News

POST TYPE

TIP

ကွန်ဖြူးရှပ်ကို ပြန်လည်မွေးဖွားခြင်း
20-Oct-2018


ကမ္ဘာ့ ပညာတတ်လောကအား တရုတ်နိုင်ငံ၏ အကြီးမြတ်ဆုံးသော အတွေးအခေါ်ပညာရှင်ကြီးအကြောင်း မေးလိုက်လျှင် အားလုံးက တညီတညာတည်း “ကွန်ဖြူးရှပ်” ဟုသာ ပြောကြမည်။ သူ့နေရာတွင် အစားထိုးနိုင်မည့်၊ သူ့လောက်ကိုးကားစရာကောင်းသည့် ပညာရှင်မျိုး မပေါ်ပေါက်သေးဟုလည်းဆိုနိုင်သည်။

ကွန်ဖြူးရှပ်သည် တရုတ်နိုင်ငံတွင်သာမက အာရှအထိ သူ့ဩဇာအတွေးအခေါ်ကို လွှမ်းမိုးအောင် လုပ်ဆောင်နိုင်ခဲ့သူဖြစ်သည်။ တရုတ်အတွေးအခေါ် ပညာရှင်များထဲတွင် အာရှနိုင်ငံအချို့က ကိုးကွယ်ရလောက်အောင် ဩဇာကြီးမားသူဆို၍ ကွန်ဖြူးရှပ်တစ်ဦးတည်းသာရှိခဲ့သည်ဟုဆိုရမည်။ တရုတ်သည် သူ၏ဆော့ဖ်ပါဝါ (soft power) နှင့် တရုတ်ဘာသာစကားကို အခြားနိုင်ငံများသို့ ပျံ့နှံ့စေရန် လုပ်ဆောင်ရန် အခက်အခဲသိပ်မရှိပေ။ အဘယ်ကြောင့်ဆိုသော် နှစ်ကာလပေါင်းများစွာ သူတို့ဆရာကြီး ကွန်ဖြူးရှပ်၏ အတွေးအခေါ်များကို လွှမ်းမိုးထားနိုင်စေရန် လုပ်ဆောင်နိုင်ခဲ့ပြီးသောကြောင့်ဖြစ်သည်။

တရုတ်နိုင်ငံမှ ကွန်ဖြူးရှပ်အဖွဲ့အစည်းများသည် ကမ္ဘာပတ်ပြီး သံတမန်နည်းကျကျ စည်းရုံးသိမ်းသွင်းထားနိုင်သည့် အနေအထားတွင် ရှိနေသည်။ Confucius Institute ဆိုကာ ထူထောင်ထားသော အဖွဲ့အစည်း၊ တက္ကသိုလ်၊ ကျောင်းပေါင်းသည် နိုင်ငံပေါင်း ၁၂၀ တွင် ၁၀၀၀ ကျော်ရှိသည်။ Confucius Institute ဆိုသည်မှာ တက္ကသိုလ်အခြေစိုက်ဌာနတစ်ခုအနေနှင့် ရပ်တည်နေပြီး အထက်တန်းများတွင် တရုတ်ဘာသာစကားကိုသင်ကြားနိုင်ရေးအတွက် ကျယ်ပြန့်စွာ လှုပ်ရှားနေကြသည့် အဖွဲ့အစည်းတစ်ခုအနေနှင့် ရပ်တည်နေသည်။

ကွန်ဖြူးရှပ်ဆိုသည်မှာ တရုတ်နိုင်ငံထုတ်ကုန်အမှတ်တံဆိပ်တစ်ခုလို ဖြစ်လာစေရန် တရုတ်တို့ ကြိတ်ပြီး ကြိုးစားနေကြသည်။ တရုတ်ကွန်မြူနစ်ပါတီက ကွန်ဖြူးရှပ်နေရာတွင် မော်စီတုံးကို အစားထိုးရန် ကြိုးစားခဲ့ဖူးသည်။ မော်၏ ပုံရိပ်ကလည်း တရုတ်နိုင်ငံတွင် နှစ်အတန်ကြာ ရပ်တည်နိုင်ခဲ့သည်မှန်သော်လည်း တရုတ်ကျောင်းများ၌ ကွန်ဖြူးရှပ်အတွေးအမြင်များကို ကျောင်းသင်ရိုးညွှန်းတမ်းများတွင် ပြန်လည်ထည့်သွင်းသင်ကြားလာခြင်းမှာ တရုတ်တို့အကြောင်းမဲ့လုပ်နေခြင်းမဟုတ်ကြောင်း သိထားသင့်ပါသည်။ 

တရုတ်ကွန်မြူနစ်ပါတီ ကြီးစိုးစဉ်ကာလက စာအုပ်နီလေးများကို ကိုင်ကြရသည်။ လူတိုင်း၊ ကျောင်းသားတိုင်း လက်ထဲတွင် လက်စွဲစာအုပ်များအဖြစ် သတ်မှတ်ထားခြင်းဖြစ်သည်။ ထိုစာအုပ်လေးများထဲတွင် မော်စီတုံး၏ မာ့စ်ဝါဒအတွေးအမြင်တွေကို ထည့်သွင်းပေးထားသည်။ ထိုစာအုပ်ထဲပါ စာသားတွေကို နားလည်သည်ဖြစ်စေ၊ နားမလည်သည်ဖြစ်စေ အလွတ်ကျက်မှတ် ရွတ်ဖတ်ကြရသည်အထိ ခေတ်တစ်ခေတ်ဖြစ်ခဲ့ဖူးသည်။ သို့သော် ခေတ်သစ်တွင် မော်ပျောက်ပြီး ကွန်ဖြူးရှပ်က နေရာပြန်ရလာသည်။ ကွန်ဖြူးရှပ်၏ အတွေးအခေါ်များသည် နှစ်ပေါင်းများစွာကတည်းက ပညာရေးရွေးချယ်ပွဲ၊ ဝန်ထမ်းရွေးချယ်ပွဲများအတွက် စာမေးပွဲစစ်ရာ၌ ကိုးကားစရာများဖြစ်ခဲ့သည်။ ယနေ့လည်း ကွန်ဖြူးရှပ်အတွေးအမြင်များကို ကျောင်းများတွင် ပြန်သင်ပြီး ကလေးတွေကို လူတော်လူကောင်းလေးများဖြစ်လာစေရန် ပြန်လည်မွေးထုတ်ပေးမည်ဟုဆိုခြင်းမှာ သူ၏ ကိုယ်ကျင့်တရားဆိုင်ရာ အတွေးအမြင်များဖြင့် ခိုင်မာသော လူ့ဘောင်အဖွဲ့အစည်းတစ်ခုကို တည်ဆောက်နိုင်ကြောင်း တရုတ်ခေါင်းဆောင်များက လက်ခံလာခြင်းဖြစ်သည်ဟု ဆိုရမည်။

၂၀၁၁ ခုနှစ်လောက်က တီအန်မင်ရင်ပြင်မှ ကွန်ဖြူးရှပ်၏ ရုပ်တုကို ဖယ်ရှားနိုင်ရန် ကြိုးစားအားထုတ်ခဲ့ဖူးသည်။ ဖယ်ရှားပြီး မကြာမီမှာပင် မူလနေရာကို ပြန်ရောက်လာခြင်းကလည်း တရုတ်ခေါင်းဆောင်များကြားတွင် ကွန်ဖြူးရှပ်အပေါ် ကြည်ညိုလေးစားတန်ဖိုးထားရကောင်းမှန်း သိသူများ ရှိနေသည်ဟု ဖော်ပြရာရောက်ခဲ့သည်။ ကွန်ဖြူးရှပ်ကို ဖယ်ရှားပြီး ပြန်ရောက်လာ၍မကြာမီမှာပင် မော်စီတုံးကို ကိုယ်စားပြုသည့် ကြယ်နီက မှေးမှိန်သလိုဖြစ်သွားပြီး ကွန်ဖြူးရှပ်ကို ကိုယ်စားပြုသည့် ကြယ်ဝါကထွန်းတောက်လာခဲ့ရသည်။ 

ခေတ်သစ်တရုတ်နိုင်ငံခေါင်းဆောင်များသည် ကွန်ဖြူးရှပ်အပေါ် အပြည့်အဝယုံကြည်ပြီး ဂုဏ်ယူကြလိမ့်မည်ထင်လျှင်လည်း မှားနိုင်ပါသည်။ တရုတ်ကွန်မြူနစ်ပါတီသည် ၁၉၁၉ ခုနှစ် မေလ ၄ ရက် လှုပ်ရှားမှုနှင့်အတူ ပေါ်ပေါက်လာခြင်းဖြစ်သည်။ တရုတ်မင်းဆက်ကို တရုတ်ကျောင်းသားများက စတင်တော်လှန်ပုန်ကန်မှုက ဘုရင်စနစ်ကို သုတ်သင်ခဲ့သလိုဖြစ်ခဲ့ရသည်။ 

ထိုစဉ်က ကျောင်းသားတွေ ကြွေးကြော်ခဲ့သည်မှာ “ကွန်ဖြူးရှပ်နှင့်သားများ ကျဆုံးပါစေ” ဖြစ်သည်။ သက်ဦးဆံပိုင်စနစ်ကို ကွန်ဖြူရှပ်အား ဦးထိပ်ထားပြီး ဖြိုချခဲ့ကြခြင်းဖြစ်သည်။

ကွန်မြူနစ်ပါတီခေါင်းဆောင် မော်စီတုံးကိုယ်တိုင်က ကွန်ဖြူးရှပ်ကို အမျိုးသမီးများအားဖိနှိပ်သူအဖြစ် သတ်မှတ်ခဲ့သည်။ ကွန်ဖြူးရှပ်၏ အတွေးအမြင်များထဲတွင် မိသားစုဆိုသည့် သဘောတရားကို အလေးထားသော်လည်း အမျိုးသမီးများကို အရာမသွင်းခြင်းအား သူက အပြစ်တင်ခြင်းဖြစ်သည်။ ကွန်ဖြူးရှပ်သည် အမျိုးသမီးများ ပညာသင်ခွင့်ကို ပိတ်ပင်ထားရုံမက ခြေသေးမများအဖြစ် စည်းနှောင်ခိုင်းထားသည့် ရိုးရာကို ဖော်ဆောင်သူအဖြစ်လည်း ရှုတ်ချထားသည်။ အမျိုးသမီးများကို ခြေထောက်သေးသေးလေးတွေဖြစ်အောင် စည်းခိုင်းပြီး လူတောထဲမတိုးနိုင်အောင် လုပ်ဆောင်သည့် ကွန်ဖြူးရှပ်၏ အစဉ်အလာအားနည်းချက်ကို မော်စီတုံးက အခွင့်ကောင်းယူပြီး တိုက်ဖျက်ကာ အမျိုးသမီးများ၏ ကယ်တင်ရှင်ဖြစ်အောင် ကြံဆောင်နိုင်ခဲ့သည်။ 

မော်စီတုံးသည် သူကွယ်လွန်ချိန် ၁၉၇၆ ခုနှစ်အထိ ကွန်ဖြူးရှပ်ဆန့်ကျင်ရေးကို ပြင်းထန်စွာလုပ်ဆောင်ခဲ့သူဖြစ်သည်။ ထို့ကြောင့် မော်စီတုံးခေတ်နှစ်ပေါင်း ၃၀ လောက် တရုတ်နိုင်ငံတွင် ကွန်ဖြူးရှပ်သည် မှေးမှိန်ကွယ်ပျောက်ခဲ့ရသည်။ 

၂၀၀၅ ခုနှစ်မှစတင်ပြီး တရုတ်သမ္မတ ဟူကျင်တောင်းသည် ကွန်ဖြူးရှပ်ပြောခဲ့သည့် “သဟဇာတဖြစ်မည့် လူ့ဘောင်” တည်ဆောက်ရေးဆိုသော ကြွေးကြော်သံကို ထုတ်ဖော်ခဲ့သည်။ သို့သော် ထိုသဟဇာတဖြစ်သည့် လူ့ဘောင်တည်ဆောက်ရေးသဘောတရားကို ကွန်ဖြူးရှပ်က ပြောခဲ့ကြောင်း ထုတ်ဖော်ပြောကြားသည်တော့ မဟုတ်ပေ။ ဟူကျင်တောင်းနောက် တက်လာသည့် သမ္မတရှီကျင့်ဖျင်လက်ထက်မှ ကွန်ဖြူးရှပ်၏ ၂၅၆၅ ပြည့်နှစ်မြောက် မွေးနေ့ပွဲကို ၂၀၁၄ ခုနှစ်တွင် ကျင်းပရာသို့ တက်ရောက်မိန့်ခွန်းပြောကြားသည်ကိုကြည့်ပြီး တရုတ်ခေါင်းဆောင်တို့၏ ကွန်ဖြူးရှပ်အပေါ် သဘောထားများပြောင်းလဲလာပြီဟု ယူဆရသည်။

ယခုအခါ ကွန်ဖြူးရှပ်၏ အတွေးအမြင်များကို နိုင်ငံရေးခေါင်းဆောင်များက ပွင့်လင်းစွာထုတ်ဖော်ပြောကြားသည့်ခေတ် ရောက်လာပြီဖြစ်သည်။ တရုတ်တွင် ကွန်ဖြူးရှပ်၏ ရုပ်တုကလည်း အထင်ကရနေရာတွင် ရှိနေသည်။ မော်စီတုံး၏ ရုပ်တုတွေကလည်း ဝင့်ကြွားစွာ စိုက်ထူထားသည်။ သူတို့ရုပ်တုနှစ်ခု အားပြိုင်မှုသည် တရုတ်နိုင်ငံ၏ လူ့ဘောင်တည်ဆောက်ရေးတွင် မည်မျှအရေးပါလာမည်ကို စောင့်ကြည့်ရမည်ဖြစ်သည်။ 

(Ref: China's New-found Love for Confucius)


  • VIA