POST TYPE

POLITICAL

ရန်ကုန်စစ်တိုင်းမှူးကို နေပြည်တော်ပြောင်း
09-May-2017 tagged as

ရန်ကုန်၊ မေ ၉

ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ်မျိုးဇော်သိန်းကို ဒုတိယဗိုလ်ချုပ်ကြီးအဖြစ် ရာထူးတိုးမြှင့်ကာ နေပြည်တော်သို့ ပြောင်းရွှေ့လိုက်ကြောင်း တပ်မတော် အသိုင်းအဝိုင်းထံမှ စုံစမ်း သိရှိရသည်။ 

ဗိုလ်ချုပ် မျိုးဇော်သိန်းသည် ရန်ကုန် တိုင်းမှူးအဖြစ်မှ စစ်ဆင်ရေး အထူးအဖွဲ့မှူးအဖြစ် ပြောင်းရွှေ့ တာဝန်ထမ်းဆောင်ရမည်ဖြစ်ကာ ရာထူးပါ တစ်ပါတည်း တိုးမြှင့် ရရှိခြင်းဖြစ်သည်။

နေပြည်တော်သို့ ပြောင်းရွှေ့ရမည့် ဗိုလ်ချုပ် မျိုးဇော်သိန်းသည် အမှတ် (၅) စစ်ဆင်ရေး အထူးအဖွဲ့မှူး (ကစထ-၅) အဖြစ် တာဝန် ထမ်းဆောင်ရမည်ဖြစ်ပြီး ကာကွယ်ရေး ဦးစီးချုပ်ရုံး (ကြည်း)မှ  ဒုတိယ ဗိုလ်ချုပ်ကြီး မိုးမြင့်ထွန်းပြီးလျှင် အသက် အငယ်ဆုံး ဒုတိယ ဗိုလ်ချုပ်ကြီး ဖြစ်လာနိုင်ကြောင်း တပ်မတော် အသိုင်းအဝိုင်းမှ စုံစမ်း သိရှိရသည်။

စစ်တက္ကသိုလ် အပတ်စဉ် (၂၈) ကျောင်းဆင်းတစ်ဦးဖြစ်သော ဗိုလ်ချုပ် မျိုးဇော်သိန်းသည် ၂၀၁၅ ခုနှစ်က ရန်ကုန် တိုင်းမှူး ဗိုလ်ချုပ်ထွန်းထွန်းနောင် နေပြည်တော်သို့ စစ်ဆင်ရေး အထူးအဖွဲ့မှူးအဖြစ် ပြောင်းရွှေ့စဉ် ရန်ကုန်တိုင်းမှူး ဖြစ်လာသူ ဖြစ်သည်။ 

ရန်ကုန်တိုင်းမှူး မဖြစ်မီ တပ်မတော် ဆေးတက္ကသိုလ် ကျောင်းအုပ်ကြီး တာဝန်ကို ဗိုလ်မှူးချုပ်ရာထူးဖြင့် ထမ်းဆောင်ခဲ့သည်။ ယင်းနောက် ရန်ကုန်တိုင်းမှူး ဖြစ်လာပြီး ဗိုလ်ချုပ်အဆင့်သို့ ရာထူးတိုးမြှင့်ရရှိကာ ယခုအချိန် ၂ နှစ်ခန့်အတွင်း တစ်ဆင့်မြင့် ရာထူးတာဝန်များကို ထပ်မံ ပြောင်းရွှေ့ရခြင်းဖြစ်သည်။

လက်ရှိ အနောက်မြောက်တိုင်းစစ် ဌာနချုပ်တိုင်းမှူး ဗိုလ်မှူးချုပ် သက်ပုံက ရန်ကုန်တိုင်းမှူးနေရာသို့ ပြောင်းရွှေ့ တာဝန် ထမ်းဆောင်ရမည်ဖြစ်ကြောင်း တပ်မတော် သတင်းရင်းမြစ်များထံမှ ထပ်မံ သိရှိရသည်။ ဗိုလ်မှူးချုပ် သက်ပုံမှာ စစ်တက္ကသိုလ် အပတ်စဉ် (၂၉) ကျောင်းဆင်းဖြစ်ပြီး ၂၀၁၀ ပြည့်နှစ် ဝန်းကျင် KIA နှင့် တိုက်ပွဲများ ဖြစ်ပွားချိန်က ထိုစဉ်က မြောက်ပိုင်း တိုင်းစစ်ဌာနချုပ် တိုင်းမှူးဖြစ်သူ လက်ရှိ ဒုတိယတပ်မတော် ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီးစိုးဝင်း၏ လက်အောက်တွင် တာဝန် ထမ်းဆောင်ခဲ့ဖူးသည်။ 

ဗိုလ်ချုပ်မျိုးဇော်သိန်းသည် အမျိုးသား ဒီမိုကရေစီ အဖွဲ့ချုပ် (NLD) ပါတီ ဥပဒေအကြံပေး ဦးကိုနီ လုပ်ကြံ သတ်ဖြတ်ခံရချိန်က ဦးကိုနီနှင့် အငှားယာဉ်မောင်း ဦးနေဝင်းတို့၏ နာရေးကို လိုက်ပါ ပို့ဆောင်ခဲ့ပြီး သေဆုံးသူများ၏ နေအိမ်သို့လည်း သွားရောက် အားပေးခဲ့သူဖြစ်သည်။

W-01

  • TAGS