News

POST TYPE

REGIONAL

အိမ်အကူ မကရင်မ အသတ်ခံရမှု သေဆုံးသူ၏မိခင်က အမှုရုပ်သိမ်းလွှာတင်ထားဟုဆို
07-May-2019
ရန်ကုန်၊ မေ ၇ 

အိမ်အကူ မကရင်မ (ခ) မခင်သန္တာဦး အသတ်ခံရမှုနှင့်ပတ်သက်၍ သေဆုံးသူ၏ မိခင်ဖြစ်သူ ဒေါ်လှလှဝင်းမှ ပြီးခဲ့သည့်ရုံးချိန်းတွင် ခရိုင်ဥပဒေရုံးသို့ အမှုရုပ်သိမ်းလွှာတင်ခဲ့ကြောင်း ယင်းအမှုကို တရားလိုဘက်မှ လိုက်ပါဆောင်ရွက်ပေးနေသည့် တရားလွှတ်တော်ရှေ့နေ ဒေါ်စန်းစန်းမြင့်ကပြောကြားသည်။

ရန်ကုန်တောင်ပိုင်းခရိုင်တရားရုံး၌ မေ ၇ ရက်နေ့ ရုံးချိန်းအပြီးတွင် သတင်းမီဒီယာများကိုပြောကြားခဲ့ခြင်းဖြစ်သည်။
 
“ဒေါ်လှလှဝင်းဆိုတာက မကရင်မရဲ့အမေ။ တရားလိုပြသက်သေထဲမှာ သူပါတယ်။ ပြီးခဲ့တဲ့ရုံးချိန်းက သူကိုယ်တိုင် သက်သေအဖြစ်နဲ့ထွက်ဆိုပြီး နောက်ပိုင်းမှာ ခိုင်လုံတဲ့သတင်းအနေနဲ့ တရားရုံးဆီကနေ သိရှိရတာက ဒေါ်လှလှဝင်းသည် မကရင်မ သေဆုံးတဲ့ကိစ္စနဲ့ပတ်သက်ပြီး ဥပဒေရုံးမှာ အမှုရုပ်သိမ်းလွှာ လာတင်တယ်လို့ သိရတယ်။ တာဝန်ရှိသူက တရားဝင်ပြောတာပါ။ ဒေါ်လှလှဝင်းသည် ဒီအမှုမှာ တရားလို မဟုတ်ဘဲနဲ့ ကျင့်ထုံးဥပဒေအရလည်း ရုပ်သိမ်းလွှာတင်ခွင့် မရှိဘူး။ သူ့နည်းသူ့ဟန်နဲ့ တစ်စုံတစ်ရာ ပယောဂရှိလို့ တင်တယ်လို့ယူဆတယ်”ဟု တရားလွှတ်တော်ရှေ့နေ ဒေါ်စန်းစန်းမြင့်က ရှင်းပြသည်။

လာမည့် မေ ၁၄ ရက်နေ့ရုံးချိန်းတွင် ဒေါ်လှလှဝင်းကို ပြန်ခေါ်သက်သေအဖြစ် စစ်ဆေးရန် ချိန်းဆိုထားပြီး ယင်းနေ့ရုံးချိန်းတွင် ရုပ်သိမ်းလွှာ တင်ထားပါသည်ဟု သက်သေထွက်ဆိုပါက တရားသူကြီးက ဥပဒေနှင့် ညီညွတ်သည့် တစ်စုံတရာ ညွှန်ကြားခြင်းနှင့် အမိန့်ချမှတ်ခြင်းတို့ ဆောင်ရွက်ပေးလိမ့်မည်ဟု မျှော်လင့်ကြောင်း ၎င်းက ဆက်လက်ပြောကြားသည်။

မေ ၇ ရက်နေ့ ရုံးချိန်းတွင် ပြန်ခေါ်သက်သေအဖြစ် မနီလာဝင်းနှင့် မစန္ဒာထွေးတို့ကို စစ်ဆေးခဲ့ရာ မနီလာဝင်းမှာ မီးဖွားရန် တစ်ပတ်။ ဆယ်ရက်ခန့်သာ လိုတော့သည့်အတွက် ခတ္တိယကျေးရွာအုပ်စု လူမှုကယ်ဆယ်ရေးအသင်း တာဝန်ရှိသူများမှ ကူညီပေးသည့် အရေးပေါ် လူနာတင်ယာဉ်ဖြင့်လာရောက်ကာ သက်သေထွက်ဆိုခဲ့သည်။

ယင်းသို့ သက်သေထွက်ဆိုပေးခြင်းကြောင့် တရားစွဲဆိုခံရသူဘက်မှ မေးခွင့်ရရှိရေး၊ အမှုတိုးတက်ရေးနှင့် အမှန်တရား ပေါ်ပေါက်ရေးအတွက် တရားလိုဘက်မှ ကူညီဆောင်ရွက်ပေးခဲ့ခြင်းသာဖြစ်ကြောင်း ဒေါ်စန်းစန်းမြင့်က ထပ်မံရှင်းပြသည်။

တရားခွင်အတွင်း လူသတ်မှုဖြင့် တရားစွဲဆို စစ်ဆေးခံနေရသူ ဥပဒေအရာရှိဟောင်း ဒေါ်သိင်္ဂီစု၏ရှေ့နေက ပြန်ခေါ်သက်သေကို ပြန်လှန်စစ်မေးရာတွင် မေးခွန်းမရောထွေးစေရန်နှင့် ရှင်းလင်းအောင်မေးရန်၊ ပြန်ခေါ်သက်သေ ထွက်ဆိုစဉ် တရားလိုဘက်မှ ရှေ့နေကသင်ပေးသည့်သဏ္ဍာန် ပေါ်ပေါက်သည့်အတွက် ဝင်ရောက်ပြောဆိုခြင်းမပြုရန်၊ ဒေါ်သိင်္ဂီစု၏ ရှေ့နေကစစ်ဆေးပြီး တရားလိုပြသက်သေ အမှုစစ်ရဲအရာရှိနှင့် ဆရာဝန်ကို ကျင့်ထုံးဥပဒေပုဒ်မ ၅၄၀ အရ ရုံးခေါ်သက်သေအဖြစ် ပြန်လည်စစ်မေးခွင့်လျှောက်ထားရာ တရားလိုဘက်က ကန့်ကွက်သည့်အတွက် လာမည့်ရုံးချိန်းတွင် ဒေါ်လှလှဝင်းကို စစ်ဆေးပြီးနောက် နှစ်ဖက်ကြားနာရန် အမှုစစ်ခရိုင်တရားသူကြီးက ထိန်းကျောင်းညွှန်ကြားခဲ့ကြောင်း တရားရုံး သတင်းပြန်ကြားရေးအရာရှိထံမှ သိရသည်။

အဆိုပါအမှုတွင် စွပ်စွဲခံရသူ ပဲခူးခရိုင်တရားရုံး ဒုခရိုင်ဥပဒေအရာရှိဟောင်း ဒေါ်သိင်္ဂီစုကို အမြင့်ဆုံးပြစ်ဒဏ် တစ်သက်တစ်ကျွန်းအထိ ချမှတ်နိုင်ကြောင်း ပြဋ္ဌာန်းထားသည့် ပြစ်မှုဥပဒေပုဒ်မ-၃၀၂ (၂) ဖြင့် စွဲချက်တင် စစ်ဆေးရန် ရန်ကုန်တောင်ပိုင်းခရိုင်တရားရုံးက ၂၀၁၈ ခုနှစ် ဇန်နဝါရီ ၂၃ ရက်က အမိန့်ချမှတ်ခဲ့သည်။

S-03