News

POST TYPE

POLITICAL

NCA ကို လက်နက်ကိုင် အဖွဲ့အစည်းတိုင်း လက်မှတ်ထိုးရမည်ဟု တပ်ချုပ်ပြောကြား
11-Jul-2018
နေပြည်တော်၊ ဇူလိုင် ၁၁

တစ်နိုင်ငံလုံး အပစ်အခတ် ရပ်စဲရေးစာချုပ် (NCA) ကို တိုင်းရင်းသား လက်နက်ကိုင် အဖွဲ့အစည်းများ အားလုံး လက်မှတ်ရေးထိုးရမည်ဖြစ်ကြောင်း တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်သည်။

“NCA ကို တိုင်းရင်းသားလက်နက်ကိုင် အဖွဲ့အစည်းတိုင်းက လက်မှတ်ရေးထိုးရမှာ ဖြစ်ပါတယ်။ ပစ်ခတ်တိုက်ခိုက်မှုတွေမရှိလို့ လက်မှတ်ထိုးစရာ မလိုဘူးလို့ ပြောဆိုနေတာတွေ၊ ယခင် သဘောတူညီချက်တွေရှိပြီး ဖြစ်တယ်လို့ ဆိုနေတာတွေဟာ လျှောက်လှမ်းနေတဲ့ ဒီမိုကရေစီကျင့်ဝတ်တွေနဲ့ ညီညွတ်မှုမရှိဘူးလို့ ပြောလိုပါတယ်”ဟုဆိုသည်။

နေပြည်တော်ရှိ MICC-2  ၌ ဇူလိုင်လ ၁၁ ရက်နေ့တွင် ကျင်းပသော ပြည်ထောင်စုငြိမ်းချမ်းရေး ညီလာခံ ၂၁ ရာစုပင်လုံ တတိယ အစည်းအဝေးတွင် အဖွင့်အမှာစကား ပြောကြားရာ၌ ဗိုလ်ချုပ်မှူးကြီးက အထက်ပါအတိုင်း ပြောကြားခဲ့ခြင်းဖြစ်သည်။

လက်နက်ကိုင်များအနေနှင့် မိမိတို့၏ တပ်ဖွဲ့ဝင်များကို နိုင်နင်းစွာ ထိန်းကျောင်းပြီး အဓိပ္ပာယ် ကင်းမဲ့သည့် အကြောင်းပြချက် မပေးစေလိုကြောင်း၊ ငြိမ်းချမ်းရေး လုပ်ငန်းစဉ် ဆောင်ရွက်ရာတွင် ငြိမ်းချမ်းရေးထက် အရေးကြီးသည့်ကိစ္စ ဘာမျှမရှိသောကြောင့် ယနေ့ကာလတွင် နားလည်မှုလွဲမှားစေနိုင်သော ကိစ္စများကို ရှေ့တန်းတင်ခြင်း၊ ငြိမ်းချမ်းရေးလုပ်ငန်းစဉ်နှင့် မသက်ဆိုင်သော ကိစ္စများကို ဆွဲသွင်းလာခြင်းတို့မလုပ်ရန် အရေးကြီးကြောင်း တပ်ချုပ်ကဆိုသည်။

“ငြိမ်းချမ်းရေး လုပ်ငန်းတွေကို နိုင်ငံတော်အစိုးရနဲ့ တပ်မတော်က တက်ကြွစွာ ဦးဆောင်ဆောင်ရွက်နေခြင်းဟာ ကျွန်တော်တို့မှာ အင်အားချည့်နဲ့နေလို့ မဟုတ်ဘူးဆိုတာ သတိချပ်စေလိုပါတယ်။ အမှန်တကယ် ငြိမ်းချမ်းရေးလိုချင်တဲ့ အဖွဲ့အစည်းမှန်သမျှ သဘောတူညီချက်တွေကိုသာ လိုက်နာရင် ဘာသေနတ်သံမှ ကြားရမှာမဟုတ်ပါဘူး”ဟု ၎င်းကပြောသည်။

အချို့သောဒေသရှိ တိုင်းရင်းသား လက်နက်ကိုင်များသည်လည်းကောင်း၊ နိုင်ငံရေးပါတီများသည်လည်းကောင်း ၅၂ သန်းသော ပြည်သူကို ကိုယ်စားပြုခြင်း မဟုတ်ဘဲ ၎င်းတို့ကို ထောက်ခံသူများကိုသာ ကိုယ်စားပြုခြင်းဖြစ်ပြီး တပ်မတော်သည်သာ ပြည်သူအားလုံးကြားမှ ပေါက်ဖွားလာခြင်းဖြစ်ပြီး အားလုံးသော ပြည်သူကို ကိုယ်စားပြုထားခြင်းဖြစ်ကြောင်း ၎င်းက ရှင်းလင်းပြောကြားသည်။

ယင်းအပြင် ၂၀၂၀ ပြည့်နှစ်တွင် ကျင်းပမည့် ညီလာခံတွင် ငြိမ်းချမ်းရေး လုပ်ငန်းစဉ်များ ပြီးပြတ်အောင် ဆောင်ရွက်သွားရန် တိုက်တွန်းလိုကြောင်း တပ်မတော် ကာကွယ်ရေး ဦးစီးချုပ်က ထပ်လောင်းဆိုသည်။

ယင်းအခမ်းအနားသို့ တက်ရောက်လာသည့် နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နိုင်ငံရေးဆွေးနွေးပွဲ ကြန့်ကြာမှု၊ နှောင့်နှေးမှုတို့ကြောင့် နိုင်ငံ၏ အခွင့်အလမ်းများ ဖြုန်းတီးရာ ရောက်ရှိသွားမည်ကို စိုးရိမ်မိသောကြောင့် အထူး အလေးအနက်ထား ထောက်ပြလိုပြီး နိုင်ငံရေးဆွေးနွေးမှုဆိုင်ရာ မူဘောင်ကို လိုအပ်ပါက အစုအဖွဲ့အားလုံး၏ သဘောတူညီချက်ဖြင့် ပြန်လည် သုံးသပ်ပြင်ဆင်မှုများ ဆောင်ရွက်သွားရမည်ဖြစ်ကြောင်း ပြောကြားသည်။

“သေနတ်တစ်ချက် တာနဲ့ ရရှိထားသော အပစ်ရပ် သဘောတူညီချက်တွေ ပျက်ပြယ်သွားပြီးတော့ လက်နက်ကိုင် ပဋိပက္ခ သံသရာမှာ ပြန်ပြီး လည်ခဲ့ရတာ အားလုံး အသိပဲဖြစ်ပါတယ်”ဟု ၎င်းကပြောသည်။

ငြိမ်းချမ်းရေး လုပ်ငန်းစဉ်များတွင် တစ်နိုင်ငံလုံး အပစ်အခတ်ရပ်စဲရေးစာချုပ် (NCA) ၌ လက်မှတ်မထိုးထားသော တိုင်းရင်းသား လက်နက်ကိုင်များ ပါဝင်လာရေးအတွက် ပိုမို၍ဆောင်ရွက်ရန်လိုအပ်ကြောင်း ကရင်အမျိုးသား အစည်းအရုံး (KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုးကလည်း အမှာစကားတွင် ထည့်သွင်းပြောကြားသည်။

ယခုညီလာခံဖွင့်ပွဲသို့ ကိုယ်စားလှယ်က ၇၅၀ ဦး၊ လေ့လာသူက ၁၇၀ ဦး၊ လက်မှတ်မထိုးထားသောအဖွဲ့ ရှစ်ဖွဲ့က အဖွဲ့ဝင်များ၊ နိုင်ငံတကာ ဧည့်သည်များ အပါအဝင် တက်ရောက်သူ ၁၁၀၀ ဦးခန့်ရှိသည်။

S-01