News

POST TYPE

POPULAR POST

ဦးစိုးထွန်းရှိန်အပါအဝင် ဒါရိုက်တာ ၄ ဦးကို ကမ္ဘာ့ရတနာဘဏ် အမှုဖွင့်
04-Dec-2018

ရန်ကုန်၊​ ဒီဇင်ဘာ ၄

ကမ္ဘာ့ရတနာဘဏ်မှ ချေးယူထားငွေ ကျပ်သိန်းတစ်သောင်းခွဲကို ပြန်လည်ပေးဆပ်ခြင်း မရှိသဖြင့် အာရှကြီးပွားတိုးတက်ရေး ပို့ကုန်သွင်းကုန်ကုမ္ပဏီမှ အုပ်ချုပ်မှု ဒါရိုက်တာ အပါအဝင် လေးဦးကို ဒီဇင်ဘာ ၃ ရက်နေ့က ပန်းဘဲတန်းမြို့မ ရဲစခန်းတွင် လိမ်လည်မှုဖြင့် အမှုဖွင့်အရေးယူထားကြောင်း ရဲတပ်ဖွဲ့ထံမှ စုံစမ်းသိရှိရသည်။

ကုန်သည်လမ်းရှိ ကမ္ဘာ့ရတနာဘဏ်တွင် အာရှကြီးပွားတိုးတက်ရေး ပို့ကုန် သွင်းကုန် ကုမ္ပဏီမှ​အုပ်ချုပ်မှု ဒါရိုက်တာ ဦးစိုးထွန်းရှိန်က လာရောက်၍ ကုမ္ပဏီပိုင် စက်ရုံမှတ်ပုံတင် မိတ္တူ၊ ကုမ္ပဏီ မှတ်ပုံတင်မိတ္တူ၊ ကုမ္ပဏီ မှတ်ပုံတင်ရုံး၏ ပုံစံ (င)၊ ပုံစံ (၆)၊ ပုံစံ (၂၆) မိတ္တူတို့ကို တင်ပြခဲ့သည်။

ယင်းနောက် အမေရိကန်ဒေါ်လာ သိန်း ၄၀ နီးပါးရှိ အေးခဲထားသော ရေထွက်ပစ္စည်း ကုန်ချောတန်ချိန် ၃၅၄၁ တန်ရှိကြောင်းနှင့် ကုမ္ပဏီရှိ ရင်းနှီးမြှုပ်နှံထားသည့် ငွေပမာဏတို့နှင့်အတူ ရေထွက်ကုန်ချောပစ္စည်းများ အမှန်တကယ်ရှိကြောင်း ငါးလုပ်ငန်းဦးစီးဌာန၏ ထောက်ခံချက်ပါ ပူးတွဲတင်ပြလာ၍ ကမ္ဘာ့ရတနာဘဏ်မှ ကျပ်သိန်း တစ်သောင်းခွဲကို ထုတ်ယူခဲ့သော်လည်း ယနေ့အချိန်ထိ ရယူသွားသည့် ငွေနှင့်ဘဏ်အတွက် အကျိုးအမြတ်ကို ပေးဆပ်လာခြင်း မရှိခဲ့သောကြောင်း စုံစမ်းရာ ယင်းကုမ္ပဏီမှ​ရေထွက်ကုန်ပစ္စည်းများကို ပြည်ပသို့ တင်ပို့ရောင်းချပြီးဖြစ်ကြောင်း သိရှိခဲ့သည်။

ကုန်ပစ္စည်းများကို ပြည်ပသို့ တင်ပို့ရောင်းချပြီးပါက ဘဏ်မှ ရယူထားသည့်ငွေများကို ပေးသွင်းမည်ဟု ပြောဆိုပြီး ငွေများ ထုတ်ယူထားသူ အာရှကြီးပွားတိုးတက်ရေး ပို့ကုန်သွင်းကုန် ကုမ္ပဏီမှ အုပ်ချုပ်မှု ဒါရိုက်တာ ဦးစိုးထွန်းရှိန် အပါအဝင် ဦးကြည်ရှိန်၊ ဦးခင်မောင်အုန်း၊ ဒေါ်နီလာရှိန်တို့ကို အရေးယူပေးပါရန် ကမ္ဘာ့ရတနာဘဏ်မှ ဒု အထွေထွေမန်နေဂျာ ဦးထင်အောင်က တရားလိုပြု တိုင်ကြားလာသဖြင့် ပန်းဘဲတန်းမြို့မ ရဲစခန်းက လိမ်လည်မှုပုဒ်မဖြင့် အမှုဖွင့် အရေးယူထားပြီး စုံစမ်းစစ်ဆေးမှုများ ဆောင်ရွက်သွားမည်ဖြစ်ကြောင်း ရဲတပ်ဖွဲ့ထံမှ စုံစမ်းသိရှိရသည်။

လိမ်လည်မှုဖြင့် အမှုဖွင့်ခံရသူ ဦးစိုးထွန်းရှိန်မှာ မိုးထိ မိုးမိဒေသတွင် ရွှေတူးဖော်ရေးလုပ်ငန်း လုပ်ကိုင်ခဲ့သော အမျိုးသားကြီးပွားတိုးတက်ရေး ကုမ္ပဏီ ဥက္ကဋ္ဌဖြစ်ပြီး ယင်းကုမ္ပဏီမှာ နိုင်ငံတော်သို့ သတ်မှတ်ထားသော ရွှေပိဿာချိန် ပေးသွင်းခြင်းမရှိသဖြင့် ၂၀၁၇ ခုနှစ် နိုဝင်ဘာလမှ လုပ်ငန်း ရပ်ဆိုင်းခံခဲ့ရသည်။

လုပ်ငန်း ရပ်ဆိုင်းထားချိန်တွင် ခွင့်ပြုချက်မရှိဘဲ ရွှေတူးဖော်သည်ဟုဆိုကာ ဦးစိုးထွန်းရှိန်ကို ထောင်ဒဏ် ၁၀ နှစ်အထိ ချမှတ်နိုင်သော သတ္တုတွင်း ဥပဒေပုဒ်မ ၃၀ (ဃ)ဖြင့် အမှတ် (၂) သတ္တုတွင်းလုပ်ငန်းက အမှုဖွင့်ခဲ့သည်။

ဦးစိုးထွန်းရှိန်မှာ လွန်ခဲ့သော ၂၀၁၄ ခုနှစ် ဇွန်လ ၉ ရက်က သရုပ်ဆောင် ချမ်းမီမီကို နှင့် လက်ထပ်ခဲ့ရာ Sule Shangrila ဟိုတယ်၌ ပြုလုပ်ခဲ့သည့် ၎င်းတို့၏ မင်္ဂလာဧည့်ခံပွဲနှင့် ညစာ စားပွဲတွင် ၎င်းတို့၏ မင်္ဂလာပျားရည်ဆမ်းအဖြစ် လကမ္ဘာကို သွားရောက်မည်ဟု ဦးစိုးထွန်းရှိန်က မီဒီယာကို ပြောကြားခဲ့သူဖြစ်သည်။