News

POST TYPE

TIP

ဘီလ်ဂိတ်စ် (Bill Gates) ၏ ခေါင်းဆောင်မှုပုံစံ
06-Apr-2018 tagged as



“မင်းတို့ဆရာတွေက မင်းတို့အပေါ် ကြမ်းတယ်ထင်ရင် မင်းတို့ အကြီးအကဲဖြစ်တဲ့အထိ စောင့်လိုက်ပါ။ သူက ဒီနေရာမှာ အမြဲတမ်းရှိနေမှာ မဟုတ်ပါဘူး”

ဂိတ်စ်က ထိုစကားကို ပြောရခြင်းမှာ ခေါင်းဆောင်မှုပုံစံတစ်ခုကို ချပေးလိုက်ခြင်းဖြစ်သည်။ လူငယ်တိုင်း ငယ်ရွယ်စဉ်အခါက ကိုယ့်ဆရာတွေအပေါ် စိတ်ခုဖူးကြပေလိမ့်မည်။ ဆရာတွေကို စိတ်ဆိုးမည်ဆိုလျှင် ကိုယ်တိုင်က ထိုနေရာကို ရောက်အောင် လုပ်ကြည့်လိုက်ပါ။ နားလည်လာပါလိမ့်မည်။ ဆရာတွေက အဘယ်ကြောင့် ကိုယ်တပည့်တွေအပေါ် ကြမ်းတမ်းစွာ ကိုင်တွယ်နေရသနည်းဆိုခြင်းကို ကိုယ်တိုင် အကြီးအကဲနေရာရောက်လာလျှင် သိလာပေလိမ့်မည်။

ဂိတ်စ်သည် သူ့ပန်းတိုင်သို့ရောက်စေရန် အလျှော့မပေးသည့် စိတ်ဓာတ်ရှိသူတစ်ဦးဖြစ်သည့်အတိုင်း တစ်ခါတစ်ရံတွင် သူ့၌ ခက်ထန်ကြမ်းတမ်းမှုများကို တွေ့ရတတ်သည်။ အထူးသဖြင့် ဝန်ထမ်းများနှင့်ဆက်ဆံရာတွင် သူ့ဘက်က အလျှော့မပေးစိတ်များက အဆင်မပြေသလိုဖြစ်ခဲ့ရသည်။ စကားကိုဖြတ်ပြောခြင်း၊ ထေ့သလို ငေါ့သလိုပြောခြင်း၊ အော်ငေါက်ခြင်းများအထိ ပြုလုပ်တတ်သူ လည်းဖြစ်သည်။ 

သူ့ဝန်ထမ်းတွေက သူ့ကိုကြောက်ကြသည်။ ၂၀၀၀ ပြည့်နှစ်က ဂိတ်စ်သည် Newsweek မဂ္ဂဇင်းကိုပြောဖူးသည်။ ထိုစဉ်က သူသည် အကြီးအကဲ CEO ရာထူးက ဆင်းပေးလိုက်ချိန်ဖြစ်သည်။ သူက ဖြစ်ချင်တာကို အတင်းမရမက တောင်းဆိုခြင်းမှာ လူသားမဆန်သည့် အလုပ်တစ်ခုဖြစ်ကြောင်း ဝန်ခံသည်။ သို့သော် ထိုတောင်းဆိုနိုင်မှုများကြောင့်ပင် သူအောင်မြင်မှုများကို ရလာခြင်းဖြစ်ကြောင်းကိုတော့ အသိအမှတ်ပြုရမည်ဖြစ်သည်။

သူသည် မိုက်ခရိုဆော့ဖ်၏ အကြီးအကဲတစ်ဦးဖြစ်သော်လည်း လက်အောက်ငယ်သားတွေ ကြိုက်သူတစ်ဦးမဟုတ်။ သူလိုချင်ဖြစ်ချင်တာကို မရမက တောင်းဆိုတတ်ပြီး ဆင်ခြေကို လုံးဝလက်မခံသူလည်းဖြစ်သည်။

“ကျွန်တော် အထက်တန်းကျောင်းသားဘဝက အခြားပရိုဂရမ်ရေးနေသူတွေကို ပြောဖူးတာရှိတယ်။ မင်းတို့ ငါ့ကို ဦးဆောင်ခိုင်းရင် မင်းတို့အတွက် အန္တရာယ်ရှိတယ်။ ဘာကြောင့်လဲဆိုတော့ ဒီတစ်ကြိမ် ငါဦးဆောင်လိုက်ရင် မင်းတို့ကို ငါတစ်သက်လုံး ဦးဆောင်သွားရလိမ့်မယ်”ဟု ဆိုခဲ့ဖူးသည်။

သူ့ကိုယ်သူ ယုံကြည်စိတ်ပြင်းထန်သူတစ်ဦးအနေနှင့် မည်သည့်အလုပ်ကို မည်သူတွေအား ဦးဆောင်ပြီး မည်မျှပေါက်မြောက်စေရန် လုပ်ဆောင်ရမည်ကို သူကောင်းစွာ သဘောပေါက်ထားသည်။ ထို့ပြင် သူက လွတ်လပ်စွာလုပ်ကိုင်လိုပြီး သူတစ်ပါးဩဇာမခံလိုသူလည်းဖြစ်သည်။ သူ့ခေါင်းဆောင်မှုပုံစံကို လေ့လာသုံးသပ်ကြည့်လျှင် သူလိုချင်သည့်ပုံစံကို မရမချင်း မဖြစ်ဖြစ်အောင် ပြန်လုပ်ခိုင်းတတ်သည်ကို တွေ့ရသည်။ 

“ကျွန်တော် အစည်းအဝေးကိုသွားရင် စိတ်ထဲမှာ ဘာလုပ်ရမယ်ဆိုတဲ့ တိကျတဲ့ ဦးတည်ချက်တွေကို တစ်ခါတည်း ထည့်သွားတယ်”ဟု သူကဆိုသည်။ သူ့ခေါင်းထဲတွင် ဘာလိုချင်သည်ဆိုခြင်းကို ထည့်သွားသဖြင့် အစည်းအဝေးခန်းအတွင်း ရောက်သည်နှင့် သူဘာဖြစ်ချင်သည်ကို တောက်လျှောက်ပြောတော့သည်။ 

“ဆုံးဖြတ်ချက်တစ်ခုတည်းကို ဘယ်တော့မှ နှစ်ကြိမ်ပြန်မချမိစေနဲ့”

သူက ဘာလုပ်လုပ် တစ်ကြိမ်တည်းနှင့် ဆုံးဖြတ်ချက်ကို ပိုင်အောင်ချတတ်သည်။ မလိုအပ်ဘဲ ထိုကဲ့သို့သော ဆုံးဖြတ်ချက်မျိုးကို ပြန်မရောက်စေရန် ကြိုးစားတတ်သည်။ သူနှင့် အစည်းအဝေးတက်သူတိုင်းက သူခိုင်းသည်ကို ဘာကြောင့်လုပ်ရမည်၊ မည်သို့ လုပ်ဆောင်ရမည်ကို သဘောပေါက်သွားအောင် သူကခိုင်းတတ်သည်။ တစ်ချိန်တည်းမှာပင် မည်သို့အကောင်အထည်ဖော်ရမည်ကိုပါ သူတို့ အသေးစိတ်တွေးပြီးသား ဖြစ်ကောင်းဖြစ်နိုင်သည်။ 

“ကျွန်တော်ကတော့ အိုင်ကျူမြင့်တာတွေဘာတွေ သိပ်လက်မခံဘူး။ အောင်မြင်ဖို့ဆိုတာ ဘယ်လိုလုပ်ရမလဲလို့ ခင်ဗျားမှာ ရွေးချယ်ပိုင်ခွင့်တွေရှိရမယ်။ ပိုပြီးတော့ ကျယ်ပြန့်စွာ တွေးနိုင်စွမ်းရှိရမယ်”

ယင်းသည် သူ့ခံယူချက်ဖြစ်သည်။ သူက မည်သူ့ကိုမဆို ဖိအားပေးကောင်းပေးမည်။ သူပေးသည့်ဖိအားမှာ သူလမ်းကြောင်း ချပေးခြင်းဖြစ်သည်။ လမ်းကြောင်းပေါ်ရောက်ရန် သူအော်ကောင်းအော်မည်။ သို့သော် လွတ်လပ်စွာ ဖော်ထုတ်နိုင်သည်။ သူလိုချင်သည်က ရလဒ်သာဖြစ်သည်။ ထို့ကြောင့် သူက -

“လာမည့်ရာစုနှစ်တွင် လိုအပ်သည့်ခေါင်းဆောင်မျိုးဆိုသည်မှာ အခြားသူများကို လုပ်ပိုင်ခွင့်ပေးနိုင်သည့် ခေါင်းဆောင်မျိုးများသာ ဖြစ်သည်”ဟု ဆိုသည်။ 

ထို့ကြောင့်လည်း သူက လမ်းညွှန်ချက်ကို တစ်ခါတည်းချပေးသည်။

“တကယ်လို့ ခင်ဗျားတို့က ပြဿနာကို ချပြထားနိုင်မှ၊ အဲဒီပြဿနာကို ဘယ်လို ကျော်လွှားနိုင်တယ်ဆိုတာ ချပြထားနိုင်မှ သူတို့က ဘယ်လိုလုပ်ရမယ်ဆိုတာ သိမှာပေါ့”

သူပြောသည့်စကားက ရှင်းသည်။ ခေါင်းဆောင်ကောင်းတစ်ယောက်သည် ကြိုတင်တွက်ဆထားနိုင်စွမ်း ရှိရမည်။ ကိုယ်ဖြစ်ချင်သည့်အရာမှာ စင်းလုံးချောဖြစ်ချင်မှဖြစ်မည်။ ပြီးချင်မှပြီးမည်။ သို့သော် ကိုယ်က မည်သို့လုပ်လိုက်လျှင် ပြီးနိုင်ကြောင်း သူတို့ထက်ပိုပြီး တွက်ဆနိုင်မှ သူတို့ခေါင်းဆောင်ဖြစ်မည်။ 

“ကျွန်တော် ကလေးဘဝတုန်းက အိပ်မက်တွေ အများကြီးရှိခဲ့တာပေါ့။ အဲဒီအိပ်မက်တွေကို အကောင်အထည်ဖော်ဖို့ဆိုတာ ကျွန်တော်အများကြီး သိမှဖြစ်မယ်ဆိုတာ သဘောပေါက်လာတယ်။ ဒါကြောင့် ကျွန်တော် စာတွေ အများကြီးဖတ်ရတယ်”

သူ့ခေါင်းဆောင်နိုင်စွမ်းကို သူက တစ်ခါတည်း ထုတ်ဖော်သွားခြင်းဖြစ်သည်။ ခေါင်းဆောင်လုပ်ချင်သူတစ်ဦးသည်။ မိမိနောက်လိုက်များထက်ပိုပြီး တတ်သိနားလည်သူ ဖြစ်နေရမည်။ ထိုသို့ဖြစ်ရန်အတွက် အသိပညာ ဗဟုသုတကို စာဖတ်ခြင်းဖြင့်ရှာရန်မှတစ်ပါး အခြားမရှိ။ သူသည် မောက်မာသူဖြစ်ကောင်းဖြစ်နိုင်သည်။ သူမောက်မာနေရခြင်းမှာ သူသည် ခေါင်းဆောင်နေရာရလာခြင်းကြောင့်ဖြစ်သည်။ သူ ထိုနေရာရောက်လာရန် အများကြီး လေ့လာဖတ်မှတ်လေ့ကျင့်ခဲ့ရသည်။ ထို့ကြောင့် သူက ခေါင်းဆောင်ဖြစ်ချင်လျှင် ခေါင်းဆောင်နိုင်သည့် အရည်အချင်းရှိအောင် ဦးစွာလုပ်ခိုင်းသည်။

  • TAGS