News

POST TYPE

POPULAR POST

လစာယူသည့်အတွက် စာသင်ကြားရမည်ဟု ပညာရေးဝန်ကြီး ပြောဆို
09-Jan-2020
တောင်ငူ၊ ဇန်နဝါရီ ၉

ပညာရေးဝန်ကြီးဌာနလက်အောက်ရှိ ဆရာဆရာမများသည် နွေကျောင်းပိတ်ရက်တွင်လည်း လစာခံစားသည့်အတွက် စာသင်ကြားရေး လုပ်ငန်းများ ဆောင်ရွက်ရမည် ဖြစ်သည်ဟု ပညာရေးဝန်ကြီး ဒေါက်တာမျိုးသိမ်းကြီးက ပြောကြားသည်။

ယခုစာသင်နှစ်မှစတင်ပြီး စာသင်ချိန်တိုးမြင့်သည့်ကိစ္စနှင့်ပတ်သက်၍ ဆရာဆရာများ ကျောင်းသားမိဘများ ဝေဖန်မှုများမြင့်တက်နေချိန်တွင် ပညာရေးဝန်ကြီး ဒေါက်တာ မျိုးသိမ်းကြီးက စာသင်ချိန်တိုးမြင့်မှုကို ပြောင်းလဲမည်မဟုတ်ကြောင်း ပြောဆိုထားခဲ့သည့်အပြင် ယခုကဲ့သို့ လစာယူပါက စာသင်ရမည်ဖြစ်ကြောင်း ပြောဆိုခဲ့ခြင်းဖြစ်သည်။

ပညာရေးကောလိပ်များကို ပြည်ပအကူညီဖြင့် ပြုပြင်ပြောင်းလဲမှုများ ဆောင်ရွက်နေသည့်ကိစ္စများနှင့်ပတ်သက်ပြီး ယခုလ ၉ ရက်နေ့က တောင်ငူပညာရေးကောလိပ်တွင် ကျောင်းတာဝန်ရှိသူများ၊ ကျောင်းသူကျောင်းသားများနှင့်တွေ့ဆုံခဲ့စဉ် ဝန်ကြီးက ပြောခဲ့ခြင်းဖြစ်သည်ဟု ဖဲကြိုးစိမ်းကန်ပိမ်းလှုပ်ရှားမှု ဦးဆောင်ကော်မတီဝင် ကိုနောင်ထက်အောင်က ပြောကြားသည်။

“သူက မေးတယ်။ စာသင်ရက်တိုးတာသိလားလို့။ တစ်ဖက်က သိတယ်ပြောတော့ ထပ်မေးတယ်။ အာ့အချိန်ရော လစာယူလားဆိုပြီး။ ယူတယ်ပြောတဲ့အခါ လစာယူထားရင် စာသင်ရရမှာပဲ ဆိုတဲ့သဘော ပြောခဲ့တာပါ ”ဟု ကိုနောင်ထက်အောင် က ဆက်လက်ပြောဆိုရှင်းပြသည်။

မတ်လကုန်အထိ စာသင်ကြားရမည့်ကိစ္စနှင့်ပတ်သက်ပြီး ဇန်နဝါရီ ၇ ရက်နေ့က စစ်ကိုင်းပညာရေးကောလိပ်၌ ကန့်ကွက်သည့်အနေဖြင့် ဖဲကြိုးစိမ်းလှုပ်ရှားမှုစတင်ပြုလုပ်ခဲ့ပြီး ယနေ့ နံနက် (ဇန်နဝါရီ ၉) ပညာရေးဝန်ကြီးဒေါက်တာမျိုးသိမ်းကြီး တောင်ငူမြို့ပညာရေးကောလိပ်ကို ရောက်ရှိစဉ် ယင်းကောလိပ်ကျောင်းသားများကလည်း ဖဲကြိုးစိမ်းကန်ပိမ်းကို စတင်လှုပ်ဆောင်ခဲ့ကြသည်။

ပညာရေးဝန်ကြီးဌာနတာဝန်ရှိသူများသည် အခြေခံပညာဦးစီးဌာနလက်အောက်ရှိ ဆရာဆရာမများ၊ ဝန်ထမ်းများ၊ ကျောင်းသားသမဂ္ဂများ၏ ဝေဖန်မှုများနှင့် သဘောထားကိုလစ်လျှူရှုခြင်း၊ သင်ရိုးသစ်သင်ရိုးဟောင်း စာသင်ကာလများကို စနစ်တကျခွဲဝေမှုမရှိသည့်အပြင် ကျောင်းပိတ်ရက်ဖွင့်ရက်များနှင့်ပတ်သက်ပြီး စနစ်တကျ ခွဲဝေမှုမရှိခြင်းတို့ကြောင့် ဖဲကြိုးစိမ်းလှုပ်ရှားမှုများကို လုပ်ဆောင်ရခြင်းဖြစ်သည်ဟု ပညာရေးတက္ကသိုလ်နှင့် ကောလိပ်ကျောင်းသားများက ဆိုသည်။

စာသင်ချိန်ကာလတိုးမြှင့်မှုအပေါ် အခြေခံပညာနှင့် အဆင့်မြင့်ပညာပူးပေါင်းဆောင်ရွက်ရေးကော်မတီ၊ မြန်မာနိုင်ငံလုံးဆိုင်ရာဆရာ ဆရာမများ အဖွဲ့ချုပ်တို့ကလည်း ကန့်ကွက်ထားပြီး ပြင်ဆင်မှုမလုပ်ပေးပါက၂၀၂၀ ရွေးကောက်ပွဲတွင် မဲရုံတာဝန်များကို ယူမည်မဟုတ်ကြောင်း ထုတ်ပြန်ထားသည်။

R-15