News

POST TYPE

POPULAR POST

ကျောင်းအုပ်ရုံးခန်းအထိ နယ်ချဲ့လာသော မူးယစ်ဆေး အန္တရာယ် (Daily, Vol-4/ No-175)
31-Oct-2016

ရှမ်းပြည်နယ်မြောက်ပိုင်း ကျောက်မဲမြို့ရှိ မူလတန်းလွန် ကျောင်းအုပ် ဆရာကြီး တစ်ဦး၏ ကျောင်းရုံးခန်း အတွင်းမှ မူးယစ်ဆေး သုံးစွဲသည့် ပစ္စည်းများနှင့် မူးယစ်ဆေးဝါးများ ဖမ်းဆီးရမိကြောင်း သတင်းမှာ မြန်မာနိုင်ငံတွင် မူးယစ် ဆေးဝါးအန္တရာယ် မည်မျှ ဆိုးရွားနေကြောင်း ထပ်မံ သတိပေး ခေါင်းလောင်း ထိုးလိုက်ခြင်း ဖြစ်သည်။

 

ကလေးငယ်များကို လူတော်၊ လူကောင်းများ ဖြစ်ရန် သွန်သင် ဆုံးမပေးရမည့်သူ ဖြစ်သည့်အပြင် ယင်းကျောင်းမှ ဆရာ၊ ဆရာမများကိုလည်း စည်းကမ်းနှင့်အညီ စီမံခန့်ခွဲ အုပ်ချုပ်ရသော ကျောင်းအုပ်ဆရာကြီး တစ်ဦးက ကျောင်းအတွင်း၌ပင် မူးယစ်ဆေးဝါးများ ထားရှိ သုံးစွဲနေခြင်းမှာ များစွာ တုန်လှုပ်ဖွယ် ကောင်းလှသည်။

 

ကုန်ခဲ့သည့် အနှစ် သုံးဆယ်ခန့်က ဘိန်းစိုက်ပျိုးထွက်ရှိခြင်း၊ မူးယစ်ဆေးဝါး ချက်လုပ်ရာတွင် အသုံးပြုသော ဓာတုဆေးဝါးများကို အိမ်နီးချင်း နိုင်ငံများမှ ဝယ်ယူရ လွယ်ကူခြင်းတို့ကြောင့် ရှမ်းပြည်နယ်နှင့် ကချင်ပြည်နယ်တို့သည် မူးယစ်ဆေးဝါး တရားမဝင် ရောင်းဝယ် ဖောက်ကားမှု၊ ကျား၊ မ၊ လူကြီး၊ လူငယ် မရွေး မူးယစ်ဆေးဝါး သုံးစွဲမှုတို့ဖြင့် နာမည် ကျော်ကြားနေသော ပြည်နယ်များ ဖြစ်သည်။

 

ကချင်ပြည်နယ်မြို့တော် မြစ်ကြီးနားရှိ တက္ကသိုလ် ပရိဝုဏ် အနီးတစ်ဝိုက်တွင် မူးယစ်ဆေး အကြောအတွင်း ထိုးသွင်းသည့် တစ်ခါသုံး ဆေးထိုးအပ်များ မြင်မကောင်း၊ ရှုမကောင်း နေရာအနှံ့ တွေ့နေရခြင်း၊ ဖားကန့် ကျောက်စိမ်းမြေတွင် မူးယစ်ဆေး သုံးစွဲ၍ ဘဝပျက် သေဆုံးသူ အထူး များပြားနေခြင်းတို့မှာ အံ့သြ ထိတ်လန့်ဖွယ် ကောင်းလှသည်။

 

ရှမ်းပြည်နယ်တွင်မူ ရှေးယခင်ကပင် အမျိုးသား အများစု ဘိန်းသုံးစွဲသည့် ဓလေ့ရှိခဲ့ပြီး ယခုနောက်ပိုင်းတွင် ထိုင်းနှင့် တရုတ်နိုင်ငံ နယ်စပ်ဒေသများတွင် ပမာဏ အများအပြားကို ဈေးပေါပေါဖြင့် အချိန်တိုအတွင်း လျင်မြန်စွာ ထုတ်လုပ် ဖြန့်ဖြူးနေသော စိတ်ကြွဆေး သုံးစွဲသူ ဦးရေ ပိုများပြား လာပေသည်။

 

ယနေ့ မြန်မာ တစ်နိုင်ငံလုံးရှိ နေရာဒေသ၊ မြို့၊ ရွာအသီးသီးတွင် နေ့စဉ် ရက်ဆက်နီးပါး မူးယစ်ဆေးဝါးများ ဖမ်းဆီး ရမိနေသော သတင်းများကို ကြည့်လျှင် ဖော်ပြပါ ရှမ်းနှင့် ကချင်ပြည်နယ်များ ကဲ့သို့ ဖြစ်လာနေပြီလောဟု မေးခွန်းထုတ်စရာ ဖြစ်နေပေသည်။

 

အထူး စိုးရိမ်စရာ ကောင်းသည်မှာ ဖမ်းမိသော မူးယစ်ဆေးဝါးများမှာ ဈေးကွက်အတွင်း အမှန်တကယ် ဖြန့်ချိနေသော ပမာဏ၊ ပြည်ပနိုင်ငံများသို့ ပို့ဆောင်နေသော ပမာဏတို့ထက် များစွာ လျော့နည်းနေခြင်း၊ မူးယစ်ရာဇာကြီးများ၊ ကုန်သည်ကြီးများထက် ကြားခံ သယ်ယူဖြန့်ချိပေးသူ အငယ်စား၊ အသေးစားများနှင့် ပိုင်ရှင်မဲ့အဖြစ်သာ အများဆုံး ဖမ်းမိနေခြင်းနှင့် အခြေခံပညာ ကျောင်းပရိဝုဏ်အနီး ပတ်ဝန်းကျင်နှင့် ပရိဝုဏ် အတွင်းသို့ပါ မူးယစ်ဆေး သားကောင်များ၊ ဖြန့်ချိသူများ ကွန်ရက်ဖြန့်ကြက် လာနိုင်ခြင်းပင် ဖြစ်သည်။

 

အထူးသဖြင့် မူးယစ်ဆေးဝါး သုံးစွဲနေသော ကျောင်းအုပ်ဆရာကြီး အုပ်ချုပ်နေသော ကျောင်းတွင် စာသင်ကြားပေးနေသော ဆရာ၊ ဆရာမများ၊ ထိုဆရာ၊ ဆရာမများထံမှ သင်ကြားနာယူ နေကြသော ကျောင်းသား၊ ကျောင်းသူများ၏ ကံကြမ္မာမှာ အထူး ဝမ်းနည်း စိုးရိမ်ဖွယ် ကောင်းလှသည်။

 

မူးယစ်ဆေးဝါး ပြဿနာသည် မြန်မာနိုင်ငံ လက်ရှိ အကောင်အထည်ဖော် ဆောင်ရွက်နေသော ပြည်တွင်းစစ် ရပ်စဲရေးနှင့် ငြိမ်းချမ်းမှု တည်ဆောက်ရေး နည်းတူ အထူး အရေးကြီးသော ပြဿနာ သို့မဟုတ် များစွာ ရှုပ်ထွေးပွေလီ နက်နဲသော ပုစ္ဆာတစ်ပုဒ်လည်း ဖြစ်သည်။

 

ပြည်တွင်းစစ် နောက်ကွယ်တွင် ကိုယ်ကျိုးစီးပွားများ၊ နိုင်ငံကြီး အချို့၏ သြဇာသက်ရောက်၊ ခြယ်လှယ်မှုများ ရောယှက် ပွေရှုပ်နေသကဲ့သို့ မူးယစ်ဆေးဝါး ပြဿနာသည်လည်း နောက်ကွယ်တွင် ဇာတ်လမ်းပေါင်း များစွာ ပါဝင်ပတ်သက်၊ လိမ်ယှက် ရှုပ်ထွေးနေပေသည်။

 

ကျောင်းပေါက်မှသည် ကျောင်းပရိဝုဏ် အတွင်းရှိ ကျောင်းအုပ်ရုံးခန်း အထိပါ ရောက်နေသော မူးယစ်ဆေးဝါး ပျံ့နှံ့မှုကို ထိရောက်စွာ မနှိမ်နင်းနိုင်ပါက နိုင်ငံ၏ အနာဂတ် အညွန့်အဖူးကလေများ အချိန် မတိုင်မီ လွင့်ကြွေ သွားနိုင်ပြီး နိုင်ငံတော်၏ ဂုဏ်သိက္ခာ အဆင့်အတန်း လျော့ကျကာ ဒီမိုကရေစီ ပန်းတိုင်သို့ သွားမည့် ခရီးလမ်းကိုပါ ကြီးစွာ အနှောင့်အယှက် ဖြစ်စေနိုင်ကြောင်း သိစေအပ်ပေသည်။

 

အယ်ဒီတာ (၃၁-၁ဝ-၂ဝ၁၆)



  • VIA