News

POST TYPE

POLITICAL

ရှစ်လေးလုံးကို အားနာစိတ်ထားပါ (Daily, Vol-6/No-101)
06-Aug-2018

အားလုံးသိကြသည့်အတိုင်း ရှစ်လေးလုံး အရေးတော်ပုံကြီးသည် မြန်မာ့သမိုင်းတွင် အကြီးကျယ်ဆုံး လူထုအုံကြွ ဆန္ဒပြမှုကြီးဖြစ်သည့်အပြင် အတုယူစရာ၊ သင်ခန်းစာယူစရာ၊ သတိထားဆင်ခြင်စရာ၊ နောင်တရစရာ၊ စက်ဆုပ်ရွံ ရှာဖွယ်ရာ၊ ထိတ်လန့်အံ့ဩဖွယ်ရာ အဖြစ်အပျက် များစွာရှိခဲ့သည်။

ပဒေသရာဇ်ခေတ်မှ ယနေ့ကာလထိတိုင် မြန်မာ့သမိုင်းကိုပြန်ကြည့်လျှင် မြန်မာတို့ အချင်းချင်းအကြား သွေးစည်းညီညွတ်ချိန် များစွာရှားပါးခဲ့ပြီး အချင်းချင်း သွေးကွဲကာ အပြန်အလှန် တိုက်ခိုက်နေခြင်းဖြင့် အချိန်ကုန်နေခဲ့သည်က များသည်။

လူထုတစ်ရပ်လုံးနီးပါး ပါဝင်သော သွေးစည်းညီညွှတ်မှုကိုပြပါဆိုလျှင် ၁၃၀ဝပြည့်အရေးတော်ပုံ၊ ဗိုလ်ချုပ်အောင်ဆန်းခေါင်းဆောင်သော ဖက်ဆစ်ဂျပန်တော်လှန်ရေးနှင့် ရှစ်လေးလုံးအရေးတော်ပုံတို့သာ ထင်ထင်ရှားရှားပြနိုင်သည်။

ဗြိတိသျှထံမှ လွတ်လပ်ရေးအတွက် တောင်းဆိုတိုက်ပွဲဝင်ရာတွင်ပင် နိုင်ငံရေးခေါင်းဆောင်များအတွင်း ၉၁ ဌာနအုပ်ချုပ်ရေးလက်ခံလိုသူ၊ ဒိုင်အာခီ အုပ်ချုပ်ရေးလိုလားသူ၊ လုံးဝလွတ်လပ်ရေးရလိုသူစသဖြင့် ကွဲပြားသော အယူအဆများဖြင့် အချင်းချင်း စည်းလုံးညီညွှတ်မှု မရှိခဲ့ပေ။

ရှစ်လေးလုံး လူထုအုံကြွမှုကြီး အနှစ်သုံးဆယ်ပြည့်မြောက်သော ယနေ့အချိန်အခါတွင် ထိုစဉ်က ဒီမိုကရေစီတောင်းဆို၊ ဆန္ဒပြမှုများ၊ တော်လှန်ရေးလုပ်ငန်းများအတွင်း ပစ်ခတ်၊ ဖမ်းဆီး၊ ထောင်သွင်းအကျဉ်းချ၊ နှိပ်စက်ခြင်းတို့ကြောင့် အသက်စွန့်လွှတ်သွားခဲ့သူတို့ ပေးဆပ်မှုနှင့်ထိုက်တန်သော အောင်မြင်မှု မည်မျှရရှိနေပြီနည်း သို့မဟုတ် ကျန်ရှိနေခဲ့သူများက မည်မျှတာဝန်ကျေကြသနည်းဟု မေးစရာရှိပေသည်။

ယနေ့အချိန်တွင် ရှစ်လေးလုံးကာလက သေအတူရှင်မကွာ အတူတကွ တိုက်ပွဲဝင်ခဲ့သူ အချင်းချင်းအကြားတွင်ပင် စည်းလုံးညီညွှတ်မှု မည်မျှရှိသနည်း၊ ရှစ်လေးလုံးကာလနောက်ပိုင်း စစ်အာဏာရှင်တို့၏ အဖိအနှိပ်၊ အကွပ်အညှပ် အောက်တွင် ရုန်းကန်လှုပ်ရှားလာခဲ့သူ အချင်းချင်းအကြား မည်မျှနားလည်မှု ရှိသနည်း၊ ရှစ်လေးလုံးတွင် ပါဝင်ခဲ့သောကြောင့်၊ မတရားသော ရွေးကောက်ပွဲဖြင့် အာဏာရခဲ့သောပါတီကို အတိုက်အခံပြုခဲ့သောကြောင့် စစ်အာဏာရှင်တို့၏ အပြစ်ရှာ၊ ထောင်ချောက်ဆင်၊ ဖမ်းဆီး၊ နှိပ်ကွပ်ခဲ့သည်များကို ယနေ့ မိမိတို့ကိုယ်တိုင် အာဏာရလာချိန်တွင် မည်သို့ပြန်လည်စဉ်းစား သုံးသပ်နေပါသနည်းဆိုသော မေးခွန်းများလည်း ထွက်ပေါ်လာသည်။

ထိုမေးခွန်းများသည် အာဏာကို အလွဲသုံးစားပြုခဲ့သူများဖြေဆိုရန် ခက်ခဲမည့်အပြင် ဒီမိုကရေစီခေါင်းစဉ်အောက်တွင် ကိုယ်တိုင် စွန့်လွှတ် အနစ်နာခံခဲ့သူအချို့အတွက်လည်း များစွာ ခက်ခဲနေပေမည်။ အကြောင်းမှာ အာဏာသည် အရာရာကို ပြောင်းလဲသွားနိုင်သောကြောင့်ဖြစ်သည်။

သို့သော် ရှစ်လေးလုံး အရေးတော်ပုံကြီးသည် ရှေ့တန်းမှ ဦးဆောင်လှုပ်ရှားခဲ့သော ၈၈ မျိုးဆက် ကျောင်းသားများ အပါအဝင် ထိုစဉ်က မိမိတို့ကျရာ နေရာမှ  တက်ညီလက်ညီ ပါဝင်ခဲ့သူ နိုင်ငံသားအားလုံးနှင့်သက်ဆိုင်ပြီး ယနေ့ မြင်တွေ့နေရသော အပြောင်းအလဲများသည်လည်း ထိုသို့ ပါဝင်ခဲ့သူအားလုံး ကြိုးစား အားထုတ်၊ စွန့်လွှတ်၊ အနစ်နာခံ၊ တိုက်ပွဲဝင်ခဲ့ကြခြင်း၏ အကျိုးရလဒ်ဖြစ်သည်။

သို့ဆိုလျှင် ပန်းတိုင်ဖြစ်သော ဒီမိုကရေစီလူ့ဘောင် သို့မဟုတ် နိုင်ငံသားတိုင်း ကြောင့်ကြ ပူပန်မှုကင်းစွာ တန်းတူရည်တူ ပညာသင်ခွင့်၊ မိမိတို့ကိုယ်စွမ်း ဉာဏ်စွမ်းရှိသမျှ မျှတစွာ စီးပွားရှာခွင့်၊ ကြီးပွားတိုးတက်ခွင့်၊ နိုင်ငံရေးတွင် ပါဝင်လှုပ်ရှားခွင့်၊ မိမိတို့ အခွင့်အရေးနှင့် လွတ်လပ်ခွင့်ကို တရားမျှတစွာ တောင်းဆိုခွင့်၊ မိမိတို့ တိုက်ရိုက်၊ သွယ်ဝိုက်သော နည်းလမ်းများဖြင့် ရွေးချယ်တင်မြှောက်ထားသော အာဏာသုံးရပ်ကို ဝေဖန်၊ ထောက်ပြ၊ အကြံပြုခွင့်၊ အာဏာသုံးရပ်က ဆောင်ရွက်လုပ်ကိုင်သည်များအနက် မိမိတို့ မရှင်းလင်း၊ မသဲကွဲ၊ နားမလည်သည်များကို လွတ်လပ်စွာ စောကြော၊ မေးမြန်းခွင့် စသဖြင့် လွတ်လပ်ပွင့်လင်းသော၊ ယဉ်ကျေးသော လူ့အဖွဲ့အစည်းတစ်ရပ်၏ ကြန်အင်လက္ခဏာများနှင့်ညီညွှတ်သော ဥပဒေများ၊ လွတ်လပ်သော တရားစီရင်ရေးစနစ်များ အဘယ်မျှ ရရှိနေပြီနည်းဟု မေးစရာရှိသည်။

ကျယ်ပြန့်သော အာဏာနိုင်ငံရေးနယ်ပယ်၊ စီးပွားရေးနယ်ပယ်၊ ပညာရေးလောက မဆိုထားနှင့် မိမိတို့ နိုင်ငံရေးပါတီတစ်ခုအတွင်း၊ အသင်းအဖွဲ့တစ်ခုအတွင်းတွင်ပင် ရှစ်လေးလုံး အရေးတော်ပုံကြီးက အဓိကတောင်းဆိုခဲ့သော ဒီမိုကရေစီစနစ်၏ ရေခံမြေခံ အချက်အလက်များနှင့် မညီသေးဘဲ ယခင် အာဏာရှင်စနစ်များနှင့် သံတူကြောင်းကွဲ ဖြစ်နေခြင်းကို ရှစ်လေးလုံးအရေးတော်ပုံတွင် စွန့်လွှတ်အနစ်နာခံခဲ့သူများကို အားနာစိတ်ဖြင့် ပြုပြင်ကြစေလိုကြောင်း တိုက်တွန်းအကြံပြုအပ်ပေသည်။

အယ်ဒီတာ (၆-၈-၂၀၁၈)