News

POST TYPE

TIP

အမှားကိုပြင် အမှန်ကိုဆင်ခြင်တိုးတက်ခဲ့သူ အီရန်မေးနား (Ian Millner)
30-Dec-2017
“မစွန့်စားရင် ဘယ်နေရာမှ မရောက်ဘူး”

“ကျွန်တော်က နှစ်တိုင်း ကိုယ့်ကိုယ်ကိုယ် ပြန်ပြီးသုံးသပ်တာ လုပ်တယ်။ ဒီနှစ်အကောင်းဆုံး ဘာတွေလုပ်ပြီးပြီလဲပေါ့။ အတိုင်းအတာတစ်ခုအထိ ကျေနပ်မှု၊ အမြင်ရှင်းလင်းမှု၊ အကောင်းဆုံး အနေအထားတစ်ခုအထိ ကြိုးစားလုပ်ဆောင်နိုင်ခြင်း ရှိ၊ မရှိ ဆိုတာတွေကို သုံးသပ်တယ်။ တစ်ခုခုလိုနေပြီဆိုရင် ကျွန်တော် ဘာလိုနေပြီလဲဆိုတာကို သူများတွေဆီက ပြောတာကြားရအောင် ပြန်လုပ်တယ်” 

အထက်ပါစကားကို ပြောသွားသူမှာ လန်ဒန်အခြေစိုက် တီထွင်ဖန်တီးမှု အေဂျင်စီတစ်ခုကို ထူထောင်ထားသည့် အိုင်ယာလန်မှ အီရန်မေးနားဆိုသူက ပြောကြားခြင်းဖြစ်သည်။ 

သူ့ကို အိုင်ယာလန်နိုင်ငံမြောက်ပိုင်းတွင် မွေးဖွားသည်။ Massey နှင့် Linciln တက္ကသိုလ်တို့တွင် သိပ္ပံနှင့်လူသားရင်းမြစ် စီမံခန့်ခွဲမှုဆိုင်ရာ ပညာရပ်များကို လေ့လာခဲ့သည်။ သူက လူတွေနှင့် မြေယာပြဿနာကို စိတ်ဝင်စားသည်။ မြေယာကို အခြေခံသည့် စီးပွားရေးလုပ်ငန်းများကို လေ့လာပြီး အကြံပေးမှုများပြုလုပ်သည်။

လုပ်ငန်းကို စတင်စတွင် ရှောင်လွှဲမရသည့် အခက်အခဲများကို ကျော်လွှားဖြတ်သန်းရင်းက ယခုဆိုလျှင် သူ့ထံတွင် ဝန်ထမ်း ၂၅၀ ကျော်ကို ခန့်ထားပြီး လုပ်ငန်းများ လုပ်ဆောင်နေသည်။ လန်ဒန်တွင် ရုံးခန်းများတည်ထားရုံမက မန်ချက်စတာမှသည် စင်ကာပူနိုင်ငံအထိ သူ့လုပ်ငန်းများကို ခြေဆန့်နိုင်သော အနေအထားကိုလည်း ရောက်ရှိနေပြီဖြစ်သည်။

“ကျွန်တော်က ကျွန်တော့်ကိုယ်ကျွန်တော် ငြိမ်းချမ်းရေးသမားတစ်ယောက်လို့ မြင်ပါတယ်။ ဘာလုပ်လုပ် အောင်မြင်မှုရဖို့က အရေးကြီးတယ်ဆိုပေမယ့် ကျွန်တော်တို့အနေအထားကို သိပ်ပြီးတော့ အားမရသေးပါဘူး။ ကျွန်တော်က ရှေ့ဆက်ပြီး ဘာလုပ်ရမယ်ဆိုတာကိုပဲ အမြဲတွေးတယ်။ ဒါကြောင့် ကျွန်တော့်ကို ဝန်ထမ်းအချို့က ကြောက်စရာလို့ မြင်ကြပါတယ်”ဟု သူကဆိုသည်။ သူက အမြဲတမ်းအခြေအနေတစ်ခုကို ပြန်လည်ဆန်းစစ်ကာ သုံးသပ်တတ်ခြင်းကြောင့် ဖြစ်သည်။

၁၉၉၉ ခုနှစ်တွင် သူ့လုပ်ငန်းက စတာလင်ပေါင် သန်း ၅၀ အထိ တိုးတက်အောင်မြင်မှု ရလာသည်။ လုပ်ငန်းစစချင်း အောင်မြင်မှုရလိုက်ခြင်းဖြစ်သည်။ လုပ်ငန်းလုပ်ရာတွင် တွေ့ကြုံခဲ့ရသည့် အခက်အခဲများနှင့် ပတ်သက်ပြီး သူက -

“ကျွန်တော် ကြုံတွေ့ခဲ့ရတဲ့ အခက်အခဲဆိုတာတွေကို နောက်ပြန်ကြည့်လိုက်တဲ့အခါ ဘာမှမဟုတ်တော့ဘဲ သေးသေးလေးတွေ ဖြစ်နေတာတွေ့ရတယ်။ တစ်ချိန်က အကြီးကြီးလို့ထင်ခဲ့ပေမယ့် ပြန်တွေးကြည့်လိုက်တော့ ဘာမှမဟုတ်သလိုဖြစ်ပြီး ပိုပြီးတော့ ကြီးမားခဲ့အခက်အခဲတွေ တွေ့ပါစေလို့တောင် ဆုတောင်းမိတယ်။ ကျွန်တော်တို့က ကျွန်တော်တို့ ထူထောင်ထားတဲ့ ငွေကြေးတွေနဲ့ပဲ တိုးတက်အောင် လုပ်ချင်တာပါ” ဟုဆိုသည်။

မေးနား၏အလုပ်မှာ အခြားသော ကုမ္ပဏီများကို သူတို့၏ ဈေးကွက်ထိုးဖောက်ပေးမှုနှင့် ဂုဏ်သတင်းတို့ဖြင့် တိုးမြှင့်ပေးခြင်း ဖြစ်သည်။ သူတို့ ထိုသို့လုပ်ဆောင်နိုင်ရန်အတွက် သူ၏ Ian Millner ဆိုသည့် အမည်ကို ပေါက်အောင်လုပ်ရသည်။ မီဒီယာပေါင်းများစွာကို အသုံးပြုရသည်။ သူ၏ ကြိုးစားမှုကြောင့် ယနေ့ တာဝန်ယူပြီး လုပ်ဆောင်ပေးနေရသည့် ကုမ္ပဏီများထဲတွင်  Manchester United FC, Lego နှင့် Amnesty International တို့လို ထိပ်သီးအဖွဲ့အစည်းကြီးတွေ ပါဝင်နေကြောင်းတွေ့ရမည်။ အစပိုင်းတွင် သူထံ၌ စာရင်းပြစရာ လက်ချိုးရေနိုင်သည့် ပမာဏလောက်သာရှိခဲ့သော်လည်း Ericesson ကဲ့သို့သော ကုမ္ပဏီကြီးက သူ့ထံမှ အတိုင်ပင်ခံအဖြစ် ယူသည်ဆိုကတည်းက ထိုးတက်သွားတော့သည်။

“အစောပိုင်းကတော့ ကျွန်တော်တို့က ဆက်သွယ်ရေးနဲ့ ဈေးကွက်ကို လူငယ်တွေဆီရောက်အောင် တာဝန်ယူရတယ်။ အဲဒီမှာကတည်းက အခြေအနေကောင်းခဲ့ပါတယ်။ နောက်ပိုင်း ကျွန်တော်တို့က ဖောက်သည် သေးသေးလေးတွေကိုလည်း ထိုးဖောက်နိုင်အောင် လုပ်ပေးလာခဲ့ပါတယ်”ဟု ဆိုသည်။

မေးနားက သူ့ကိုဆက်သွယ်သည့် ဖောက်သည်တိုင်းထံတွင် စံတစ်ခုခုကို စွဲပြီးကျန်ခဲ့စေရန် ဖော်ဆောင်ပေးနိုင်ခဲ့သည်။ သူက -

“အရှိန်အဟုန်တစ်ခုရဖို့ဆိုတာ နည်းလမ်းလည်းကျရမယ် ကြိုးစားလည်း လုပ်ရမယ်။ ကျွန်တော်တို့ အရှိန်တစ်ခုရဖို့အတွက် ဆုံးဖြတ်ထားတာက သုတေသနလုပ်ငန်းကို အလေးအနက်ထားပြီး လုပ်ဆောင်ဖို့ပဲဖြစ်ပါတယ်။ ကျွန်တော်တို့က လုပ်ငန်းစပြီဆိုကတည်းက သုတေသန စလုပ်တယ်။ ရရှိတဲ့ အချက်အလက်တွေအပေါ်မှာ အခြေခံပြီးတော့မှာ ဆက်လုပ်တယ်။ အချို့ဖောက်သည်တွေက အဲဒီသဘောတရားကို သဘောမပေါက်ကြဘူး။ အရေးအကြီးဆုံးကို သူတို့သဘောမပေါက်ကြတာ”ဟု ဆိုသည်။

မေးနားသည် အဖွဲ့အစည်းကြီးတစ်ခုလုံးကို သူတစ်ယောက်တည်း မောင်းနှင်၊ သူတစ်ယောက်တည်း ဦးဆောင်နေသည်တော့ မဟုတ်။ သူ့ယခင်က အလုပ်ရှင်လည်းဖြစ် ဆရာလည်းဖြစ်သူကိုလည်း ရှေ့တန်းတင်ထားသည်။ ထို့ပြင် ကုမ္ပဏီမှ စီနီယာမန်နေဂျာကြီးများကိုလည်း သူက လေးစားစွာတိုင်ပင်ပြီး အကြံဉာဏ်များ ရယူတတ်သည်။

“တစ်ခါတစ်ရံမှာ လူတွေဟာ ကိုယ့်ကိုယ်ကိုယ် ယုံကြည်စိတ်နည်းပြီးတော့ ဘာလုပ်လို့ ဘာကိုင်ရမှန်းမသိအောင် ဖြစ်တတ်ပါတယ်။ အဲဒါကတော့ ကိုယ့်ကိုယ်ကိုယ် သတ်မှတ်ထားတဲ့ အတားအဆီးကြီးတစ်ခု ဖြစ်ပါတယ်။ အဲဒီလို လူမျိုးတွေက ဘာဖြစ်လာသလဲဆိုရင် သူတို့လုပ်တာပဲမှန်၊ သူတို့တွေးတာပဲ မှန်တယ်ဆိုပြီး ထင်လာတတ်ကြတယ်”ဟု သူက ပြောပြသည်။

သူက တစ်ကြိမ်တွင် စိတ်ဖိစီးမှုများကြောင့် အမှားများကို လုပ်ဖူးကြောင်း ဝန်ခံသည်။ 

“လုပ်ငန်းတစ်ခု အောင်မြင်အောင် လုပ်ဖို့ဆိုတာ အမှားတော့ လုပ်ဖူးရမှာပဲ။ အမှားကပြန်ပြီး သင်ခန်းစာယူနိုင်ရမယ်။ မစွန့်စားရင် ဘယ်နေရာမှ မရောက်ဘူး”ဟု သူကဆိုသည်။ 


  • VIA