News

POST TYPE

POPULAR POST

ဆရာဆရာမ လေးသိန်း ခုနှစ်သောင်းကျော် ကန့်ကွက်ပါက ကျောင်းတက်ချိန် ပြန်လည်စဉ်းစားပေးမည်ဟု ညွှန်ချုပ်ပြော
09-Jan-2020
ရန်ကုန်၊ ဇန်နဝါရီ ၉

အခြေခံပညာကဏ္ဍရှိ ဆရာဆရာမ လေးသိန်းခုနှစ်သောင်းကျော် ကန့်ကွက်မည်ဆိုပါက လက်ရှိထုတ်ပြန်ထားသည့် ကျောင်းတက်ချိန်များကို ပြန်လည်စဉ်းစားပေးမည်ဖြစ်ကြောင်း အခြေခံပညာဦးစီးဌာန ညွှန်ကြားရေးမှူးချုပ် ဦးကိုလေးဝင်းက ပြောသည်။

မတ်လကုန်အထိ ကျောင်းတက်ရက်တိုးမြှင့်ထားခြင်းအပေါ် မြန်မာနိုင်ငံလုံးဆိုင်ရာ ဆရာဆရာမများအဖွဲ့ချုပ်၊ အခြေခံနှင့်အဆင့်မြင့်ပညာ ပူးပေါင်းဆောင်ရွက်ရေးကော်မတီတို့က ကြေညာချက်များထုတ်ပြန်ပြီး ကန့်ကွက်ထားသကဲ့သို့ ပညာရေးတက္ကသိုလ်နှင့် ပညာရေးကောလိပ်များရှိ ကျောင်းသားကျောင်းသူများက ဖဲကြိုးစိမ်းလှုပ်ရှားမှုများဖြင့် ကန့်ကွက်မှုများပြုထားသော်လည်း ကိုယ်စားပြုမှုအရ တစ်နိုင်ငံလုံးရှိ ဆရာဆရာမ လေးသိန်းခုနှစ်သောင်းကျော်ဖြင့် နှိုင်းယှဉ်ကြည့်ရန်လိုအပ်မည်ဖြစ်ကြောင်း၊ ဆရာဆရာမအားလုံး ကန့်ကွက်မည်ဆိုပါက ယင်းစနစ်ကို ပြန်လည်စဉ်းစားမည်ဟု ၎င်းကဆိုသည်။ 

“သမဂ္ဂတွေကို ကျွန်တော်မပြောလိုဘူး။ ဖေ့စ်ဘွတ်ခ်မှာတင်နေတာတွေကိုကြည့်ရင် Like အရေအတွက်ကိုကြည့်လေ။ တစ်ချို့ဆိုရင် အပြုသဘောဆောင်ပြောနေတဲ့ဆရာတွေလည်းရှိနေတယ်။ သူတို့နဲ့ အခုဆိုရန်တွေဖြစ်ကုန်တယ်။ ဘယ်လောက်ကိုယ်စားပြုလဲပေါ့နော်။ ဆရာဆရာမ လေးသိန်းခုနှစ်သောင်းကျော်ရှိတယ်။ သူတို့အားလုံးက ကန့်ကွက်တယ်ဆိုရင်တော့ ကျွန်တော်တို့ပြန်စဉ်းစားရင် စဉ်းစားမှာပေါ့”ဟု ဦးကိုလေးဝင်းက The Voice သို့ပြောသည်။

ဇန်နဝါရီလ ၉ ရက်နေ့တွင် အခြေခံပညာဦးစီးဌာန နေပြည်တော်တွင် တိုင်းဒေသကြီး၊ ပြည်နယ်ပညာရေးမှူးများနှင့် ကျောင်းတက်ရက်တိုးမြှင့်ခြင်းနှင့် စာမေးပွဲအချိန်စာရင်း ပြောင်းလဲခြင်းများအတွက် ဖြစ်ပေါ်လာနိုင်သည့် အခက်အခဲများကို ဆွေးနွေးမှုများကိုပြုလုပ်ခဲ့ကြောင်းသိရသည်။

“ပညာရေးကောလိပ်တွေက လုပ်နေတာတွေကိုတော့ အဆင့်မြင့်ပညာဦးစီးဌာနက တာဝန်ရှိသူတွေနဲ့ ညှိနှိုင်းရမှာပါ”ဟု ဦးကိုလေးဝင်းက ပြောသည်။

ကျောင်းတက်ရက်တိုးမြှင့်ခြင်းအပေါ်တွင် ကန့်ကွက်သည့် အဖွဲ့အစည်းများထဲမှ ပညာရေးတက္ကသိုလ်နှင့် ပညာရေးကောလိပ်များမှ ကျောင်းသားသမဂ္ဂများသည် ပညာရေးဝန်ကြီးဌာန၏ လက်ရှိစနစ်ကိုပြန်လည် ပြင်ဆင်ရန်နှင့် ကျောင်းသား၊ ဆရာတို့နှင့်တွေ့ဆုံဆွေးနွေးပြီးမှသာ ဖဲကြိုးစိမ်းလှုပ်ရှားမှုများကိုရပ်တန့်မည်ဟု ထုန်ပြန်ထားသည်။

တစ်နိုင်ငံလုံးအတိုင်းအတာဖြင့် အခြေခံပညာတွင် ဆရာဆရာမစုစုပေါင်း လေးသိန်းခုနှစ်သောင်းကျော်ရှိပြီး ကျောင်းသားကျောင်းသူ ကိုးသန်းကျော် ပညာသင်ကြားနေသည်။

အောင်သက်ကို