News

POST TYPE

POPULAR POST

အစ္စလာမ်ဘာသာကို တရုတ်ဇာတ်သွင်းမည့် ဥပဒေသစ်တစ်ရပ် တရုတ်အစိုးရ ပြဋ္ဌာန်း
07-Jan-2019



ဘေဂျင်း၊ ဇန်နဝါရီ ၆ 

တရုတ်ပြည်သူ့သမ္မတနိုင်ငံသည် အစ္စလာမ်ဘာသာကို တိုင်းပြည်နှင့် လိုက်လျောညီထွေမှုရှိအောင် လာမည့်ငါးနှစ်တာ ကာလအတွင်း ပြုလုပ်ပေးနိုင်မည့် ဥပဒေသစ်တစ်ရပ်ကို ရေးဆွဲအတည်ပြုလိုက်ပြီ ဖြစ်ကြောင်း နိုင်ငံပိုင် Global Times ၏ ရေးသားဖော်ပြချက်ကို Aljazeera သတင်းဌာနက ကိုးကားဖော်ပြသည်။ 

အင်္ဂလိပ်ဘာသာဖြင့် ပုံနှိပ်ထုတ်ဝေပြီး တရုတ်ကွန်မြူနစ်ပါတီအာဘော် သတင်းစာဖြစ်သော ယင်း Global Times ၏ ဖော်ပြချက်အရ အစ္စလာမ်ဘာသာရေး အဖွဲ့အစည်းရှစ်ခုမှ ကိုယ်စားလှယ်များနှင့် တရုတ်အစိုးရအရာရှိများ တွေ့ဆုံဆွေးနွေးပြီးနောက် အစ္စလာမ်ဘာသာကို တရုတ်ပြည်၏ ဆိုရှယ်လစ်စနစ်နှင့် လိုက်လျောညီထွေမှုရှိစေရန် သဘောတူညီမှုရရှိခဲ့ကြသည်ဟု ဆိုသည်။ 

ယင်းသဘောတူညီချက် သို့မဟုတ် ဥပဒေသစ်ပေါ်ထွက်ရန် ကြိုးပမ်းချက်နှင့် ပတ်သက်၍ သတင်းဌာနများက“အစ္စလာမ်ဘာသာကို တရုတ်ဇာတ်သွင်းခြင်း”ဟု ရေးသားဖော်ပြကြသည်။ 

သို့သော် တရုတ်အစိုးရအရာရှိကြီးများနှင့်တွေ့ဆုံကာ ဥပဒေသစ်အတွက် ဆွေးနွေးခဲ့ကြသည့် အစ္စလာမ်ဘာသာရေး အဖွဲ့အစည်းများ၏ အမည်ကို Global Times က ထုတ်ဖော်အသိပေးခြင်းမရှိသလို ဥပဒေနှင့်ပတ်သက်သည့် အသေးစိတ် အချက်အလက်များကိုလည်း ထုတ်ဖော်ရေးသားမှု မပြုခဲ့ပေ။ 

သမ္မတရှီကျင့်ဖျင်လက်ထက်တွင် ဘာသာရေးလွတ်လပ်ခွင့်များ ပိုမိုလျော့ကျ လာခဲ့သည့် တရုတ်နိုင်ငံသည် လတ်တလောနှစ်များအတွင်း ဘာသာရေးအဖွဲ့အစည်းများနှင့် ဘာသာတရားများအား တရုတ်ဇာတ်သွင်းသည့် စီမံချက်များကို အစွမ်းကုန် အကောင်အထည်ဖော်လျက်ရှိသည်။ 

တရုတ်နိုင်ငံ နေရာအတော်များများတွင် အစ္စလာမ်ဘာသာရေးလှုပ်ရှားမှုများကို ကန့်သတ်ပိတ်ပင်ထားသည်။ ဝတ်ပြုဆုတောင်းခြင်း၊ ဥပုသ်စောင့်ခြင်း၊ မုတ်ဆိတ် အရှည်ထားခြင်း၊ ဟာဂျစ်ခေါင်းစွပ်ဆောင်းခြင်း၊ မွတ်ဆလင်အမျိုးသမီးများ ခေါင်းစည်းပဝါဝတ်ခြင်း စသည်တို့ကိုဘာသာရေး ထုံးတမ်းဓလေ့အဖြစ် ပြုလုပ်မည်ဆိုပါက ဖမ်းဆီးခံရမည်ဟု ခြိမ်းခြောက်ထားသည်။ 

ကုလသမဂ္ဂ၏ အဆိုအရ အူဂါမွတ်ဆလင် တစ်သန်းကျော်ခန့်မှာ ဘာသာရေး ယုံကြည်မှုမရှိသည့် တရုတ်ကွန်မြူနစ်ပါတီအပေါ် သစ္စာစောင့်သိသွားရန် ဝါဒဖြန့်သည့် သင်တန်း (စခန်း) များသို့ မဖြစ်မနေ တက်ရောက်ကြရသည်။ လူ့အခွင့်အရေးအုပ်စုများကမူ တရုတ်ပြည်သည် လူမျိုးရေး ရှင်းလင်းမှုတစ်ရပ်ကို ပီပီပြင်ပြင်အကောင် အထည်ဖော်နေခြင်းဖြစ်သည်ဟု စွပ်စွဲပြောဆိုကြသည်။ 

AP သတင်းဌာန၏ ဖော်ပြချက်အရ တရုတ်နိုင်ငံရှိဗလီများတွင် အမိုးအခုံးများနှင့် လခြမ်းများ ဖယ်ရှားခံရသလို အာရပ်ဘာသာစကား သင်တန်းနှင့် အစ္စလာမ်ဘာသာရေးကျောင်းများလည်း ဖွင့်လှစ်ခွင့်မရှိပေ။ မွတ်ဆလင်ကလေးငယ်များအနေနှင့်လည်း အစ္စလာမ်ဘာသာရေးဆိုင်ရာ သင်တန်းများသို့ တက်ရောက်ခွင့် မရှိပေ။ 

သို့သော် တရုတ်အစိုးရက ဘာသာရေးဆိုင်ရာ နှိပ်ကွပ်မှုများရှိသည်ဟူသော စွပ်စွဲချက်များသည် မှန်ကန်မှုမရှိကြောင်း ငြင်းဆိုသည်။ တရုတ်နိုင်ငံအနေနှင့် နိုင်ငံတွင်းရှိ လူနည်းစုများ၏ ဘာသာရေးနှင့်ယဉ်ကျေးမှုများကို အကာအကွယ်ပေးထားကြောင်း အခိုင်အမာပြောဆိုသည်။ 

သို့သော် ပြီးခဲ့သည့်သီတင်းပတ်အတွင်း မြန်မာနှင့် နယ်စပ်ချင်းထိစပ်နေသည့် ယူနန်ပြည်နယ်ရှိဗလီသုံးခုကို အာဏာပိုင်များက ပိတ်ပင်လိုက်ကြောင်း၊ ယင်းဗလီသည် ဟွာမွတ်ဆလင်လူနည်းစုတို့ ဝတ်ပြုနေသည့် ဗလီများဖြစ်ကြောင်း ဟောင်ကောင်သတင်းစာ South China Morning Post က ရေးသားဖော်ပြသည်။

F-01