News

POST TYPE

TIP

ငွေသာဘုရင်ဟု ထင်ခဲ့သူ ဆာ စတယ်လို့စ် ဟာဂျီ အီအိုအန်နို (Sir Stelios Haji-Ioannou)
23-Sep-2017 tagged as ငွေ ကုမ္ပဏီ


“တတ်နိုင်သမျှ အမှားနည်းအောင် လုပ်ရမယ်”

ဆာ စတယ်လို့စ် ဟာဂျီ အီအိုအန်နို (Sir Stelios Haji-Ioannou) သည် အသက် ၂၈ နှစ်အရွယ်ကတည်းက (easyJet) ဆိုသည့် ကုမ္ပဏီကို စတင် ထူထောင်ခဲ့သူဖြစ်သည်။ ယခုအခါ သူ ထူထောင်ထားသည့် လေကြောင်းလိုင်းသည် လေယာဉ် အစင်းပေါင်း ၁၅၇ စင်းနှင့် နိုင်ငံပေါင်း ၂၆ နိုင်ငံသို့ ပြေးဆွဲပေးနေကာ လေဆိပ်ပေါင်း ၁၀၁ ခုတွင် သယ်ယူပို့ဆောင်ပေးလျက် ရှိသည်။ ခရီးသည် သန်းပေါင်း များစွာကို သယ်ယူ ပို့ဆောင်ပေးနိုင်ခဲ့သော်လည်း သူ့လောဘက အတော မသတ်နိုင်ခဲ့ပေ။ ထို့ကြောင့် ကုမ္ပဏီခွဲ၊ လုပ်ငန်းခွဲ ပေါင်း ၁၇ ခုကို ထူထောင်ထားပြီး လုပ်ငန်းတိုင်း၏အမည်ရှေ့တွင် (easy) ကို ခံထားလေ့ရှိသည်။

သူ၏ (easyCar) လုပ်ငန်းသည် နိုင်ငံပေါင်း ၆၀ ကျော်တွင် နေရာဒေသပေါင်း ၂၄၀ဝ ၌ ပြေးဆွဲဝန်ဆောင်မှု ပေးနေသည်။ (easyBus) လုပ်ငန်းကို ၂၀ဝ၄ ခုနှစ်၊ ဇူလိုင်လတွင်စတင်ခဲ့ပြီး လန်ဒန်တွင် တန်ဖိုးနည်း အထူးကား သယ်ယူပို့ဆောင်ရေး လုပ်ငန်းအဖြစ် နာမည်ကြီးသည်။ ဂက်ဝစ်ခ်ျ၊ လူတန်နှင့် စတန်းစ်တက်လေဆိပ်မှ လန်ဒန်မြို့လယ်တိုင်အောင် သယ်ယူပို့ဆောင်ရေး လုပ်ငန်းများကို လုပ်ဆောင်ပေးလျက်ရှိသည်။ (easyCruise) လုပ်ငန်းကလည်း မက်ဒီတာရေးနီးယန်းမှသည် ယခု ကရစ်ဘီယန်အထိ ရေကြောင်းသယ်ယူ ပို့ဆောင်ရေး လုပ်ငန်းများကို လုပ်ဆောင်လျက်ရှိသည်။

(easy) ဆိုသည့် စာလုံးကို မြင်လိုက်သည်နှင့် ဈေးသက်သာသည့် လုပ်ငန်းတစ်ခုအဖြစ် မြင်စေရန်နှင့် ထူးခြားသော အရောင်ဖြစ်သည့် တောက်ပသည့် လိမ္မော်ရောင်များကို တန်ဆာဆင်ထားခြင်းကလည်း ထူးခြားသည်ဟု ဆိုရမည်။ စတယ်လို့်စ်သည် (easyCruise) ရေကြောင်းလုပ်ငန်းကို လူငယ်တွေအတွက် အဓိက ဦးတည်ကာ လုပ်ဆောင်သည်။ သင်္ဘောပေါ်တွင် အခန်းတိုင်း သန့်ရှင်းနေပြီး ဝန်ဆောင်မှုကိုလည်း အမျိုးမျိုး ပေးထားသည်။

တန်ဖိုးနည်းပြီး ဝန်ဆောင်မှု ကောင်းကောင်းနှင့် လုပ်ငန်းကို ဖော်ဆောင်နိုင်ခဲ့သဖြင့် သူ့လုပ်ငန်းက တိုးတက်လာသည်။ ဗြိတိန်တွင် ထင်ရှားသည့် လုပ်ငန်းရှင်ကြီးတစ်ဦးအဖြစ် သတ်မှတ်ခံရသည့်အဆင့်ကို ရောက်လာသည်။ 

သူ့ဖခင်ကလည်း ရေကြောင်းသယ်ယူပို့ဆောင်ရေး လုပ်ငန်းတွင် အောင်မြင်ခဲ့သူတစ်ဦးဖြစ်သည်။ စတယ်လို့စ်က သူ ချမ်းသာလာရခြင်းမှာ မျိုးရိုးနှင့် သူ့ဖခင်ကြောင့် မဟုတ်ကြောင်း ထုတ်ဖော် ပြောတတ်သည်။ သူ ချမ်းသာရသည်မှာ ကံတရားကြောင့်သာဖြစ်ကြောင်း ပြောပြသည်။ သူ့အမည်နှင့် အမှတ်တံဆိပ်ကို ပေါက်အောင် လုပ်သည်။ ဝန်ဆောင်မှုကို လက်ခံနိုင်သည်အထိ လုပ်ပေးသည်။ ဈေးသက်သာအောင် ကြံဆောင်ပေးသည်။ သူ့အမှတ်တံဆိပ်ဖြစ်သည့် (easy) ကို တရားဥပဒေနှင့် အကာအကွယ် လုပ်ထားသည်။

အင်တာနက်ထဲတွင်လည်း (easy.com) ဆိုသည့် Website ကို ထူးခြားအောင် လုပ်ထားသည်။ သူ့အမှတ်တံဆိပ်ကို မည်သူမှ ခိုးမသုံးနိုင်အောင် အကာအကွယ်တွေ လုပ်ထားသည်။

“လူတချို့က ထင်ကြတယ်။ ကျွန်တော်တို့ နာမည်ကို ခိုးသုံးလိုက်ရင် ချက်ချင်းပဲ အောင်မြင်သွားမယ်လို့”ဟုဆိုကာ သူ၏အကြံပြု သုံးသတ်ချက်များမှာ စိတ်ဝင်စားစရာ ကောင်းလှပါသည်။ သူက သူများအမည်ကို ခိုးသုံးပြီး ထိုကုမ္ပဏီ၏ ဖောက်သည်နှင့် ဝန်ဆောင်မှုကို စော်ကားခြင်းထက်၊ ကိုယ်ပိုင် ထူထောင်ပြီး လမ်းပေါက်အောင် ဖောက်နိုင်ခြင်းက ပိုကောင်းသည်ဟု ဆိုသည်။ သူက ကုမ္ပဏီ သို့မဟုတ် လုပ်ငန်းတစ်ခုတွင် အမည်က အရေးကြီးပြီး မိမိအမည်ကို အကာအကွယ် လုပ်ထားရန်ကလည်း ပိုအရေးကြီးသည်ဟု ဆိုသည်။ ကိုယ့်အမှတ်တံဆိပ်ကို ပုံမှန် စောင့်ကြည့်ပြီး အကာအကွယ်ပေးခြင်းမှာ မိမိကုမ္ပဏီကို အောင်မြင်စေခြင်းဟု သူက ခံယူထားသည်။ 

(easyGroup) သည် အမှတ်တံဆိပ်ကို တန်ဖိုးထားသည့် ဗျူဟာကို ကျင့်သုံးနေသော ကုမ္ပဏီကြီးတစ်ခုဖြစ်သည်။ သူတို့ ကုမ္ပဏီအနေနှင့် လုပ်ငန်းငယ်လေးများကိုလည်း သင်ခန်းစာတွေ ပေးကာ အကူအညီတွေ ပေးလျက်ရှိသည်။ အောင်မြင်ထင်ရှားသည့် လုပ်ငန်းရှင်လေးများ ဖြစ်လာစေရန် အများကြီး ရည်မှန်းချက်တွေ ထားရန်မလို။ စိတ်ထားကောင်းများဖြင့်သာ စတင်သင့်ကြောင်း သူက နည်းပေးလမ်းပြပြုသည်။ သူတို့ကုမ္ပဏီ၏ ခံယူချက်ကိုက ဥရောပကို ဦးဆောင်နိုင်မှုဖြစ်သည်။ သူ ကုမ္ပဏီ၏ အမှတ်တံဆိပ် အရောင်ဖြစ်သော အဝါရောင်ကို တစ်ကမ္ဘာလုံး လွှမ်းစေရမည်ဆိုသည့် စိတ်ဓာတ်မျိုးဖြင့် သူက လုပ်ဆောင်နေခြင်းဖြစ်သည်။

သူ့လုပ်ငန်းနှင့် ပတ်သက်ပြီး စတယ်လို့စ်က -

“ကျွန်တော့် ဆုံးဖြတ်ချက် ထက်ဝက်လောက်ဟာ ဖြစ်မလာဘူး ဆိုတာသိတယ်။ ဒါကြောင့် တကယ်ဖြစ်လာဖို့ ခင်ဗျား အမှား လုပ်လို့မရဘူး။ တတ်နိုင်သမျှ အမှားနည်းအောင် လုပ်ရမယ်”ဟုဆိုသည်။

သူသည် အလွန်ခေတ်မီသူဖြစ်သည်။ လန်ဒန် School of Economics ကျောင်းဆင်းဖြစ်သည်။ Shipping, Trade and Finance ဘာသာရပ်များနှင့် M.Sc ဘွဲ့ကို လန်ဒန်၊ City University မှ Cass Business School ကျောင်းက ရခဲ့သည်။ ၁၉၈၈ ခုနှစ်တွင် ဖခင်ကုမ္ပဏီတွင် ခေတ္တဝင်လုပ်လိုက်သေးသည်။ ထိုစဉ်က အသက် ၂၅ နှစ်ရှိနေပြီ။ နောက်ပိုင်း သူ့ကိုယ်ပိုင် Stelmar သင်္ဘောလိုင်းကို ထူထောင်ခဲ့သည်။ ၂၀ဝ၁ မှ ၂၀ဝ၅ ခုနှစ်အထိ သင်္ဘောလိုင်းကို ပြေးဆွဲခဲ့ပြီးနောက် OSG Shipping Group သို့ ဒေါ်လာ ၁ ဒသမ ၃ ဘီလီယံနှင့် ရောင်းလိုက်သည်။ 

၂၀ဝ၆ ခုနှစ်တွင် သူ့ကို ဗြိတိန်ဘုရင်မကြီး ကိုယ်တိုင်က စွန့်ဦးလုပ်ငန်းရှင်တစ်ဦးအဖြစ် အသိအမှတ်ပြုခဲ့ရသည်။ ထို့ကြောင့် သူရဲကောင်း (Sir) ဘွဲ့ကို ပေးအပ်ချီးမြှင့်ခြင်းခံရသည်။ ဗြိတိန်မှ စလိုဗေးနီးယားအထိ တိုက်ရိုက်လေကြောင်း ပျံသန်းမှုကို (easyJet) အနေနှင့် လုပ်ဆောင်နိုင်ခဲ့ခြင်းကြောင့် ဘုရင်မကြီးက သူ့ကို ချီးကျူးခဲ့သည်။ 

စတယ်လို့်စ်သည် လှူဒါန်းမှုများ၊ ပညာသင် ထောက်ပံ့ကြေးပေးမှုများကိုလည်း သူကိုယ်တိုင် ထူထောင်ထားသည့် ဖောင်ဒေးရှင်းကတစ်ဆင့် ပြုလုပ်လေ့ရှိသည်။ နှစ်စဉ် London School of Economics နှင့် City University တွင် ဖွင့်လှစ်ထားသော Cass Business School အတွက် ပညာသင်ဆု ၁၀ ဆုပေးလေ့ ရှိသည်။ သူက ဥရောပနှင့် ဗြိတိန်၊ ဂရိ၊ ဆိုက်ပရပ်နိုင်ငံများတွင် လုပ်ငန်းရှင် မျိုးဆက်သစ် လူငယ်များ ပေါ်ထွန်းလာစေရန် အကူအညီပေးနေခြင်းဖြစ်သည်။

၂၀ဝ၇ ခုနှစ်တွင် သူသည် မသန်စွမ်းသူများအတွက် ဆုတစ်ခုဖြစ်သည့် (Disabled Entrepreneur of the Year) ကို ပေးအပ် ချီးမြှင့်ခဲ့သည်။ Leonard Cheshire အဖွဲ့နှင့် ပူးပေါင်းပြီး မသန်စွမ်းသူများကို ချီးမြှောက် ထောက်ပံ့ပေးခြင်းဖြစ်ကာ ဆုရရှိသူကို စတာလင်ပေါင် ၅၀ဝ၀ဝ ပေးအပ်ချီးမြှင့်ခဲ့သည်။ 

စတယ်လို့စ်၏ဝါဒမှ “ငွေသည်ဘုရင်” ဖြစ်သည်။  

“ကုမ္ပဏီတစ်ခုမှာ ငွေက အရေးအကြီးဆုံးပဲ။ ငွေမရှိရင် ဂျွမ်းထိုးမှောက်ခံဖြစ်သွားမှာပေါ့။ ငွေရှိမှ အများကြီး လုပ်နိုင်မယ်” ဟု သူက ဆိုသည်။ 

သူ့အောင်မြင်မှုအတွက် စတယ်လို့်စ်က ပြောသည့်အချက်ထဲတွင် ကြိုးစားခြင်း၊ အမှတ်တံဆိပ်တစ်ခုကို ထူထောင်ခြင်း၊ ဈေးသက်သာအောင်လုပ်ခြင်း၊ ဝန်ဆောင်မှု အကောင်းဆုံးပေးခြင်းတို့သည် အရေးအကြီးဆုံးဖြစ်ကြောင်း ပြောပြသည်။ ထိုအရာအားလုံးသည် လူတစ်ယောက်ကို ကံကောင်းစေခြင်းဖြစ်သည်ဟုလည်း ပြောသည်။