News

POST TYPE

REGIONAL

ချင်းပြည်နယ်အတွင်း အထက်တန်းပြဆရာ ၄၀၀ ကျော်လိုအပ်
08-Aug-2019
ကလေး၊ ဩဂုတ် ၈

ချင်းပြည်နယ်အတွင်း အထက်တန်းပြကျောင်းဆရာ၊ ဆရာမ လိုအပ်ချက်မှာ ၄၀၀ ကျော်ရှိကြောင်း ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက ပြောကြားသည်။

ဩဂုတ်လ ၈ ရက်နေ့တွင် ကျင်းပသည့် အမျိုးသားလွှတ်တော်ပုံမှန်အစည်းအဝေးတွင် ချင်းပြည်နယ် မဲဆန္ဒနယ်အမှတ် (၂) မှ အမျိုးသားလွှတ်တော်ကိုယ်စားလှယ် ဦးရှန်အောရ်၏ ချင်းပြည်နယ်ကျေးရွာများရှိ အခြေခံပညာအထက်တန်းများ၌ လိုအပ်နေသော ဆရာ၊ ဆရာမများ လုံလောက်စွာ ခန့်အပ်ပေးနိုင်ခြင်း ရှိ မရှိဆိုသည့်မေးခွန်းကို ဖြေကြားရာတွင် ဝန်ကြီးက အထက်ပါအတိုင်း ထည့်သွင်းပြောကြားခဲ့ခြင်း ဖြစ်သည်။

ယခုနှစ်ပညာသင်နှစ်တွင် အထက်တန်းကျောင်း၊ အထက်တန်းကျောင်း (ခွဲ) များအဖြစ် ကျောင်းအဆင့် တိုးမြှင့်လိုက်ခြင်းများရှိပြီး ချင်းပြည်နယ်အတွင်း ကျောင်းဆရာ၊ ဆရာမလိုအပ်ချက် တွက်ချက်မှုအရ ၂၀၁၇-၂၀၁၈ ပညာသင်နှစ်စာရင်းအရ အထက်တန်းပြဆရာ၊ ဆရာမ ၄၁၁ ဦး လိုအပ်နေသည်ဟု ဝန်ကြီးက ပြောကြားသည်။

“ဒါက ဦးရေကိုပဲ တွက်ချက်ထားတာ ဖြစ်ပါတယ်။ ဘာသာရပ်အလိုက်လည်းပဲ မြန်မာစာ၊ အင်္ဂလိပ်စာ၊ သင်္ချာ၊ ဓာတုဗေဒ၊ ရူပဗေဒ၊ ဇီဝဗေဒ၊ ပထဝီ၊ သမိုင်း၊ ဘောဂ ဗေဒ စသည့်ဖြင့် ဘာသာရပ်အလိုက် လိုအပ်ချက်တွေကိုလည်း တွက်ချက်ထားပါတယ်”ဟု ဝန်ကြီးက ဆိုသည်။ 

ချင်းပြည်နယ်အတွင်း ကျေးရွာများရှိ အခြေခံပညာအထက်တန်းကျောင်းများသို့ အထက်တန်းပြများ ဖြည့်ဆည်းခန့်ထားရန်အတွက် ချင်းပြည်နယ်အတွင်းရှိ ဘီအီးဒီဘွဲ့ရ အလယ်တန်းပြများနှင့် မူလတန်းကျောင်းအုပ်များအား အထက်တန်းပြများအဖြစ် ရာထူးတိုးမြှင့်ခန့်ထားပေးခြင်း၊ ဘီအီးဒီ ဒုတိယနှစ် တက်ရောက်ဆဲ အလယ်တန်းပြများနှင့် မူလတန်းကျောင်းအုပ်များအား အထက်တန်းပြ (ယာယီ) အဖြစ် ခန့်ထားပေးခြင်း၊ မဟာဘွဲ့ရမူလတန်းပြများနှင့် အလယ်တန်းပြများကို အထက်တန်းပြ ကျောထောက်နောက်ခံအဖြစ် ခန့်အပ်ခြင်းများပြုလုပ်ဖြည့်ဆည်းခန့်ထားပေးခဲ့ကြောင်း ပြည်ထောင်စုဝန်ကြီး ဒေါက်တာမျိုးသိမ်းကြီးက ပြောကြားသည်။

၂၀၁၉- ၂၀၂၀ ပညာသင်နှစ် ချင်း ပြည်နယ်အတွင်းရှိ အခြေခံပညာကျောင်းစာရင်းမှာ အထက်တန်းကျောင်း ၉၅ ကျောင်း၊ အထက်တန်းကျောင်း (ခွဲ) ၇၈ ကျောင်း၊ အလယ်တန်းကျောင်း ၂၂၃ ကျောင်း၊ အလယ်တန်းကျောင်းခွဲ ၁၀၅ ကျောင်း၊ မူလတန်းလွန်ကျောင်း၂၁၃ ကျောင်း၊ မူလတန်းကျောင်း (ခွဲ) ၉၇ ကျောင်းနှင့် မူလတန်းကျောင်း ၆၈၅ ကျောင်း စုစုပေါင်း ၁၄၉၆ ကျောင်း ရှိသည်။

R-20