောင်းစားကို ဝတ်ဆင်တတ်သည်။ စတိဂျော့သည် အရည်အသွေးကောင်းကောင်း၊ ပစ္စည်းကောင်းကောင်း အလွန်ကြိုက်သည်။ ရှေးဟောင်းပစ္စည်းဆန်ဆန် ပြတိုက်ထဲတွင် ထားရမည့် ပုံတုံးဒီဇိုင်းတုံးတွေကိုလည်း သူသဘောကျလေ့ရှိသည်။ သူ့နာရီကို သူများက ကြိုက်သည်ဟု ပြောလျှင် ချွတ်ပေးချင် ပေးတတ်သည့် လူစားလည်းဖြစ်သည်။ သူက -

“ခင်ဗျား ဒီလို ပုံတုံးတုံးဒီဇိုင်းကို သတိထားမိတာ ဂုဏ်ယူပါတယ်ဗျာ”ဟု ပြောတတ်သည်။

နောက်တစ်နေ့တွင် သူ့ကို မနေ့က လက်ဆောင်ပေးလိုက်သည့် ပုံတုံးတုံးဒီဇိုင်းနာရီနှင့်အတူ ပြန်တွေ့ကောင်း တွေ့နိုင်သည်။ သူက အလားတူပုံစံနာရီမျိုးကို နောက်တစ်လုံး သိမ်းချင်သိမ်းထားတတ်သည်။ ထိုနာရီတန်ကြေးက ဒေါ်လာ ၂၀၀၀ ခန့် ဖြစ်ချင်ဖြစ်နေတတ်သည်။

ထိုသဘောတရားကိုကြည့်ပြီး သူ့စိတ်ကို ခန့်မှန်းနိုင်သည်။ သူက ရှေးရိုးဆန်ဆန် ပုံတုံးတုံးပဲကြိုက်ချင် ကြိုက်မည်။ သို့သော် သူသုံးသည့်ပစ္စည်းက ဒေါင်ဒေါင်မြည် အကြမ်းခံ၊ ရေစိမ်ခံဖြစ်နေရမည်ဆိုသည့် သဘောကို သူမြတ်နိုးတတ်မှန်း သိသာသည်။ သူက ပစ္စည်းတစ်ခုကို စစ်စစ်ပေါက်ပေါက် စိစစ်ပြီးမှ လက်ခံသုံးစွဲတတ်သည်။ အလားတူ သူ့ထုတ်ကုန်များကို ကြည့်လိုက်လျှင်လည်း ပြန်ကြည့်စရာ မလိုလောက်အောင် အကောင်းဆုံး စိစစ်ထားပြီး သေချာမှ ထုတ်လေ့ရှိခြင်းမှာ သူ့စတိုင်ဖြစ်သည်။

စတိဂျော့သည် အရာရာကို အသေးစိတ်လေ့လာရခြင်းအား သဘောကျသူဖြစ်သည်။ သူက ကွန်ပျူတာတစ်လုံးကို သုံးသူသည် စဖွင့်လိုက်လျှင် ဖွင့်လိုက်ချင်း ဘာတွေ့သင့်သနည်း။ ဘာတွေကို ဖယ်ရှားတတ်သနည်း။ ဘာတွေကိုကြိုက်တတ် ထည့်သွင်းခိုင်းတတ်သနည်း စသည်တို့ကို ထုတ်လုပ်သည့် အဖွဲ့အား တစ်ချက်ချင်း မေးလေ့ရှိသည်။ ထို့နောက် -

“တကယ်လို့ ကျွန်တော်သာ ကွန်ပျူတာဝယ်ရင် ဒါတွေထည့်ခိုင်းမိမှာပဲ” ဆိုသည့် သူ့အမြင်ကို တီထွင်ထုတ်လုပ်သည့်အဖွဲ့ကို တင်ပြသည်။ 

သူက ပစ္စည်းတစ်ခုကို တီထွင်ပြီးတိုင်း အားသာချက်၊ အားနည်းချက်၊ မပြည့်စုံသေးသည်တို့ကို အဖြေရှာ ဆန်းစစ်နေတတ်သည်။ သုံးစွဲသူ စိတ်တိုင်းကျ မဖြစ်မချင်း သူပြင်ဆင်နေမည်ဖြစ်သည်။ ကွန်ပျူတာထဲရှိ စက်လည်ပတ်မှုစနစ်၏ စစချင်းတွေ့မြင်ရမည့် အနေအထားမှသည် ဈေးကွက်ကိုတင်မည့် ထုပ်ပိုးပုံစနစ်အထိ သူစေ့စပ်သေချာစွာ လိုက်ကြည့်တတ်သည်။ နောက်ဆုံး ဈေးကွက်တွင် မည်သို့ရောင်းနေသနည်း ဆိုသည်ကိုပါ လေ့လာအကဲဖြတ်နေတတ်သည်။

အသေးစိတ် လိုက်ပြီးစစ်ဆေးခြင်းသည် စားသုံးသူအတွက် ဦးစားပေးခြင်းဖြစ်သည်။ ငါသာ သူ့နေရာမှာဆိုလျှင် ဟူသော ကိုယ်ချင်းစာစိတ်ဖြင့် လိုက်ကာ ခံစားပေးခြင်းမှာ Apple ထုတ်ပစ္စည်းများကို စတိဂျော့ခေတ်တွင် ရွှေခေတ်ဖြစ်လာစေရန် တွန်းပို့ပေးနေသလိုဖြစ်သည်။ 

သူ့ကွန်ပျူတာ အသုံးပြုရသည့် Mouse လေးတစ်ခုကအစ သူဂရုစိုက်သည်။ လက်နှင့် အုပ်သုံးလိုက်လျှင် မည်သို့ဖြစ်နေရမည် ဆိုရာကအစ ထို Mouse လေးကို ထုပ်ပိုးပြီး ပုံးထဲထည့်ပုံကအစ သေချာစွာ ဂရုစိုက်သည်။ သူ့ကွန်ပျူတာများကို ထုပ်ပိုးသည်မှ စားပွဲခုံပေါ်တင်လိုက်သည်အထိ အခြားသော ကွန်ပျူတာများနှင့် မတူစေရဆိုသော စိတ်ထားမှာ စတိဂျော့၏ အခြေခံစိတ်ထားလည်း ဖြစ်သည်။ သူက ကြည့်လိုက်လျှင် ရိုးစင်းပြီး လှပနေရမည်။ ကွန်ပျူတာဆိုသည်မှာ ပုံဆိုးဆိုး ပုံးကြီးတွေ ဘေးကထောင်ပြီး ရှုပ်နေအောင် လုပ်ထားသည်ဆိုခြင်းထက် ရှင်းနေပြီး အသုံးအတည့်ဆုံးဖြစ်စေမည့် ဒီဇိုင်းမျိုးကို သူကတီထွင်တတ်သည်။ 

သူ၏ Macintosh ကွန်ပျူတာတွေကို တစ်ဆင့်ချင်း တီထွင်ထုတ်လုပ်လာမှုများကို သတိပြုစေချင်ပါသည်။ အရောင်၊ ဒီဇိုင်းဆန်းသစ်နေရမည်။ လိုချင်စဖွယ်လှပနေရမည်။ ပါဝါခလုတ်လေး နှိပ်လိုက်ရုံဖြင့် စသုံးနိုင်ရမည် ဆိုသောအချက်များပေါ်တွင် အခြေခံပြီး တီထွင်ထားခြင်းဖြစ်သည်။ ကွန်ပျူတာထဲတွင် ထည့်ပေးထားသည့် သုံးစွဲနည်းအညွှန်းကို မဖတ်ဘဲနှင့် သုံးနိုင်အောင် သူကထုတ်လုပ်ထားခြင်းဖြစ်သည်။ 

သူ၏ ကွန်ပျူတာသုံးစွဲနည်း စာအုပ်အညွှန်းကို ရေးသားထားသည့် အင်္ဂလိပ်စာ အဆင့်ကလည်း အထက်တန်းအဆင့်လောက်သာဖြစ်သည်။ သူက Manual စာအုပ်ကို ထည့်သာထည့်ပေးသည် “ကြည့်စရာမလိုပါဘူးဗျာ”ဟု ဆိုတတ်သည်။ အဘယ်ကြောင့်ဆိုသော် သူ့ကွန်ပျူတာသည် သုံးစွဲသူများ အလွယ်ဆုံး သုံးစွဲနိုင်ရန်ဖြစ်ကြောင်း သူကောင်းကောင်း သိထားသောကြောင့်ဖြစ်သည်။ 

စတိဂျော့သည် အရိုးရှင်းဆုံးကိုကြိုက်သလို စားသုံးသူအကြိုက် အသေးစိတ်ကို သိမြင်အောင် သုံးသပ် ဆုံးဖြတ်နိုင်စွမ်းရှိခြင်းကြောင့် အောင်မြင်လာရသည်ဟုပြောလျှင် လွန်အံ့မထင်။  

(Ref: Steve Jobs Way iLeadership)