News

POST TYPE

POPULAR POST

ဒုသမ္မတ၏ တူတော်စပ်သူ အသတ်ခံရပြီး အလောင်းဖျောက်ဖျက်ခံရ
05-Oct-2017 tagged as လူသတ်မှု

ရန်ကုန်၊ အောက်တိုဘာ

သာကေတမြို့နယ်၊ စက်မှုလက်မှု ရပ်ကွက်ရှိ စုပေါင်းရေဆိုးထွက်ပေါက်ဝ ငမိုးရိပ်ချောင်းကမ်းစပ်တွင် အောက်တိုဘာလ ၄ ရက် နံနက်ပိုင်းက တွေ့ရှိခဲ့သော လူသတ် အလောင်းဖျောက် စွန့်ပစ်ခံရသည့် အမျိုးသားမှာ ဒုသမ္မတ ဟင်နရီဗန်ထီးယူ၏ တူတစ်ဝမ်းကွဲဖြစ်ကြောင်း ရဲတပ်ဖွဲ့ထံမှ သိရသည်။

ဦးခေါင်းပေါက်ပြဲ ဒဏ်ရာများဖြင့် ပုပ်ပွသေဆုံးနေသူ (အသက် ၂၅ နှစ်) ကျဲအိုလျန်မန်းမှာ ဒဂုံမြောက်မြို့နယ်၊ ၄၆ ရပ်ကွက် အေးရိပ်သာလမ်းတွင် နေထိုင်သူဖြစ်ပြီး စက်တင်ဘာလ ၂၆ ရက်နေ့က ယင်းမြို့နယ်ရှိ မြို့မရဲစခန်းတွင် လူပျောက်တိုင်ချက် ဖွင့်ထားသူဖြစ်သည်။ 

ဒုသမ္မတ ဟင်နရီဗန်ထီးယူနှင့် ညီအစ်ကို တစ်ဝမ်းကွဲတော်စပ်သူ ဦးဒုလျန်းက ၎င်း၏ သားဖြစ်သူ ကျဲအိုလျန်မန်းမှာ စက်တင်ဘာလ ၂၂ ရက် ည ၈ နာရီက နေအိမ်မှ အပြင် ထွက်သွားခဲ့ပြီးနောက် ပျောက်ဆုံးခဲ့ကြောင်း ပြောသည်။ 

“မိသားစု ညစာအတူစားပြီး သားက အိမ်နေရင်း အဝတ်အစားနဲ့ အိမ်အပြင်ထွက်သွားတာ။ ဖုန်းလည်း မယူသွားတော့ အဆက်အသွယ် လုပ်လို့ မရဘူး။ သူ့ သူငယ်ချင်းတွေနဲ့ ရုံးဆီ လှမ်းမေးတော့လည်း ရောက်မလာဘူးပြောတယ်။ မနေ့က ရဲလာခေါ်မှ ဆေးရုံလိုက်ကြည့်တော့ သေသူက သားဖြစ်နေမှန်း အတည်ပြုပေးနိုင်ခဲ့တယ်”ဟု ဦးဒုလျန်းက ပြောသည်။

အသတ်ခံရသူမှာ မောင်နှမ လေးဦးတွင် အကြီးဆုံးသားဖြစ်ပြီး ဒဂုံမြို့နယ်ရှိ Alpha Hotel Housing ကုမ္ပဏီမှ ဝန်ထမ်းတစ်ဦးဖြစ်ကြောင်း၊ ၎င်းတွင် ရန်ငြှိုးရန်စ မရှိခဲ့ဖူးကြောင်း သေဆုံးသူ၏ မိသားစုထံမှ သိရသည်။

“သားမှာ အွန်လိုင်းပေါ်ကနေ သမီးရည်းစားဖြစ်နေတဲ့ အမျိုးသမီး တစ်ယောက်တော့ ရှိတယ်။ သူတို့ နှစ်ယောက်က အပြင်မှာတော့ တစ်ခါမှ မဆုံဘူးကြဘူး။ အခု ဒီအမျိုးသမီးကို အဆက်အသွယ် လုပ်လို့မရဘူး။ သူ့ကို ရဲတပ်ဖွဲ့က မသင်္ကာလို့ လိုက်စုံစမ်းနေတယ်”ဟု ဦးဒုလျန်းက ဆိုသည်။

ကျဲအိုလျန်မန်းမှာ စက်တင်ဘာလ ၂၁ ရက်က ၎င်း၏ချစ်သူနှင့် ဖုန်းဖြင့် အကြီးအကျယ် စကားများခဲ့ပြီးနောက် စက်တင်ဘာလ ၂၂ ရက် ညပိုင်းတွင် ကျဲအိုလျန်မန်း ရုတ်တရက် ပျောက်ဆုံးခဲ့ကြောင်း သေဆုံးသူ၏ နှမတော်စပ်သူထံမှ သိရသည်။

“အရင်ကဆို အဲအမျိုးသမီးက နေ့တိုင်း အစ်ကို့ဆီ ဖုန်း အကြိမ်ကြိမ် ဆက်တယ်။ အစ်ကို ပျောက်သွားပြီး နောက်ပိုင်း အိမ်မှာကျန်ခဲ့တဲ့ အစ်ကို့ ဖုန်းဆီ သူ တစ်ခါမှ မဆက်တော့ဘူး။ သူ့ဖုန်းကိုလည်း ခေါ်မရတော့ဘူး”ဟု ၎င်းက ဆိုသည်။

အဆိုပါ လူသတ်မှုကို အလောင်း တွေ့ရှိခဲ့သော နယ်မြေအပိုင် သင်္ဃန်းကျွန်း နယ်မြေ ရဲစခန်းတွင် (ပ) ၁၁၀၄/၁၇၊ ရာဇသတ်ကြီးပုဒ်မ ၃၀၂ ဖြင့် အမှုဖွင့် အရေးယူထားပြီး အမှုနှင့်ပတ်သက်၍ ဆက်နွှယ်နေသူများကို ဒဂုံမြောက်မြို့မ ရဲစခန်း၌ ခေါ်စစ်ဆေးလျက် ရှိကြောင်း ရဲတပ်ဖွဲ့ထံမှ သိရသည်။

S-03