News

POST TYPE

TIP

အမေရိကန် ကျောင်းသားဗီဇာ
03-Mar-2018



လွန်ခဲ့သည့် ဆယ်စုနှစ်ဝန်းကျင်ကတော့ မြန်မာကျောင်းသားများ အမေရိကန်ကျောင်းသားဗီဇာရဖို့ဆိုလျှင် နည်းနည်းမျက်ခုံးလှုပ်ရသည်။ ဗီဇာရရှိမှုကလည်း သုံးခွက်တစ်ခွက်တင်သာ။

မြန်မာ့နိုင်ငံရေးစနစ်ကြောင့် ကျောင်းသားဗီဇာ တင်းကျပ်ခံရမှုအပိုင်းတွင် ပါကစ္စတန်ပြီးလျှင် ဒုတိယနိုင်ငံများစာရင်း၌ မြန်မာပါသည်ဟုဆိုနိုင်မည်။ သို့သော် . . .

ယခုအခါ အမေရိကန်ပြည်ထောင်စုသို့ ပညာသင်သွားသူ မြန်မာကျောင်းသား ရာနှင့်ချီရှိနေပြီ။ မြန်မာကျောင်းသားများနှင့် အမေရိကန်တက္ကသိုလ်များလည်း ရေအိုးနှင့်ရေမှုတ်ပင် ဖြစ်နေပါသည်။ 

အမေရိကန်ပြည်ထောင်စုသို့ ကျောင်းတက်မည့်သူများအနေနှင့် ကျောင်းသားဗီဇာ F 1 လျှောက်ထားရာတွင် သတိပြုစရာများရှိပါသည်။

ကျောင်းသွားတက်ရန် F 1 ဗီဇာလျှောက်ရာတွင် အဓိကအားဖြင့် ပညာသင်သွားပြီး ပြန်လာရန်သေချာသည့် ကျောင်းသားများကိုသာ သံရုံးအနေနှင့် ခွင့်ပြုလိုသည်။ 

သို့မဟုတ်ဘဲ ကျောင်းသွားတက်မည်ဆိုကာ အလုပ်လုပ်သွားလျှင်၊ အပြီးနေထိုင်သွားလျှင် ဗီဇာလျှောက်ထားမှုကို သံရုံးက တင်းကျပ်လာနိုင်သည်။

ကျောင်းသားဗီဇာဖြင့် ပညာသင်သွားသည့်အခါ အမေရိကန်တွင် အပြင်အလုပ်ကို လုပ်ခွင့်မရှိပါ။ တက္ကသိုလ် (ကျောင်းတွင်း) On-Compus ၌သာ ကျောင်းညွှန်ကြားမှုအောက်မှာပဲ အလုပ်လုပ်ခွင့်ရသည်။

အချိန်ပိုင်းအလုပ်လုပ်လိုသော ကျောင်းသားများသည် တစ်ပတ်လျှင် နာရီ ၂၀၊ ကျောင်းပိတ်ရက်ဆိုလျှင် နာရီ ၄၀ အချိန်ပြည့်အလုပ်လုပ်ခွင့်ရှိသည်။

ယေဘုယျအားဖြင့် အချက်အလက်များ ပြည့်စုံမှန်ကန်သည့်အပြင် ပညာသင်ယူရန်သာ သွားရောက်သည်၊ ပြန်လာပြီးလျှင် ကောင်းကောင်းမွန်မွန် အလုပ်လုပ်ကိုင်မည်ကို အင်တာဗျူးတွင် ပြတ်ပြတ်သားသားဖြေခဲ့လျှင် ကျောင်းသားဗီဇာရရန် စိုးရိမ်စရာမရှိပါ။

I - 20 Form သို့မဟုတ် ဝင်ခွင့်ခေါ်စာ

မိမိတက်လိုသည့် အမေရိကန်အစိုးရ အသိအမှတ်ပြုတက္ကသိုလ်တစ်ခုခုသို့ ဝင်ခွင့်လျှောက်ထားရမည်။ တက္ကသိုလ်က လက်ခံလျှင် ဝင်ခွင့်ခေါ်စာ (I - 20 Form) ကို လျှောက်ထားသူထံ ပြန်ပို့ပေးသည်။

များသောအားဖြင့် ခေါ်စာကို ကျောင်းမဖွင့်မီ တစ်လခန့်သာကြို၍ ပို့ပေးလေ့ရှိသည်။ ဥပမာ - မိမိတက်မည့်အတန်းက ဩဂုတ်လဆန်းဖွင့်မည်ဆိုလျှင် ဝင်ခွင့်ခေါ်စာကို ဇွန်လကုန် သို့မဟုတ် ဇူလိုင်လဆန်း ပို့ပေးလေ့ရှိသည်။

ဝင်ခွင့်ခေါ်စာတွင် SEVIS ID ခေါ် တက္ကသိုလ်မှတ်ပုံတင်အမှတ်ပါ (ဂဏန်းအက္ခရာ ၉ လုံးပါလေ့ရှိ) ရှိသည်။

ထိုစာတွင် ဝင်ခွင့်လျှောက်သူ၏ အချက်အလက်များ၊ တက္ကသိုလ်၏ အချက်အလက်များ၊ ပညာသင်ယူရေးအစီအစဉ်၊ တစ်နှစ်ကုန်ကျစရိတ်၊ တက္ကသိုလ်တာဝန်ရှိသူ၏ လက်မှတ်တို့လည်းပါသည်။ ခေါ်စာရလျှင် ရသည့်နေ့စွဲ၊ လက်မှတ်ထိုးထားရမည်။

ဝင်ခွင့်ခေါ်စာ (I - 20 Form) ရလျှင် ကျောင်းသားဗီဇာအတွက် တံခါးခေါက်နိုင်ပါပြီ။

Ds - 160 Form လျှောက်ခြင်းနှင့် အင်တာဗျူးတောင်းခြင်း

ခေါ်စာရပြီးလျှင် DS - 160 Form ကို အွန်လိုင်းမှတစ်ဆင့် ဖြည့်ရပါမည်။ ယင်းလျှောက်လွှာတွင် ကိုယ်ရေးအချက်အလက်၊ တက္ကသိုလ်၊ အထူးပြုဘာသာရပ်ဆိုင်ရာ အချက်အလက်များ၊ လုံခြုံရေးဆိုင်ရာနှင့်ပတ်သက်သည့် မေးခွန်းအချို့ စသည့်မေးခွန်းများ ဖြည့်စွက်ဖြေဆိုပေးရမည်။ ထိုသို့ဖြည့်ရာတွင် မှန်မှန်ကန်ကန်ဖြေရန် အရေးကြီးသည်။

ရည်ရွယ်ချက်ရှိရှိ လိမ်ညာလိုသည့် သဘောမပါသော်လည်း လိမ်ညာသည်ဟုယူဆရသော၊ သံသယဖြစ်စေသော၊ သဘောသက်ရောက်သော အမှားများဖြစ်လာပါက ကျောင်းသားဗီဇာ လျှောက်ထားခွင့် ရာသက်ပန်ပိတ်ထားခံရနိုင်သည်။ ထို့ကြောင့် မတော်တဆဖြစ်စေ မမှားရန်နှင့် ရိုးသားရန် အရေးကြီးခြင်းဖြစ်သည်။

ထို့ပြင် SEVIS fee အတွက် အမေရိကန် ဒေါ်လာ ၂၀၀ ကို အွန်လိုင်းမှတစ်ဆင့် ပေးရပါမည်။ ဖြည့်ပြီးသော DS - 160 Form နှင့် ငွေသွင်းပြေစာ (SEVIS fee receipt) တို့ကို အနည်းဆုံး နှစ်ရွက်စီ ပရင့် (Print) ထုတ်ထားသင့်သည်။

လျှောက်လွှာဖြည့်ပြီး အင်တာဗျူးရက်ကို အွန်လိုင်းမှ ကြိုရွေးချယ်ရမည်။ ထို့နောက် အင်တာဗျူးရက်မတိုင်မီ သီတင်းတစ်ပတ်ကြို၍ ရန်ကုန်မြို့ရှိ မြန်မာနိုင်ငံဆိုင်ရာ အမေရိကန်သံရုံးသို့ စာအိတ်ပို့ထားရမည်။

ထိုစာအိတ်တွင် ဝင်ခွင့်ခေါ်စာ (I - 20 Form)၊ DS- 160 Confirmation Sheet, ငွေသွင်းပြေစာ (SEVIS fee receipt)၊ ပတ်စ်ပို့ပုံ (နှစ်လက်မ ပတ်လည်၊ နောက်ခံအဖြူ၊ မျက်မှန်တပ်မထားရ) နှင့် ပတ်စ်ပို့တို့ကို ထည့်ပေးရမည်။ 

ထို့ပြင် ဝင်ခွင့်ခေါ်စာတွင်ပါသည့် တစ်နှစ်စာကျောင်းစရိတ်ကို မိမိကိုယ်တိုင် သို့မဟုတ် မိဘက အကုန်ခံလျှင် ထိုငွေကြေးအမှန်တကယ်ရှိကြောင်း ဘဏ်စာအုပ်နှင့် တွဲ၍တင်ပြရမည်။

မိဘမဟုတ်သော ဆွေမျိုးတစ်ဦးဦးက ထောက်ပံ့လျှင် ထပ်ဆောင်းလျှောက်လွှာတစ်ခု (Sponsor Commitment) ကိုလည်း ဖြည့်ရပါလိမ့်မည်။ ဘာကြောင့်ထောက်ပံ့သည်၊ တစ်နှစ်မည်မျှထောက်ပံ့မည်ကို ဖြေကြားရပြီး I - 20 Form တွင်ပါသည့် တစ်နှစ်စာ ကျောင်းစရိတ်ပြနိုင်လျှင် ရပြီဖြစ်သည်။

အချက်အလက်မှန်လျှင် ကျောင်းသားဗီဇာရရန် ၅၀ ရာခိုင်နှုန်း သေချာသလောက်ရှိပြီဖြစ်သည်။

အင်တာဗျူးသွားသည့်အခါ အထက်ပါစာရွက်စာတမ်းများအပြင် လိုရမည်ရ အခွန်ပြေစာ၊ ပညာရေးမှတ်တမ်း၊ TOEFL PBT 520 အနည်းဆုံးရရှိထားသည်ကို သက်သေခံသည့်စာတမ်းများလည်း ယူသွားသင့်သည်။ 

အင်တာဗျူးသွားဖြေရာတွင် အင်တာဗျူးကြေး ဒေါ်လာ ၁၆၀ သံရုံးကို ပေးသွင်းရပါမည်။ ငွေသွင်းပြေစာကိုယူပြီး အင်တာဗျူးဖြေဆိုရပါတော့မည်။ များသောအားဖြင့် အင်တာဗျူးကို နံနက်ခင်းပိုင်းလုပ်လေ့ရှိသည်။

အင်တာဗျူးရာတွင် များသောအားဖြင့် အမေရိကန်သို့ ဘာကြောင့်သွားသည်၊ ဘာပညာရပ်သင်ယူမည်ကို မေးလေ့ရှိသည်။ အမေရိကန်ပြည်ထောင်စုသို့ ပညာသင်ရန်သာ သွားခြင်းဖြစ်ကြောင်းကို သေသေချာချာ ပြန်ဖြေသင့်သည်။ 

အခြားသော မလိုအပ်သေးသည့်အကြောင်းအရာများ၊ အဓိပ္ပာယ်နှစ်ခွဖြစ်စေမည့်၊ သံသယဖြစ်စေမည့် အဖြေများမပေးမိရန် သတိပြုသင့်သည်။

အင်တာဗျူးပြီးလျှင် ဗီဇာ ရ၊ မရ တစ်ခါတည်း အဖြေပေးလေ့ရှိသည်။ ရလျှင်ပတ်စ်ပို့မှလွဲ၍ ကျန်စာရွက်စာတမ်းများ သံရုံးကပြန်ပေးလိုက်သည်။ ဗီဇာနှင့်ပတ်စ်ပို့ ဘယ်ရက်ပြန်လာယူရမည်ကို အကြောင်းကြားသည်။

ငြင်းပယ်ခံရလျှင် ကျန်စာရွက်များနှင့်အတူ ပတ်စ်ပို့ကိုပါ တစ်ခါတည်းပြန်ပေးလိုက်ပြီး ငြင်းပယ်ခံရကြောင်း အသိပေးလိုက်လေ့ရှိသည်။ 

ငြင်းပယ်ခံရကြောင်း တစ်ခါတည်းအသိမပေးလိုက်ဘဲ ပတ်စ်ပို့ကိုသာပြန်ပေးလျှင် ကျောင်းသားဗီဇာ ရနိုင်ခြေရှိနေပါသေးသည်။

အချက်အလက်များ မှန်ကန်စွာဖြည့်ခဲ့လျှင်၊ အင်တာဗျူးတွင် ကျောင်းတက်ရန်သာ သေသေချာချာဖြေလျှင် ကျောင်းသားဗီဇာရရန် သေချာသလောက်ရှိပြီဖြစ်သည်။ 

ကျောင်းသားဗီဇာထုတ်ပေးရန် ယေဘုယျအားဖြင့် ကျောင်းဝင်ခွင့်ခေါ်စာ (I - 20 Form) ပါ အချက်များ၊ DS - 160 Form ပါ မိမိဖြည့်စွက်ထားသည့်အချက်များ၊ ပတ်စ်ပို့ပါအချက်များကို တိုက်ဆိုင်စစ်ဆေးလေ့ရှိသည်။

ကျောင်းသားဗီဇာရပြီး - သတိပြုစရာ

ဗီဇာရပြီးလျှင် မိမိတက်မည့်တက္ကသိုလ် ကျောင်းဖွင့်ချိန်ထက် ၃၀ ရက်ထက်ပို၍ ကြိုမသွားရပါ။ 

ကျောင်းသားတစ်ဦး ကျောင်းတက်ရန် ရက် ၃၀ စောလာလျှင် လုံလောက်ပြီဟု သူတို့က သဘောထားရှိဟန်တူသည်။ အကယ်၍ ၃၀ ရက်ထက်ကျော်ပြီး ဥပမာ - ရက် ၄၀ ကြိုသွားလျှင် ပိုနေသည့် ၁၀ ရက် အတွက် အလည်အပတ်ဗီဇာ လုပ်ရမည်ဖြစ်သည်။

ထိုအခါ လုပ်ငန်းစဉ်အဆင့်ဆင့်ကြာပြီး ဗီဇာနှစ်မျိုးဖြစ်နေပါမည်။ ဗီဇာနှစ်မျိုးဖြစ်လျှင် အမေရိကန်သို့အရောက် လူဝင်မှုကြီးကြပ်ရေး၏ သံသယစစ်ဆေးခံရပြီး စိတ်အနှောင့်အယှက်ဖြစ်စရာများနှင့် နောက်ဆက်တွဲမလိုလားအပ်သည့် ကိစ္စများ ပါလာတတ်သည်။

အဓိကအရေးကြီးသည်မှာ အမေရိကန် ပြည်ထောင်စုသို့သွားရောက်ပညာသင်ယူလျှင် မူလရည်ရွယ်ချက်ဖြစ်သည့် ပညာသင်ယူရေးကိုသာ အာရုံစိုက်သင့်သည်။ 

ကျောင်းသားဗီဇာကို အခြားတစ်ခုခုအတွက် အသုံးချလျှင် မြန်မာပြည်တွင် ကျန်နေသေးသည့် ကျောင်းသားများ ဗီဇာလျှောက်ထားမှု ပိုတင်းကျပ်လာနိုင်သည်။

ကျန်ကျောင်းသားများအတွက် ယုံကြည်မှုလျော့ကျပြီး ထိခိုက်စေပါလိမ့်မည်။

(ကျောင်းသားဗီဇာနှင့် ပတ်သက်သည့် အချက်အလက်များ၊ အကြံပြုချက်များကို Connect University တည်ထောင်သူ ဦးအောင်ဖုန်းမြင့်နှင့် ယင်းတက္ကသိုလ်မှ ကျောင်းသားဗီဇာအကြောင်း အတွေ့အကြုံရှိသူနှစ်ဦးက ကူညီဖြေဆိုထားခြင်းဖြစ်သည်။)

နေဇာကျော်