News

POST TYPE

TIP

မာဟွာတန်၏ စီးပွားရေးအမြင်
15-Jun-2018



မာ ဟွာတန် (Ma Huateng) က အောင်မြင်သည်ဖြစ်စေ မအောင်မြင်သည်ဖြစ်စေ Tencent ဆိုသည့် ကုမ္ပဏီကြီးတစ်ခုကို ထူထောင်နိုင်ခဲ့ကြောင်း ဂုဏ်ယူနေသူဖြစ်သည်။ 

တရုတ်နိုင်ငံ၏ နာမည်ကျော် အင်တာနက်ကုမ္ပဏီကြီးတစ်ခုဖြစ်သည့် Tencent ကို ထူထောင်ခဲ့သူ မာဟွာတန်က သမိုင်းတွင် သူသည် မှတ်တိုင်တစ်တိုင်ကို စိုက်ထူနိုင်ခဲ့ကြောင်း “ကျွန်တော် လုပ်နိုင်ခဲ့တယ်” ပြောလိုရင်းဖြစ်သည်။ လူငယ်တစ်ဦးဘဝနှင့် နည်းပညာကို ကိုင်စွဲပြီး ကုမ္ပဏီကြီးတစ်ခုဖြစ်အောင် ကြံဆောင်ခဲ့သည်။ တရုတ်နိုင်ငံ၏ ဘီလီယံကြွယ်အချမ်းသာဆုံး ထိပ်တန်း ၁၀ စာရင်းဝင်အောင်လုပ်ခဲ့သည့် ကိုယ့်ဒူးကိုယ်ချွန် စီးပွားရေးသမားတစ်ဦး၏စကားမှာ မာန်နှင့်အား အပြည့်ပါနေသည်။ သူက -

“အမေရိကန်ဟာ ကျွန်တော်တို့အနေနဲ့ တစ်ကမ္ဘာလုံးဖြန့်ကြက်ပြီးလုပ်ရတဲ့အထဲမှာ ဈေးကွက်အခက်ဆုံးပါပဲ”ဟု ဆိုခဲ့သည်။ 

သူက တရုတ်အင်တာနက်ကုမ္ပဏီတစ်ခုအနေနှင့် အမေရိကကို ထိုးဖောက်ရန် မလွယ်ကူကြောင်း ပြောဆိုခြင်းဖြစ်သည်။ အမေရိကကိုထိုးဖောက်ရန် မအောင်မြင်သေးသမျှ သူက ကမ္ဘာကိုလွှမ်းမိုးနိုင်လောက်အောင် လုပ်ငန်းကို အောင်မြင်ပြီဟု မဆိုနိုင်ကြောင်း ကောင်းစွာသိထားသည်။ 

“ခုဆိုရင် မိုးဘိုင်းလ်ဖုန်းနဲ့ အင်တာနက်အသုံးပြုမှုဟာ အနောက်ဥရောပနိုင်ငံတွေထက် အာရှမှာ ပိုပြီးတော့ ဖွံ့ဖြိုးတိုးတက်နေပါတယ်။ ဒါကြောင့် တရုတ်အင်တာနက်ကုမ္ပဏီတွေအနေနဲ့ အနောက်ထက် အာရှဈေးကွက်ကို ပိုပြီးတော့ ဂရုစိုက်ဖို့လိုပါလိမ့်မယ်” ဟု သူကဆိုသည်။ သူက ထိုးဖောက်ရခက်သည့်နေရာများထက် ထိုးဖောက်ရလည်းလွယ် ဖွံ့ဖြိုးနေသည့် ဒေသများတွင် ရင်းနှီးမြှုပ်နှံမှုများကို အလေးပေးပြီး ရှေ့ပြေးထားရန် လိုအပ်ကြောင်း ပြောကြားခြင်းဖြစ်သည်။ 

မိုဘိုင်းလ်အင်တာနက်လုပ်ငန်းသည် ဖွံ့ဖြိုးတိုးတက်နေသည်။ အထူးသဖြင့် အာရှဈေးကွက်ကြီးသည် အင်အားအကြီးဆုံးဖြစ်သည်။ အမေရိကတွင် လွှမ်းမိုးနေသည့် Facebook ၏ ဈေးကွက်ကို သွားတိုက်ခြင်းထက်၊ သူက အာရှတွင် သူ့နည်းသူ့ဟန်ဖြင့် ဈေးကွက်တစ်ခုကို ရထားစေရန် ကြံဆောင်ထားခြင်းက ပိုပြီး စိတ်ချသေချာရလိမ့်မည်ဟု ခံယူထားသူဖြစ်သည်။ အင်တာနက်ကို လူတိုင်းက ကွန်ပျူတာ PC တွေနှင့် သုံးစွဲခြင်းထက် မိုဘိုင်းလ်ဖုန်းများဖြင့် အလွယ်တကူသုံးစွဲနေခြင်းကြောင့်လည်း သူက ဈေးကွက်ကို ဦးတည်ချက်အား ဖုန်းများပေါ်တွင်သာ ပစ်မှတ်ထားရန် ကြံဆောင်သင့်ကြောင်း အကြံပြုထားသည်။

“အကြီးမားဆုံးအခွင့်အလမ်းတွေဟာ လုပ်ငန်းကြီးတွေကလာတယ်။ ကျွန်တော်ဆိုရင် ဆက်သွယ်ရေးနဲ့ပတ်သက်တဲ့လုပ်ငန်းတွေ လုပ်နေတာ နှစ်ပေါင်း ၂၀ လောက်ရှိနေပြီ။ ကျွန်တော်နဲ့ အရင်းနှီးဆုံးလုပ်ငန်းကို ပြောပါဆိုရင် အင်တာနက်လုပ်ငန်းပဲ။ ဒါကြောင့် အဲဒီလုပ်ငန်းအပေါ်မှာပဲ ကျွန်တော့်အနေနဲ့ ပေါင်းစပ်ပြီး ကြီးပွားအောင်လုပ်ရမှာပဲ။ စာပို့လုပ်ငန်းနဲ့ အွန်လိုင်းဆက်သွယ်ရေးလုပ်ငန်းတွေကို Tencent ဆိုပြီး ထူထောင်ကာ ကျွန်တော်လုပ်ခဲ့တာ”

သူပြောကြားသည့်စကားမှာ စိတ်ဝင်စားစရာကောင်းပါသည်။ မည်သူမဆို မိမိကျင်လည်ကျွမ်းကျင်သည့်အလုပ်အပေါ်တွင် အာရုံထားပြီး တိုးတက်ကြီးပွားအောင် လုပ်ဆောင်ရမည်ဟု ဆိုလိုခြင်းဖြစ်သည်။ တရုတ်နိုင်ငံတွင် e-Commerce လုပ်ငန်းနှင့် Search Engine လုပ်ငန်းများသည် ဈေးကွက်အားဖြင့် နှောင့်နှေးသည်ဟုထင်ရသော်လည်း သူက လုပ်ငန်းကို မဆုတ်မနစ် ကြိုးစားလုပ်ခဲ့သည်။ ထို့ကြောင့်လည်း သူ၏ WeChat ဆိုသည့် ဆက်သွယ်ရေးစနစ်ကို သန်း ၃၀၀ အထိ သုံးစွဲသူပေါ်လာအောင် လုပ်သည်။ အမေရိကတွင် ကြိုးစား၍ မအောင်မြင်လျှင် သူက အာရှတွင် ကြိုးစားသည်။ ထို့ကြောင့် ကမ္ဘာ့ဈေးကွက်၏ ထက်ဝက်ခန့်ကို သိမ်းပိုက်နိုင်သည်အထိ အောင်မြင်မှုကိုရခဲ့သည်။

ယနေ့ဆိုလျှင် Tencent နှင့်ပတ်သက်သည့် အွန်လိုင်း၊ အင်တာနက်၊ ဆက်သွယ်ရေးကိစ္စများကို သုံးစွဲနေသူပေါင်း ဘီလီယံနှင့် ချီပြီးရှိနေသည်။ ဂိမ်း၊ ဘဏ်၊ ဖျော်ဖြေရေး၊ ငွေပေးငွေယူကိစ္စအားလုံးကို Tencent က ချုပ်ကိုင်ထားနိုင်ခဲ့သည်မှာ မာဟွာတန်၏ စိတ်ဓာတ်နှင့် ဇွဲကြောင့်သာဖြစ်သည်။ 

Tencent တွင် လစဉ်ပုံမှန်အစည်းအဝေး ကျင်းပလေ့ရှိသည်။ ရာပေါင်းများစွာသော စီနီယာများနှင့် ဒုတိယဥက္ကဋ္ဌများ အစည်းအဝေးကို တက်ရသည်။ အသစ်ငှားရမ်းထားသည့် ဝန်ထမ်းတွေကလည်း မိမိတို့ လုပ်ဆောင်ထားသည့် ပရောဂျက်များကို တက်ရောက်ဆွေးနွေးခွင့်ရှိသည်။ မာဟွာတန် သို့မဟုတ် ဒုတိယဥက္ကဋ္ဌအဖြစ် တာဝန်ယူထားသည့် မာတင်လောတို့ တက်လေ့ရှိသည်။ သုံးနာရီခန့်ကြာသည့် ထိုအစည်းအဝေးတွင် သေချာစွာတင်ပြချက်များကို နားထောင်တတ်သည်။ သူတို့အစည်းအဝေးပြီးသွားသည့် နောက်ပိုင်းတွင် မာ သို့မဟုတ် မာတင်တို့ထံမှ တောင်းဆိုချက်များကို WeChat ကတစ်ဆင့် ဝန်ထမ်းများအားလုံးထံ ပို့ပေးတတ်သည်။ သူတို့ဘာဖြစ်ချင်သည်ကို ပြောပြကြသည်။ ခေါင်းဆောင်တွေက အားလုံးသည် မည်သည့်နေရာတွင် မည်သည့်တာဝန်ကို ထမ်းဆောင်နေကြောင်း သိချင်မှသိမည်။ သို့သော် ခေါင်းဆောင်တစ်ဦးအနေနှင့် မိမိဘာဖြစ်ချင်သည်ဆိုခြင်းကို အားလုံးသိအောင် ထုတ်ဖော်ပြီးအုပ်ချုပ်နည်းမှာ ထူးခြားသည့်ခေါင်းဆောင်မှုတစ်ခုဖြစ်ပါသည်။ 

“အင်တာနက်ကုမ္ပဏီတွေဟာ ကြီးသည်ဖြစ်စေ၊ ငယ်သည်ဖြစ်စေ နည်းပညာခေတ်ရဲ့ ပြောင်းလဲနေတဲ့ လုပ်ငန်းသဘောတရားတွေကို သတိထားရမယ်။ ခေတ်က ကွန်ပျူတာ မိုဘိုင်းလ်ခေတ်ကို အလှည့်အပြောင်းဖြစ်နေတာကို သိသင့်တယ်။ မိုဘိုင်းလ်အင်တာနက်က ပိုပြီးတော့ သုံးစွဲနှုန်းများနေတယ်။ ကျွန်တော်တို့မှာ ကံကောင်းတာက မိုဘိုင်းလ်အင်တာနက်ကို ပိုပြီးတော့ ရင်းနှီးကျွမ်းဝင်နေကြတယ်။ ဒါကြောင့် မိုဘိုင်းလ်ပစ္စည်းတွေအသုံးပြုပြီး အင်တာနက်သုံးဆောင်နိုင်တဲ့အထိ ကျယ်ပြန့်လာအောင် လုပ်ကြရမယ်။ ကျွန်တော်တို့အနေနဲ့ တီထွင်သူတွေ၊ သုံးစွဲနိုင်တဲ့ ပလက်ဖောင်းတွေနဲ့ သုံးစွဲနိုင်အောင် လုပ်ပေးနေသူတွေအချင်းချင်း ပူးပေါင်းလုပ်ဆောင်ရင် ပိုပြီးအောင်မြင်မယ်” ဟု သူကဆိုသည်။

ကွန်ပျူတာခေတ်ပြောင်းတော်လှန်ရေးမှသည် အင်တာနက်ခေတ်ပြောင်းတော်လှန်ရေးဆီ ဦးတည်နေသည်။ မည်သည့်ခေတ်အနေအထားကို အချိုးအလှည့်ပြောင်းမည်ဆိုခြင်းကို ခန့်မှန်းရအလွန်ခက်သည်။ ပြောင်းလဲနေမှုအပေါ် လူတွေ လိုက်ပြောင်းပြီး လိုက်ပါအောင် လုပ်ဆောင်နိုင်သူတွေက ကမ္ဘာ့စီးပွားရေးကို ဦးဆောင်နိုင်မည်ဖြစ်ကြောင်း မာဟွာတန်ကောင်းကောင်း သဘောပေါက်ထားသည်။