News

POST TYPE

POPULAR POST

စားသုံးရန်မသင့်၍ အစားအသောက်ခုနစ်မျိုး ပြန်သိမ်းရန် လုပ်ငန်းရှင်များကို FDA က အကြောင်းကြား
03-May-2018

ရန်ကုန်၊ မေ ၂

ဈေးကွက်အတွင်း ရောင်းချလျက်ရှိသော စားသုံးရန် မသင့်သည့် အစားအသောက် ခုနစ်မျိုးကို ပြန်လည်သိမ်းဆည်းရန် လက်လီရောင်းချသူများနှင့် လုပ်ငန်းရှင်များကို အစားအသောက်နှင့် ဆေးဝါးကွပ်ကဲရေးဦးစီးဌာန (FDA) မှ အကြောင်းကြားထားကြောင်း ယင်းဌာနမှ တာဝန်ရှိသူတစ်ဦးက ပြောကြားသည်။

ယခုနှစ်တွင် FDA မှ ဈေးကွက်အတွင်း ရှောင်တခင်ကွင်းဆင်း၍ အစားအသောက်နမူနာများကို စစ်ဆေးခဲ့ရာ ခွင့်ပြုအစားအသောက် ထပ်ဖြည့်ပစ္စည်း (Sodium Benzoate) ကို ခွင့်ပြုအမြင့်ဆုံးပမာဏထက် ကျော်လွန်နေသော အစားအသောက် ၆ မျိုး၊ (အထက်ပါ အစားအသောက် ၁ မျိုးတွင် ခွင့်မပြု ဓာတုဆိုးဆေး Rodamine-B)နှင့် ခွင့်မပြုဓာတုဆိုးဆေး Orange II ပါဝင်သော အစားအသောက် ၁ မျိုးတို့ဖြစ်ကြောင်း ယင်းဌာနမှသိရသည်။

ဈေးကွက်အတွင်းမှ သိမ်းဆည်းရန် အကြောင်းကြားထားသည့် အမှတ် တံဆိပ်များမှာ Net Weight မပါရှိဘဲ ၂၀၁၈ ဒီဇင်ဘာ ၂၇ တွင် သက်တမ်းကုန်မည့် ရွှေပုံချစ်အမှတ်တံဆိပ် အစေ့လွတ် ဆီးရှယ်-ခြောက်စပ်၊ Net Weight မပါရှိဘဲ ဧပြီလ၊ ၂၀၁၈ တွင် သက်တမ်းကုန်သည့် စံချိန်မီအမှတ်တံဆိပ် ငရုတ်ဆီ၊ Net Weight 60g  ပါ ၂၀၁၈ မေလ ၂၁ တွင် သက်တမ်းကုန်မည့် GU GU အမှတ်တံဆိပ် အောင်ပန်း ဆိတ်သားခြောက်ကြော်၊ Net Weight 100g ပါ ၂၀၁၈ ဇွန်လ ၁၆ ရက်တွင် သက်တမ်းကုန်မည့် Wao အမှတ်တံဆိပ် Preserved Fruit Cherry Red၊ Net Weight 150g ပါ Lot no.12၊ ၂၀၁၉ ခုနှစ် မတ်လတွင် သက်တမ်းကုန်မည့် မေမေ့သမီး အမှတ်တံဆိပ် မရမ်းခြောက်စပ်၊ Net Weight မပါရှိဘဲ ၂၀၁၈ ဧပြီလတွင် သက်တမ်းကုန်သည့် ကျားရုပ်ပုံနှင့် နေလုံးပုံပါ အမှတ်တံဆိပ် မကျည်းငရုတ်ဆီနှင့် Net Weight 500g ပါ သက်တမ်းကုန်မည့် ရက်မပါသော KKK အမှတ်တံဆိပ် ငရုတ်ဆီ စသည်တို့ဖြစ်ကြောင်း FDA ၏ စာရင်းများအရ သိရသည်။

အဆိုပါအစားအသောက်များကို ဈေးကွက်အတွင်း ဆက်လက်ရောင်းချခြင်း မပြုရန်နှင့် ဈေးကွက်အတွင်းမှ အမြန်ဆုံး ပြန်လည်သိမ်းဆည်းရန်၊ ဖြန့်ဖြူးရောင်းချထားမှုစာရင်း၊ ပြန်လည် သိမ်းဆည်းမှုမှတ်တမ်းများကို FDA သို့ ခုနစ်ရက်အတွင်း တင်ပြပေးရန်နှင့် ဈေးကွက်အတွင်း ထပ်မံစစ်ဆေးစဉ် ခွင့်မပြု ဓာတုပစ္စည်းတွေ့ရှိပါက အမျိုးသားအစားအသောက် ဥပဒေအရ ထိရောက်စွာ အရေးယူသွားမည်ဖြစ်ကြောင်း ဖော်ပြထားသည်။

ထို့အတူ ယင်းလုပ်ငန်းများကို အစားအသောက်ထပ်ဖြည့်ပစ္စည်း သုံးစွဲမည်ဆိုပါက ခွင့်ပြုအစားအသောက်ထပ် ဖြည့်ပစ္စည်းများကို ခွင့်ပြုအမြင့်ဆုံး ပမာဏအတွင်းသာ သုံးစွဲရန် ခံဝန်ကတိ ရေးထိုးထားပြီးဖြစ်ကြောင်းနှင့် FDA တွင် အစားအသောက်ထုတ်လုပ်ခြင်း ထောက်ခံချက် လျှောက်ထားရန် ညွှန်ကြားထားပြီးဖြစ်ကြောင်း ယင်းဌာနမှ တာဝန်ရှိသူတစ်ဦးက ဖြည့်စွက်ပြောကြားသည်။



  • VIA