News

POST TYPE

TIP

အားလပ်ချိန်ကို အကောင်းဆုံး ဖြတ်သန်းခြင်း
28-Aug-2017 tagged as အစားအစာ

လူတို့သည် လုပ်ငန်းတာဝန်များကို နေ့စဉ်ရက်ဆက် အချိန်ပြည့် လုပ်ကိုင်နိုင်ကြမည် မဟုတ်ချေ။ အနားယူသင့်သည့် အချိန်တွင် အနားယူကြရသည်။ အိပ်စက်အနားယူခြင်းသည် နောက်တစ်နေ့တွက် အင်အားဖြည့်တင်းခြင်း ဖြစ်သည်။ လူတိုင်းတွင် အားလပ်ချိန်များ ရှိကြသည်။ ဝန်ထမ်းများသည်ပင်လျှင် နေ့စဉ် အားလပ်ချိန်နှင့် ရုံးပိတ်ရက် အားလပ်ရက်များ ရှိသည်။ ကိုယ်ပိုင်စီးပွားရေး လုပ်ငန်းရှင်များသည် အားလပ်ချိန်ကို သတ်သတ်မှတ်မှတ် ထားနိုင်ကြသည်။ အားလပ်ချိန်တွင် အပြည့်အဝ အနားယူသင့်ပေသည်။ သို့မှသာလျှင် ဆောင်ရွက်ဖွယ်ရာများကို အင်ပြည့်အားပြည့် လုပ်ကိုင်ဆောင်ရွက်နိုင်မည် ဖြစ်သည်။

အားလပ်ချိန်ကို ဘယ်လိုဖြတ်သန်းကြမလဲ

လက်လုပ်လက်စားများတွင် အားလပ်ချိန် သီးသန့်မရှိကြပေ။ မည်သို့ပင် ဆိုစေကာမူ လူတို့သည်  အားလပ်ချိန်ကို အမျိုးမျိုးဖြတ်သန်းကြသည်။ အချို့က တီဗီရှေ့တွင် အချိန်ကုန်ကြသည်။ အချို့က ဖုန်းတစ်လုံးဖြင့်အ လုပ်ရှုပ်နေတတ်သည်။ အချို့က မိသားစုနှင့်အတူ ဘုရားသွား၊ ကျောင်းတက်လုပ်ကြသည်။ အချို့က ရုပ်ရှင်ရုံနှင့် ပန်းခြံများသို့ အပန်းဖြေသွားကြသည်။ အချို့က အနီးအနားသို့ ခရီးသွားကြသည်။ မိသားစုများ၊ သူငယ်ချင်းများနှင့်အတူ ကာရာအိုကေ သီချင်းဆိုခြင်းသည်လည်း စိတ်ထွက်ပေါက်ကို ရရှိစေမည် ဖြစ်သည်။ 

အားလပ်ချိန်တွင် အပန်းဖြေခြင်းသည် ပျော်ရွှင်ကြည်နူးမှုကို ရရှိစေမည်မှာ အသေအချာပင် ဖြစ်သည်။ မည်သည့်အရာတွင်မဆို ချင့်ချိန်ဆောင်ရွက်တတ်ဖို့တော့ လိုပါသည်။ အချို့သောသူများသည် အားလပ်ချိန်ကို တလွဲအသုံးချတတ်သည်။ အရက်ဆိုင်၊ ဘီယာဆိုင်နှင့် လက်ဖက်ရည်ဆိုင်တို့တွင် အချိန်ဖြုန်းတတ်ကြသည်။ အချို့က ညဥ့်နက်သန်းခေါင် ဘောလုံးပွဲကြည့်လျက် အားလပ်ချိန်ကို ဖြုန်းတတ်ကြသည်။ အချို့က အနှိပ်ခန်းနှင့် အပျော်မယ်အိမ်များသို့ သွားတတ်ကြသည်။ ထိုသို့ သွားရောက်ခြင်းသည် ငွေကြေးကုန်ကျမှု များပြားသည့်အပြင် ကာလသားရောဂါပိုးပင် ကူးစက်ခံရနိုင်သည်။

နယ်ပယ်တစ်ခုခုတွင် အောင်မြင်မှု ရရှိထားသူများကို ကြည့်မည်ဆိုလျှင် လျှို့ဝှက်ချက် ရှိနေပါသည်။ ထိုအရာကား အခြားမဟုတ်ချေ။ အချိန်ကို အကျိုးရှိစွာ အသုံးချခြင်းပင် ဖြစ်သည်။ အထူးသဖြင့် အားလပ်ချိန်ကို အကျိုးရှိစွာ ဖြတ်သန်းကြခြင်း ဖြစ်သည်။ အချို့ သော ထူးချွန်သူများသည် အားလပ်ချိန်တွင် လေ့လာဖတ်မှတ်သွားမည့် စာအုပ်နှင့် အကြောင်းအရာများကို ကြိုတင်စီစဉ်ထားလေ့ ရှိသည်။ အချို့က ပညာရပ်တစ်ခုခုကို လေ့လာကြသည်။ မည်သို့ပင် ဆိုစေကာမူ အားလပ်ချိန်ကို အကျိုးရှိစွာ အသုံးချသွားမည် ဆိုလျှင် အောင်မြင်မှုကို မလွဲမသွေ ရရှိသွားမည်မှ ဧကန်မုချပင် ဖြစ်သည်။

အားလပ်ချိန်ရအောင် ယူသင့်

မျက်မှောက်ကာလတွင် နည်းပညာ တိုးတက်လာမှုနှင့်အတူ ဆန်းသစ်သော ဇိမ်ခံပစ္စည်းများလည်း  ပေါ်ထွက်လျက်ရှိသည်။ လူတို့၏ သဘာဝသည် နောက်ဆုံးပေါ် ပစ္စည်းများကိုသာ အသုံးပြုလိုကြသည်။ ထိုပစ္စည်းများကို ဝယ်ယူနိုင်ရန်အတွက် ငွေကိုပင်ပင် ပန်းပန်းရှာဖွေကြရသည်။ ညဥ့်နက်သန်းခေါင်အထိ အလုပ်လုပ်ကြရသည်။ အားလပ်ချိန် နည်းပါးလာကြသည်။ မိသားစုနှင့် ထမင်းလက်ဆုံပင် မစားနိုင်ကြတော့ပေ။ ထိုသို့ မနားမနေ လုပ်ကိုင်နေမည် ဆိုလျှင်  အလုပ်အကိုင်အပေါ် တဖြည်းဖြည်း ငြီးငွေ့လာမည် ဖြစ်သည်။ မိသားစုနှင့် ပြောဆိုဆက်ဆံရာတွင်လည်း ကတောက်ကဆ ဖြစ်လာမည်။ အသေးအဖွဲကိစ္စကိုပင်လျှင် စိတ်တိုတတ်လာတတ်သည်။ ထိုသို့ဖြစ်လာမည် ဆိုလျှင် အားလပ်ချိန်ရအောင်ယူပြီး မိသားစုနှင့်အတူ အပန်းဖြေသင့်ပါသည်။ 

ဝင်ငွေမည်မျှပင် ရရှိနေစေကာမူ အလုပ်ကို မနားမနေ မလုပ်ကိုင်သင့်ပေ။ အားလပ်ချိန်ကို ရအောင် ယူသင့်သည်။ အထူးသဖြင့် မိသားစုနှင့်အတူ ထမင်းလက်ဆုံစားခြင်း၊ တီဗီကြည့်ခြင်း၊ ဘုရားသွား၊ ကျောင်းတက်လုပ်ခြင်း၊ ဈေးဝယ်ထွက်ခြင်း၊ ကလေးများနှင့် အတူလိုက်ပါ ဆော့ကစားခြင်းတို့ကိုအချိန်ပေး လုပ်သင့်သည်။ သို့မှသာလျှင် ဘဝသည် အဓိပ္ပာယ် ရှိလာမည် ဖြစ်သည်။ 

လက်အောက်ဝန်ထမ်းများကိုလည်း အားလပ်ချိန် ပေးသင့်

အချို့သော ဌာနအကြီးအကဲများသည် မိမိတို့၏ လိုလားချက်များကိုသာ ရှေ့တန်းတင်လေ့ ရှိကြသည်။ နောက်ထပ်ရာထူးတိုးတက်ရေးအတွက် လုပ်ဆောင်ချက် ပြလိုကြသည်။ လက်အောက်ဝန်ထမ်းများ၏ စွမ်းဆောင်ရည်ကို ချင့်ချိန်နိုင်စွမ်း မရှိဘဲ မဖြစ်နိုင်သည့် တာဝန်များကို ပေးတတ်ကြသည်။ ကိုယ်တိုင်လည်း စွမ်းဆောင်နိုင်စွမ်း မရှိကြပေ။ ထိုသူများ၏ လက်အောက်ရှိ ဝန်ထမ်းများသည် အမြဲတမ်းလိုလိုပင် ရုံးဆင်းနောက်ကြရသည်။ ထိုဝန်ထမ်းများသည်  ရုံးပိတ်ရက် မရှိသဖြင့် အားလပ်ချိန်ပင် မရှိသလို ဖြစ်လာကြသည်။ 

ထမ်းဆောင်ရသည့် တာဝန်အပေါ် တဖြည်းဖြည်း စိတ်ကုန်လာတတ်ကြသည်။ မလိုလားအပ်သော အပိုတာဝန်များကြောင့် အချို့သော ဝန်ထမ်းများသည် မိသားစုဘဝ တဖြည်းဖြည်း ဆုံးရှုံးလာရသည်။ နောက်ဆုံးတွင် စိတ်ထွက်ပေါက် ရှာတတ်ကြသည်။ ထို့ကြောင့် လက်အောက်ဝန်ထမ်းများကိုလည်း အားလပ်ချိန် အပြည့်အဝ ရရှိအောင် ဆောင်ရွက်ပေးသင့်သည်။ ရသင့်ရထိုက်သည့် အားလပ်ချိန်ကို အပြည့်အဝပေးခြင်းသည် ဝန်ထမ်းများအတွက် သက်သာချောင်ချိရေး ဆောင်ရွက်ပေးခြင်း ဖြစ်သည်။  မည်သို့ပင် ဆိုစေကာမူ မိမိ၏ ရာထူးတိုးတက်ရေးအတွက် လက်အောက်ဝန်ထမ်းများ၏ အားလပ်ချိန်ကို အနိုင်ကျင့် မယူသင့်တော့ပေ။ 

ကုန်ကျစရိတ် သက်သာသော အနားယူအပန်းဖြေနည်း

လူတို့သည် ဝင်ငွေအပေါ် မူတည်၍ အားလပ်ချိန်တွင် အမျိုးမျိုး အပန်းဖြေလေ့ ရှိကြသည်။  မည်သို့ပင် အနားယူ အပန်းဖြေနေစေကာမူ ကိုယ်စိတ်နှစ်ဖြာ ရွှင်လန်းတက်ကြွပြီး လုပ်ငန်းခွင်တွင် အင်တိုက်အားတိုက် တာဝန်ထမ်းဆောင်နိုင်ရန်သာ လိုအပ်ပါသည်။ အထူးသဖြင့် မိသားစုနှင့်အတူ နွေးနွေးထွေးထွေး အနားယူခြင်းသည် အကောင်းဆုံးပင် ဖြစ်သည်။ တချို့သော မိသားစုများသည် ငွေကြေးပြည့်စုံသော်လည်း မိသားစုဝင်များအကြား တစ်ဦးနှင့်တစ်ဦး ဆက်ဆံရေးသည် အေးစက်စက်နိုင်လွန်းလှသည်။ ထိုမိသားစုသည် စိတ်အာဟာရ ချို့တဲ့နေသောကြောင့် ဖြစ်သည်။ ထို့ကြောင့် စိတ်အာဟာရကို ပုံမှန်ဖြည့်ဆည်းပေးရန် လိုအပ်ပါသည်။

ရုပ်ဝတ္ထုပစ္စည်းများ မည်မျှပင် ပြည့်ဝနေစေကာမူ စိတ်အာဟာရချို့တဲ့နေမည် ဆိုလျှင် လုပ်ငန်းတာဝန်များကို အင်ပြည့်အားပြည့် ထမ်းဆောင်နိုင်မည် မဟုတ်ချေ။ ထို့ကြောင့် အားလပ်ချိန်တွင် စိတ်အာဟာရ ဖြည့်တင်းသွားရန် လိုအပ်ပါသည်။ လူတိုင်းအတွက် စိတ်အာဟာရ ဖြည့်တင်းနိုင်ရန် ကုန်ကျစရိတ် သက်သာသော အနားယူ အပန်းဖြေနည်းသည် စာဖတ်ခြင်းပင် ဖြစ်သည်။

စာဖတ်သည့် အလေ့အထပျိုးထောင်

အထူးသဖြင့် မျိုးဆက်သစ် လူငယ်များကို စာဖတ်တတ်သည့် အလေ့အထကောင်းတစ်ရပ် မွေးမြူပေးသင့်သည်။ မည်သို့ မွေးမြူသွားမည်နည်း။ လွယ်ပါသည်။ လူကြီးမိဘများကိုယ်တိုင် အကျိုးပြုစာပေများကို ဖတ်သွားရန်သာ လိုပါသည်။ မိဘများသည် အားလပ်ချိန်တွင် တီဗီဇာတ်လမ်းတွဲများနှင့် Facebook ကိုကြည့်ပြီး ဖုန်းကိုသာပွတ်နေမည် ဆိုလျှင် လူငယ်များကို မည်သို့ လမ်းပြသွားမည်နည်း။ မိဘများသည် သား၊ သမီးများ၏ စံပြပုဂ္ဂိုလ်များ ဖြစ်ကြသည်။ မိမိတို့၏ သား၊ သမီးများကို အမှန်တကယ် ချစ်မြတ်နိုးသည်ဆိုလျှင် စာကြည့်တိုက်များသို့ ခေါ်ဆောင်သွားသင့်ပါသည်။ တတ်နိုင်ပါက စာအုပ်ဆိုင်များသို့ လိုက်ပို့ပေးသင့်ပါသည်။ ထိုမှတစ်ဆင့် စာအုပ်စာပေကို ချစ်မြတ်နိုးတတ်သည့် လူငယ်များ ဖြစ်လာအောင် တဖြည်းဖြည်းချင်း ပြုစုပျိုးထောင်သွားရန် လိုအပ်ပါသည်။

စာပေဝါသနာ ထုံလာသော လူငယ်များသည် အချိန်ကို အလဟဿ မဖြုန်းတတ်ပေ။ နှစ်စဉ် တက္ကသိုလ်ဝင်တန်းတွင် ထူးချွန်စွာ အောင်မြင်ခဲ့သော ကလေးများသည် စာပေကို ချစ်မြတ်နိုးပြီး အားလပ်ချိန်ကို စနစ်တကျ စီမံခန့်ခွဲတတ်သူများ ဖြစ်ကြသည်။ စာရေးသူသည် ငယ်စဉ်က နွေရာသီ ကျောင်းပိတ်ရက်တွင် ယာခင်းစောင့်ခဲ့ရသည်။ ထိုစဉ်က ယာတောထဲ၌ ကာတွန်း၊ မဂ္ဂဇင်း၊ ဝတ္ထု စသည့် စာအုပ်ပေါင်းစုံကို ဖတ်ဖြစ်ခဲ့သည်။ ကျေးလက်ဒေသတွင် မွေးဖွားခဲ့သော်လည်း စာအုပ်၊ စာပေများမှ စိတ်အာဟာရ ခွန်အားများ ရရှိခဲ့သည်။ စာအုပ်စာပေများမှ ရရှိသော အသိတရားကြောင့် ငယ်စဉ်ကတည်းကပင် အားလပ်ချိန်များတွင် စာအုပ်၊ စာပေများကို ရှာဖွေဖတ်ဖြစ်ခဲ့သည်။ အချိန်ရသည်နှင့် သတင်းစာ၊ ဂျာနယ်၊ စာအုပ်၊ စာစောင်တစ်ခုခုကို ဖတ်ဖြစ်နေသည်။

စာပေကျေးဇူးများ 

လူငယ်များသည် စာအုပ်စာပေများကို ဖတ်ရှုခြင်းအားဖြင့် တန်ဖိုးမဖြတ်နိုင်သော အတွေးအခေါ်များကို တူးဆွနိုင်ပါသည်။ အကျိုးပြုစာပေများ၊ အထူးသဖြင့် ဗုဒ္ဓတရားတော်များသည် လူငယ်များကို  မှန်ကန်သော အတွေးအခေါ်များ ပေးစွမ်းပါသည်။  အတွေးအခေါ်မှန်သော လူငယ်များဖြင့် တည်ဆောက်ထားသည့် လူ့အသိုက်အဝန်းသည် အေးချမ်းသာယာမှု ရှိနေမည် ဖြစ်သည်။ ဆန့်ကျင်ဘက် အနေနှင့် အစွန်းရောက် အတွေးအခေါ်များ ကိန်းအောင်းနေသော လူ့အသိုက်အဝန်းသည် သတ်ဖြတ်ညှဉ်းပန်းနှိပ်စက်မှုများ ထူပြောနေမည်သာ ဖြစ်သည်။

နည်းပညာ တိုးတက်နေသော ခေတ်ကြီးတွင် အပျင်းထူနေသူများသည် နောက်ကျကျန်နေမည် ဖြစ်သည်။ လူငယ်များသည် အချိန်နှင့်အမျှ လေ့လာသင်ယူ အားထုတ်နေရန် လိုအပ်သည်။ လုပ်ငန်းရှင်များသည် အသက်မွေးဝမ်းကျောင်း ပညာရပ်တစ်ခုခုကို ကျွမ်းကျင်သူများကိုသာ အလုပ်အကိုင် ပေးလိုကြသည်။ နယ်ပယ်တစ်ခုခုတွင် ဝမ်းစာပြည့်နေသော လူငယ်များသည် ဝင်ငွေလစာများ ကောင်းကြသည်။ အားလပ်ချိန်ကို စနစ်တကျ စီမံခန့်ခွဲ ကြိုးပမ်းခဲ့ကြသောကြောင့် ထိုသို့ ရပ်တည်နိုင်ကြခြင်း ဖြစ်သည်။

အားလပ်ချိန်ကို စနစ်တကျ အသုံးချ၏

ငယ်ရွယ်နုပျိုသော လူငယ်တို့၏ ဘဝသည် ကုန်ဆုံးမှု မြန်ဆန်လွန်းလှသည်။ အချို့သောလူငယ်များသည် ထိုသို့ တန်ဖိုးရှိသည့် လူငယ်ဘဝကို အလဟဿ ဖြုန်းတီးခဲ့ကြသည်။ သတိမထားမိလိုက်သည့် တစ်ခဏအတွင်း လူငယ်ဘဝသည်ကုန်ဆုံးသွားကြသည်။  အချိန်အခါလွန်မှ အသက်မွေးဝမ်းကျောင်းပညာ တစ်ခုခုကို စတင်သင်ယူမည် ဆိုလျှင် နောက်ကျသွားပြီ ဖြစ်သည်။ မျှော်မှန်းသလောက် ခရီးပေါက်မည် မဟုတ်ချေ။ လူ့ဘဝသည် အချိန်ကိုက် ဆောင်ရွက်သွားမှသာလျှင် အောင်မြင်မှုပန်းတိုင်ကို ဆွတ်ခူးနိုင်မည် ဖြစ်သည်။

အားလပ်ချိန်ကို စနစ်တကျ စီမံခန့်ခွဲနိုင်သူများသည် နယ်ပယ်တစ်ရပ်ရပ်တွင် အောင်မြင်မှု ရရှိနေမည် ဖြစ်သည်။ ငယ်စဉ်ကတည်းက အားလပ်ချိန်ကို အကျိုးမဲ့ ဖြုန်းတီးခဲ့ကြသူများသည် မည်သည့် အောင်မြင်မှုကိုမျှ ရရှိနိုင်မည် မဟုတ်ချေ။ ဤနေရာတွင် အောင်မြင်မှုကို ငွေကြေး၊ ရာထူးတို့ဖြင့် တိုင်းတာနိုင်မည် မဟုတ်ချေ။ ကိုယ်ကျင့်တရားဖြင့်သာ တိုင်းတာနိုင်ပါသည်။ လူသားတို့၏ စွမ်းအားသည် ကိုယ်ကျင့်တရားသာ ဖြစ်ပါသည်။ မည်မျှပင် တိုးတက်ကြီးပွား၊  ရာထူးမြင့်မားနေစေကာမူ ကိုယ်ကျင့်တရား မရှိသူသည် စာရိတ္တဆင်းရဲနေသူတစ်ဦးသာ ဖြစ်သည်။ လူငယ်များ အနေနှင့် စာရိတ္တချမ်းသာအောင် ကြိုးစားသွားသင့်သည်။

ခြုံ၍တင်ပြရလျှင် လူတို့သည် နေ့စဉ် စားဝတ်နေရေးအတွက် စဉ်ဆက်မပြတ် ရုန်းကန် လှုပ်ရှားနေကြရသည်။ ထိုသို့ ငွေကြေးရှာဖွေရာတွင် နေ့မနား၊ ညမအား အချိန်ပြည့် လုပ်ကိုင်နေ၍ မရပေ။ အားလပ်ချိန်ကိုလည်း ရအောင်ယူထားသင့်သည်။ အထူးသဖြင့် အားလပ်ချိန်ကို အကျိုးရှိစွာ အသုံးချနိုင်ရေးသည် များစွာအရေးပါလျက် ရှိသည်။ အစိုးရ ရုံး၊ ဌာနများတွင် ဝန်ထမ်းများကို အားလပ်ချိန် မရှိအောင် တာဝန်ပေးအပ်ခြင်းမျိုး မလုပ်သင့်ပေ။ ရုံးပိတ်ရက်တွင် အနားမရသော ဝန်ထမ်းများသည် စိတ်ရွှင်လန်းတက်ကြွမှု မရှိသဖြင့် ရည်မှန်းချက်တာဝန်ကို မျှော်မှန်းထားသလောက် ထမ်းဆောင်နိုင်မည် မဟုတ်ချေ။ ထို့ကြောင့် ဌာနအကြီးအကဲများသည် လက်အောက်ဝန်ထမ်းများ၏ အားလပ်ချိန်ကို မယူသင့်တော့ပေ။ အထူးသဖြင့် ဝန်ထမ်းများသည် ဝင်ငွေနှင့် ထွက်ငွေ ညီမျှအောင် ခြိုးခြံချွေတာ နေထိုင်ကြရသဖြင့် အားလပ်ချိန်တွင် ငွေကြေးကုန်ကျမှုများသည့် အပန်းဖြေမှုမျိုးကို တတ်နိုင်သမျှ ရှောင်ကြဉ်သွားသင့်ပါသည်။ မည်သို့ပင် ဆိုစေကာမူ နိုင်ငံသားအားလုံးသည် အားလပ်ချိန်များတွင် စိတ်ခွန်အားဖြစ်စေမည့် စာအုပ်၊ စာပေများကို ဖတ်ရှုအနားယူပြီး အောင်မြင်တိုးတက်မှုများ ဆတက်ထမ်းပိုး ပိုင်ဆိုင်သွားနိုင်ကြပါစေ။   

မောင်သောင်းဝင်း (တမန်ဟောင်း)