News

POST TYPE

TIP

ဘီလ်ဂိတ်စ် (Bill Gates) ခန့်မှန်းသည့် အနာဂတ်
17-Mar-2018 tagged as



ကမ္ဘာကျော်သူဌေးကြီး ဘီလ်ဂိတ် (Bill Gates) သည် မျက်မှောက်ဘဝတွင် နေထိုင်သူဖြစ်သော်လည်း သူ့ဦးနှောက်ကတော့ အနာဂတ်တွင် ရောက်နေသူဖြစ်သည်။ ဘီလီယံကြွယ်သူဌေးကြီးနှင့် အလှူအတန်းရက်ရောသူတစ်ဦးလည်းဖြစ်နေသူက ကွန်ပျူတာလောက၊ ပြည်သူ့ကျန်းမာရေးနှင့် သဘာဝပတ်ဝန်းကျင်များအကြောင်းကို ခန့်မှန်းပြောဆိုမှုများသည် အလွန်စိတ်ဝင်စားစရာ ကောင်းလှသည်။

သူက စမတ်ဖုန်းနှင့် ဆိုရှယ်မီဒီယာတို့ ခေတ်စားလာမည့်ကို ကြိုတင်ပြောခဲ့ပြီး သူပြောသည့်အတိုင်း ဖြစ်လာခဲ့သည်ပင်။ သူက နောက်တစ်ခု ခန့်မှန်းပြောလိုက်သေးသည်။

“ဇီဝလက်နက်များနှင့် အကြမ်းဖက်မှုကြောင့် တစ်နှစ်အတွင်း လူသားမျိုးနွယ် ၃၃ သန်းခန့် အသက်ပျောက်သွားနိုင်သည်”ဟု ဆိုပြန်သည်။

၂၀၁၇ ခုနှစ် ဖေဖော်ဝါရီလက ဂျာမနီနိုင်ငံ မြူးနစ်တွင်ကျင်းပသော ညီလာခံတွင်သူက အကြမ်းဖက်သမားများ ဇီဝလက်နက်များ ကိုင်ဆောင်ထားပြီး လေထုထဲတွင် ရောဂါဖြစ်စေတတ်သော ပိုးမွှားများကို ပြန့်ပွားစေရန် စီစဉ်ပြီး အဖျက်လုပ်ငန်းများကို လုပ်တော့မည်ဟု သတိပေးထားသည်။ ကျောက်ရောဂါဖြစ်စေသည့် ဗိုင်းရပ်စ်များ သို့မဟုတ် တုပ်ကွေးဖြစ်စေနိုင်သည့် ဗိုင်းရပ်စ်များကိုဖြန့်ပြီး လူသားတို့အသက်အန္တရာယ်ကို ခြိမ်းခြောက်နိုင်ကြောင်း သူက သတိပေးထားသည်။ သူက လာမည့် ၁၀ နှစ်မှ ၁၅ နှစ်အတွင်း ဗိုင်းရပ်စ်များဖြင့် တိုက်ခိုက်ခြင်းများ ဖြစ်လာနိုင်ကြောင်း ပြောကြားသည်။

ဂိတ်က ဖောင်ဒေးရှင်းတစ်ခုထောင်ပြီး ကာကွယ်ဆေးများကို သုတေသနပြုကာ ထုတ်လုပ်နေသည်။ သူအဘယ်ကြောင့် ကြိုတင်ကာကွယ်ဆေးတွေထုတ်ပြီး အသင့်ပြင်နေရသနည်းဆိုသည်မှာ ရှင်းပါသည်။ အနာဂတ်ကို သူစိတ်မချသောကြောင့်ဖြစ်သည်။ 

၂၀၁၅ ခုနှစ်ကလည်း ဂိတ်စ်သည် ဆောင်းပါးတစ်ပုဒ်ရေးဖူးသည်။ သူက အာဖရိကကို ထောက်ပံ့ခြင်းထက် အစားအစာများ ထုတ်လုပ်နိုင်ရန် ကြံဆောင်ပေးနိုင်ခြင်းက ပိုပြီး အကျိုးရှိမည်ဟု ဆိုထားသည်။ လာမည့် ၂၀၃၀ ပြည့်နှစ်ခန့်တွင် အာဖရိကသည် လယ်ယာလုပ်ငန်းမှ ထုတ်ကုန် ၅၀ ရာခိုင်နှုန်းခန့် ထုတ်လုပ်နိုင်တော့မည်ဟု သူက ဆိုသည်။ ထိုပမာဏသည် တစ်တိုက်လုံး လုံလောက်စွာ စားသောက်နိုင်သည့် ပမာဏလည်းဖြစ်သည်။ 

လက်ရှိအနေအထားတွင် အာဖရိကတိုက်သို့ အစားအစာများ ဒေါ်လာ ဘီလီယံ ၅၀ ဖိုးခန့် နှစ်စဉ်တင်သွင်းနေရသည်။ ထိုအနေအထားတွင် အာဖရိကတိုက်၏ ၇၀ ရာခိုင်နှုန်းသော ပြည်သူတို့မှာ တောင်သူလယ်သမားများဖြစ်ကြသည်။

“လာမယ့် ၁၅ နှစ်လောက်ဆိုရင် လယ်ယာကဏ္ဍ တီထွင်ပြုပြင်ပြောင်းလဲမှုတွေကြောင့် ကံကြမ္မာအခွင့်မသာသေးတဲ့ သူတို့ဘဝတွေဟာ ပြောင်းလဲသွားနိုင်ပါတယ်။ ကမ္ဘာကြီးမှာ အစွမ်းထက်တဲ့ ဓာတ်မြေဩဇာတွေ၊ သီးနှံမျိုးစေ့တွေ တီထွင်နေကြတာဖြစ်လို့ ပိုပြီးတော့ ထုတ်လုပ်အားတွေ ကောင်းလာတော့မှာပါ။ ခုဆိုရင် အာဟာရပြည့်ဝတဲ့၊ မိုးခေါင်ရေရှားဒဏ်ကို ခံနိုင်တဲ့၊ ရာသီဥတုဒဏ်ကို ကောင်းကောင်းခံနိုင်တဲ့ သီးနှံမျိုးတွေလည်း တီထွင်ထားနိုင်ပါပြီ။ နည်းပညာတွေနဲ့ ပေါင်းစပ်လိုက်မယ်ဆိုရင် သူတို့ လက်ရှိထုတ်လုပ်နေတာထက် နှစ်ဆတိုးပြီး ထုတ်လုပ်နိုင်တော့မှာဖြစ်ပါတယ်”ဟု သူက ဆိုသည်။

ထို့ပြင် ဂိတ်က “မိုဘိုင်းလ်ဘဏ်စနစ်တွေက ဆင်းရဲသားတွေရဲ့ဘဝကို ကောင်းစွာ အထောက်အကူဖြစ်စေနိုင်ပါလိမ့်မယ်”ဟုလည်း ခန့်မှန်းထားပါသေးသည်။

အာဖရိကတိုက်တွင်နေထိုင်သူများသည် ကျန်းမာရေး၊ အစားအစာ၊ ပညာရေးနှင့် ပြုပြင်စရိတ်များအတွက် ငွေပေးချေရသည့်အလုပ်များမှာ အလွန်ခက်ခဲသည်။ ထိုသို့ခက်ခဲရခြင်းမှာ အာဖရိကနိုင်ငံများအတွင်း ဘဏ်များထူထောင်ရခြင်း၏ အခက်အခဲများကြောင့်လည်းပါသည်။ အာဖရိကသားတွေ မြို့တက်ပြီး ငွေစုရေးဆိုသည်မှာ မလွယ်ကူသောကြောင့် ဘဏ်ကိုလည်း စိတ်မဝင်စားကြပေ။

အာဖရိကတိုက် ကင်ညာနှင့် ယူဂန်ဒါနိုင်ငံများတွင် M-PESA ဆိုသည့် အွန်လိုင်းကတစ်ဆင့် ငွေလွှဲပေးနိုင်သော စနစ်တစ်ခုကို တီထွင်လိုက်သည်။ ဒစ်ဂျစ်တယ်ဘဏ်စနစ်ကြောင့် ငွေလွှဲရ ငွေထုတ်ရ လွယ်ကူကြောင်း သိလာသည့်အခါတွေ ဘဏ်တွေကို အားကိုးလာကြသည်။ ငွေတွေစုလာကြသည်။

“လာမယ့် ၂၀၃၀ ပြည့်နှစ်လောက်ဆိုရင် အာဖရိကသား ၂ ဘီလီယံလောက်ဟာ သူတို့ ဖုန်းတွေနဲ့ ငွေလွှဲငွေထုတ်တာတွေ လုပ်လာကြတော့မှာပါ။ မိုဘိုင်းလ်ငွေလွှဲစနစ်တွေက လွယ်ကူကြောင်းနဲ့ အတိုးတွေ ကောင်းကောင်းပေးရင် သူတို့ဒီဘက်ကို ရောက်လာကြမှာပါ”ဟု ဂိတ်က ခန့်မှန်းခဲ့သည်။

ထို့ပြင် ဂိတ်က လာမည့် ၂၀၃၅ ခုနှစ်တွင် ကမ္ဘာပေါ်၌ ဆင်းရဲသည့် နိုင်ငံမရှိနိုင်တော့ကြောင်းလည်း ကြိုတင်ခန့်မှန်းထားသည်။ ၂၀၁၄ ခုနှစ်သူ၏ နှစ်ပတ်လည်စာတွင်ဂိတ်က “နိုင်ငံအများစုသည် အလယ်အလတ်ဝင်ငွေများရှိလာကာ ပိုပြီးချမ်းသာလာနိုင်ပါသည်”ဟု ဆိုထားသည်။ အဘယ်ကြောင့်နည်းဆိုသော် ရောဂါမဖြစ်ပွားစေနိုင်သည့် ကာကွယ်ဆေးများ တီထွင်နိုင်ခြင်း၊ မျိုးစေ့များ ပိုမိုကောင်းမွန်လာခြင်းနှင့် ဒစ်ဂျစ်တယ်တော်လှန်ရေးကို အောင်မြင်စွာ ဆင်နွှဲနိုင်ခဲ့ခြင်းတို့ကြောင့်ဟု ဆိုထားသည်။ 

၂၀၁၆ ခုနှစ်က ဂိတ်သည် လာမည့် ၂၀၃၀ ပြည့်နှစ်တွင် ကမ္ဘာကြီးသည် သဘာဝပတ်ဝန်းကျင်ကို သန့်စင်စေသည့် စွမ်းအင်များစွာ ထုတ်လာနိုင်ပြီး လျှပ်စစ်ဓာတ်အားများကို လုံလောက်စွာ သုံးစွဲနိုင်မည်ဟု ခန့်မှန်းထားသည်။ 

“ကျွန်တော်တို့ ယနေ့ရင်ဆိုင်နေရတဲ့ စိန်ခေါ်မှုတွေက အရမ်းများတယ်။ လူတွေ ထင်ထားတာထက်လည်း ပိုပြီးကြီးတယ်။ ကျွန်တော်ရောက်ခဲ့တဲ့ နိုင်ငံတွေမှာဆိုရင် ရေပေးဝေရေးစနစ်မရှိဘူး။ လျှပ်စစ်မီးတွေ မရှိဘူး။ ညဆိုရင် အမှောင်ထဲမှာနေကြရတော့ မဖွံ့ဖြိုးတော့ဘူးပေါ့။ သူတို့ကို ရေမီးလုံလောက်အောင်ပေးပြီး ဖွံ့ဖြိုးရေး လမ်းဖွင့်ပေးလိုက်ရင် ပိုပြီးတိုးတက်လာလိမ့်မယ်”ဟု ထောက်ပြခဲ့သည်။ 

ဂိတ်က လာမည့် နှစ်ပေါင်း ၂၀ အတွင်း လူသားလုပ်သားများနေရာတွင် စက်ရုပ်လုပ်သားများကို အစားထိုးခိုင်းလာတော့မည်ဟုလည်း ခန့်မှန်းထားပါသေးသည်။ သူက -

“ပြောင်းလဲမှုတွေက ချက်ချင်းကြီးဆိုသလို ဖြစ်လာတော့မှာ၊ လူတွေနေရာကို စက်တွေဝင်လာရင် ဘာလုပ်မလဲဆိုတာ စဉ်းစားထားဖို့လိုမယ်”ဟု သူက ဆိုသည်။ အားလုံး တွေးဆထားစရာများဖြစ်သည်။

  • TAGS