News

POST TYPE

POPULAR POST

သင်္ဃန်းကျွန်း၌ နေ့ခင်းကြောင်တောင် နေအိမ်ထဲဝင် အနုကြမ်းစီး
01-Nov-2016

ရန်ကုန်၊ နိုဝင်ဘာ ၁
အခင်းဖြစ်ပွားသည့် အိမ်အားတွေ့ရစဉ် (ဓါတ်ပုံ-ခိုင်စိုးလင်း)

သင်္ဃန်းကျွန်းမြို့နယ် လေးထောင့်ကန်ရပ်ကွက် ပြည်တော်အေးလမ်းတွင် အောက်တိုဘာ ၃၁ ရက် မွန်းလွဲ ၁ နာရီ ၄၅ မိနစ်က အမျိုးသားနှစ်ဦး နေအိမ်ထဲဝင်ရောက်ပြီး အိမ်ရှင်အမျိုးသမီးကို ချွှန်ထက်သောအရာဖြင့် ထောက်ကာ လက်ဝတ်ရွှေထည်ပစ္စည်းများ လုယက်ခဲ့ကြောင်း သင်္ဃန်းကျွန်းမြို့မ ရဲစခန်းထံမှ သိရသည်။

"အစ်မရေလို့ခေါ်သံကြားမိတာကြောင့် ကျွန်မက နောက်ဖေးမှာ ငါးနွင်ရာက အိမ်ရှေ့ခန်း ထွက်လာတယ်။ အမျိုးသား နှစ်ယောက်က အိမ်ထဲ ရောက်နေပြီး တစ်ယောက်က ကျွန်မဗိုက်ကို ချွှန်တဲ့အရာတစ်ခုခုနဲ့ လှမ်းထောက်ပြီး မအော်နဲ့ပြောတယ်။ နောက်ဖေးကို ဆွဲခေါ်သွားပြီး ဝတ်ထားတဲ့ နားကပ်နဲ့ လက်ကောက်နှစ်ကွင်းကို ဆွဲဖြုတ်ယူတယ်။ တစ်ယောက်က အိမ်ထဲ မွှေပြီး ဘီရိုထဲမှာ သိမ်းထားတဲ့ ရွှေဆွဲကြိုးကို ယူသွားတယ်။ သူတို့ပြန်ထွက်သွားတော့ အော်ဟစ်အကူအညီ တောင်းချင်ပေမယ့် ကြောက်လန့်နေလို့ ကျွန်မအသံတွေ မထွက်တော့ဘူး"ဟု အနုကြမ်းစီးခံရသည့် အိမ်ရှင်အမျိုးသမီးက ပြောသည်။

အနုကြမ်းစီး လုယက်ခံရသည့် နေအိမ်ဘေးတွင် လက်ဖက်ရည်ဆိုင်ရှိပြီး နေ့ခင်းကြောင်တောင် လမ်းအတွင်း လူအများစည်ကားစွာသွားလာချိန် လူစိမ်းနှစ်ဦး နေအိမ်ထဲ ဝင်ရောက်လုယက်ခဲ့သောကြောင့် ရပ်ကွက်နေသူများမှာ ထိတ်လန့်ကြောက်ရွံ့နေပြီး ၎င်းတို့၏ နေအိမ်တံခါးများကို သော့ခတ်ထားရကြောင်း ပြည်တော်အေးလမ်းနေသူများထံမှ သိရသည်။

လွတ်မြောက်နေဆဲဖြစ်သော လုယက်မှု ကျူးလွန်ခဲ့သူနှစ်ဦးကို သင်္ဃန်းကျွန်းမြို့မရဲစခန်းက ရာဇသတ်ကြီး ပုဒ်မ ၃၈၆ ဖြင့် အမှုဖွင့်စုံစမ်းနေကြောင်း ယင်းရဲစခန်းထံမှ သိရသည်။
ဓာတ်ပုံ - ခိုင်စိုးလင်း

  • VIA