News

POST TYPE

TIP

ကွန်ဖြူးရှပ်၏ စီးပွားရေးသင်ကြားချက်များ
29-Sep-2018


အာရှ၏ကျားကြီးများဖြစ်စေရန် စင်ကာပူနိုင်ငံကို ကြံဆောင်ပေးသော လီကွမ်ယုနှင့် မလေးရှားမှ မဟာသီယာတို့က သူတို့နိုင်ငံများ၏ စီးပွားရေးအနေအထား တောင့်တင်းခိုင်မာလာခြင်းမှာ ကွန်ဖြူးရှပ်၏ မိသားစုအပေါ်ထားအပ်သည့် သွန်သင်လမ်းညွှန်ချက်များကြောင့်ဖြစ်ကြောင်း ထိုပုဂ္ဂိုလ်ကြီးများကိုယ်တိုင်က ထုတ်ဖော်ဝန်ခံကြပါသည်။ အနောက်တိုင်းဒဿန ယဉ်ကျေးမှုများကို အထင်ကြီးလေးစားသော သူတို့က ကွန်ဖြူးရှပ်ကို မပစ်ပယ်ခြင်းကလည်း ထူးခြားသည်ဟု ဆိုရမည်ဖြစ်သည်။ သူတို့က ကွန်ဖြူးရှပ်၏ မိသားစုစိတ်ဓာတ်၊ အဆင့်ဆင့်လေးစားတန်ဖိုးထားခြင်း၊ ရိုသေခြင်း၊ ဟန်ချက်ညီမျှ ချစ်ကြည်ရင်းနှီးစွာ နေထိုင်ခြင်းအပေါ် အလေးထားခြင်းများမှာ တိုင်းပြည်ဖွံ့ဖြိုးတိုးတက်စေခြင်း၏ အဓိကအကြောင်းဖြစ်သည်ကို ကောင်းစွာ နားလည်သဘောပေါက်ထားကြသည်။

“ဒီမိုကရေစီအလွန်အကျူးပေးခြင်း” အပေါ်လည်း သူတို့နှစ်ဦးက ဝေဖန်ထောက်ပြကြသည်။ အနောက်နိုင်ငံများမှာကဲ့သို့ ဒီမိုကရေစီဆိုကာ လွတ်လပ်မှုပေးခြင်းသည် တိုင်းပြည်တည်ငြိမ်အေးချမ်းခြင်းကို ပျက်ပြားစေသည်ဟု သူတို့က နားလည်ထားကြသည်။ လွတ်လပ်စွာပြောဆိုခြင်းသည် ယဉ်ကျေးမှုကို အားနည်းစေသည်၊ အလွန်အကျူး အနှောင်အဖွဲ့မရှိ လွတ်လပ်ခွင့်ပေးလိုက်လျှင် မိသားစုနှင့် မိမိတို့အသိုင်းအဝိုင်းအပေါ် ခင်တွယ်မြတ်နိုးစိတ်များ ကွယ်ပျောက်သွားနိုင်သည်။ ထိုသို့ကွယ်ပျောက်သွားလျှင် အစဉ်အလာက လက်ခံထားသော မိသားစုဆိုင်ရာ သဘောထားနှင့် ခံယူချက်များ ကွယ်ပျောက်သွားနိုင်သည်။ သူတို့ပြောသည့် အစဉ်အလာဆိုသည်မှာ ကွန်ဖြူးရှပ်၏ သွန်သင်မှုများတွင် အခြေခံနေကြောင်းတွေ့ရသည်။ 

အနောက်နိုင်ငံမှ စီးပွားရေးသမားတိုင်းသည် တရုတ်၊ စင်ကာပူ၊ မလေးရှားနိုင်ငံများနှင့် စီးပွားရေးအကြောင်းပြောမည်ဆိုလျှင် ထိုနိုင်ငံများအတွင်း ဆက်နွှယ်နေသော မိသားစုဆိုင်ရာ သဘောတရားနှင့် သူတို့လုပ်ငန်းများ ချိတ်ဆက်ပတ်သက်နေမှုများကို သတိထားရပေလိမ့်မည်။ ထိုသဘောတရားများသည် ထိုင်း၊ ဂျပန်၊ ဖိလစ်ပိုင်နိုင်ငံများတွင်လည်း ထွန်းကားနေကြောင်း သတိထားရန်လိုပါသည်။

တရုတ်နိုင်ငံတွင် ဒီမိုကရေစီအကြောင်း သိပ်ပြောနိုင်မည်မဟုတ်ပေ။ သို့သော် သူတို့သည် ရှေးရိုးလမ်းစဉ်အတိုင်း မိသားစုဖြင့် စီးပွားရေးကို ထိန်းကျောင်းကြသည်။ သူတို့တွင် ဘုံဝါဒနှင့် စုပေါင်းဖော်ဆောင်ခြင်းဆိုသည့် သဘောတရားများ ထွန်းကားသည်။ ထိုသဘောတရားများက ကွန်မြူနစ်တွေ ကြီးစိုးထားသည့်နိုင်ငံတွင် အထူးအဆန်းတော့မဟုတ်ဟုဆိုရမည်။ မည်သို့ဆိုစေသူတို့ နိုင်ငံစီးပွားရေးနှင့် နိုင်ငံရေးစနစ်က ခရိုနီများ မလွှမ်းမိုးရေး၊ အကျင့်ပျက်ခြစားမှုမရှိရေး၊ ငါ့သားငါ့မယား ကောင်းစားရေးဝါဒများ မထွန်းကားရေးတို့ကို သူ့နည်းသူ့ဟန်နှင့် ထိန်းသိမ်းထားနိုင်ခဲ့သည်။ 

အကျင့်ပျက်ခြစားမှုဆိုသည်မှာ နေရာတိုင်းကင်းနိုင်သည်တော့ မဟုတ်ပေ။ တရုတ်နိုင်ငံတွင်လည်း အကျင့်ပျက်ခြစားမှုများ ရှိသည်။ သို့သော် တရုတ်တို့၏ ရက်စက်စွာ အရေးယူအပြစ်ပေးခြင်းများကြောင့် အခြားအနောက်နိုင်ငံများနှင့်ယှဉ်လျှင် အလွန်နည်းသည်ဟုဆိုရမည်။ သူတို့နိုင်ငံ သူတို့လူမျိုးစိတ်ဓာတ်က ငယ်စဉ်ကတည်းက အကျင့်စာရိတ္တကောင်းမွန်ရေးကို ဦးစားပေးလေ့ကျင့်သင်ကြားကြသည်။ ကျောင်းတွေကလည်း သင်သည်။ ပါတီကလည်း ပြုစုပျိုးထောင်သည်။ နိုင်ငံကလည်း အလေးထားပြီး အရေးယူဆောင်ရွက်သည်။ သူတို့ လူ့ဘောင်ကို ကိုယ်ကျင့်တရားကောင်းသော လူ့ဘောင်တစ်ခု ဖြစ်လာစေရန် ပြုစုပျိုးထောင်နေခြင်းမှာ ရှေးကတည်းက စွဲမြဲစွာလက်ခံလာခဲ့သည့် ကွန်ဖြူးရှပ်၏ တန်ဖိုးများကြောင့်သာဖြစ်သည်။ 

ကွန်ဖြူးရှပ်က ရှာဖွေရမည်၊ စုဆောင်းရမည်၊ ရှာဖွေစုဆောင်းထားသောအရာများကို အရင်းအနှီးပြုလုပ်ပြီး တိုးတက်ကြီးပွားအောင် ကြံဆောင်ရမည်ဆိုသည်မှာ အဖွဲ့အစည်းတိုင်းအတွက် လက်မခံနိုင်စရာမရှိသော သွန်သင်မှုများဖြစ်သည်။ ထိုသဘောတရားက လူ့ဘောင်အဖွဲ့အစည်းတိုင်းတွင်လည်း အခြေခံသဘောတရားများဖြစ်နေသည်။ ကွန်ဖြူးရှပ်က မိမိဝင်ငွေ၏ ၅၀ ရာခိုင်နှုန်းခန့်ကို စုဆောင်းရန်သွန်သင်သည်။ ထိုသွန်သင်ချက်အတိုင်း သူတို့စုဆောင်းလေ့ရှိသဖြင့် ကမ္ဘာပေါ်တွင် ချွေတာစုဆောင်းအား အကောင်းဆုံးသူများအဖြစ်လည်း နာမည်ကျော်သည်။

ကွန်ဖြူးရှပ်သည် ပညာကိုလေးစား တန်ဖိုးထားသူတစ်ဦးဖြစ်သည်။ ထို့ကြောင့် ပညာတတ်များ မွေးထုတ်ပေးရေးကို မိဘတာဝန်၊ တိုင်းပြည်တာဝန်တစ်ခုအနေနှင့် ချမှတ်သည်။ ထိုသဘောတရားကို အစဉ်အလာအတိုင်း လက်ခံလာကြသဖြင့် မိမိတို့ သားသမီးများကို ပညာတွေသင်ပေးကြသည်။ သို့ဖြစ်ရာ လုပ်ငန်းခွင်သို့ရောက်လာသည့် တရုတ်လေးများသည် ပညာတတ်အများစုဖြစ်နေသည်ကိုလည်း ထူးခြားစွာတွေ့ရမည်ဖြစ်သည်။ လက်ရှိလည်း မသင်မနေရပညာရေးစနစ်နှင့် မဝင်မနေရစစ်သင်တန်း သဘောတရားများကို ချမှတ်ထားသော နိုင်ငံတိုင်းသည် စမတ်ကျသော လူငယ်များကို မွေးထုတ်ပေးနိုင်ခဲ့သည်။ ပညာတတ်သော၊ စည်းကမ်းစနစ်ကျနပြီး ပုံစံဝင်နေသော သူများဖြင့်သာ တိုင်းပြည်ကို ပြုပြင်တည်ဆောက်နိုင်မည်ဟုဆိုကာ ဖော်ဆောင်နေသည့် နိုင်ငံတိုင်း တိုးတက်ဖွံ့ဖြိုးနေသည်မှာ အထင်အရှားဖြစ်သည်။

မိသားစုသဘောတရားကိုအခြေခံပြီး အသိုင်းအဝိုင်းကိုချဲ့ထွင်ခြင်းမှာ ကောင်းသည်လည်းရှိသလို၊ ဆိုးသည်လည်းရှိပါသည်။ မိသားစုကြီးပွားတိုးတက်ရေးကို အခြေခံလွန်းသည့် စီးပွားရေးစနစ်တစ်ခုသည် လက်ဝါးကြီးအုပ် စီးပွားရေးအသွင်ကိုလည်း ဆောင်သွားတတ်ပါသည်။ အထက်ကို လေးစားတန်ဖိုးထားတတ်ခြင်းကလည်း အထက်က လမ်းမညွှန်လျှင်၊ အမိန့်မချလျှင် ဘာတစ်ခုမှ ဖော်ဆောင်၍မရနိုင်လောက်အောင်ဖြစ်သွားနိုင်သည်ဆိုခြင်းကို သတိထားသင့်ပါသည်။ တရုတ်နိုင်ငံတွင် ဗဟိုချုပ်ကိုင်မှုများလွန်းသောအခါ ကောင်းသည်ရှိသလို အဆိုးဘက်ကိုဦးတည်နေချက်များလည်း ရှိနေကြောင်း သတိထားသင့်ပါသည်။ 

ကွန်ဖြူးရှပ်၏ တန်ဖိုးထားမှုဆိုင်ရာ သဘောတရားများသည် အကောင်းနှင့်အဆိုး နှစ်မျိုးစလုံး ဒွန်တွဲနေသည်။ တရုတ်တို့၏ အနောက်နိုင်ငံများနှင့် ဆက်သွယ်ရာတွင် သဘောထားသည် လွတ်လပ်သည်ဆိုသော်လည်း အခြားသူများကို အတင်းအဓမ္မ သူတို့ထဲကို ဆွဲသွင်းနေသည့် သဘောမျိုးမဆောင်အောင် သတိထားနေတတ်ကြသည်။ သူတို့က ဆွေမျိုးပေါက်ဖော်ဆိုသည့် သဘောတရားကို ပြောချင်ပြောနေမည်။ သို့သော် သူတို့ အခြားနိုင်ငံများနှင့်ဆက်သွယ်ရာတွင် အဓိကလိုချင်သည်က သဘောတူစာချုပ်သာဖြစ်သည်။ သူတို့လိုချင်သည်ကို မရရအောင် စာချုပ်တွေနှင့် တုပ်နှောင်တတ်ခြင်းကလည်း တရုတ်ဝါဒတစ်ခုဟုဆိုနိုင်သည်။ 

နောက်တစ်ချက် တရုတ်တို့၏ စီးပွားရေးဆက်ဆံမှုများကို သတိထားရမည့်အချက်များမှာ စိတ်ရှည်သည်းခံခြင်းဖြစ်သည်။ သူတို့က သူတို့လိုချင်သည့်အနေအထားမရောက်မချင်း မျှောထားပြီးပေါင်းသည်။ သူတို့က ဆက်ဆံသည့် အခြားတစ်ယောက်အပေါ်တွင် စိတ်ရှည်သည်းခံရမည်ဆိုသည့် ကွန်ဖြူးရှပ်၏ သဘောတရားအတိုင်း ကျင့်သုံးနေခြင်းဖြစ်သည်။ တရုတ်သည် ရေရှည်အကျိုးကို မျှော်ကိုးပြီး ကြိုးရှည်ရှည်နှင့် လှန်ထားတတ်သည်ကလည်း  ရှေးအစဉ်အလာ ဗျူဟာပင်ဖြစ်သည်။