News

POST TYPE

POPULAR POST

အခြေခံပညာ ဦးစီးဌာန ညွှန်ကြားရေးမှူးချုပ် ဦးအောင်သန်းဦးနှင့် တွေ့ဆုံခြင်း
04-Oct-2016
ဆရာများ၏ လစာတိုးရေးကိစ္စမှာ အချိန်ယူ ပြင်ဆင်နေမှုများကြောင့် သြင်္ကန်အမြောက် ဖြစ်နေသေးသည်။ ဝန်ကြီးဌာန အနေနှင့်လည်း လစာတိုးပေးရန် ဆန္ဒရှိသော်ငြား ရေရှည်ခိုင်မာရန် အရေးကိုလည်း စဉ်းစားဆောင်ရွက်နေရသည့် အခြေအနေ ဖြစ်နေသည်။ စီမံအပိုင်းနှင့် သင်ကြားရေးအပိုင်း၏ လစာနှင့် ရာထူး သတ်မှတ်ချက်များကိုလည်း ဖြေရှင်းနေရသေးသည်။  ယခု ၂၀၁၆-၂၀၁၇ ပညာသင်နှစ်မှစ၍ သူငယ်တန်း (KG) ကို သင်ရိုးညွှန်းတမ်းအသစ်ဖြင့် စတင် ပြဋ္ဌာန်းသင်ကြားစေခဲ့သည်။ ထို့ပြင် စတုတ္ထတန်း ခရိုင်စစ်နှင့် အဋ္ဌမတန်း တိုင်းစစ်စာမေးပွဲ ကုစား (နောက်ဆက်တွဲ ဖြည့်ဆည်းစာမေးပွဲ) ဆက်ရှိ၊ မရှိ အခြေအနေများလည်း ထုတ်ပြန်ချက် အမျိုးမျိုးကြောင့် သို့လောသို့လော ဖြစ်နေရသည်။ 
ယင်းအခြေအနေများနှင့် ပတ်သက်၍ စက်တင်ဘာလ ၂၆ ရက်က ရန်ကုန်မြို့၊ လှိုင်တက္ကသိုလ်နယ်မြေ MICT Prak တွင် ဗြိတိန်အစိုးရ နိုင်ငံတကာ ဖွံ့ဖြိုးရေးဌာန (DFID)၊ ဗြိတိသျှကောင်စီနှင့် ပညာရေး ဝန်ကြီးဌာနတို့ ပူးပေါင်းပြုလုပ်သည့် သင်ကြား၊ သင်ယူကောင်းမွန်ပြီး ပညာရေး အရည်အသွေး မြင့်မားစေရန် ရည်ရွယ်သည့် Connection Classrooms အလုပ်ရုံ ဆွေးနွေးပွဲ ဖွင့်ပွဲသို့ တက်ရောက်လာသည့် အခြေခံပညာဦးစီးဌာန ညွှန်ကြားရေးမှူးချုပ် ဦးအောင်သန်းဦးနှင့် The Voice တို့ ခေတ္တတွေ့ဆုံခွင့်ရခိုက် မေးမြန်းခဲ့သည်များကို စာဖတ်ပရိသတ်အတွက် ကောက်နုတ်ဖော်ပြလိုက်ပါသည်။

Voice : ပညာရှင်အဆင့် (၁)၊ (၂)၊ (၃) သတ်မှတ်ပြီးမှ လစာတိုးမယ့်ကိစ္စ မူဝါဒက ဘယ်လိုရှိတယ် ဆိုတာ နားလည်အောင် ရှင်းပြပေးစေချင်ပါတယ် ခင်ဗျ။ 

UATO : သူက ဒီလိုလေ ဆွေးနွေးဆဲကိစ္စ ဖြစ်တဲ့အတွက် သိပ်ပြီးတော့ ပြောလို့မရဘူး။ ကျွန်တော်တို့က နိုင်ငံတော်မှာ လစာက သူ့ဟာသူ အဆင့်ဘယ်လောက်ရှိတယ် ဆိုပြီး ဟိုးအောက်ခြေဝန်ထမ်းကနေ အခုကနေ့ဆိုရင် အတွင်းဝန်အထိ ဒီလိုရာထူးတွေမှာ လစာစကေး ဘယ်လောက်ရှိတယ် ဆိုတာ သတ်မှတ်ထားတယ်။ သတ်မှတ်ထားတဲ့ အခါကျတော့ ကျွန်တော်တို့က ဒီကနေ ကျော်လွန်ပေးလို့ မရဘူး။ ကြားစကေး သွားပေးလို့လည်း မရဘူး။ ရာထူးတစ်ဆင့် ခုန်ကျော်လို့လည်း မရဘူး။ ဥပမာ- ကျွန်တော်တို့က လစာဘယ်လောက်ဆိုရင် သူနဲ့ညီမျှတဲ့ (Equivalent) ရာထူးတွေက ဘေးမှာတန်းစီရေးထားတယ်။ ဥပမာ- စာရေး၊ ဆရာမ မူလတန်း၊ ဟိုဘက်က ယာဉ်မောင်း၊ စက်မောင်း ပေါ့စသဖြင့် သူ့ဌာနတွေရဲ့ ဖွဲ့စည်းပုံအရ မျိုးစုံရေးထားတာပေါ့။ လစာနှုန်းထား တစ်ခုမှာ ဒီလစာနှုန်းထားကို ဘယ်သူတွေ ခံစားခွင့်ရှိတယ် ဆိုတာ ရေးထားတာပေါ့။ အလားတူပဲ နောက် ရာထူးတစ်ဆင့်မှာ ဆိုရင်လည်း လစာနှုန်းထားတွေ ဘေးမှာ တန်းစီရေးထားတာ ဖြစ်ပါတယ်။ အဲဒီတော့ အခုဆိုရင် ကျွန်တော်တို့ ပညာရေးကျတော့ မူလတန်းပြဆရာမ ဆိုရင် ဘယ်လစာ စကေးအုပ်စုထဲမှာ ရှိတယ်။ ဒါ ကျွန်တော်တို့က ရေးထားတာပေါ့။ နိုင်ငံတော်က သတ်မှတ်ထားတာပေါ့။ 

အလယ်တန်းပြဆိုရင် ဘယ်အုပ်စုထဲမှာ ရှိတယ်။ အထက်တန်းပြဆိုရင် ဘယ်အုပ်စုထဲမှာ ရှိတယ်။ အဲလိုရှိနေတဲ့အခါ ကျွန်တော်က မူလတန်းပြကို အလယ်တန်းပြလစာ ပေးချင်တယ် ဆိုပါစို့။ ဒီတိုင်းပေးလို့ မရဘူး။ သူက နာမည်ကိုက မူလတန်းပြက ဘယ်စကေးဆိုတာ အဲဒီစကေး သတ်မှတ်ချက်ကို ပြန်ပြင်ရမှာ။ ဥပမာ- အလယ်တန်းပြ လစာပေးချင်တယ် ဆိုရင် မူလတန်းပြကို နဂိုရှိတဲ့ဟာကို (၁) ဆိုပါစို့။ သူ့ Cretria တစ်ခုပေါ့။ ဘယ်နှနှစ်ရှိရမယ်။ ဘွဲ့ရရမယ်။ ဘာလုပ်ရမယ်။ ညာလုပ်ရမယ်။ ဒီလိုသတ်မှတ်ချက်တွေပေါ့။ သူ့ကို မူလတန်းပြ (၂) ဆိုပြီး ရာထူး တီထွင်ရမှာပေါ့။ တီထွင်လိုက်ရင် အဲဒီ (၂) သည် ခုနက သူ့ရဲ့တစ်ဆင့် မြင့်သော မူလတန်းပြ (၁) ထက် တစ်ဆင့်မြင့်သော လစာနဲ့ ညီပါတယ်ဆိုတာ ပြန်ပြီး အစိုးရအဖွဲ့ကို တင်ပြီး သတ်မှတ်ရဦးမှာ။ အဲဒါဆိုရင် သူက လစာတိုးရသွားမှာပေါ့။ 

Voice : အခု အစိုးရအဖွဲ့ကို မတင်ရသေးဘူးလား ခင်ဗျ။ 

UATO : တင်တာတော့ တင်ထားပြီးပြီ။ ကျွန်တော်တို့က ဒါကြောင့်မို့လို့ ဟိုတစ်ခါက သတင်းစာရှင်းလင်းပွဲမှာ မေးပါတယ်။ ဒါတွေ ကျွန်တော်တို့ တွက်နေတုန်းပါ။ အများကြီး လုပ်ရတယ်။ ကျွန်တော်တို့ ပညာရေးထဲမှာလည်း တချို့ရာထူးတွေက ပြောင်းရတဲ့ဟာတွေ ရှိတယ်။ ဥပမာ- အထက်တန်းပြဆိုရင်၊ လက်ထောက်မြို့နယ် ပညာရေးမှူး (ATEO) ဆိုရင် အထက်တန်းပြလစာနဲ့ တူနေတယ်။ အထက်တန်းပြလစာ မြင့်သွားရင် ATEO ကျန်ခဲ့လို့ မဖြစ်ဘူး။ ဘယ်သူက ပြန်လာလုပ်မလဲ ဒီမှာ။ ရာထူးလျှော့ပြီး လစာလျှော့ပြီး ပြန်လုပ်ရမယ့် သဘော ဖြစ်သွားတာပေါ့။ ဟုတ်တယ်မလား။ အဲဒါကြောင့်မို့ မကျန်ခဲ့အောင် အများကြီး စဉ်းစားရတယ်။ ဘယ်ရာထူးက ဘယ်ကနေ ကူးရတယ်ဆိုတဲ့ သတ်မှတ်ချက်တွေ ရှိတယ်။ 

Voice : ဒီလိုဆိုရင် မူအသစ်မှာ အရင်တုန်းက ရှိခဲ့တဲ့ အလယ်တန်းပြ (မူသင်) ရာထူးက ပယ်ဖျက်လိုက်ပြီလို့ ပြောလို့ရမလား ခင်ဗျ။

UATO : အဲဒါတွေတော့ မပြောလိုသေးဘူး။ Approve မဖြစ်သေးတဲ့ ကိစ္စတွေ ကျွန်တော်တို့ကလည်း၊ ဆွေးနွေးဆဲ ကိစ္စတွေကလည်း ပြောလို့မရသေးဘူး။ အခုပြောပြတာက သဘောပေါက်အောင်လို့ ပြောပြတာ။ အတိအကျတော့ ထွက်လာရင် သိမှာပေါ့။ အများကြီး စဉ်းစားနေပါတယ်။ ဘယ်သူ့ဘယ်သူမှ မကျန်ခဲ့စေချင်ဘူး။ ဘယ်သူ့ဘယ်သူမှလည်း နစ်နာမသွားစေချင်ဘူး။ ဒါတော့ ကျွန်တော်တို့ဆီမှာလည်း ခေတ်စနစ်၊ နှစ်အလိုက် လိုအပ်ချက်တွေက အများကြီးလေ။ မူလတန်းပြထဲမှာလည်း အလယ်တန်းပြလစာ နဂိုကတည်းက စားနေတဲ့သူတွေ ရှိနေတယ်။ နှစ်ဘယ်လောက် ကြာပါတယ် ဆိုပြီးတော့။ အလယ်တန်းပြတွေကလည်း မူပြဆိုပြီး ဆင်းသင်နေတဲ့လူတွေ ရှိတယ်။ အမျိုးမျိုးရှိနေတယ်။ နည်းနည်းလိုအပ်ချက်အရ ကျောင်းတွေဖွင့်ကြ၊ ဆရာတွေက နောက်က မလောက်ဘူးဆိုတဲ့ အခါမှာ အဆင်ပြေအောင် လုပ်သွားခဲ့ရလို့ ရာထူးအမျိုးမျိုးတွေ၊ လစာအမျိုးမျိုးတွေ ကျွန်တော်တို့ဆီမှာ ရှိနေရတယ်။ ရှိနေတယ်ဆိုတော့ သူများလို လွယ်လွယ်လေး၊ ရှင်းရှင်းလေး မူပြဆို မူပြတစ်မျိုးတည်း ရှိတယ်။ လယ်ပြဆိုရင် လယ်ပြတစ်မျိုးတည်း ရှိတယ်။ ထက်ပြဆို ထက်ပြတစ်မျိုးတည်း ရှိတယ်ဆိုရင် လုပ်ရတာ လွယ်တာပေါ့။ အခုကတော့ မူလတန်းမှာ အလယ်တန်းလစာ စားနေတဲ့သူ ရှိတယ်။ အလယ်တန်းပြထဲမှာ အလယ်တန်းလစာ စားပြီး မူလတန်းပြ ဆင်းသင်နေတဲ့သူ ရှိတယ်။ 

အလားတူပဲ အထက်တန်းပြထဲမှာ မဟာဝိဇ္ဇာ (M.A) မဟာသိပ္ပံ (M.Sc) အောင်ထားတဲ့သူတွေကို အထက်တန်းပြ ယာယီပေးထားပြီး လစာမစားခိုင်းသေးဘူးပေါ့နော်။ အဲလိုသွားသင်ခိုင်းထားတဲ့ သူတွေလည်း ရှိတယ်ဆိုတဲ့အခါ ကျွန်တော်တို့မှာ အများကြီး ဖြစ်နေတယ်။ လူထုလိုလားချက်က ကျောင်းတွေ ဖွင့်ချင်တယ်၊ ဘာလိုချင်တယ်။ လိုချင်တဲ့အတိုင်း ကျွန်တော်တို့က နောက်က လိုက်လုပ်ရတာကိုး။ လုပ်ရတဲ့အခါမှာ ခုနပြောသလို ရာထူးအဆင့် ကန့်သတ်ချက်တွေနဲ့ ဘောင်ဝင်အောင် လိုက်လုပ်ပေးထားခဲ့ရတဲ့ ဟာတွေက အများကြီး ရှိနေတာပေါ့။ ဒါတွေကို အကုန်လုံး ပြန်ပြီးတော့ လူမှန်၊ နေရာမှန်၊ ရာထူးမှန် ဖြစ်အောင် ပြန်လုပ်တဲ့အခါမှာ ဒီလိုချိတ်ဆက်တဲ့ ရာထူးတွေကလည်း ရှိတယ်။ ဟိုဘက်၊ ဒီဘက် ကူးသွားတာ။ Admin ဆိုပေမယ့် ပညာရေး Admin ကျ ဆရာပဲ လုပ်လို့ရတယ်။ ကျန်တဲ့လူ အပြင်စာရေးလိုင်းက တက်တဲ့လူက ဝင်လုပ်လို့ မရဘူး။ အဲဒီတော့ အဲဒီရာထူးတွေကိုလည်း ချိန်ရသေးတယ်။ လစာတွေ၊ ရာထူးတွေက လွဲကုန်ရင် အရင်တုန်းက ရာထူးတက်တယ် ထင်ရတယ်။ အခုက ဒီဘက်က နဂိုရာထူးက လစာများသွားရင် ရာထူးပြန်ကျသလို ဖြစ်သွားမယ်။ ဒီရာထူးကို သွားပေးလိုက်ရင်လေ။ အဲဒါမျိုးတွေလည်း ကျွန်တော်တို့က ချိန်ဆပြီး အများကြီး တွက်ရတာပေါ့။ နိုင်ငံတော်ကလည်း ဘတ်ဂျက် ဘယ်လောက်ပေးမယ်ဆိုတာ မသိခဲ့ဘူး။ ကျွန်တော်တို့က အကြမ်းဖျင်းပေါ့နော် တစ်လကို ဘီလီယံ ၈၀ နဲ့ ၉၀ ကြား လစာသုံးရတယ်။ ပညာရေးဘတ်ဂျက်ရဲ့ ကျွန်တော့် အခြေခံဆိုရင် ရတဲ့ဘတ်ဂျက်ရဲ့ ၈၅ ရာခိုင်နှုန်းက လစာပြန်ပေးရတယ်။ တအားကြီးမားတယ်။ 

Voice : ဖုန်းဘေလ်အခွန်တွေလည်း ပညာရေးအတွက် သုံးတယ်လို့ သိရပါတယ်။ 

UATO : အဲဒါ ကျွန်တော်တို့အပိုင်း မဟုတ်ဘူးလေ။ ဖုန်းဘေလ်အခွန်က ဘယ်က ဘယ်လောက်ရတယ် ဆိုတာ ကျွန်တော်လည်း မသိဘူး။ နောက်တစ်ခါ ကျွန်တော်တို့ကို ဘယ်လောက်ခွဲပေးမလဲ ကျွန်တော်တို့ မသိဘူး။ နောက်တစ်ခါ တိုးပေးပြီးပါပြီ ဆိုပါစို့။ အလွယ်တကူခေါ်ရင် လစာတိုးတယ် ခေါ်တာပေါ့။ ရာထူးအဆင့် ပြောင်းတာပဲခေါ်ခေါ်၊ လစာတိုးတာပဲခေါ်ခေါ် တကယ်တော့ ငွေပိုပေးလိုက်တာပေါ့။ အဲဒီပိုပေးတာက Sustainable လို့ခေါ်တဲ့ တစ်သက်လုံး ပေးနိုင်ဖို့က လိုသေးတယ်။ ဒီလဖုန်းက အများကြီး ပြောကြလို့ ဆိုပါစို့ ၁၀ ဘီလီယံ ရတယ်။ နောက်လ သိပ်မပြောလို့ ခုနစ်ဘီလီယံပဲ ရတယ်။ သဘောပြောတာပါ။ တစ်နှစ်လုံး ပျမ်းမျှကျတော့ ဘယ်လောက်ပဲရှိတယ် ဆိုတာ ခုမှစကောက်တာ၊ တစ်နှစ်လုံး ဘယ်လောက်ရမယ် ဆိုတာ ဘယ်သူမှ မပြောတတ်သေးဘူး။ ပထမလ ကြည့်တာတော့ ထွက်လာတာပေါ့လေ။ နောက်လကျတော့ ကျချင်ကျသွားမယ်လေ။ ပိုချင်လည်း ပိုလာမယ်လေ မပြောနိုင်သေးဘူး။ ဒါကြီးက ပျမ်းမျှဆိုတာကလည်း ၁၂ လ ပြည့်မှ ထွက်မှာကိုး။ တစ်နှစ်နဲ့တစ်နှစ် တူချင်မှလည်း တူမှာလေ။ တစ်လနဲ့ တစ်လကတော့ မတူနိုင်ဘူး ထင်တယ်လေ။ ဒါပေမဲ့ ပိုတော့ တိုးလာနိုင်ပါတယ်။ ဘာလို့လဲဆိုတော့ လိုင်းတွေ ကောင်းလာတယ်။ သုံးလာကြတဲ့လူ ပိုများလာတယ်ဆိုတဲ့ အခါကျတော့။ 

ဒါပေမဲ့ ပေးပြီးပြီဆိုရင် အစိုးရဆိုတော့ ခုပေးလိုက် ခဏနေ ပြန်လျှော့မယ်။ ‘ဟာ မပေးနိုင်တော့ဘူး’ ဆိုပြီး အဲဒီလို ပြောလို့တော့ မရဘူး။ ပေးပြီဆိုရင် တောက်လျှောက်ပေးရတော့မှာ။ ဒါကြောင့်မို့လို့ ထိန်းထိန်းသိမ်းသိမ်း လုပ်နေတာလည်း ပါပါတယ်။ ပေးချင်တာပေါ့။ နိုင်ငံတော် အတိုင်ပင်ခံပုဂ္ဂိုလ်ကလည်း ပြောသွားတယ်လေ။ နိုင်ငံခြားမှာ ဆိုရင်လည်း မူလတန်းကို လစာအများဆုံး ပေးတာလေ။ ပေးချင်တာပေါ့။ ဒါပေမဲ့ အင်အားအများဆုံး ဖြစ်နေတယ်။ တစ်ခုတစ်ခု ပေးဖို့ဆိုတာ ရေရှည်ပေးနိုင်ဖို့ပေါ့။ 

Voice : ဟုတ်ကဲ့။ နောက်ထပ်တစ်ခုက အခြေခံပညာအဆင့် သင်ရိုးညွှန်းတမ်း ပြောင်းလဲရေးပေါ့။ ဒီနှစ်ကနေ စပြီးတော့ သူငယ်တန်း (KG) က သင်ရိုးညွှန်းတမ်း အသစ်နဲ့ စပြီးတော့ လုပ်နေတယ်ပေါ့။ နောက်နှစ်တွေမှာ ပထမတန်းကနေ စပြီးတော့ ၁၂ တန်းအထိ အားလုံး သင်ရိုးအသစ်လား။ သို့တည်းမဟုတ် တစ်တန်းချင်း ပြောင်းသွားမှာလား။ 

UATO : သြော် တစ်ပြိုင်တည်း အဲလိုပြောင်းလို့ မရဘူးလေ။ သူက ဟိုးတစ်ချိန်တုန်းက ပြောရင် မနှစ်ကအထိ သူငယ်တန်းက စာရေးသင်တယ်။ ‘ဝ’ လုံး သင်တယ်။ က၊ ခ သင်တယ်။ စာရေးတတ်အောင် သင်ပေးတယ်။ ဘာသာရပ်အလိုက် အထိုက်အလျောက် ဖတ်တတ်အောင် သင်ပေးတယ်။ ကနေ့ သူငယ်တန်း (KG) သင်ရိုးကို ပြန်သွားကြည့်လိုက်။ အဲလိုစာရေးဖို့ မသင်တော့ဘူး။ သူ့ရဲ့ အချင်းချင်း ပူးပေါင်းဆောင်ရွက်မှု၊ စဉ်းစားတတ်ပြီးတော့ လုပ်တတ်အောင်သင်တဲ့ ဟာမျိုးပေါ့။ စာရေးသင်တာမျိုးကို အခု သူငယ်တန်း (KG) က အဓိက မထားဘူး။ မထားတော့ အရင်ကဟာ အဲဒီလိုထားခဲ့တဲ့ဟာ။ အဲဒီကျောင်းသားတွေကို ဒီ Idea ကို ၁၂ တန်းလုံး တစ်ပြိုင်တည်း ပြောင်းလိုက်မယ်ဆိုရင် မဖြစ်သေးဘူးလေ။ 

အဲဒီတော့ တစ်နှစ်ချင်းပဲ ဒီအသစ်နဲ့ တက်လာတဲ့သူမှ ဒီအတွေးအခေါ်က စပါလာမှာ။ အဲဒါနဲ့ကိုက်အောင်လည်း တစ်တန်းချင်းကို ရေးသွားမှာ။ တစ်ခုပြီးတစ်ခု ရေးသွားမှာပေါ့။ အခုကတော့ တစ်တန်းပြီးသွားပြီ။ နှစ်တန်းဆက်ရေးမယ်၊ သုံးတန်းဆက်ရေးမယ် ဒီလိုသွားမှာပေါ့။ တစ်နှစ်မှာ တစ်ခု၊ တစ်ခု သွားတာက ပိုအဆင်ပြေတယ်။ တစ်ခါတည်း အဲဒီလို ဝုန်းဒိုင်းလုပ်လိုက်ရင် ဟိုဘက်က အလွတ်ကျက်စနစ်လို့ ကနေ့ပြောကြရမယ့် အနေအထားမျိုးက အတွေးအခေါ်စနစ်ကို သွားတဲ့အခါကျတော့ ချက်ချင်းသွားမယ်ဆိုရင် Revolution ပုံစံဖြစ်နေတယ်။ အကုန်လုံး အိုးနင်းခွက်နင်း ပုံစံတွေ ဖြစ်သွားမှာ။ 

Voice : လေးတန်း၊ ရှစ်တန်း အရင်တုန်းကတော့ ကုစားစာမေးပွဲပေါ့ ခင်ဗျာ။ ဒီနှစ်ကျတော့ နောက်ဆက်တွဲ ဖြည့်ဆည်းစာမေးပွဲ ဆိုပြီး ပြောင်းလိုက်တာက ဟုတ်လား ခင်ဗျ။ 

UATO : သြော် အခု ကျွန်တော်တို့က တကယ်တကယ်တော့ ပြန်ကြည့်လိုက်လေ။ စာမေးပွဲစစ်တယ်။ နှစ်ပတ်လောက် အမှတ်တွေ စစ်တယ်။ အောင်၊ ရှုံးတွေ ရလာတယ်။ အဲဒီတော့ကျမှ နောက် ကျောင်းမဖွင့်ခင်အမီမှာ တရမန်းကြမ်း သူ့ကို သင်တယ်။ တစ်ပတ်၊ ဆယ်ရက်၊ နှစ်ပတ်ပေါ့။ အလွန်ဆုံး သင်ရင်ပေါ့။ ပြီးတာနဲ့ပြန်စစ် ဆိုတော့ တကယ်တတ်တာလား။ ဒီမေးခွန်းကိုပဲပြင်ပြီး ပြန်အောင်အောင် ဖြေခိုင်းတာ လားဆိုတဲ့ ကိစ္စက ကုစားတဲ့ရည်ရွယ်ချက်ကို တိမ်ကောတဲ့ သဘော ဖြစ်သွားတာ။ ဒီနှစ်တော့ ကျွန်တော်တို့က ကုစားရဲ့ သဘောသဘာဝက ကလေးတွေကို တကယ်စာတတ်စေချင်တာ။ မတတ်ဘဲနဲ့ ခုနကလို လုပ်ပြီး အောင်သွားတယ်။ တစ်တန်းကလေးက နှစ်တန်း ရောက်သွားတယ်။ နှစ်တန်းသာ ရောက်သွားတယ် မတတ်တော့ နှစ်တန်းက ဆရာမ ဒုက္ခရောက်တာပေါ့။ နှစ်တန်းမှာလည်း အဲလိုပဲဖြစ်။ အခြေမခိုင်ရင် သုံးတန်းကဆရာ ဒုက္ခရောက်ပေါ့။ 

ဒီလိုပဲဖြစ်တာ ဆိုတော့ ဒီနှစ်ကိုတော့ နိုဝင်ဘာက စပြီးတော့ First Step ပေါ့လေ။ အကြမ်းဖျင်း အောက်တိုဘာမှာ လုပ်လိုက်တဲ့ဟာကို ကြည့်မယ်။ အဲဒီမှာ အားနည်းနေတဲ့ ကလေးတွေ ရှိမယ်။ ကျထားတဲ့ ကလေးတွေရှိမယ်။ နောက်တစ်ခါ ကျွန်တော်တို့နိုင်ငံမှာ မိဘကို ကလေးတွေက ကူရတယ်။ မချမ်းသာဘူးလေ။ တောမှာနေတဲ့ ကလေးက များတယ်။ စပါးစိုက်တဲ့အချိန်၊ တောင်ယာနဲ့ ကျောင်းက ပျက်ကြတယ်။ ကျောင်းခေါ်ချိန်အရလည်း ကြည့်မယ်။ စာမေးပွဲအရလည်း ကြည့်ပြီးတော့ ဒီကလေးတွေကို နိုဝင်ဘာကနေ စပြီးတော့၊ နိုဝင်ဘာ၊ ဒီဇင်ဘာ၊ ဇန်နဝါရီမှာ ဒီကလေးတွေကို ကုစားကို အဲဒီမှာ ကြိုပြီးလုပ်မယ်။ အဓိက ကလေးကို စာတတ်စေချင်တာပဲ။ စာမေးပွဲအမှတ်က သုံးလက အဓိက ဖြစ်နေတယ်။ စာမေးပွဲအမှတ် အဓိကကို လျှော့ချပြီးတော့ ကလေး တကယ်စာတတ်အောင်ဆိုတဲ့ လမ်းကြောင်းဘက်ကို ပြောင်းပြီးတော့ ဒီနှစ် ကုစားမှုက တချို့နိုင်ငံမှာလည်း Support Learning ပေါ့ သူ့ကို ပိုပြီးသင်ပေးလိုက်တာပေါ့။ ဒီမှာလည်း ကုစားဆိုတာကို အလွယ်တကူ ခေါ်လိုက်တာပေါ့။ တချို့ကလည်း ကုစားလည်း မှားလားဆိုတော့ မမှားပါဘူး။ အားနည်းတဲ့ ဘာသာကိုပဲ ကျွန်တော်တို့က လုပ်ပေးမှာကို။ ဥပမာ- မြန်မာစာရနေရင် မြန်မာစာ မလုပ်တော့ဘူး။ အင်္ဂလိပ်စာ အားနည်းရင် အင်္ဂလိပ် စာလုပ်မယ်။ သင်္ချာအားနည်းရင် သင်္ချာလုပ်မယ်။ အဲဒီပုံစံမျိုး နိုဝင်ဘာက စပြီးတော့ ကျွန်တော်တို့က ကြိုပြီးတော့ သွားတော့မှာ။ ပုံမှန်ကတော့ အောက်တိုဘာမှာ စာမေးပွဲ ရှိနေတာပဲလေ။ တချို့ကလည်း Chapter End Test နဲ့ ပေါင်းတာ။ လပတ်စာမေးပွဲနဲ့ ပေါင်းတာ။ တချို့ကလည်း ပေါင်းတယ်။ တချို့ကလည်း သတ်သတ်လုပ်တယ်။ ဒါတော့ သူ့အနေအထားနဲ့ သူ့ဘာသာလုပ်ပါစေ။ ကိစ္စမရှိဘူး။ သို့သော် ပထမတစ်ပိုင်းဖြစ်တဲ့ ကျွန်တော်တို့က အကြမ်းဖျင်းက အောက်တိုဘာတစ်ပိုင်း ထုံးစံအတိုင်းပါပဲ။ ဒီဇင်ဘာတစ်ပိုင်း၊ နောက်ဆုံးတစ်ပိုင်း ဆိုပြီး သုံးပိုင်းရှိတာကိုး။ အဲဒီတော့ ဒီကလေးတွေကို ပထမအကြိမ်လောက် ရှေ့သုံးလစာ သင်ပေးတဲ့ အနေအထားကို ကြည့်ပြီးတော့ အဲဒီမှာ သူသိပ်မလိုက်နိုင်ဘူး ဆိုရင် အဲဒီမှာ အဖြေထွက်နေပြီ။ အဲဒီမှာ ‘ဒီ’ ထဲကို အဆင့်အရ ရောက်နေပြီ။ ဘယ်ဘာသာ ရောက်နေတယ်။ ဒီကလေးတွေကို နိုဝင်ဘာက စပြီးတော့ ဒါတော့ ဘယ်လိုသင်မလဲ ဆိုတော့ သူ့အားနည်းတဲ့ ဘာသာကို သင်မယ်ပေါ့။ ဘယ်အချိန်မှာ သင်မလဲ ဆိုတာကတော့ သူ့ကျောင်းချိန်ကို စောပြီးတော့ ဒီကလေးတွေအရ စောလုပ်တာ၊ နောက်ကျပြီး လုပ်ချင်လုပ်ရမယ်။ စနေ၊ တနင်္ဂနွေ လုပ်ချင်လုပ်မယ်။ ကလေးရဲ့ ကျောင်းပျက်တာတို့၊ အားနည်းတာတို့က သူ့ရဲ့ မအားမှု ကိစ္စပေါ့။ သူ့အချိန် ဘယ်လိုရနိုင်သလဲ ဒါကို သေချာညှိနှိုင်းပြီးတော့မှ ဒါကို တချို့ကလေးက  မနက်အားမယ်။ တချို့ကလေးက ညနေအားမယ်။ တချို့ကလေးက တစ်ပတ်လုံး အားကိုမအားဘူး။ စနေ၊ တနင်္ဂနွေမှ အားမယ်။ ဒါကိုကြည့်ပြီးတော့ ဘယ်လိုပဲဖြစ်ဖြစ် သူ့ကို တတ်သွားအောင်သင်ပေးဖို့ ကိစ္စ။ 

ကုစားလို့ အလွယ်တကူ ခေါ်နေကြပေမယ်လို့ ကျွန်တော် တို့လုပ်ချင်တာကတော့ ကလေးကို အမှန်တကယ် တတ်မြောက်အောင် ဝိုင်းကူတာ။။ သူ့အားနည်းတဲ့ ဘာသာရပ်တိုင်း လုပ်မှာ။ အတန်းတိုင်းကို လုပ်မှာ။ လေးတန်း၊ ရှစ်တန်းကတော့ စံလေးသတ်မှတ်လို့ ရအောင် တစ်နေရာက မေးခွန်းတစ်ခုကို ထုတ်လိုက်တာပဲလေ။ ဒီမို့ဆိုရင် သူ့ဟာသူ တောမှာ တောမေးခွန်းထုတ်ပြီး အောင်နေရင်လည်း မဖြစ်သေးဘူး။ မြို့ကလည်း သူ့မေးခွန်း ထုတ်ပြီးအောင် ကွာဟမှု သိပ်ကြီးသွားမှာစိုးလို့ တစ်နေရာကနေ ချိန်လိုက်တဲ့ သဘောပါပဲ လေးတန်းရော၊ ရှစ်တန်းရောက။ တစ်နေရာကနေ ချိန်ပေးလိုက်တာပါပဲ။ ဒီအဆင့် (Level) ကနေ ဘယ်လောက်ကျော်တယ်။ ဒီအဆင့် (Level) ကနေ မကျော်ဘူး ညီအောင် ညှိပေးလိုက်တာပါပဲ။ 

Voice : လေးတန်းနဲ့ရှစ်တန်း ခရိုင်စစ်နဲ့တိုင်း စစ်ဖြစ်တဲ့အခါ နောက်ဆုံးစာမေးပွဲ ကျတဲ့သူက ပြန်ဖြေခွင့် မရှိတော့ဘူးလား ခင်ဗျ။ 

UATO : ဒါတော့ ကျွန်တော်တို့ မပြောသေးဘူး။ ဒီဟာက Result ကြည့်ဦးမယ်။ အောက်တိုဘာက နောက်ပိုင်းကို စလုပ်တော့ ဒီဇင်ဘာ ကျသွားဦးမှာကိုး။ နောက်တစ်ခါ ဖိုင်နယ်လည်း သွားဦးမှာကိုး။ သုံးခုပေါင်းပြီးမှ အောင်တာကိုး။ ဒီမှာ Result တွေ ကောင်းနေရင် ဒီသုံးခုပေါင်းမှာ မကောင်းစရာအကြောင်း မရှိဘူး။ ပထမအကြိမ်မှာ Result က ကျနေတဲ့ ကလေးတွေကို လုပ်ပေးလိုက်လို့ ဒီကလေးတွေက ဟိုရောက်သွားလို့ အကျက တော်တော်လေးကို နည်းသွားမယ့် အနေအထား ရှိတယ်။ အဲဒါကတော့ Result အပေါ်မှာ ကြည့်ပြီးတော့မှပဲ ပြောနိုင်မယ့် အနေအထား ရှိပါတယ်။ ကြိုတော့လုပ်မှာပါ။         

နေဇာကျော်


ABOUT AUTHOR

(နေဇာကျော်)