News

POST TYPE

POPULAR POST

တောင်သူတစ်ဦးချင်းကို စိုက်ပျိုးစရိတ် ထုတ်ချေးမည်
11-May-2018



ပုသိမ်၊ မေ ၁၀ 

၂၀၁၈ ခုနှစ် မိုးစပါးစိုက်ပျိုးချိန်မှ စတင်ကာ စိုက်ပျိုးစရိတ်ချေးငွေများ ထုတ်ချေးသည့် ဝိုင်းကြီးချုပ်စနစ်ကို ပယ်ဖျက်ပြီး တောင်သူတစ်ဦးချင်းကိုသာ စိုက်ပျိုးစရိတ်ထုတ်ချေးပေးမည်ဖြစ်ကြောင်း ဧရာဝတီတိုင်းဒေသကြီး မြန်မာလယ်ယာ ဖွံ့ဖြိုးတိုးတက်ရေးဘဏ်ခွဲမှ မန်နေဂျာ ဦးသန်းဌေးအောင်က ပြောသည်။ 

စိုက်ပျိုးစရိတ်ချေးငွေများကို ယခင်က ဝိုင်းကြီးချုပ်စနစ်ဖြင့် ဆောင်ရွက်ခဲ့ရာ ကျေးရွာအုပ်စုလိုက် ကြွေးဆပ်မှ တစ်အုပ်စုလုံးကို ပြန်ထုတ်ချေးသည့် ဝိုင်းကြီးချုပ်စနစ်ကို ကျင့်သုံးခဲ့ကြောင်း၊ သို့သော် ချေးငွေမဆပ်နိုင်သည့် တောင်သူအချို့ကြောင့် ချေးငွေဆပ်သော်လည်း ချေးငွေပြန်မရသည့် တောင်သူများ အခက်အခဲဖြစ်မှုကို တင်ပြလာသဖြင့် တစ်ရွာချင်းအလိုက် တာဝန်ခံရသည့် ဝိုင်းကြီးချုပ်စနစ်သို့ ပြောင်းခဲ့ကြောင်း၊ ယင်းနောက် တစ်ရွာချင်းမှ ၁၀ ဦး၊ ၁၀ ဦး မှ ၅ ဦး၊ ၅ ဦးမှ ၃ ဦး ဝိုင်းကြီးချုပ်စနစ်တို့ကို ပြောင်းလဲကာ ချေးငွေထုတ်ချေးခဲ့ကြောင်း၊ ၎င်းက ရှင်းပြသည်။ 

“ဒီနှစ် (၂၀၁၈) မှာတော့ တစ်ဦးချင်းပဲ ချေးမှာဖြစ်တယ်၊ ကြွေးကျေသူရော မကျေသူရော ချေးမှာလား မချေးမှာလားတော့ မညွှန်ကြားသေးဘူး၊ တစ်ယောက်ချင်းချေးရာမှာတော့ အနီးစပ်ဆုံးကတော့ လယ်ယာမြေလုပ်ကိုင်ခွင့် လက်မှတ်ပုံစံ ၇ မူရင်းကို အပေါင်အဖြစ်ထားပြီး ချေးရမှာဖြစ်တယ်”ဟု ၎င်းက ဆိုသည်။ 

ဧရာဝတီတိုင်းဒေသကြီးတွင် လယ်ယာမြေလုပ်ကိုင်ခွင့် မှတ်ပုံတင်ပုံစံ ၇ မိတ္တူဖြင့်လည်းကောင်း၊ နည်းလမ်းအမျိုးမျိုးဖြင့်ရရှိထားသော ပုံစံ ၇ များ ဖြင့် ချေးငွေများချေးယူကာ ကြွေးပတ်လည် ဝိုင်းနေသော တောင်သူများလည်းရှိကြောင်း တောင်သူအရေးတက်ကြွလှုပ်ရှားသူ ဦးသန်းအေးက ပြောသည်။ 

“ဝိုင်းကြီးချုပ်စနစ်မှာ တစ်ဦးတစ်ယောက် ကြွေးမဆပ်တာနဲ့ ကျန်တဲ့ကြွေးဆပ်ပြီး တောင်သူတွေက စိုက်ပျိုးချိန်မှာ ချေးငွေမရသေးဖြစ်နေပြီး အခက်အခဲဖြစ်ရတယ်။ တစ်ဦးချင်းကို စိုက်ပျိုးစရိတ် ထုတ်ချေးတာဆိုတော့ ပိုအဆင်ပြေလာတာပေါ့” ဟု ပုသိမ်မြို့နယ် ပေါက်ကုန်းကျေးရွာမှ တောင်သူ ဦးညွန့်လှိုင်က ဆိုသည်။ 

၂၀၁၇ ခုနှစ် ဘဏ္ဍာနှစ်က ဧရာဝတီတိုင်းဒေသကြီးအတွင်းရှိ ကျေးရွာအုပ်စု ၁၉၅၀ ကျော်မှ တောင်သူသုံးသိန်းနှစ်သောင်းကျော်ကို မိုးစပါးစိုက်ပျိုးစရိတ် ချေးငွေ ကျပ် ၃၂၂ ဒသမ၃၉ ဘီလီယံနှင့် ဆောင်းသီးနှံ ချေးငွေအဖြစ် ကျေးရွာအုပ်စု ၁၅၀၀ ကျော်မှ တောင်သူ နှစ်သိန်းကျော်ကို ကျပ်သန်းပေါင်း ၁၂၅ ဒသမ ၆၀ ထုတ်ချေးပေးခဲ့ကြောင်း ဧရာဝတီတိုင်းဒေသကြီး မြန်မာ့လယ်ယာ ဖွံ့ဖြိုးဘဏ်ထံမှ သိရသည်။ 

ယင်းအပြင် ဧရာဝတီတိုင်းရှိ တောင်သူများက ၂၀၁၂ခုနှစ် မှ ၂၀၁၇ ခုနှစ် ဆောင်းစပါးချေးငွေအထိ ကြွေးကျန်စုစုပေါင်း ၃၆၅ ဘီလီယံကျော် ပေးဆပ်ရန် ကျန်ရှိနေကြောင်း ယင်းဘဏ်ထံမှ သိရသည်။

R-12