News

POST TYPE

POPULAR POST

ဗိုလ်ချုပ်ကြီး (ငြိမ်း) သူရကျော်ထင်၏ အငယ်ဆုံးသားကို လေတပ်ဦးစီးချုပ်အဖြစ် ခန့်အပ်
03-Jan-2018

ရန်ကုန်၊ ဇန်နဝါရီ ၂

မြန်မာ့ဆိုရှယ်လစ် လမ်းစဉ်ပါတီ အစိုးရလက်ထက်က တပ်မတော်ကာကွယ်ရေး ဦးစီးချုပ် တာဝန်ယူခဲ့သည့် ဗိုလ်ချုပ်ကြီး သူရကျော်ထင်၏သားဖြစ်သူ ဗိုလ်ချုပ်ကြီး မောင်မောင်ကျော်ကို ကာကွယ်ရေးဦးစီးချုပ်(လေ) အဖြစ် ခန့်လိုက်ခြင်းဖြစ်သည်။

ကာကွယ်ရေးဦးစီးချုပ်(လေ) ရာထူးကို အပြောင်းအလဲပြုလုပ်ခဲ့ကြောင်း တပ်မတော်ကာကွယ်ရေး ဦးစီးချုပ်ရုံးက ဇန်နဝါရီလ ၂ ရက်နေ့တွင် သတင်းထုတ်ပြန်၍ ကြေညာခဲ့သည်။

ကာကွယ်ရေးဦးစီးချုပ်(လေ) အဖြစ် တာဝန်ထမ်းဆောင်ခဲ့သော ဗိုလ်ချုပ်ကြီးခင်အောင်မြင့်မှာ သက်ပြည့်အငြိမ်းစားယူသွားသဖြင့် စစ်ဦးစီးအရာရှိချုပ် လေအဖြစ် တာဝန်ထမ်းနေသော လေ-၁၉၂၅ ဗိုလ်ချုပ်မောင်မောင်ကျော်ကို ဗိုလ်ချုပ်ကြီးရာထူးသို့ တိုးမြှင့်၍ ကာကွယ်ရေးဦးစီးချုပ် ခန့်အပ်တာဝန်ပေးခဲ့ကြောင်း တပ်မတော်သမိုင်းမှာ ဗိုလ်ချုပ်ကြီးသားကနေ ဗိုလ်ချုပ်ကြီးဖြစ်တာ ဒါပထမဆုံးပါပဲ၊ ဗိုလ်ချုပ်ရာထူးကနေ Jump Promotion ဗိုလ်ချုပ်ကြီးရာထူးပေးပြီး ခန့်လိုက်တာပါဟု တပ်မတော် ထိပ်တန်းခေါင်းဆောင်များနှင့်နီးစပ်သူ စီးပွားရေးလုပ်ငန်းရှင်တစ်ဦးက ဆိုသည်။

ကာကွယ်ရေးဦးစီးချုပ်(လေ) အဖြစ် ခန့်အပ်ခဲ့သည့် ဗိုလ်ချုပ်ကြီး မောင်မောင်ကျော်သည် ဇန်နဝါရီလ ၂ ရက်နေ့ နံနက်ပိုင်းတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်အတူ နိုင်ငံတော်သမ္မတ ဦးထင်ကျော်ကို ဂါရဝပြုတွေ့ဆုံခဲ့ကြောင်း တပ်မတော်ကာကွယ်ရေး ဦးစီးချုပ်ရုံးက ထုတ်ပြန်ကြေညာခဲ့သည်။

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် လေတပ်ဦးစီးချုပ်အသစ် ဗိုလ်ချုပ်ကြီး မောင်မောင်ကျော်တို့ သမ္မတဦးထင်ကျော်ကို သွားရောက်ဂါရဝပြုသည့် ကိစ္စနှင့် ပတ်သတ်၍ စစ်ဘက်အရပ်ဘက် စောင့်ကြည့်လေ့လာသူများက စိတ်ဝင်စားမှု မြင့်တက်ခဲ့သည်။

အထူးသဖြင့် အရပ်သား အစိုးရလက်ထက်တွင် တပ်မတော်မှ ထိပ်ပိုင်းခေါင်းဆောင်နှစ်ဦးက သမ္မတထံ လာရောက်ဂါရဝပြုမှုသည် ပထမဦးဆုံးအကြိမ်ဖြစ်သည့်အတွက် ထူးခြားမှုရှိသည့် တွေ့ဆုံမှုတစ်ခုဟု လေ့လာသူများက ယူဆနေသည်။

ယင်းသို့ သမ္မတအား တပ်မတော်ခေါင်းဆောင်များက သွားရောက်တွေ့ဆုံသည့်အဖြစ်မှာ ထူးဆန်းသည့် အဖြစ်အပျက်တစ်ခုဖြစ်ပြီး လက်ရှိတပ်ချုပ်၏ သက်တမ်းကုန်ဆုံးခါနီး ကာလဖြစ်ခြင်းနှင့် သက်ဆိုင်မှုရှိနိုင်ကြောင်း နိုင်ငံရေးလေ့လာသူ ဦးရဲထွန်း (သီပေါ) က သုံးသပ်ပြောကြားသည်။

“အရင် ဦးသိန်းစိန်လက်ထက်က ဘယ်သွားသွား တပ်ခေါင်းဆောင်တွေပါတော့ မထူးဆန်းပေမယ့် အခုတွေ့ဆုံမှုက ထူးခြားမှုရှိနိုင်တယ်။ ကာလုံ အစည်းအဝေးကလည်း မခေါ်တာကြာပြီဆိုတော့ သမ္မတနဲ့တပ်မတော်က မတွေ့ဆုံဖြစ်ဘူး။ လက်ရှိ ကာချုပ်ကလည်း သက်တမ်းပြည့်တော့မယ်လို့ ကြားနေတော့ အဲဒီဟာနဲ့များ ဆက်စပ်နေမလားလို့ ထင်ရတယ်”ဟု ၎င်းက ဆိုသည်။

ဗိုလ်ချုပ်ကြီး မောင်မောင်ကျော်မှာ ယခင်အစိုးရလက်ထက် နိုင်ငံခြားရေး ဒုတိယဝန်ကြီး ဦးသန့်ကျော်၏ ညီအငယ်ဆုံးဖြစ်သည်။

ကာကွယ်ရေး ဦးစီးချုပ်(လေ) အသစ် ခန့်အပ်မှုနှင့်အတူ  မန္တလေးအခြေစိုက် အလယ်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ်ဝင်းဗိုလ်ရှိန်ကို တပ်မတော် စစ်ဆေးရေးအရာရှိချုပ်အဖြစ် ပြောင်းလဲတာဝန်ပေးခဲ့ပြီး ကာကွယ်ရေးဦးစီးချုပ်ရုံး(ကြည်း) မှ ဗိုလ်မှူးချုပ်ကျော်စွာလင်းအား အလယ်ပိုင်းတိုင်းစစ်ဌာနချုပ် တိုင်းမှူးအဖြစ် ခန့်အပ်ခဲ့ကြောင်း  တပ်မတော်ကာကွယ်ရေး ဦးစီးချုပ်ရုံးက သတင်းထုတ်ပြန်သည်။                    
                                     
J-08


  • VIA