News

POST TYPE

POPULAR POST

တူရကီတွင် အာဏာသိမ်းမှု တွန်းလှန်နိုင်ခဲ့ခြင်း တစ်နှစ်ပြည့်၊ အာဏာသိမ်းမှုအား ဖီဆန်ခဲ့ကြသူများကို သမ္မတအာဒိုဂန် ချီးကျူး
17-Jul-2017
အန်ကာရာ၊ ဇူလိုင် ၁၅

တူရကီတွင် အာဏာသိမ်းရန် ကြိုးပမ်းမှုကို တွန်းလှန်နိုင်ခဲ့ခြင်း တစ်နှစ်ပြည့် အထိမ်းအမှတ်အဖြစ် တူရကီသမ္မတ ရီဆက်တာယစ်အာဒိုဂန်က လူထုကို မိန့်ခွန်းပြောကြားခဲ့ရာတွင် လမ်းမပေါ်ထွက်ပြီး အာဏာသိမ်းမှုကို ဖီဆန်ခဲ့ကြသည့် ပြည်သူများ၊ လွှတ်တော်အမတ်များကို ချီးကျူးစကား ဆိုခဲ့ကြောင်း BBC သတင်းဌာနက ဖော်ပြသည်။

ဒီမိုကရေစီနှင့် တရားဝင်အစိုးရကို ကာကွယ်ပေးခဲ့သူများကို ချီးကျူးခဲ့သလို အာဏာသိမ်းရန် ကြံရွယ်သူများကို သေဒဏ်ပေးရေးကို ထောက်ခံကြောင်း၊ ထိုသူများသည် ဂွမ်တာနာမို အကျဉ်းစခန်းပုံစံ ဝတ်စုံများ ဝတ်ဆင်စေသင့်ကြောင်းလည်း သမ္မတက ပြောကြားခဲ့သည်။

ပြီးခဲ့သည့်နှစ် ဇူလိုင်လ ၁၅ ရက်နေ့က စစ်တပ်အတွင်းရှိ အုပ်စုတစ်စု၏ အာဏာသိမ်းရန် ကြိုးပမ်းမှုတွင် လူ ၂၅၀ နီးပါး သေဆုံးခဲ့ပြီး လူ ၂၁၉၆ ဦး ဒဏ်ရာရခဲ့သည်။

အာဏာသိမ်းမှုတွင် စစ်ဘက်ထိပ်တန်းခေါင်းဆောင်များ မပါဝင်ခဲ့သလို နိုင်ငံရေး အသိုင်းအဝိုင်းနှင့် လူထု၏ ထောက်ခံမှု မရှိသောကြောင့် မအောင်မမြင်ဖြစ်ခဲ့ခြင်း ဖြစ်သည်။

အေဂျင်အပန်းဖြေစခန်းတွင် အနားယူနေသော အာဒိုဂန်ကို ထိန်းသိမ်းပြီး အာဏာသိမ်းရန် စီစဉ်ခဲ့ကြသော်လည်း အာဒိုဂန်ကို ဆက်မဖမ်းထားနိုင်ခဲ့သလို သမ္မတကို သစ္စာခံသော အရပ်သားများနှင့် စစ်သားများက ဟန့်တားခဲ့ကြသည်။ 

“အဲဒီညက ပြည်သူတွေဆီမှာ သေနတ်တွေ မရှိပါဘူး။ အလံတစ်လက်ပဲ ရှိတယ်။ ပိုအရေးကြီးတာက သူတို့ရဲ့ ယုံကြည်မှုပဲ” ဟု အာဒိုဂန်က ထောင်နှင့်ချီသော ထောက်ခံသူများကို ပြောကြားခဲ့သည်။

သို့သော်လည်း မအောင်မြင်သော အာဏာသိမ်းမှုကို အကြောင်းပြပြီး အာဒိုဂန်က အတိုက်အခံများ၊ သဘောကွဲလွဲသူများကို ဖိနှိပ်ခဲ့ခြင်းကြောင့် တိုင်းပြည်၏ ညီညွတ်မှုမှာ ဆိုးဆိုးရွားရွား ထိခိုက်ခဲ့ရသည်ဟု ဝေဖန်မှုများ ရှိနေသည်။ 

အာဒိုဂန်အစိုးရသည် အာဏာသိမ်းရန် ကြံစည်မှုတွင် ပတ်သက်သည် ဆိုသော အကြောင်းပြချက်ဖြင့် အစိုးရဝန်ထမ်း တစ်သိန်းခွဲခန့်ကို ရာထူးမှ ထုတ်ပယ်ခဲ့သလို လူ ၅၀၀၀၀ ခန့် ဖမ်းဆီးထိန်းသိမ်းခဲ့သည်။

ဖြုတ်၊ ထုတ်၊ ဖမ်းပွဲကြီးကို တစ်နှစ်ပြည့်ချိန်အထိ ဆက်လက်လုပ်ဆောင်နေဆဲ ဖြစ်ပြီး ဇူလိုင်လ ၁၄ ရက်နေ့ကလည်း အစိုးရဝန်ထမ်း ၇၀၀၀ ကျော် ထပ်မံထုတ်ပယ်ခဲ့သည်။

ပြီးခဲ့သောနှစ်က အာဏာသိမ်းမှုတွင် ပါဝင်သော စစ်သားများကို အရပ်သားများက ထိပ်တိုက်ရင်ဆိုင်ခဲ့သော ဘော့စ်ဖားရပ်စ်တံတားတွင် စုဝေးရောက်ရှိလာသော ထောက်ခံသူများကို အာဒိုဂန်က မိန့်ခွန်းပြောကြားခဲ့ခြင်း ဖြစ်သည်။

ဇူလိုင်လ ၁၅ ရက်နေ့တွင် အဆိုပါ တံတားကို အာဇာနည်တံတားဟု အမည်ပြောင်းလဲခဲ့ပြီး အာဇာနည် အထိမ်းအမှတ်ကိုလည်း ဖွင့်လှစ်ပေးခဲ့သည်။

လွှတ်တော်အဆောက်အအုံကို စစ်လေယာဉ်များက ဗုံးကြဲခဲ့သည့် အချိန်တစ်နှစ်ပြည့်သည့် အချိန်နာရီအတိအကျတွင်လည်း သမ္မတသည် မြို့တော်အန်ကာရာရှိ လွှတ်တော်အဆောက်အအုံတွင် မိန့်ခွန်းထပ်မံပြောကြားခဲ့သည်။

အာဏာသိမ်းမှုကို တွန်းလှန်နိုင်ခဲ့ သည့် ဇူလိုင်လ ၁၅ ရက်နေ့ကို ဒီမိုကရေစီနှင့် အမျိုးသားညီညွတ်ရေးနေ့အဖြစ် သတ်မှတ်ခဲ့ပြီး အများပြည်သူ အားလပ်ရပ်အဖြစ် သတ်မှတ်ခဲ့သည်။

ဝန်ကြီးချုပ် ဘီနာလီယီလ်ဒီရင်မ်ကလည်း ဇူလိုင် ၁၅ သည် ‘လွတ်လပ်ရေး ဒုတိယစစ်ပွဲ’ ဖြစ်သည်ဟု တင်စားခဲ့သည်။

သို့သော်လည်း အဓိက အတိုက်အခံ ရီပတ်ဘလစ်ကန် ပြည်သူ့ပါတီခေါင်းဆောင် ကမဲလ်ကီလစ်ဒါရိုဂလူကမူ “ ဗုံးဒဏ်ကို ကြံ့ကြံ့ခံနိုင်ခဲ့တဲ့ ပါလီမန်ဟာ အခုတော့ အသုံးမဝင် ဖြစ်ခဲ့ရပြီး လုပ်ပိုင်ခွင့် အာဏာတွေပါ ဖယ်ရှားခံခဲ့ရပါတယ်။ ပြီးခဲ့တဲ့နှစ်မှာ တရားမျှတမှုဟာ ဖျက်ဆီးခံခဲ့ရပါတယ်။ မြန်မြန်ဆန်ဆန် ပုံမှန်ပြန်ဖြစ်အောင် လုပ်မဲ့အစား အမြဲတမ်း အရေးပေါ်အခြေအနေ ကြေညာမှုကို အကောင်အထည်ဖော်ခဲ့ပါတယ်” ဟု ဝေဖန်ခဲ့သည်။

အာဏာသိမ်းရန် ကြံစည်မှု နောက်ကွယ်တွင် အမေရိကန်နိုင်ငံ၌ ခိုလှုံနေသူ  မွတ်ဆလင် တရားဟောဆရာ ဖာသူလာဂူလန် ရှိနေသည်ဟု အစိုးရက စွပ်စွဲထားပြီး လွှဲပြောင်းပေးရန် အမေရိကန်ကို တောင်းဆိုထားသည်။ အမေရိကန်ဘက်ကမူ အထောက်အထားများ ဦးစွာတင်ပြရန် တုံ့ပြန်တောင်းဆိုထားသည်။

အာဏာသိမ်းမှုကို တွန်းလှန်ခဲ့ရာတွင် တစ်တိုင်းပြည်လုံး ညီညွတ်ခဲ့ကြသော်လည်း ဖြစ်စဉ်အလွန်တွင် ယင်းကိုအကြောင်းပြပြီး အာဒိုဂန်က လုပ်ပိုင်ခွင့်အာဏာ တိုးချဲ့လာခြင်း၊ မလိုလားသူများကို အုံနှင့်ကျင်းနှင့် ဖယ်ရှားခြင်းများ ရှိခဲ့သည်။ ပြီးခဲ့သည့်အပတ်က အစိုးရ၏ အာဏာရှင်ဆန်သော လုပ်ရပ်များကို ကန့်ကွက်သည့်အနေနှင့် သိန်းဂဏန်းခန့်ရှိသော လူအုပ်ကြီးသည် အစ္စတန်ဘူလ်တွင် စုဝေးချီတက်ဆန္ဒပြခဲ့ကြသည်။ အာဒိုဂန်ကမူ ထိုသူများသည် အကြမ်းဖက်ဝါဒကို အားပေးသူများသာ ဖြစ်သည်ဟု စွပ်စွဲခဲ့သည်။         

F-03